Amor pa Dios i pa nos próhimo ta loke ta motivá nos komo Testigunan di Yehova pa papia ku tur hende tokante e mensahe di Beibel, inkluso esnan ku a bisa ku nan no ta interesá. (Mateo 22:37-39) E amor ku nos tin pa Dios ta motivá nos pa obedesé e mandamentu di su Yu pa “duna testimonio kabal.” (Echonan 10:42; 1 Huan 5:3) Pa nos por obedesé e mandamentu akí, nos ta hiba e mensahe di Dios na tur hende vários biaha, meskos ku Dios su profetanan di antigwedat a hasi. (Yeremías 25:4) Nos ta stima nos próhimo, i esei ta motivá nos pa kompartí e ‘bon notisia di e Reino’ ku por salba bida di hende, inkluso esnan ku na promé instante no ta interesá.—Mateo 24:14.

 Hopi biaha sa pasa ku ora nos bolbe bèk na kasnan kaminda niun hende a mustra interes, nos ta topa hende ku sí kier skucha. Laga nos wak dikon esaki ta pasa:

•   Hende ta muda.

•   Otro miembro di famia ta mustra interes den nos mensahe.

•   Hende ta kambia di pensamentu. E kosnan ku ta pasa den mundu òf sirkunstansianan personal por pone ku algun hende ta bira mas “konsiente di nan nesesidat spiritual” i ke sa mas tokante Beibel. (Mateo 5:3) Te asta esnan ku normalmente ta hopi kontra di nos mensahe por kambia di opinion, meskos ku apòstel Pablo.—1 Timoteo 1:13.

 Sinembargo, nos no ta obligá niun hende pa skucha nos mensahe. (1 Pedro 3:15) Nos ta pensa ku kada ken mester tuma su mes desishon tokante religion.—Deuteronomio 30:19, 20.