•  Dikon mi no por konsentrá bon?

•  Kon bo por siña konsentrá mihó?

•  Loke otro hóben ta bisa

 “Mi no ta lesa buki hopi mas manera mi sa hasi. Ni sikiera paragrafnan largu mi no gusta lesa mas.”—Elaine.

 “Si mi ta wak un vidio, anto e tarda un tiki, mi ta kla pa pon’é bai mas lihé.”—Miranda.

 “Ora mi ta hasiendo algu importante anto mi telefòn zona, mesora mi ta kuminsá pensa: ‘Ta ken lo ta manda mensahe pa mi?’”—Jane.

 Kòmpiuter i internet por stroba nos di konsentrá bon? Algun hende ta bisa ku sí. Nicholas Carr, outor i konsehero di atministrashon ta bisa: “Mas nos usa Internet, mas nos ta train nos selebro pa prosesá informashon rápidamente i efisientemente sin tin nodi di konsentrá.” a

 Ban konsiderá tres okashon kaminda internet por stroba bo di konsentrá bon.

•   Ora bo ta kòmbersá. Un mucha muhé yòn ku yama Maria a bisa: “Asta durante un kòmbersashon personal, hende ta manda mensahe, hunga wega òf wak ret sosial riba nan telefòn, sin sikiera paga tinu na e hende ku nan ta kòmbersá kuné.”

•   Ora bo ta den klas. Segun e buki Digital Kids “mayoria alumno ta bisa ku nan ta usa nan telefòn òf tablet den klas pa manda mensahe, sùrf riba internet òf buska notisia. I esakinan no tin nada di hasi ku lès.”

•   Ora bo ta hasi lès. Chris di 22 aña ta bisa: “E kos di mas difísil pa mi ta di ignorá e telefòn kada bes ku e zona.” Si bo ta un alumno di skol, bo sa ku lès ku por ehèmpel bo por a kaba denter di un ora, kisas ta tuma kasi tres ora pa kaba si kada bes bo telefòn ta distraé bo.

 Konklushon: Lo ta difísil pa bo konsentrá bon si bo laga internet distraé bo òf dominá bo bida.

•   Ora bo ta kòmbersá. Beibel ta bisa: “No buska boso mes interes so, ma tambe interes di otro hende.” (Filipensenan 2:4) Ora bo ta kòmbersá, tene konsiderashon ku otro hende i skucha ku atenshon. Wak e persona den su kara i no permití bo aparatonan elektróniko kita bo atenshon.

   “Ora bo ta kòmbersando ku un persona, resistí e tentashon di wak bo telefòn. Mustra rèspèt pa e persona i dun’é tur bo atenshon.”—Thomas.

   Sugerensia: Ora bo ta kòmbersando, lo ta bon pa pone bo telefòn kaminda bo no ta mir’é. Algun eksperto ta bisa ku e simpel echo ku tin un selular serka ei por stroba bo di konsentrá, ya ku kualke momento e por interumpí e kòmbersashon.

•   Ora bo ta den klas. Beibel ta bisa: “Presta atenshon na e manera ku boso ta skucha.” (Lukas 8:18) Tene e prinsipio ei na mente i si boso tin akseso na internet den klas, evitá di chèk bo mensahenan, hunga wega òf manda mensahe en bes di konsentrá riba bo lès.

   “Hasi esfuerso pa presta bon atenshon den klas. Hasi anotashon. Si ta posibel, sinta dilanti den klas pa evitá distraishon.”—Karen.

   Sugerensia: Skirbi bo notanan na man en bes di riba kòmpiuter. Investigashon a mustra ku e ora ei bo tin ménos distraishon i bo ta keda kòrda kosnan mihó.

•   Ora bo ta hasi lès. Beibel ta bisa: “Atkerí sabiduria! Atkerí komprondementu!” (Proverbionan 4:5) Esei ta enserá mas ku pasa ariba-ariba den e materia djis pa bo traha un prufwèrk. E ta rekerí konsentrá i pensa profundamente.

   “Ora mi ta siña mi lès, mi ta pone mi tablet riba ‘airplane mode’ di manera ku mi por konsentrá riba loke mi ta hasi. Mi ta evitá di wak mensahe. Si tin algu ku mi mester kòrda, mi ta skirbié.”—Chris.

   Sugerensia: Hasi sigur ku bo ambiente ta permití bo konsentrá bon. Tene bo ambiente limpi i na òrdu.