Entre 1999 i 2015, Testigunan di Yehova a konstruí mas ku 5.000 Salòn di Reino den Sur Amérika a i México. I ainda tin mester di mas ku 700 Salòn di Reino pa akomodá e 1 mion Testigu i tur otro hende ku ta asistí na nos reunionnan den e region akí.

Den pasado, kongregashonnan den e parti di mundu akí tabata haña difísil pa konstruí lugánan di adorashon. Por ehèmpel, na México mayoria Testigu tabata reuní den nan kasnan. Dikon? Un di e motibunan tabata ku pa hopi aña lei no tabata permití pa organisashonnan religioso ta doño di tereno. Pero na aña 1990 e lei a kambia i Testigunan di Yehova a kuminsá konstruí hopi Salòn di Reino. Tòg e konstrukshon di kada salòn a dura mayoria di biaha lunanan largu.

Aworakí e proseso ei ta bai hopi mas lihé. Na aña 1999 nan a start un programa nobo kaminda Gruponan di Konstrukshon di Salòn di Reino a kuminsá konstruí Salònnan di Reino den paisnan di ménos rekurso inkluso México i e shete paisnan di Sentroamérika. Desde 2010, e sukursal na México ta supervisá e trabou di konstrukshon den henter e region ei.

E sirbidónan di konstrukshon tin retonan grandi pa ku konstrukshon di un Salòn di Reino den áreanan isolá. Esaki tabata e kaso ku algun sirbidó na Panamá ku mester a biaha den boto pa mas o ménos 3 ora pa por a yega na un proyekto di konstrukshon. I den e estado Mehikano di Chiapas, e grupo di konstrukshon mester a usa un avioneta chikitu pa hiba e materialnan di konstrukshon na un lugá aislá.

Te asta hendenan ku no ta Testigu tin biaha ta ansioso pa wak Salòn di Reino nobo den nan komunidat. Por ehèmpel, un hòmber di Honduras a bisa ku promé ku e Testigunan a traha un Salòn di Reino den su bario, otro hende kier a usa e tereno pa un nightclub. Esei sí e no tabata ke. Ora Testigunan di Yehova a bis’é ku nan tin planiá pa traha un Salòn di Reino einan, el a grita: “Ki un bendishon!”

Den hopi pais e hendenan ta impreshoná pa e trabou duru di e trahadónan. Un hòmber di Guatemala a bisa: “Den nos kultura mayoria di biaha hende muhé ta traha den kushina so. Pero e hende muhénan akinan ta hasi e mesun trabou ku e hende hòmbernan. Mi ta asombrá di mira hende muhé hasi e trabou di las i pleister muraya. Esaki ta impreshonante!” Algun di e bisiñanan te asta a sinti nan motivá pa kumpra kos di kome i bebe pa e trahadónan akí.

Hopi hende ta apresiá tambe e diseño di nos Salònnan di Reino. Na Nicaragua un ingeniero a bisa e alkalde di un stat ku e Salòn di Reino einan ta un edifisio bunita trahá di materialnan di bon kalidat. De echo, el bisa ku e edifisio akí ta di kalidat mas haltu ku kualke otro edifisio den e stat ei!

Ta klaru ku Testigunan di Yehova mes ta kontentu pa tin lugánan apropiá pa adorá Dios. Nan a ripará ku e studiantenan di Beibel ta mas dispuesto pa asistí na e reunionnan di kongregashon despues ku un Salòn di Reino ser konstruí. Miembronan di un kongregashon na México ku a yuda e sirbidónan di konstrukshon den traha un Salòn di Reino, tabata hopi gradisidu i a bisa: “Nos ta gradisí Yehova pa e privilegio ku nos tabatin di konstruí un Salòn di Reino ku ta duna onor i gloria na su nòmber.”