NGERA osengem el kirel a Sils er a Kerrekeriil? A rebetok a omdasu el kmo, tia sel sils el redersta el chad a mo er a medal a Dios e ngii a mo oukerekeriil er tir. Me te ngar er ngii a rebebil el mo nguu a klengar er a eanged me a rebebil el mo mukcharm el diak a ulebengelel. Engdi a Biblia a ngodech a omesodel el kirel tiang. A Tekingel a Dios a ochotii el kmo, tia diak el taem er a dakt, e ngbai taem er a omelatk el kirel a beluulechad el lmuut el mo oltirakl er sel dimla moktek er a Dios.

Ngar er a Ocholt 20:11, 12, BT, e kede menguiu er a omesodel a apostol el Johanes el kirel a Sils er a Kerrekeriil el kmo: “Ak dirrek el milsa kloul becheleleul kingall me ngikal dengchokl er ngii; e a chutem ma eanged a chiliis er medal, e mlo diak le betik a le bor ngii. E dirrek el milseterir tirikel mla mad el meklou mar mekekerei el dul dechor er medal a kingall, e ulebkais a betok el babier. Ma lmuut el tara babier me ngulebkais, el ngii a babier ra klengar. Mar mla mad a mlukerrekeriil el oltirakl a ikel llechukl er iaikal babier el kirel chomerellir.” Ngtecha ngika el Chad er a Kerrekeriil el losaod er ngii?

A Jehovah el Dios ingii a kot el ngarbab el Chad er a kerrekeriil. Me nguaisei, engdi ngmla tutkii ngike el mo meruul er tia el ureor. Ngar er a Rellir 17:31 e a apostol el Paulus a dilu el kmo, a Dios a “mla tutkii a sils el bo loukerrekeriil er a beluulchad el rokir el oba llemalt, el okiu a tal chad el bla le ngiltii.” Ngika el mla metutk el Chad er a Kerrekeriil a ngike el mlokiis el Jesus Kristus. (Johanes 5:22) Me a leuaisei, e ngoingerang e ngmo  omuchel a Sils er a Kerrekeriil? E mo ua ngerang a klemengetel?

A babier er a Ocholt a ochotii el kmo, a Sils er a Kerrekeriil a mo omuchel er a uriul er a mekemad er a Armakedon, el ngii sel taem el Dios a mo okngemedii a blekeradel er a Satan. * (Ocholt 16:14, 16; 19:19–20:3) Ngdirrek el uriul er a Armakedon, e a Satan me a remekngit el anghel er ngii a mo obidokl er a diak a btil el deliobech el ta el telael el rak. Ngar tiakid el taem, e tirke el 144,000 el chad el milekiis el mo er a eanged, a mo chad er a kerrekeriil e mo “mengedereder el . . . king tir ma Kristus el 1,000 el rak.” (Ocholt 14:1-3; 20:1-4; Rom 8:17) Me a Sils er a Kerrekeriil a diak el 24 el sikang a klemengetel, e ngbai mo er ngii el ta el telael el rak.

Ngar chelsel tiakid el ta el telael el rak e a Jesus Kristus a mo “oukerrekeriil er a re di chad ma re mla mad.” (2 Timothy 4:1) Tirke el “di chad” a melutk el kirel a “kloul seked” el tir tirke el mo suobel er a Armakedon. (Ocholt 7:9-17) A apostol el Johanes a dirrek el “milseterir tirikel mla mad el . . . dechor er medal a kingall” er a kerrekeriil. Me ngdi ua letilbir a Jesus, ngoeak a okiis e “tirkel rokui el mla mad a mo rongesii a ngerel [a Kristus] me te mo tuobed er a debellir.” (Johanes 5:28, 29; Rellir 24:15) Engdi te mo mukerrekeriil el kirel a ngerang?

Ngar sel ues el lilsa apostol el Johanes e ngdilu el kmo, ng “ulebkais a betok el babier . . . mar mla mad a mlukerrekeriil el oltirakl a ikel llechukl er iaikal babier el kirel chomerellir.” (Ocholt 20:12, BT) Aika el babier ngllechukl er ngii aike el lurruul tirka el chad er a ngar er a mong? Ngdiak, a kerrekeriil a diak lultuil er aike el lurruul tirka el chad er a uchei er a lemad. E le Biblia a melekoi el kmo: “Ngikel mla mad a mla mengubet er a  klengit.” (Rom 6:7, BT) Me tirke el mo mekiis a diak a kngterir. Me a leuaisei, aika el babier a locha mesaod el kirel a beches el tekoi el soal a Dios a bo doruul. Me a bo lekiei el mo cherechar tirke el mo suobel er a Armakedon me tirke el mo mekiis, e ngkirir el mo olengesenges a llechul a Dios el uldimukl er aike el beches el tekoi el Jehovah a mo ouchais er kid er a chelsel a ta el telael el rak. Me nguaisei, a rechad a mo mukerrekeriil el kirel a omerellir er a temel a Sils er a Kerrekeriil.

Me a Sils er a Kerrekeriil a mo mesterir a rebetok el biliol el chad a techellir el mo medengelii a soal a Dios e mo meruul er ngii. Tia belkul a kmo, ngmo er ngii a klou el ureor er a osisechakl. Nguaisei, a ‘beluulchad ma re chad er ngii a mo medengei el kmo ng ngera llemalt.’ (Isaia 26:9) Engdi ngdiak el rokui el chad a mo sorir el meruul a soal a Dios. A Isaia 26:10 a melekoi el kmo: “Cho bekokuii el mor a re dengerenger, me tir a di diak bo le meduch el meruul a melemalt. Te ngar tial belurir a re melemalt el chad, e dirrek el di cheleuid omerellir. Ng chetirir el olecholt er a klengarbab er kau.” Tirka el medengerenger a mo mad e diak el lluut el mo ngar er a temel a Sils er a Kerrekeriil.​—Isaia 65:20.

Ngar er a ulebengelel a Sils er a Kerrekeriil, e tirke el rokui el mo suobel a mo “ngar” el mecherrungel. (Ocholt 20:5, BT) Seikid el taem e a rokui el tekoi a mo oltirakl er sel dimla moktek er a Dios el kirel a klechad. (1 Korinth 15:24-28) Ngdirrek el mo er ngii a mo ulebongel el omelsemai. A Satan a mo mekedoked e tuobed er a kelebsengel e mo er ngii a ulebongel el techellel el mo mengeuid er a rechad. (Ocholt 20:3, 7-10) Tirke el mo otngeklii a mo oldeu a rengrir er a cherrungel el otutel a telbiil el ngar er a Biblia el kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.” (Psalm 37:29) Nguaisei, a Sils er a Kerrekeriil a mo uchul a klengeltengat el mo er a klechad!