No ta e esfuersonan ku hende ta hasi lo trese pas na mundu; mas bien, ta e Reino di Dios, ku ta un gobièrnu selestial goberná pa Kristu Hesus, lo hasi esaki. Tuma nota kiko Beibel ta bisa tokante e speransa maravioso akí.

1.   Dios lo “hasi gueranan stòp te na e fin di tera,” kumpliendo asina ku su promesa pa trese “pas riba tera entre hende ku e ta aprobá!”—Salmo 46:9, Beibel Santu; Lukas 2:14.

2.   E Reino di Dios lo goberná for di shelu riba e tera kompleto. (Daniel 7:14) Komo ku e ta goberná riba henter mundu, lo e eliminá nashonalismo, ku ta e kousa fundamental di hopi problema.

3.   Hesus, e gobernante di e Reino di Dios, kende ta ser yamá tambe e “Prins di Pas,” lo hasi sigur ku “lo no tin fin na . . . pas.”—Isaías 9:6, 7, Beibel Santu.

4.   Hende ku no ke stòp di bringa lo no haña chèns di biba bou di e Reino di Dios ya ku “esun ku ta gusta violensia [Dios] Su alma ta odia.”—Salmo 11:5, Beibel Santu; Proverbionan 2:22.

5.   Dios ta siña hende kon pa biba na pas. Beibel ta deskribí e resultado di e instrukshon akí, bisando: “Nan lo bati nan spadanan traha plug ku nan, i nan lo bati nan lansanan traha skèr-pa-snui [mata] ku nan. Nashon lo no lanta spada kontra nashon, i nunka mas nan lo train pa guera.”—Isaías 2:3, 4, Beibel Santu.

 Ya kaba rònt mundu tin miónes di Testigunan di Yehova ku ta siña for di Dios kon pa ta hendenan pasífiko. (Mateo 5:9) Aunke nos ta di diferente kultura i nos ta biba den mas ku 230 diferente pais, hamas nos lo bringa kontra nos próhimo.