Kasi 47.000 Testigu di Yehova mester a bandoná nan kas pa motibu di e guera na Ukrania. Hopi di nan a bai otro parti di e pais ku ta mas safe. Einan, nan rumannan ta yuda nan. Nan rumannan ta duna nan paña, kuminda, lugá pa keda i otro kos ku nan tin mester. E rumannan ku ta yuda mes tin e difísil finansieramente. Apesar di esei, nan ta kla pa yuda nan rumannan ku ta den nesesidat.

Olha ta un ruman ku ta biba na e stat Uman, na Ukrania. Durante e promé dos lunanan di e guera, Olha i su esposo, kende no ta Testigu, a laga 300 publikadó keda na nan kas. Hopi di e rumannan ei a keda djis un anochi so. Hopi biaha, e rumannan tabata yega serka Olha mardugá. Anto, hopi biaha, nan tabata avisá Olha djis un ratu promé ku nan a presentá na su porta ku nan tabata biniendo. Un biaha, Olha a laga 22 ruman pareu keda na su kas. Olha tin un yu hòmber ku yama Stanislav. E tin 18 aña di edat. Ora e rumannan tabata bin keda na kas, Stanislav tambe tabata haña un oportunidat pa mustra generosidat. Hopi bes, e tabata drumi riba flur pa laga e rumannan drumi den su kamber.

Olha a konta: “Mi ta masha kontentu ku mi por yuda Yehova su pueblo den e momentonan teribel akí. Esei ta hasi mi masha felis.”

Andriy ku su esposa, Liudmyla, a laga hopi ruman keda na nan kas den transkurso di 5 siman. Na tur, 200 Testigu a keda serka nan. Riba un anochi, 18 hende a keda na nan kas. Andriy a bisa: “Nos a sigui e konseho di Sukursal pa nos tin poko kuminda èkstra wardá. Pa e promé siman i mei, nos a usa e kuminda ei pa yuda e rumannan ku a keda serka nos. E rumannan ei tabata laga karchi ku sèn aden atras, i nos tabata usa e sèn ei pa kumpra kuminda pa e rumannan ku tabata bini despues. Komité di Ousilio tambe tabata duna nos kuminda. Pues, nunka nos no tabatin falta di nada.”

Na mart, un ruman ku yama Vita i ku ta biba na e stat Ivano-Frankivsk a sali for di su apartamento i bai biba ku su ruman muhé. El a hasi esei pa e rumannan por a keda na su apartamento. Vita a bisa: “Pa ami, loke mi ta hasi no ta un sakrifisio pero un manera pa mi mustra amor na mi rumannan. Mi ta masha kontentu ku mi por yuda mi rumannan. Nos ta un famia uní.”

Natalia ku su esposo i yu muhé ta biba na Ternopil. Nan tur a pèrdè trabou ora e guera a kuminsá, i nan a usa mayoria di e sèn ku nan tabatin di spar pa kubri nan gastunan. Apesar di esei, nan tabata dispuesto pa laga un ruman muhé i su yu muhé ku limitashon físiko keda na nan kas.

Natalia a konta: “Mi ta kòrda un eksperensia di un ruman muhé na Afrika. E no tabatin muchu sèn, tòg el a laga 14 ruman keda na su kas pa un kongreso. I niun di nan no tabatin falta di nada.” El a bisa ku e eksperensia ei a motiv’é pa pone nesesidat di otro ruman promé.

Nos rumannan na Ukrania ta pasando den hopi situashon difísil. Apesar di esei, nan ta sigui konfia den Yehova, i nan ta sigui mustra hospitalidat.—Romanonan 12:13.