•   Abo gusta ta spontáneo, i bo kasá gusta tin tur kos planiá.

•   Abo ta un persona ketu i reservá, i bo kasá ta un persona ku gusta ta rònt di hende.

 Bo kasá sa hasi kos ku ta iritá bo? Si bo keda enfoká riba e kosnan ei, esei lo afektá bo matrimonio. De echo, Beibel ta bisa “esun ku ripití un asuntu ta separá amigunan íntimo.”—Proverbionan 17:9.

 En bes di laga e kosnan ku ta iritá bo di bo kasá kousa problema den bo matrimonio, kisas bo por purba di mira nan for di un punto di bista positivo.

Den e artíkulo akí

•  Un punto di bista positivo di kos ku ta iritá bo

•  Loke otro pareha ta bisa

•  Guia pa kòmbersashon

 E kos ku bo kasá ta hasi ku ta iritá bo, por tin di haber ku un kualidat ku bo ta atmirá di dje. Ban wak tres ehèmpel:

 “Hopi bes mi esposo ta slo pa hasi kos òf pa prepará pa bai un kaminda. Pero na mes momento, e tin hopi pasenshi—asta ku mi. Tin biaha e echo ku e ta slo ta iritá mi. Pero mi sa ku esei ta parti di loke mi ta gusta di dje tambe.”—Chelsea.

 “Mi esposa ta plania kos en detaye; e mester sinti ku e tin tur kos bou di kontrol, i esei sa iritá mi. Di otro banda, su atenshon pa detaye ta pone ku semper e ta prepará pa tur kos.”—Christopher.

 “Tin biaha ta parse ku mi esposo no ta interesá den algun kos, i esei ta frustra mi. Pero na mes momento, su manera relahá di hasi kos ta loke a atraé mi na dje. Mi ta atmirá su abilidat pa keda kalmu den situashon difísil.”—Danielle.

 Manera Chelsea, Christopher i Danielle a siña, un kasá su puntonan fuerte i puntonan débil hopi bes ta parti di e mesun kualidat. Ora esei ta e kaso, bo no por kita e debilidatnan sin kita e puntonan fuerte tambe. Meskos ku bo no por djis kita un banda di un moneda.

 Klaru ku algun kos ku ta iritá nos no tin un banda positivo. Por ehèmpel, Beibel ta atmití ku tin “hende ku ta rabia lihé.” (Proverbionan 29:22, BPK) Den kaso asina, un persona mester hasi esfuerso pa kita “tur tipo di amargura malisioso, rabia, furia, gritamentu i papiamentu di kos ofensivo.” a—Efesionan 4:31.

 Pero ora ta trata di algu ku ta djis iritá nos, sigui Beibel su konseho: “Sigui soportá otro . . . asta si un di boso tin motibu pa keha un otro.”—Kolosensenan 3:13.

 Ademas, purba di haña e banda positivo di e kos ku ta iritá bo. Kisas e ta parti di un kualidat ku a atraé bo na bo kasá. Un esposo ku yama Joseph a bisa: “Si bo enfoká riba e kosnan ku ta iritá bo, ta meskos ku si bo enfoká riba e banda skèrpi di un djamanta i no riba su bunitesa.”

 Promé, purba di kontestá e preguntanan akí pa bo mes. Despues konsiderá e kontestanan huntu.

•   Bo ta sinti ku algu ku bo kasá ta hasi ku ta iritá bo ta kousando problema den bo matrimonio? Si ta asina, kiko e ta?

•   Loke ku bo kasá ta hasi ta algu malu òf e ta djis iritá bo?

•   Tin un banda positivo di e kos ku ta iritá bo? Si ta asina, kiko e ta i dikon bo ta balorá e kualidat ei di bo kasá?