Testigunan di Yehova ta kere ku e prinsipio- i mandamentunan ku tin den Beibel ta yuda nos tuma desishon ku ta hasi Dios kontentu i nan ta benefisiá nos. (Isaías 48:17, 18) Nos no a inventá e prinsipio- i mandamentunan akí, ma nos ta apliká nan den nos bida sí. Wak algun di nan ku tin di haber ku namorashon. a

•   Matrimonio ta un union permanente. (Mateo 19:6) Testigunan di Yehova ta konsiderá namorashon komo un stap pa matrimonio. P’esei, nos ta mir’é komo un asuntu masha serio.

•   Solamente hende ku tin edat pa kasa por namorá. Nan a “pasa e flor di hubentut,” es desir, e periodo ku deseonan seksual ta mas intenso.—1 Korintionan 7:36.

•   Esnan ku ta namorá mester ta liber pa kasa. Algun hende ku divorsiá legalmente for di nan kasá no ta liber pa bolbe kasa den bista di Dios. Segun e normanan di Dios, inmoralidat seksual ta e úniko motibu bálido pa divorsio.​—Mateo 19:9.

•   Kristiannan ku ke kasa, mester kasa solamente ku un hende ku tin e mesun kreensianan ku nan. (1 Korintionan 7:39) Ku otro palabra, Testigunan di Yehova ta kuminsá un relashon i kasa ku un hende ku tambe ta un Testigu di Yehova batisá i no djis un hende ku ta respetá nan kreensianan. (2 Korintionan 6:14) Semper Dios a pidi su sirbidónan pa kasa solamente ku hende di e mesun fe. (Génesis 24:3; Malakías 2:11) Ademas, ekspertonan a komprobá ku e mandamentu akí ta práktiko. b

•   Yunan mester obedesé nan mayornan. (Proverbionan 1:8; Kolosensenan 3:20) Yunan ku ainda ta biba na kas mester obedesé reglanan ku nan mayornan ta pone tokante namorashon. Esaki ta inkluí e edat ku un yu por kuminsá namorá i kiko su mayornan ta permitié hasi.

•   Testigunan ta disidí pa nan mes si nan ke namorá i ken nan ke namorá i nan ta tuma e desishon ei basá riba normanan di Beibel. Esaki ta na armonia ku e prinsipio: “Kada ken lo karga su propio karga di responsabilidat.” (Galationan 6:5) Apesar di esei, hopi di nan ta pidi otro Testigunan madurá ku tin nan bienestar na pechu pa konseho.​—Proverbionan 1:5.

•   Hopi kos ku hende awendia ta konsiderá komo parti di namorashon eigenlijk ta piká grave. Por ehèmpel, Beibel ta prohibí inmoralidat seksual. Esaki no ta referí solamente na relashon seksual entre persona ku no ta kasá, e ta referí tambe na karisiamentu di órganonan seksual di un otro persona ku no ta bo kasá i na sèks oral òf anal. (1 Korintionan 6:9-11) Asta eksitashon seksual entre hende ku no ta kasá di otro sin ku e yega na inmoralidat seksual ta “impuresa” ku Dios no ta keda kontentu kuné. (Galationan 5:19-21) Beibel tampoko no ta aprobá kòmbersashon inmoral ku tin “palabra baho.”​—Kolosensenan 3:8, Beibel na papiamentu koriente.

•   Nos kurason, e persona ku nos ta di paden, ta traishonero. (Yeremías 17:9) E por laga un hende hasi kos ku e sa ku ta robes. Pa evitá ku e kurason ta hiba un pareha ku ta namorá na hasi kos malu, nan mester evitá di ta nan so den situashonnan ku por hiba na inmoralidat seksual. Nan por tuma prekoushon dor di keda den un grupo òf skohe un hende pa kompañá nan. (Proverbionan 28:26) Kristiannan soltero ku ke kasa ta rekonosé e peliger di buska un pareha riba Internet, spesialmente e peliger di desaroyá un relashon ku un hende ku kasi nan no konosé mes.​—Salmo 26:4.