YUDANSA PA FAMIA
Ora Surgi Diferensia di Opinion
Pareha kasá ta haña nan konfrontá ku vários reto manera interes diferente, kustumber diferente i karakter diferente. Pero tin algun otro reto ku por ta mas difísil pa trata kuné, por ehèmpel:
Kuantu tempu nos ta pasa ku famia
Kon nos ta manehá plaka
Si nos ke yu
Kiko bo por hasi si abo i bo kasá tin punto di bista diferente?
Loke bo mester sa
Dos persona ku ta kompatibel no ke men ku nan ta pensa meskos ku otro. Aunke e esposo i esposa ta kompatibel, esta, ta pas bon ku otro, esei no ke men ku semper nan ta pensa meskos, asta ora ta trata di asuntu importante.
“Mi a lanta den un famia ku tabata mashá uní. Den wikènt, nos tabata pasa tempu ku mi abuelonan, tionan, tantanan i primunan. Mi esposo su famia no tabata hasi hopi kos huntu. Pues nos tabata pensa diferente tokante kuantu tempu nos mester pasa ku famia òf kuantu tempu nos lo tuma pa komuniká ku famia ku ta biba leu.”—Tamara.
“Debí na nos kriansa, ami ku mi esposa tabata pensa diferente tokante e manera ku ta usa plaka. Durante e promé lunanan di nos matrimonio, nos tabata diskutí tokante esei. Pa nos por a resolvé e problema, nos mester a papia vários biaha pa yega na un akuerdo.”—Tyler.
Dos hende ta wak un paisahe, pero for di ángulo diferente. Asina tambe, un pareha por mira un problema for di punto di bista diferente
Yega na un akuerdo no ke men ku a solushoná tur problema. Por ehèmpel, kiko si un suegro òf suegra bira malu i tin mester di kuido? Òf kiko si un di boso ke yu i e otro no ke yu? a
“Ami ku mi esposa tabatin algun kòmbersashon largu tokante hañamentu di yu. Mi kasá ta pensa mas i mas tokante hañamentu di yu, i nos punto di bista ta halando mas leu for di otro. Mi no ta mira un manera pa nos yega na un akuerdo.”—Alex.
Diferensia di opinion no ke men fin di boso matrimonio. Algun eksperto ta bisa ku si abo i bo kasá no por yega na un akuerdo riba un asuntu importante, abo mester hasi loke sea ta nesesario pa haña loke bo ke—asta si esei ta nifiká kibra bo matrimonio. Pero e supuesto “solushon” ei ta duna mas importansia na loke abo ta sinti i ménos importansia na e promesa ku bo a hasi dilanti di Dios pa keda ku bo kasá, pase loke pase.
Loke bo por hasi
Sea determiná pa kumpli ku boso voto matrimonial. Si boso ta determiná pa kumpli ku boso voto matrimonial, boso lo ta mihó prepará pa trata e problema komo tim i no komo enemigu di otro.
Prinsipio di Beibel: “No laga ningun hende separá loke Dios a uni bou di un yugo.”—Mateo 19:6.
Pensa riba esaki. Por ehèmpel, imaginá ku un di boso ke yu pero e otro no ke. Tin vários faktor ku boso mester tene kuenta kuné, manera:
Kon fuerte boso matrimonio ta?
Boso matrimonio por trata ku e strès ku kriamentu di yu ta trese kuné?
Boso a tene kuenta ku e responsabilidatnan komo mayor?
Esei ta enserá mas ku djis perkurá kuminda, paña i dak.
Kon boso situashon finansiero ta?
Boso por balansá trabou, famia i otro responsabilidat?
Prinsipio di Beibel: “Kua di boso ku ke traha un toren no ta sinta kalkulá e gastu promé?”—Lukas 14:28.
Analisá tur aspekto di e asuntu. Kisas boso lo por resolvé algun desakuerdo. Por ehèmpel, si ta trata di hañamentu di yu, e kasá ku no ke yu por puntra su mes:
‘Ora mi bisa ku mi no ke yu, mi ke men nunka òf aworakí nò?’
‘Mi ta duda ku mi por ta un bon mayor?’
‘Mi tin miedu ku mi kasá lo neglishá mi?’
Di otro banda, e kasá ku ke yu por hasi su mes e siguiente preguntanan:
‘Nos ta prepará pa lanta un yu?’
‘Nos ta den posishon finansiero pa kria un yu?’
Prinsipio di Beibel: “Sabiduria djariba ta. . . rasonabel.”—Santiago 3:17.
Rekonosé ku e opinion di bo kasá tin su parti bon. Dos hende por wak un paisahe, pero for di ángulo diferente. Asina tambe, un pareha por mira un problema for punto di bista diferente, por ehèmpel, kon pa trata ku plaka. Ora boso tin diferensia di opinion, kuminsá promé ku e puntonan ku boso ta di akuerdo ku otro.
Ki meta boso tin en komun?
Kiko ta e bentaha di kada un su punto di bista?
Pa tene e matrimonio fuerte, un di boso òf boso tur dos por ahustá boso punto di bista pa komplasé e otro?
Prinsipio di Beibel: “Laga kada hende sigui buska, no su mes benefisio, sino esun di e otro persona.”—1 Korintionan 10:24.
a Ta bon pa boso papia tokante sierto asuntu importante promé ku boso kasa. Pero asina mes, tin situashon imprevisto ku por pasa òf sintimentu di un boso por kambia ku tempu.—Eklesiástes 9:11.