Hopi parehá kasá a ripará ku, maske nan ta huntu den e mesun kamber, nan no ta kòmbersá mashá ku otro. Kon bini?

•  Huntu pero tòg apartá. Kon bini?

•  Loke bo por hasi

•  Loke otro pareha ta bisa

•  Guia pa kòmbersashon

•   Nos ta muchu kansá

   “Hopi biaha ora nos haña chèns pa pasa tempu ku otro, un di nos ta kansá; ta sea ami ta kansá òf ta mi kasá ta kansá. Anto ora mi ta kansá, kualke kos chikitu ta traha riba mi nèrvio. Ta mihó nos djis sinta wak televishon.”—Anna.

•   Nos ta pasa hopi tempu riba Internet

   “Ret sosial òf otro pasatempu online por kita tur bo tempu. Hopi ora ta pasa, i bo no a papia mes ku bo kasá. Ta komo si fuera nos ta sintá den kamber apart.”—Katherine.

•   Nos no ta interesá den e mesun kosnan

   “Hopi biaha ora mi kasá yega kas for di trabou, e ta bai hasi su hòbinan, i e ta pasa hopi tempu ta hasi esei. E ta traha duru. Pues, e mester di tempu pa relahá. Pero mi tin gana pa nos pasa mas tempu huntu.”—Jane.

•   Trabou

   “Teknologia a pone ku ta mas difísil pa tene trabou separá for di bida di famia. Hopi biaha, mi ta pasa tempu ta kontestá e-mail i mensahe di trabou en bes di pasa tempu ku mi kasá.”—Mark.

•   Kòrda ku e tempu ku boso ta pasa huntu ta un nesesidat importante.

   Prinsipio di Beibel: “Hasi sigur kiko ta e kosnan mas importante.”—Filipensenan 1:10.

   Pensa riba esaki: E kosnan ku mi ta hasi ta demostrá ku mi matrimonio ta mas importante pa mi ku mi trabou i mi hòbinan? Ta ora mi sobra un tiki tempu i energia so mi ta pasa tempu ku mi kasá?

   Sugerensia: Saka tempu regularmente pa boso dos pasa tempu huntu, i no laga nada distraé boso durante e momentonan ei.

   “Mi ta gusta mashá ora mi kasá plania algu pa nos dos hasi huntu. Esei ta laga mi sinti mi hopi bon, i mi ta sinti ku di bèrdat e ke pasa tempu ku mi. Anto esei ta pone ku mi ta stim’é mas ainda.”—Anna.

•   Pone telefòn i otro aparato elektróniko un banda un ratu.

   Prinsipio di Beibel: “Tin un tempu stipulá pa tur kos.”—Eklesiástes 3:1, Beibel Santu.

   Pensa riba esaki: Kuantu biaha mi sa laga mensahe ku ta drenta kita mi atenshon i stroba mi di duna mi kasá tur mi atenshon?

   Sugerensia: Purba di kome maske ta un biaha pa dia huntu, i laga boso telefòn den un otro kamber. Ora boso ta kome huntu, boso ta haña bon chèns pa papia tokante kon e dia a bai.

•   Ora ta posibel, hasi diligensia huntu òf hasi trabou di kas huntu.

   Prinsipio di Beibel: “Dos ta mihó ku un, pasobra nan tin un bon pago pa nan trabou.”—Eklesiástes 4:9, Beibel Santu.

   Pensa riba esaki: Kuantu biaha abo so òf bo kasá so ta hasi un trabou di kas òf ta bai hasi un diligensia?

   Sugerensia: Hasi kos huntu i yuda otro, asta si ta algu ku un di boso so por hasi i ku no tin mester di dos hende pa hasié.

   “Hasimentu di kompra, labamentu di tayó, doblamentu di paña i limpiamentu di kurá; mira e kosnan ei komo oportunidat pa pasa tempu ku otro i no djis komo trabou di kas.”—Nina.

•   Sea realístiko.

   Prinsipio di Beibel: “Laga tur hende mira ki rasonabel boso ta.”—Filipensenan 4:5.

   Pensa riba esaki: Kon ta algun manera ku bo por mustra ku bo ta rasonabel i ku bo no ta pidi muchu di bo kasá?

   Sugerensia: Papia ku otro pa saka afó kiko ta nesesidat di kada un di boso. Despues, disidí huntu kon boso lo usa boso tempu.

   “Mi kasá tin hopi energia. Pero komo ku mi tin problema ku salú, ami sí no tin hopi energia. Hopi biaha, mi ta bisa mi kasá pa e bai hasi algu ku e ta gusta i ami ta keda kas. Ami ta keda sosegá, i e por bai hasi ehersisio. Asina, nos tur dos ta sinti bon.”—Daniela.

 Promé, purba di kontestá e preguntanan akí pa bo mes. Despues, trata e kontestanan huntu.

•   Bo ta haña ku abo ku bo kasá ta pasa sufisiente tempu huntu?

•   Kiko bo kasá sa hasi pa boso pasa tempu huntu? Bo por elogi’é pa eseinan?

•   Kiko bo ke pa bo kasá mehorá den dje òf hasi diferente?

•   Bo sa laga bo telefòn òf otro aparato stroba bo di skucha bon ora bo kasá ta papia ku bo? Esei sa sosodé hopi?

•   Kon ta algun manera ku boso tur dos por mustra ku boso ta rasonabel i ku boso no ta pidi muchu di otro?

•   Ki kambio kada un di boso por hasi e siman akí pa boso por pasa mas tempu huntu, sin laga telefòn òf otro aparato kita boso atenshon pa otro?