Ka molatk er tiang: Ngdirk eru el buil er a lebo er ngii a deleuill er a Heather me a Mike, engdi a Heather a omdasu el kmo ngkmal mla mo ungil medengelii a Mike. Te di blechoel el outext e di chadecheduch er a dengua el melai a sikang, me te kmal mla mo ungil kaodengei sel lechadecheduch! Engdi chelechang, e a Mike a mla mo soal a lmuut el betok el tekoi el diak di el cheldecheduch e lemerekong.

Ngar er a chelsel aika el mereko el eru el buil, e a Mike me a Heather a di mle kaiuereked chim e ketungel mad. A Heather a di kilengei aika el omeruul, engdi ngdiak el soal el meruul a tekoi el engelakl er aikang. Engdi ngdirrek el kmal chetil el mo chacheroid ngii me a Mike. Sel lobengkel a Mike, e ngkmal mo melechesuar el kmo ngklebokel e dirrek el kmal ileakl el redil. Me ngmelatk el kmo, ‘Ngak me a Mike a kmal kaubltikerreng . . . ’

Oleko ke mla mo klou el mla mo sebechel el mo er ngii a deleuill er kau me a ta er a chad el ua Heather, e ke mo mekerang sel bo mchebengelii tia el tekoi?

A lsekum ke ngar er a chetebtel a kerrekar e ridekekl el meriou el melasem el suebek el ua suebek el charm, e ke ulterekokl el mo metemall. E tiang a di osisiu el kirel a omellach er a Biblia sel ledu el kmo: “Bo mchedaol: el mekiai a deleboes.”​—1 Thesalonika 4:3, BT.

Ngera telemellel a lak dolengesenges er tia el omellach? A Biblia a kmo: “Ngikel mor a deleboes el delengerenger a mo rullii a klengit el kirel a bedengel.” (1 Korinth 6:18) Me tiang klemerang el tekoi?

 A rechad el merriter a tekoi a mla metik er ngii el kmo, a rebetok el mekekerei el chad el meruul a tekoi er a durs sel dirk lemekekerei a mo chuarm er a tang me a lechub e ngbetok er chouaika el tekoi el beldukl er iou.

• RINGELEL A ULDASU. A ruumesingd er a rengeasek el di mekekerei e meruul a tekoi er a durs a mesaod el kmo te kmal mlo ouuchel a rengrir er a uriul.

• NGMLA MO DIAK A KLAUMERANG ER TIR. Sel uriul er a loruul a tekoi er a durs e te dul mo melatk el kmo, ‘Ngikang ngdirrek el mla mo mechiuaiu el obengkel techang?’

• RRAURRENG. Ngmera el tekoi, a rebetok el mekekerei el redil a bai sorir a chad el omekerreu er tir el diak di bo lolai a klungiolir er tir e lemerekong. E a rebetok el mekekerei el chad a metik er ngii el kmo, ngmereched el mo chetirir ngike el redil el di kongei a rokui el ongterir.

• Engdi molatk er tiang: A lsekum kedi mereched el kongei el mo meruul a tekoi er a durs engdi kau el tomellii a klengar er kau, e dirrek el oridii a ta er a tekoi el kmal mekreos er a klengar er kau. (Rom 1:24) A bedengem a kmal mekreos me ngmeringel a rengul a di lebeot er kau el torekeklii!

Mochotii el kmo, ngkmal soam el mo chedaol er medal a Dios me ke kongei el mengeroid er kau er a deleboes. (1 Thesalonika 4:3) Me sel bo bechiil er a ta er a klebesei, e ngmo sebechem el meruul a tekoi er a durs. E mo dmeu a rengum el meruul aika el tekoi el diak mouuchel er a rengum, e di bekikl me a lechub e lsebek a rengum. E aikang a tekoi el mo duubech er a uldesuel a chad sel di lekekerei e bo loruul a tekoi er a durs.​—Osisechakl 7:22, 23; 1 Korinth 7:3.

• Omomdasu e a chad el mera el betik a rengul er kau, ngkongei el mo melemall er a bedengem me a uldesuem?

• Omomdasu e a chad el mera el omekerreu er kau, ngkongei el mo melemall er a deleuill er kau me a Dios?​—Hebru 13:4.