1, 2. Ngera uchul me ngungil a deblechoel el oker a ker?

NGMLA ta el momtab er a rengalek sel loker a ker? Te betok a omuchel el loker a ker sel kot el mo mengedecheduch. Te ngellomel er kau e oker el kmo: Ngera me a btuch a omsisebusech? Ngera me a eabed a merael? Ngtecha ullisechakl a charm el suebek el mo mengitakl? Me alta e ke melasem el onger, engdi ngmeringel. E le ungil el nger er kau a mo uchul a lmuut el ta er a ker el kmo: E ngerang?

² Ngdiak el di el ngalek a oker a ker, e le dorael el mo meklou, e kede melemolem el oker a tekoi. Kede oker me bo el sebeched el metik a roled, e mo medengei a kengaol el tekoi me doibngid er ngii, e mo metik a nger er aike el tekoi el soad el mo medengei. Engdi te betok el chad a mla mo diak  el oker a ker, el ileakl aike el meklou a ultutelel el ker e dikea el osiik a nger er aika el tekoi.

3. Ngera uchul me a rebetok el chad a dikea el osiik a nger er aike el meklou a ultutelel el ker?

³ Ka molatk er sel ker el ngar er a medal tia el babier, me aike el ngar er a uchelel tia el babier, me a uchelel tia el bliongel. Aikang a bebil er aike el meklou a ultutelel el ker el sebechem el oker, engdi te betok el chad a mla mo diak el osiik a nger er ngii. E ngerang? Ke metik a nger er ngii er a Biblia? A rebebil a melatk el kmo ngmeringel a bo dodengei a nger er ngii. Me a rekuk bebil a bekikl el oker e le ngchetirir el mo merur. Me a rebebil a melatk el kmo a chouaika el ker a ungil el di mengeteklel a klechelid me a resensei a oker. E kau a ua ngera uldesuem?

4, 5. Ngera bebil er a meklou a ultutelel el ker er a klengar el sebeched el oker, e ngera uchul me ngkired el osiik a nger er ngii?

⁴ Ke locha soam el mo medengei a nger er aike el meklou a ultutelel el ker el kirel a klengar. Ke ulterekokl el melatk a lebebil er a taem el kmo: ‘Ngngera moktek er a klengar? Ngdi tiaikid a klengar? A Dios ngua ngera blekerdelel?’ Ngungil a omolemolem el oker a chouaika el ker el dimerekmo obetik a ulterekokl el nger er ngii. A Jesus Kristus a dilu el kmo molemolem el ‘olengit, me le beskemiu; e mosiik me bo betik; e molngod er a chesimer, me lobkais el kiriu.’​—Mateus 7:7, BT.

⁵ A lsekum ke melemolem el ‘osiik’ a nger er aika el ker, e ke mo ngmai a omeksullem. (Osisechakl 2:1-5) Me alta rechad a kakerous a uldesuir, engdi ngngar er ngii a nger er ngii, e sebechem el metik er a chelsel a Biblia. Aika el nger a beot er kau a mo  medengei e mo uchul a omelatk me a deurreng el kirem. Ngsebechel el ngosukau el mo ungil a klengar er kau er chelechang. Me bo dosaod er a ker el kmal mengesang er a uldesuir a rebetok el chad.

6. Ngera uchul me a rebetok a omdasu el kmo a Dios a diak el omekerreu er kid a dechelebangel a ringel?

⁶ Te betok a omdasu el uaisei. E le te kmo, ‘A lsekum a Dios a omekerreu er kid, e ngera me a beluulechad a uaisei?’ A domes el meliuekl er kid e a beluulechad a mui er a mekemad, me a klauketui, me a chelebuul. Me kid a mo smecher, e mo chuarm, me a rebetik er a rengud a mad. Sei a uchul me a rebetok a melekoi el kmo, ‘A lsekum a Dios a mera el omekerreu er kid, e ngera me ngdiak el terob aika el tekoi?’

7. (a) Te mekerang a rullisechakl a tekoi er a klechelid e rulleterir a rechad el mo omdasu el kmo a Dios a mekngit a blekerdelel? (b) Ngerang mera el lolisechakl a Biblia el kirel aike el ringel el bo decharm?

⁷ Ngklengiterreng, e le rullisechakl a tekoi er a klechelid a lebebil e te rulleterir a rechad el mo omdasu el kmo a Dios a mekngit a blekerdelel. Ngmekera loruul el uaisei? Sel duubech a chelebuul, e te blechoel el melekoi el kmo ngkuk mlo kirel er a Dios. Me nguaisei, te ua loltelechakl er a Dios el kirel aike el mekngit el tekoi el duubech. A Dios ngmera el uaisei? Ngngerang mera el lolisechakl a Biblia? A Klengiterreng 3:33 a melekoi el kirel a Dios el kmo: “Ng diak ledeu a rengul el omekringel e omekcharm er kid.” Me a Dios a kmal diak el luchul aika el mekngit el blekeradel er a beluulechad. (Monguiu er a Job 34:10-12.) Me nguaisei engdi ngomechei aika el  mekngit el blekeradel me ngar er ngii. Engdi ngngar er ngii a klou el klekakerous er a omechei a tekoi me ngngar er ngii me a meruul er ngii el tekoi.

8, 9. (a) Ngmekera omomekesiu er a klekakerous er a chad el omechei a mekngit me ngmelemolem me ngike el uchul a mekngit? (b) Ngera me ngdiak el sebeched el melekoi el kmo, a Dios a mekngit e le ngomechei er a rechad me te oltirakl er a mekngit el rolel a klengar?

⁸ El di uai tiang, ka molatk er a kmal betik a rengul el chedam el ngar er ngii a klou el ngelekel el dirk kiei el obengterir. Ngii el ngalek sel bo el lomtok er tir e ltobed el mo osiik a ngodech el delengchokl, e a demal a diak lorrob er ngii. Me sel lengiltii a klengar el mo uchul a telemellel, e a demal ngmle uchul tia el tekoi? Ngdiak. (Lukas 15:11-13) Me ngdi osisiu, a Dios a dimlak lorrob er a rechad er a lolilt el mo oltirakl er a mekngit el rolel a klengar, me ngii a diak el uchul a mondai el mo er ngii el omerellir a uchul. Me ngkmal cheleuid el tekoi a doltelechakl er a Dios el kirel a rokui el mondai el ngar er ngii.

⁹ Ngngar er ngii a ungil el uchul me a Dios a omechei er a rechad me te oltirakl er a mekngit el rolel a klengar. Ngii el Ulemeob er kid a uchul me ngsebechel diak louchais er kid. Engdi ngbetik a rengul er kid me ngmeruul el nguaisei. Ke lmuut el mo mesuub a betok el ngar er a 11 el Bliongel. Me bo lulterekokl a rengum el kmo a Dios a diak el uchul a mondai el dechelebangel. Ngbai meskid a omelatk el kirel a semecheklel a mondai er kid!​—Isaia 33:2.

10. Ngera uchul me ngsebeched el oumerang el kmo a Dios a mo okngemed a rokui el mekngit?

¹⁰ Me a Dios a chedaol. (Isaia 6:3) Tiang a belkul a kmo ngbliochel e klikiid, el diak el chelsechusem er  a klengit. Me ngkmal sebeched el mui el oumerang er Ngii. Engdi a rechad a diak el uaisei e le tir a mo chebirukel a omerellir. Ngmo lmuut er ngike el kot el melemalt el merreder me ngdiak a klisichel el sumechokl a telemellir a remekngit el chad. Engdi a Dios a olab a bek el klisiich. Me ngsebechel, e ulterekokl el mo okngemed a rokui el mekngit!​—Monguiu er a Psalm 37:9-11.

11. (a) Ngera osengel a Dios el kirel a chelebirukel? (b) Ngua ngera osengel a Dios el kirel a ringel el mchelebangel?

¹¹ Me ngua ngera osengel a Dios el kirel a blekeradel er a beluulechad me a dirrek el tekoi er a chelsel a klengar er kau? A Biblia a olisechakl el kmo a Dios a ‘betik a rengul er a llemalt.’ (Psalm 37:28) Ngkmal biusech a medal er a llemalt me a chelebirukel. Ngouketui a rokui el bedengel a chelebirukel. A Biblia a melekoi el kmo a Dios a “kmal uluuchel er a rengul” er a lomes a chelebirukel el ngar tia el beluulechad. (Genesis 6:5, 6) A Dios a dirkak el mengodech. (Malakai 3:6) Ngdirk chetil el omes a ringel el ngar tia el beluulechad. E kmal diak el soal el omes er a rechad el chuarm. A Biblia a kmo: ‘Ng kerekikl el omekerreu er kau.’​—Monguiu er a 1 Petrus 5:7.

12, 13. (a) Ngera uchul me ngngar er ngii a ungil el blekerdeled el ua bltikerreng? E mekerang a bltikerreng e ngar er ngii a lerellii er a osenged er a beluulechad? (b) Ngera uchul me ngsebechel el mo ulterekokl el rengum el kmo, a Dios a ngar er ngii a bo el rellii el kirel aika el mondai er a beluulechad?

¹² Kede mekerang e medengei el kmo a Dios a ouketui a ringel? A Biblia a olisechakl el kmo a chad  a ulebeob el okesiul a Dios. (Genesis 1:26) Me kede olab a ungil el blekeradel e le Dios el olab ngii el ungil el blekeradel. El di uai tiang, ngkora meringel er kau el meseterir a rediak a telemellir el chad el chuarm? A lsekum ngmeringel er kau, e bo lulterekokl a rengum el kmo a Dios a lmuut el meringel er ngii.

¹³ A ta er a kot el ungil el blekerdeled a rechad a sel duch er kid el oubltikerreng. Tiang a dirrek el blekerdelel a Dios. A Biblia a olisechakl el kmo a “Dios a bltikerreng.” (1 Johanes 4:8) Kede oubltikerreng e le Dios el oubltikerreng. Ngsebechel a bltikerreng el rullau el mo torob a ringel me a chelebirukel el momes er a beluulechad? A lengar er ngii a klisichem, e ke mo rullii? Ke ulterekokl el mo meruul el uaisei. Me bo lulterekokl a rengum el kmo, a Dios a mo torob a ringel me a chelebirukel. Aike el tekoi el ngar er a uchelel tia el babier a diak di el ua leberrous el tekoi. A telbilel a Dios a mo tmaut! Engdi uchei er a omotuil a klaumerang er kau er ngii, e ngkirem el mo medengei a lmuut el betok el kirel ngike el mirruul aika el telbiil.

14. Ngtecha ngklel a Dios, e ngera uchul me ngkired el ousbech er ngii?

¹⁴ A lsoam a chad a bo lodengelkau, e ke mo mekerang? Ngdiak mouchais er a ngklem er ngii? Me a Dios ngngar er ngii a ngklel? Ngbetok el klechelid a onger el kmo ng “Dios” me a lechub e ng “Rubak,” engdi aikang a dui, el di ua “king” me a “president.” A Biblia a olisechakl el kmo a “Dios” me a “Rubak” a bebil er a dial engdi ngngar er ngii a mera el ngklel,  el Jehovah. A Psalm 83:18 a kmo: “Ng di kau el tang a RUBAK, ke ngarbab el merreder er a beluulchad el rokir.” A lsekum a oidel a Biblia el mousbech er ngii a diak tiaikid el ngakl er a chelsel, e nglocha mo soam el omes er a suobel el ngar er a Bebil er a Omesodel el dai er ngii a kmo, “A Belkul me a Usbechel a Chedaol el Ngklel a Dios” el mo medengelii a uchul. A mera er ngii, tia el ngklel a Dios a debetik er ngii el betok el telael el taem er a chelsel aike el manuscript er a Biblia. Me a Jehovah a soal a bo dodengelii a ngklel e dousbech er ngii. Me ngousbech er a Biblia el olecholt er Ngii er kau.

15. Ngngera belkul tia el ngakl el Jehovah?

¹⁵ A Dios a oungakl er a ngakl el ngar er ngii a klou el belkul. Tia el ngklel el Jehovah a belkul a kmo, a Dios a sebechel el mo oltaut a ngii di el telbilel e kutmokl a ngii di el moktek er ngii. * Me a ngklel a Dios a kmal ileakl e di ngii el tang a oungakl er ngii. Me a Jehovah a dirrek el kmal ileakl el ngar er a betok el rolel. Ngmekera e uaisei?

16, 17. Ngera sebeched el suub el kirel a Jehovah el oeak aika el dial el: (a) “Rubak el Dios, el Olab a Bek el Klisiich”? (b) “King ra ikel bek el taem, el ngikel diak le ngemed”? (c) Ulemeob?

¹⁶ A Psalm 83:18 a melekoi el kirel a Jehovah el kmo: “Ke ngarbab  el merreder er a beluulechad el rokir.” Me nguaisei, ngdi ta el Jehovah a mokedong el kmo: “Rubak el Dios, el Olab a Bek el Klisiich.” Me a Ocholt 15:3 a kmo: “Rubak el Dios, el Olab a Bek el Klisiich, a urerem a meklou e mengasireng! King er a ikel beluu er a beluulchad, a rolem a melemalt e merang.” Me tia el dui el “Rubak el Dios, el Olab a Bek el Klisiich” a olisechakl er kid el kmo, a Jehovah a kot el mesisiich e kot el ngarbab. Ngdirrek el ngar er a 1 Timothy 1:17, e a Jehovah a okedongall el “King ra ikel bek el  taem, el ngikel diak le ngemed.” Tia mekltkid el kmo a Jehovah a ileakl el ngar er a kuk ta er a rolel. Ngdi ngii el tang a dimla ngar er ngii er a irechar el mei. A Psalm 90:2 a kmo: “E kau a diak a ulebengelem el Dios, el diak a uchelem el diak a ulebengelem.” Ngdiak el mechas a rengud er aika el blekerdelel a Jehovah?

¹⁷ A Jehovah a dirrek el kmal ileakl e le ngdi ngii el tang a Ulemeob. A Ocholt 4:11 a kmo: “Rubak el Dios er kemam! Kau a kirem a klebkall, ma odanges, ma klisiich. Ele kau a mileob a rokui el tekoi, e uleltirakl  a tekingem e ng dilubech el mlor ngii a klengar er ngii.” Aike el rokui el sebechem el dobedebek, el ngar er a eanged el mei er a chutem el mo lmuut er a chelsel a daob me a omoachel, ngii el rokui el ngar er ngii e le Jehovah el Ulemeob!

18. Ngera uchul me a rebebil a omdasu el kmo ngkmal diak el sebechir el mo kmeed er a Dios, engdi ngera ngolisechakl a Biblia?

¹⁸ A rebebil a kora mo medakt sel longuiu el kirel aika el betok el mengasireng el blekerdelel a Jehovah. Te omdasu el kmo a Dios a kmal chetengakl me ngdiak el sebechir el mo kmeed er ngii me a diak a ultutelir er ngii. Engdi a chouaisei el uldasu, ngmelemalt? Ngdiak, e le Biblia a melekoi el kirel a Jehovah el kmo: “Dios a diak le cheroid er a derta er kid.” (Rellir 17:27) Ngdirrek el melisiich er kid el kmo: “Molekeed er kemiu er a Dios, me bo lekeed er kemiu.”​—Jakobus 4:8.

19. (a) Kede mekerang e mo olekeed er kid er a Dios? E ngera el klungiaol a mo er ngii? (b) Ngera el blekerdelel a Dios a kmal soam?

¹⁹ Ke mekerang e sebechem el mo kmeed er a Dios? A kot, e molemolem el mesuub el kirel. A Jesus a dilu el kmo: “A diak a ulebengelel klengar a belkul a kmo, bo lodengelkau el di ta el meral Dios, e bo lodengelii a Jesus Kristus el ngikel mulderchii el mei.” (Johanes 17:3) Me a dosuub el kirel a Jehovah me a Jesus e ngsebechel el mo uchul a “diak a ulebengelel klengar.” Me ngdi ua dulsaod er ngii er a uchei, “a Dios a bltikerreng.” (1 Johanes 4:16) Ngdirrek el ngar er ngii a lmuut el bebil er a klebokel el  blekerdelel. A Biblia a melekoi el kmo a Jehovah a ‘mui er a blekokuii ma klechubechub, el diak le mereched el ngmasech a rengul, e olecholt er a blechoel bltikerreng.’ (Exodus 34:6) Ngdirrek el “ungil, e ousubes a tellemall.” (Psalm 86:5) Ngklou a rengul. (2 Petrus 3:9) E oba blakerreng. (Psalm 18:25) A omolemolem el menguiu er a Biblia, e ke mo mesa el kmo ngmekerang a Jehovah a lolecholt a lmuut el betok el ungil el blekerdelel.

20-22. (a) Kid el diak desang a Dios, ngbelkul a kmo ngdiak el sebeched el mo kmeed er ngii? Mosaod. (b) A rebebil er a rechad te mo melasem el mekerang? Engdi ke mo mekerang?

²⁰ Nguaisei, ngdiak el sebechem el mesa Dios e le ng reng. (Johanes 1:18; 4:24; 1 Timothy 1:17) Engdi sel mosuub el kirel el oeak a Biblia, e ke mo medengei a blekerdelel. A ta er a milluches er a psalm a dilu el kmo, ke mo ‘mechas a rengum er a klungiolel.’ (Psalm 27:4; Rom 1:20) Me sel monglou er a klemedengei er kau el kirel a Jehovah, e ngmo mera el chad er a rengum e mera el mo betik a rengum er ngii e mo soam el mo kmeed er ngii.

²¹ E ngmo sebechem el mo medengelii a uchul me a Biblia a olisechakl er kid el mo omes er a Jehovah el ua el Demad. (Mateus 6:9) Ngii a meskid a klengar e soal a kot el ungil el klengar el kired, el di ua betik a rengul el chedam. (Psalm 36:9) A Biblia a dirrek el olisechakl el kmo ngsebeched el mo sechelil a Jehovah. (Jakobus 2:23) Ka molebedebek er tiang, ngsebechem el mo sechelil Ngike el Ulemeob!

²² Sel molemolem er a omesubem, e a rebebil a mo melasem el merrob er kau. Ngdiak el sorir a bo  mngedechii a klaumerang er kau. Engdi lak bechititerir me leterebengau, me lak el bo er ngii a ungil klausechelei er kau me a Jehovah.

23, 24. (a) Ngera uchul me ngkirem el blechoel loker a ker a lebo el rrau a rengum? (b) Ngera kede mo mesuub er a ongingil el bliongel?

²³ Ngulterekokl el mo er ngii a tekoi el mo diak el bleketakl er a rengum er a uchelel, engdi lak omerur el loker. A Jesus a dilu el kmo ngungil a bo lengariou a rengud el ua rengalek. (Mateus 18:2-4) E kid a medengelterir a rengalek el di oker a ker. A Dios a soal a lemonger a kerim. A Biblia a chemat er a rebebil el mle kerekikl el merriter a bades el omes el kmo a tekoi el lulsuub ngmera el mle klemerang me a lechub e ngdiak.​—Monguiu er a Rellir 17:11.

²⁴ Me sel kot el ungil el rolel a dosuub el kirel a Jehovah a bo dorriter er a Biblia, el ngii a ileakl er a rokui el babier. Ngoeak a ngera el rolel? A ongingil el bliongel a mo mesaod er tia el tekoi.