“Pasenshi di esposo ku esposa ta ser poné na prueba tur dia. Pa un hende soltero, por parse ku pasenshi no ta asina importante, pero e ta sumamente importante pa éksito den bo matrimonio.”—John.

•  Dikon bo mester tin pasenshi?

•  Kon bo por demostrá pasenshi?

•  “Pasenshi ta esensial”

•   Den un matrimonio ta fásil pa bo mira otro su defektonan.

   “Despues di algun tempu kasá, ta bira mas fásil pa bo kuminsá enfoká riba e kualidatnan ménos bon di bo kasá. Ora e aktitut negativo ei kuminsá desaroyá, bo por pèrdè pasenshi masha lihé.”—Jessena.

•   Pa falta di pasenshi, bo por bisa algu sin pensa promé.

   “Mi ta masha lihé pa bisa loke mi ta pensa—hopi biaha, demasiado lihé. Si mi tabatin mas pasenshi, lo mi por a evaluá un asuntu promé i evitá di bisa algu innesesario.”—Carmen.

   Beibel ta bisa: “Amor tin pasenshi i ta bondadoso.” (1 Korintionan 13:4) Pues, ta lógiko ku dos hende ku ta stima otro mester por tin pasenshi ku otro. Pero, no ta semper esei t’e kaso. John, menshoná anteriormente, a bisa: “Meskos ku por pasa ku kualke bon kualidat, ta mas fásil pa bo pèrdè pasenshi ku pa bo desaroy’é. Bo tin ku hasi esfuerso pa kultivá mas pasenshi.”

•   Ora algu inesperá pone bo pasenshi na prueba.

   Por ehèmpel: Bo kasá ta bisa bo algu ku ta ofendé bo. Bo por tin e tendensia di bis’é algu bèk ku ta ofend’é.

   Prinsipio di Beibel: “No sea lihé den bo kurason pa rabia [òf, pa sinti bo ofendí, NW], pasobra rabia ta biba den pechu di hende bobo.”—Eklesiástes 7:9.

   Kon pa demostrá pasenshi: Warda un ratu. Promé ku bo respondé, purba di komprondé dikon bo kasá ta bisa bo algu asina, i no mir’é komo un atake personal. Segun e buki Fighting for Your Marriage (Lucha pa Salba Bo Matrimonio): “Mayoria di nos ta reakshoná hopi biaha riba loke nos ta interpretá ku a ser bisá i no riba loke realmente nos kasá a bisa i tabata ke men.”

   Pero asta si bo kasá bisa algu pa provoká bo, si bo tin pasenshi i dominio propio, bo por mehorá e situashon en bes di hasié pió. Prinsipio di Beibel: “Pa falta di palu, kandela ta paga.”—Proverbionan 26:20.

   “Si bo kuminsá mira bo esposa komo bo enemigu, para ketu un ratu i purba di kòrda kiko ta loke a pone bo namorá di dje i mesora purba di hasi algu bon p’e.”—Ethan.

   Pensa riba esaki:

  •  Kon bo ta reakshoná ora bo kasá bisa òf hasi algu ku ta hùrt bo?

  •  Kon bo por mustra mas pasenshi si e mesun kos bolbe pasa?

•   Ora ku bo kasá ta keda hasi e mesun fout.

   Por ehèmpel: Tur ora bo kasá ta lat, i bo ta kunsumí pasobra e ta laga bo keda warda.

   Prinsipio di Beibel: “Sigui soportá otro i pordoná otro libremente.”—Kolosensenan 3:13.

   Kon pa demostrá pasenshi: Purba di pone interes di bo matrimonio riba esnan di bo mes. Puntra bo mes: ‘Si mi hasi e kos akí un problema, lo e mehorá nos relashon òf dañ’é?’ Kòrda tambe ku “nos tur ta trompeká hopi biaha.” (Santiago 3:2) Esei ta nifiká ku abo tambe tin kos pa traha riba dje.

   “Tin biaha mi tin mas pasenshi ku un amiga ku mi tin ku mi esposo. Mi ta kere ku esei ta debí ku mi ta pasa mas tempu huntu ku mi esposo i mi ta mira su imperfekshonnan. Pero pasenshi ta un karakterístika di amor i un muestra di rèspèt, pues, e ta importante den matrimonio.”—Nia.

   Pensa riba esaki:

  •  Kuantu pasenshi bo tin ora ku bo kasá kometé un fayo?

  •  Kiko bo por hasi pa demostrá mas pasenshi den futuro?