Nos ta sigui roga Yehova pa yuda nos rumannan na Mariupol. Ainda tin bringamentu riba kaya i bombardeo einan. Ta ku masha tristesa, nos tin ku informá ku seis di nos rumannan a muri den e bombardeonan. Te aworakí, dies di nos rumannan a muri na Ukrania. Ademas, manera nos por a mira den notisia, un teatro a ser bombardiá siman pasá. Tabatin 1.000 hende ku tabata buska refugio den e teatro ei. Niun di nos rumannan no a muri, pero algun di nan a ser heridá levemente.

Mas o ménos 750 di nos rumannan a bandoná Mariupol; un 1.600 di nos rumannan a keda den e stat. Hopi di nan ta biba na Mariupol mes, den parti ost. E parti ei ta bou di kontrol di Rusia.

Manera nos a bisa den un otro informe, un 200 di nos rumannan a buska refugio den bodega di un lugá kaminda tin un Salòn di Reino i un Salòn di Asamblea. Nos a logra komuniká ku nan. Nan a bisa:

“Durante e bombardeo hopi di nos rumannan tabatin hopi miedu. Algun di nan tabata asta yora. Ora nos tabata tende e eksploshonnan, nos a pensa ku sigur nos lo a muri di sea e eksploshonnan òf di kandela. Un ansiano a sugerí pa nos kanta kantika di nos buki di kantika. Promé, nos a kanta kantika 10 i despues kantika 15. Ora e zonido di e eksploshonnan tabata bira mas i mas duru i e edifisio tabata sagudí mas fuerte, nos tabata kanta mas duru. Despues, nos a lesa Salmo 27 i nos a trat’é huntu. Kaba, tur hende a kuminsá bisa kiko ta nan teksto faborito i kon e teksto ta animá nan. . . . Loke nos ta pasando aden ta konvensé nos ku Yehova ta ‘e Tata di tierno miserikòrdia i Dios di tur konsuelo,’ kende por laga nos sinti kalmu ora nos ta pasa den tempu difísil.”—2 Korintionan 1:3, 4.

Vários ansiano i miembro di Komité di Ousilio ta hasi tur loke nan por, asta riska nan bida, pa yega serka e rumannan pa duna nan kuminda i remedi. Tin biaha, ora e rumannan ei ta buskando nos rumannan den stat, nan tin ku gatia riba suela pa bala no alkansá nan. Nos ta masha orguyoso di nos rumannan, kendenan ta “riska nan bida” pa nan rumannan.—Romanonan 16:4.

No tin gas ni koriente mas na e stat. P’esei, nos ruman muhénan ta kushiná pafó. Nan mester tin hopi kurashi pa hasi esei, pasobra ta masha peligroso. Ora e kuminda ta kla, e rumannan ta sòru pa e publikadónan di edat i esnan desabilitá haña algu di kome. Hopi ruman a pèrdè nan kas, outo òf otro kos material. Apesar di esei, nan ta masha gradisidu pa tur loke nan rumannan ta hasi pa nan.

E rumannan ku ta den lugá di refugio ta sigui hasi kos spiritual huntu. Nan ta studia Beibel huntu, i ora nan haña oportunidat, nan ta prediká na otro hende.

E siguiente sifranan ta for di un informe ku nos a haña di Ukrania te ku 22 di mart 2022. E sifranan akí ta basá riba informe verídiko di nos rumannan na Ukrania. Sinembargo, posiblemente, e sifranan ta hopi mas haltu. Nos no tin sigur ku tur sifra ta kuadra, pasobra ta difísil pa mantené kontakto ku nos rumannan na tur parti di Ukrania.

• 10 publikadó a muri

• 27 publikadó a ser heridá

• 33.180 publikadó a bandoná nan kas pa bai otro lugá di e pais ku ta mas safe

• 78 kas a ser destruí

• 102 kas tin daño grandi

• 484 kas tin daño leve

• 1 Salòn di Reino ta kompletamente destruí

• 4 Salòn di Reino tin daño grandi

• 18 Salòn di Reino tin daño leve

• Tin 27 Komité di Ousilio na Ukrania

• E komiténan a yuda 25.069 publikadó haña otro lugá mas safe pa keda

• 14.308 publikadó a hui pa otro pais. Einan, nos rumannan ta yudando e publikadónan ei