Den e artíkulo akí nos lo trata:

•  Kiko ta e ròl di un tata?

•  Dikon e ròl di un tata ta úniko?

•  Kiko un yu muhé por siña di su tata?

•  Konseho pa e tatanan

•   Promé ku bo yu nase. E tipo di esposo ku bo ta awor ta mustra ki tipo di tata lo bo bira despues ku bo yu nase. E buki Do Fathers Matter? ta bisa:

   “Ora un tata yuda su esposa durante su embaraso pa kumpra tur loke e tin mester, kompañ’é ora e tin afsprak na dòkter, wak e ekografia ku e dòkter ta hasi di e bebi i skucha kurason di nan yu bati, lo e sintié mas serka di su esposa i di su bebi ora e nase.”

   “Durante e embaraso di mi esposa, mi no tabata ke pa e sinti ku e tin ku hasi tur kos su so. P’esei, mi tabata yud’é ku tur loke mi tabata por. Entre otro, nos a prepará e bebi su kamber huntu. Nos tabata ke pa tur kos ta kla ora e bebi nase. Esaki tabata un periodo masha bunita i spesial pa nos.”—James.

   Prinsipio di Beibel: “No buska boso mes interes so, ma tambe interes di otro hende.”—Filipensenan 2:4.

•   Ora bo yu nase. Ta masha importante pa bo karga bo yu i hunga kuné. Di e manera ei, lo bo por krea un laso fuerte ku bo yu. Ademas, ta bon pa bo yuda bo esposa kuida e bebi. Loke bo hasi komo tata lo tin un impakto grandi riba e desaroyo di bo yu. E laso ku bo forma ku bo yu ta mustra ku bo yu ta masha importante pa bo.

   “No tuma bo mes muchu na serio. Sinta abou ku bo yu pa hunga kuné, hasi ko’i loko i pasa prèt. No lubidá, abo komo mayor ta un di e promé personanan ku lo siñ’é kiko ta amor.”—Richard.

   Prinsipio di Beibel: “Yu ta un regalo di Yehova, sí, fruta di barika ta un rekompensa di Dios.”—Salmo 127:3.

•   Segun ku bo yu ta bira grandi. Tin investigashon ku ta mustra ku un yu ku tin un bon relashon ku su tata ta siña mihó na skol, tin ménos problema emoshonal i ménos chèns pa usa droga òf pa kometé krímen. Pues, pasa tempu ku bo yu pa sera un bon amistat kuné.

   “Mi yu hòmber a bisa mi ku ora e bai biba riba su mes, e kos ku lo e sinti mas falta di dje ta e kòmbersashonnan ku nos tin ora di kome òf ora nos ta kore den outo. Algun di e kòmbersashonnan di mas importante ku mi tabatin ku mi yu tabata na un momento ku ménos mi a spera. Nos tabatin e tipo di kòmbersashonnan ei pasobra nos tabata pasa hopi tempu huntu.”—Dennis.

   Prinsipio di Beibel: “Paga bon tinu pa e manera ku boso ta kana no ta manera hende imprudente sino manera hende sabí, usando boso tempu di e mihó manera.”—Efesionan 5:15, 16.

 Mayoria di hende ta ferwagt ku un tata lo protehá su famia i pèrkurá pa nan nesesidatnan físiko, i ku un mama lo sòru pa e nesesidatnan emoshonal di su famia. (Deuteronomio 1:31; Isaías 49:15) Pero den algun famia esei no semper ta e kaso. Tin biaha, e tata lo hasi kos ku normalmente e mama ta hasi i, tin biaha, e mama lo hasi kos ku normalmente e tata ta hasi. Sinembargo, e ekspertonan riba tereno di famia ta bisa ku tantu e mama komo e tata ta kontribuí ku algu úniko den famia. a

 Un eksperto riba tereno di famia ku yama Judith Wallerstein a konta un eksperensia personal pa ilustrá e punto ei. El a bisa: “Ora ku outo a dal mi yu muhé di 12 aña i ambulans mester a hib’é hospital, e tabata ke pa su tata ta huntu kuné pasobra el a sinti ku e tata lo por yud’é mas mihó den e situashon ei. Pero mas despues, ora mi yu muhé tabata den hospital, e tabata ke pa ami sinta band’i dje henter dia pa konsol’é.” b

 “Un tata por yuda su famia pa nan por sinti nan sigur i stabil, miéntras ku pa un mama esei por ta difísil pa logra riba su mes. I komo ku un mama por lo general ta un bon skuchadó, su yunan ta sinti ku e ta komprondé nan i ta stima nan. Pues, tantu e mama komo e tata ta traha huntu komo tim.”—Daniel.

 bPrinsipio di Beibel: “Mi yu, tende di bo tata i hasi kaso ora e ta siña bo i korigí bo, i no keda sin hasi kaso di loke bo mama ta siña bo.”—Proverbionan 1:8.

 Komo tata, bo por siña bo yu muhé kon un hende hòmber mester trat’é. Laga nos wak dos manera ku bo yu muhé por siña esei:

•   Ora e wak kon abo ta trata su mama. Si bo stima i respetá bo esposa, bo yu muhé ta siña ki kualidat e mester buska den un futuro esposo.—1 Pedro 3:7.

•   Ora e wak kon abo ta trat’é. Ora bo mustra rèspèt na bo yu muhé, bo ta siñ’é pa e respetá su mes. Ademas, e ta siña ku otro hende hòmber tambe mester trat’é ku rèspèt.

   Pero si konstantemente bo ta kritiká bo yu muhé, bo por lag’é sinti ku e no ta bal nada. I komo konsekuensia, e por buska aprobashon di hende hòmber ku kisas tin mal intenshon.

   “Un yu muhé ku tin un tata ku ta stim’é i ku ta sosten’é lo no namorá fásilmente di un hende hòmber ku no tin e kualidatnan ku un bon esposo mester tin.”—Wayne.