Dios Lo Pordoná Mi?

TOKA NA

Dios Lo Pordoná Mi?

E kontesta ku Beibel ta duna

Sí, Dios lo pordoná bo bo pikánan si bo dal e pasonan korekto. Beibel ta bisa ku Dios ta “kla pa pordoná” i ku “e lo pordoná abundantemente.” (Nehemías 9:17; Salmo 86:5, Beibel Santu; Isaías 55:7, Beibel Santu) Ora e pordoná nos, e ta hasi esei kompletamente. Nos pikánan ta ser “pordoná,” òf kitá. (Echonan 3:19) Dios ta pordoná permanentemente pasobra el a bisa: “Nan piká lo mi no kòrda mas.” (Yeremías 31:34, Beibel Santu) Unabes e pordoná e no ta bai bèk pa kòrda nos pikánan i asina straf nos atrobe.

Pero, Dios su pordon no ta un señal di debilidat òf sentimentalismo. Nunka e ta kambia su normanan hustu. Pa e motibu akí, tin algun piká ku e no ta pordoná.—Hosue 24:19, 20.

E pasonan ku bo mester dal pa haña pordon di Dios

Rekonosé ku bo a peka kontra Dios su normanan. Aunke kisas bo a hùrt otro hende, bo tin ku rekonosé promé ku bo a ofendé Dios.—Salmo 51:1, 4; Echonan 24:16.
Konfesá bo piká na Dios den orashon.—Salmo 32:5; 1 Huan 1:9.
Sinti un tristesa profundo pa loke bo a hasi. E “tristesa ku ta segun e boluntat di Dios” ta hiba na arepentimentu òf kambio di aktitut. (2 Korintionan 7:10) E ta inkluí ku bo ta sinti duele di a kometé e fayonan ku a hiba na e piká.—Mateo 5:27, 28.
Kambia bo rumbo i “bira bèk.” (Echonan 3:19) Esaki por nifiká ku bo ta evitá di ripití e akshon òf e práktika, òf e por nifiká ku bo tin ku kambia bo manera di pensa i hasi kompletamente.—Efesionan 4:23, 24.
Dal paso pa drecha loke ta malu òf e daño hasí. (Mateo 5:23, 24; 2 Korintionan 7:11) Bo mester pidi despensa na esnan ku a sufri pa loke a pasa i hasi bo máksimo esfuerso pa kompensá e daño.—Lukas 19:7-10.
Pidi Dios den orashon p’e pordoná bo a base di e reskate di Hesus. (Efesionan 1:7) Pa Dios por kontestá bo orashon, bo mester pordoná esnan ku a peka kontra bo.—Mateo 6:14, 15.
Si bo piká ta serio, papia ku un persona ku ta kualifiká pa duna bo e yudansa spiritual ku bo mester i ku por hasi orashon pa bo.—Santiago 5:14-16.

Ideanan robes tokante haña pordon di Dios

“Mi a peka muchu hopi pa haña pordon.”

Dios a pordoná David di adulterio i asesinato

Tanten ku nos ta sigui e pasonan ku Dios a pone den Beibel, nos lo haña pordon, mirando ku su kapasidat pa pordoná ta hopi mas tantu ku nos. E por pordoná pikánan serio i tambe esnan ku nos a hasi diferente bes.—Proverbionan 24:16; Isaías 1:18.

Por ehèmpel, Rei David di Israel a ser pordoná pa adulterio i asesinato. (2 Samuel 12:7-13) Apòstel Pablo, ku a sinti ku e tabata e pekadó di mas grandi, tambe a ser pordoná. (1 Timoteo 1:15, 16) Asta e hudiunan di promé siglo ku Dios a tene responsabel pa mata Hesus, e Mesías, lo a ser pordoná si nan a kambia nan manera.—Echonan 3:15, 19.

“Si mi konfesá mi pikánan na un pastor òf saserdote, mi pikánan lo ser apsolvé.”

Niun hende no ta outorisá pa pordoná un otro hende pa e pikánan ku el a kometé kontra Dios. Aunke konfesá pikánan na un hende por yuda e persona bira mihó, ta Dios so por pordoná piká.—Efesionan 4:32; 1 Huan 1:7, 9.

Si ta asina, kiko Hesus tabata ke men ora el a bisa su apòstelnan: “Si boso pordoná e pikánan di un hende, nan ta haña pordon; si boso no pordoná e pikánan di un hende, nan no ta haña pordon”? (Huan 20:23) E tabata deskribí un outoridat úniko ku lo el a duna su apòstelnan ora nan lo a risibí spiritu santu.—Huan 20:22.

Manera el a primintí, e apòstelnan a risibí e regalo ei ora nan a yena ku spiritu santu na aña 33. (Echonan 2:1-4) Apòstel Pedro a usa e outoridat akí ora di husga e disipelnan Ananías ku Safira. Milagrosamente Pedro tabata sa tokante nan plan engañoso i su huisio a mustra ku nan piká lo no a ser pordoná.—Echonan 5:1-11.

E poder milagroso di spiritu santu, meskos ku otro poder manera por ehèmpel e don di kura hende i e don di papia diferente idioma, a stòp despues di morto di e apòstelnan. (1 Korintionan 13:8-10) Pues, niun hende awe por kita un otro hende su piká.