Beibel no ta usa e palabra “aborto” den e sentido di intenshonalmente pone un bebi nase promé ku tempu. Sinembargo, hopi versíkulo di Beibel ta mustra kiko Dios ta pensa tokante bida, inkluso bida di un yu ku no a nase ainda.

Bida ta un regalo di Dios. (Génesis 9:6; Salmo 36:9) Dios ta konsiderá tur bida balioso, inkluso bida di yu den barika di su mama. Pues, si un hende intenshonalmente kita bida di un yu ku no a nase ainda, esei ta meskos ku asesinato.

 Lei ku Dios a duna e israelitanan tabata bisa: “I si hòmbernan ta bringa ku otro i nan dal un muhé na estado, asina ku e ta pèrdè su yu, ma no tin otro daño, e ora ei e hòmber mester paga but sigur manera esposo di e muhé eksigí di dje; i e mester paga manera e huesnan disidí. Ma si tin otro daño, e ora ei bo mester pone komo kastigu bida pa bida.”—Éksodo 21:22, 23. a

•  Na ki momento bida di un hende ta kuminsá?

•  Dios ta pordoná hende ku a kometé aborto?

•  Ta malu pa kometé aborto si e bida di e mama òf di e yu ta den peliger?

 For di momento di konsepshon, Dios ta konsiderá ku bida a kuminsá. Den Palabra di Dios, Beibel, semper Dios a referí na un yu ku no a nase ainda komo un persona. Wak algun ehèmpel ku ta mustra ku Dios no ta hasi distinshon entre bida di un bebi den barika di su mama i un yu ku a nase kaba.

•   Rei David a bisa bou di inspirashon di Dios: “Bo wowonan a mira mi supstansia sin forma.” (Salmo 139:16) Asta promé ku David a nase, e tabata un persona den bista di Dios.

•   Ademas, promé ku Yeremías a nase Dios tabatin un propósito spesial pa Profeta Yeremías. Dios a bis’é: “Promé ku mi a forma bo den barika, mi tabata konosé bo, i promé ku bo a nase, mi a konsagrá bo; mi a nombra bo komo profeta pa e nashonnan.”—Yeremías 1:5.

•   E eskritor di Beibel Lukas, un dòkter, a usa e mesun palabra griego pa deskribí tantu un yu den barika di su mama komo un yu resien nasí.—Lukas 1:41; 2:12, 16.

 Sí. Dios ta pordoná hende ku a kometé aborto. Si nan aseptá Dios su punto di bista tokante bida, nan no mester laga sintimentu di kulpa aplastá nan. Beibel ta bisa: “Señor ta yen di kompashon i grasia, kende no ta rabia lihé, i ta abundá den miserikòrdia . . . Mes leu ku pariba ta for di pabou, mes leu el a alehá nos transgreshonnan for di nos.” b (Salmo 103:8-12) Yehova ta pordoná tur hende ku arepentí di kurason di e pikánan ku nan a kometé, inkluso aborto.—Salmo 86:5.

 En bista di loke Beibel ta bisa tokante un yu ku no a nase ainda, no ta hustifiká pa kometé aborto apesar di un posibel peliger pa mama òf bebi.

 Kiko si durante un parto surgi un emergensia kaminda mester skohe entre bida di e mama òf bida di e bebi? Den un kaso asina, e personanan direktamente enbolbí mester disidí kiko nan ta hasi.