Beibel ta animá nos pa duna di kurason i ku e motivashon korekto. Ora nos ta hasi esei, tantu e persona ku ta duna i e persona ku ta risibí ta benefisiá. (Proverbionan 11:25; Lukas 6:38) Hesus a bisa: “Tin mas felisidat den duna ku den risibí.”​—Echonan 20:35.

•  Ki ora dunamentu ta hasi Dios kontentu?

•  Ki ora dunamentu no ta hasi Dios kontentu?

•  Teksto di Beibel tokante dunamentu

 Dios ta keda kontentu ora nos ta duna di kurason. Beibel ta bisa: “Laga kada hende hasi manera el a disidí den su kurason, no di mala gana, ni fòrsá, pasobra Dios ta stima hende ku ta duna ku alegria.”​—2 Korintionan 9:7.

 “E forma di adorashon” ku Dios ta aprobá ta dunamentu di kurason. (Santiago 1:27) Ora un persona yuda hende den nesesidat na un manera generoso, e ta traha huntu ku Dios, i Dios ta mira su generosidat komo un debe hasí na dje. (Proverbionan 19:17) Beibel ta bisa ku Dios lo rekompensá e persona ei.​—Lukas 14:12-14.

 Ora nos ta duna ku motibu egoista. Wak algun ehèmpel:

•   Pa impreshoná hende.​—Mateo 6:2.

•   Pa haña algu bèk.​—Lukas 14:12-14.

•   Pa kumpra salbashon.​—Salmo 49:6, 7.

 Ora nos ta apoyá práktika òf kustumber ku Dios ta desaprobá. Por ehèmpel, ta robes pa duna hende sèn pa wega di plaka, droga òf alkohòl. (1 Korintionan 6:9, 10; 2 Korintionan 7:1) Lo no ta bon tampoko pa duna un hende sèn si e por traha, pero no ke hasi esei.​—2 Tesalonisensenan 3:10.

 Ora dunamentu ta stroba nos di kumpli ku nos responsabilidat di famia. Beibel ta bisa ku e kabes di famia mester perkurá pa e nesesidatnan di su famia. (1 Timoteo 5:8) Lo no ta bon pa un kabes di famia duna otro hende asina tantu ku e ta perhudiká su propio famia. Ademas, Hesus a desaprobá hende ku no kier a perkurá pa nan mayornan di edat pasobra nan tabata pretendé ku tur loke nan tin tabata “un ofrenda dediká na Dios.”—Marko 7:9-13.