Bo ta pensa meskos ku Jeanette? Si ta asina, porta bo ta bai kuminsá duda si ta eksistí un Kreador. Kon ku bai bin, nos niun no ke parse ignorante. Kiko por yuda bo?

•  Kiko otronan por pensa di bo?

•  Pensa bon riba loke bo ta kere

•  Kon pa buska evidensia

•  Loke otro hóbennan ta bisa

 1. Si bo ta kere den kreashon, otro hende por pensa ku bo tin algu kontra siensia.

 “Mi maestro di skol a bisa ku hende ku ta muchu floho pa buska un splikashon sientífiko di e universo ta kere den kreashon.—Maria.

 Loke bo mester sa: Esnan ku ta bisa asina no tin tur e detayenan. Sientífikonan famoso manera Galileo i Isaac Newton mes a kere den un Kreador. Anto esaki no ta nifiká ku nan no tabata kere mas den siensia. Meskos tambe, awe tin hopi sientífiko ta haña ku un hende por kere den siensia i na mes momento den kreashon.

 Purba esaki: Riba Watchtower ONLINE LIBRARY, yena den e opshon di buska “splika su fe” (ku dòbel komia) pa bo haña entrevista di ekspertonan di siensia i medisina ku ta kere den kreashon. Wak kiko a yuda nan yega na e konklushon ku tin un Kreador.

 E punto ta ku si bo ta kere den kreashon, esei no ta nifiká ku bo ta bai kontra siensia. Al kontrario, mas bo siña tokante naturalesa, mas konvensí bo ta keda ku ta Dios a krea tur kos.​—Romanonan 1:20.

2. Si bo ta kere den e relato bíbliko di kreashon, hende por pensa ku bo ta un fanátiko religioso.

 “Hopi hende ta bisa ku ta ridíkulo pa kere den kreashon. Nan ta sinti ku e relato di Génesis ta djis un kuenta.”​—Jasmine.

 Ta bon pa bo sa ku hopi biaha hende tin idea robes tokante e relato bíbliko di kreashon. Por ehèmpel, algun hende ta bisa ku tera no ta eksistí dje largu ei òf ku bida a ser kreá den seis dia di 24 ora. Pero Beibel no ta apoyá niun di e ideanan akí.

•   Na Génesis 1:1 Beibel ta bisa simplemente: “Na prinsipio Dios a krea shelu i tera.” Esaki no ta bai kontra di loke siensia ta proba, esta, ku tera ta eksistí mas ku míles di miónes di aña.

•   E palabra “dia” usá den Génesis por referí na un periodo largu di tempu. De echo, na Génesis 2:4 e palabra “dia” ta referí na tur e seis dianan di kreashon.

 E punto ta ku e relato bíbliko tokante kreashon ta kuadra ku loke siensia a demostrá.

 Bo no tin nodi di kere siegamente den kreashon. Fe den e siñansa di kreashon ta basá riba lógika. Pensa riba esaki:

 Tur loke bo ta mira rònt di bo ta siña bo ku tras di tur kos diseñá tin un diseñadó. Ora bo wak un kámara, un avion òf un kas, bo ta yega na e konklushon lógiko ku ta un hende a diseñá e kosnan akí. Dikon bo no ta yega na e mesun konklushon ei ora ta trata di kosnan manera wowo di hende, para òf nos planeta tera?

 Pa pensa ariba: Ingenieronan hopi bes ta kopia loke nan mira den naturalesa pa mehorá loke nan a diseñá kaba i nan ke rekonosementu pa nan trabou. Ta lógiko pa duna hende rekonosementu anto keda sin rekonosé e Kreador i su diseñonan hopi mas sofistiká?

 Ora bo analisá naturalesa, lo bo keda mas konvensí ainda di ku tur kos a ser kreá.

 Purba esaki: Riba Watchtower ONLINE LIBRARY, yena den e opshon di buska “Kasualidat òf Diseño” (ku dòbel komia). Skohe algun tema ku ta mustra interesante for di e seri ¿Casualidad o Diseño? den e revista Spièrta! Den kada artíkulo, purba di saka afó kiko ta e aspekto di mas impreshonante di naturalesa. Kon esaki ta duna bo mas fe ainda den un Diseñadó?

 Hasi mas investigashon: Usa e siguiente foyetonan pa haña mas prueba di kreashon.

•  Bida Ta Obra di un Kreador?

  •   Tera ta situá perfektamente den universo i tin tur kos riba dje pa sostené bida.—Wak página 4-10.

  •   Den naturalesa tin hopi ehèmpel di diseño.—Wak página 11-17.

  •   E relato di Beibel den Génesis tokante kreashon ta kuadra ku siensia.—Wak página 24-28.

•  El origen de la vida. Cinco cuestiones dignas de análisis

  •   Bida no por a kuminsá gewon asina for di materia sin bida.—Wak página 4-7.

  •   Tur loke tin bida ta muchu kompliká pa a desaroyá pa kasualidat i di nan mes.—Wak página 8-12.

  •   E kapasidat di DNA pa warda informashon ta hopi mas grandi ku esun di kualke aparato moderno.—Wak página 13-21.

  •   Loke ta na bida no por a bini for di un solo organismo. E fosilnan ku hende a haña ta duna prueba ku gruponan prinsipal di animal a presentá diripiente, no gradualmente.—Wak página 22-29.

 “E mundu di naturalesa ta loke mas ta konvensé ami ku Dios ta eksistí; for di e animalnan aki riba tera te na e universo i e òrdu ku tin den dje.”—Thomas