Kiko Beibel Ta Bisa Tokante Bibamentu Huntu Sin Kasa?
Loke Beibel ta bisa
Beibel ta bisa ku Dios ke pa hende “apstené di fornikashon.” (1 Tesalonisensenan 4:3) Den Beibel e palabra “fornikashon” ta inkluí adulterio, homoseksualidat i relashon seksual entre un hòmber i un muhé ku no ta kasá ku otro.
Ta importante pa Dios si un pareha ta kasá òf nò?
Matrimonio ta un areglo di Dios. Dios a instituí matrimonio ora el uni e promé pareha. (Génesis 2:22-24) Su propósito no tabata pa e hòmber i e muhé biba huntu sin karga e responsabilidatnan di matrimonio.
Dios sa kiko ta mihó pa nos. Dios ke pa matrimonio ta un union permanente entre un hòmber i un muhé ku ta benefisiá nan i ku ta protehá tur miembro di famia. Wak un simpel ilustrashon. Meskos ku e manual di un fabrikante ta mustra kon pa traha un muebel, asina tambe Dios su instrukshon ta mustra kon nos por tin un matrimonio felis. Dios su normanan semper ta benefisiá hende ku ta apliká esakinan.—Isaías 48:17, 18.
E manual di un fabrikante ta mustra kon nos por traha un muebel. Dios su instrukshon ta mustra kon nos por tin un matrimonio felis
Tene relashon seksual pafó di matrimonio tin konsekuensia serio. Por ehèmpel, esaki por resultá den embaraso no deseá, malesa transmití seksualmente i trouma emoshonal.
Dios a krea nos ku e kapasidat di haña yu mediante relashon seksual. Bida ta sagrado pa Dios, i e kapasidat di haña yu ta un regalo presioso. Dios ke pa nos trata e regalo ei ku rèspèt i balorá matrimonio.—Hebreonan 13:4.
Kiko di biba huntu promé ku kasa pa wak si boso ta bai bon ku otro?
Pa nos tin un matrimonio eksitoso no ta nesesario pa biba un tempu huntu promé sin kasa. Al kontrario, un matrimonio tin éksito ora e pareha ta determiná pa keda ku otro i ta traha huntu pa trata ku problema. a Matrimonio ta fortalesé e determinashon di un pareha pa keda huntu.—Mateo 19:6.
Kon un pareha por fortalesé nan matrimonio?
Niun matrimonio no ta perfekto. Sinembargo, un pareha por tin un matrimonio felis si nan apliká konseho di Beibel. Laga nos wak algun ehèmpel:
Pone e nesesidatnan di bo kasá promé ku esnan di bo.—1 Korintionan 7:3-5; Filipensenan 2:3, 4.
Sigui stima i respetá otro.—Efesionan 5:25, 33.
Siña kontrolá e manera ku bo ta papia.—Proverbionan 12:18.
Tene pasenshi i sea kla pa pordoná.—Kolosensenan 3:13, 14.
a Wak e artíkulo “Felisidat den Famia—Determinashon.”
Otro Artíkulo Interesante
PREGUNTA KU BEIBEL TA KONTESTÁ
Beibel Ta Prohibí Hende pa Haña Plaser den Relashon Seksual?
Ta un piká pa haña plaser den relashon seksual?
PREGUNTA KU BEIBEL TA KONTESTÁ
Kiko Beibel Ta Bisa Tokante Matrimonio?
Prinsipio di Beibel por yuda pareha kasá evitá problema i vense opstákulo.
PREGUNTA KU BEIBEL TA KONTESTÁ
Beibel Por Hasi Mi Famia Felis?
Konseho sabí di Beibel ya kaba a yuda miónes di hende hòmber i muhé hasi nan famia felis.
TOKANTE NOS
Pidi un Bishita
Papia tokante un tópiko di Beibel òf haña sa mas tokante Testigunan di Yehova.