Testigunan di Yehova no ta partisipá den guera pa e siguiente motibunan:

1.   Nos ta obedesé Dios. Beibel ta bisa ku e sirbidónan di Dios “lo bati nan spadanan traha plug ku nan” i “nunka mas nan lo train pa guera.”—Isaías 2:4, Beibel Santu.

2.   Nos ta obedesé Hesus. Hesus a bisa apòstel Pedro: “Hinka bo spada bèk na su lugá, pasobra ken ku usa spada lo muri pa medio di spada.” (Mateo 26:52) Asina Hesus a mustra ku su siguidónan no mester usa arma.

    Hesus su disipelnan ta obedesé su mandamentu pa “no ta parti di mundu” i ta keda estriktamente neutral den asuntunan polítiko. (Huan 17:16) Nan no ta protestá kontra gobièrnu ora gobièrnu disidí di tuma akshon militar ni nan no ta kontra hende ku ta skohe pa drenta servisio militar.

3.   Nos tin amor pa próhimo. Hesus a manda su disipelnan pa “stima otro.” (Huan 13:34, 35) Komo resultado, nan lo bira un hermandat internashonal den kua ningun miembro hamas lo bai guera i bringa kontra su ruman.—1 Huan 3:10-12.

4.   E kristiannan di promé siglo no a bai guera. Encyclopedia of Religion and War ta bisa: “E promé siguidónan di Hesus a nenga di bai guera i drenta servisio militar,” pasobra nan a komprondé ku esei “no ta kuadra ku e mandamentu di Hesus pa stima bo próhimo i bo enemigunan.” Asina tambe, Peter Meinhold, un teólogo aleman, a bisa lo siguiente tokante e promé disipelnan di Hesus: “Pa nan, bo no por tabata un kristian i a la bes un sòldá.”

 Testigunan di Yehova ta miembronan útil den komunidat i no ta forma un peliger pa e siguridat di e pais kaminda nan ta biba. Nos ta respetá outoridatnan gubernamental di akuerdo ku e siguiente mandamentunan bíbliko:

•   Ser “sumiso na outoridatnan superior.”—Romanonan 13:1.

•   “Duna Sésar loke ta di Sésar, ma Dios loke ta di Dios.”—Mateo 22:21.

 P’esei, nos ta obedesé lei, paga belasting i kooperá ku medidanan ku gobièrnu ta tuma pa perkurá pa e bienestar di pueblo.