Ka molatk er tiang: A Thomas a chetil el mo er a skuul er chelecha el sils e di mereko el chetikol el ngar er a skuul. Ngulemuchel er a edei el buil er a uchei er sel taem el bebil el ngalek er a skuul a ulemerk a mekngit el chais el kirel, e tiang a mlo uchul e ngmildibech a ngklel. A lebebil, e a tang a di merael el mo el dibekii a chimal a Thomas me ngobriid a babilengel, e rullii el leko ngdimlak el durengul me a lechub e a rebebil a merael rullel e a ta er tir a di merael el mo odbechii, engdi sel lebeltii a Thomas e ngdiak lodengei kmo ngtecha er tir a mirruul el uaisei. E a chelii e tia el ulecheracheb a telkib el mlo kdekudel, e le Thomas a chiliuii a kdekudel el tekoi el omecheracheb er ngii el ngar er a internet . . .

Oleko ke mle Thomas, e ke mo mekerang?

Ngkmal ngar er ngii a klisichem! E a mera er ngii, e ngsebechem el mtekengelii a chad el omecheracheb el okiu a ta er a tekoi el diak el klakoad. El mekerang?

•   LAKO BEKIKL. A Biblia a kmo: “A kebelung el chad a di ochotii a ngesechel a rengul, ngdi medengei a tekoi el chad a klou a rengul e orekedii a ngesechel a rengul.” (Osisechakl 29:11) Sel molemolem el chelellakl a rengum me lomes er kau tirke el omecheracheb, e nglocha mo diak el sorir el omecheracheb er kau.

• LAKO MOLAITECHEI. A Biblia a kmo: “Lako moba mekngit el omekmad a mekngit el bedul a ngiidi ltechang.” (Rom 12:17, BT) A omelaitechei a di rullii a blekeradel el mengal mo chetituokel.

• BOM CHEROID ER A BASIO EL NGAR ER NGII A MONDAI ER NGII. A Biblia a kmo: “A medengei a tekoi el chad a mo mesa tellemall a le mei e oibngii er ngii.” (Osisechakl 22:3) Bo mkerekikl el mengeroid er kau er a rechad el tir a di omuchel a mondai, e moibngau er aike el blekeradel el sebechel el mo uchul a ulecheracheb.

• MOLASEM EL ONGER ER A TEKOI EL DIMLAK LOMDASU ER NGII. A Biblia a kmo: “A medemedemek el nger a cholleklii a ngasechereng.” (Osisechakl 15:1) Ngsebechem el di ngollekelii a tekoi. El ua tiang, a lsekum e ngika el omecheracheb a kmo ke kmal kedelebuu, e ngsebechem el dmu el kmo, “ngmera el tekoi, ngmla mo kirek el telkib el omeksengaked!”

• MORAEL EL MO ER CHEROID. A 19 a rekil el Nora a kmo: “Sel di mluk e ngochotii el kmo ngklou a klemedengei er kau, e dirrek el kuk mesisiich er ngike el omecheracheb er kau. Ngdirrek el ochotii el kmo, ngsebechem el mtebechelii a rengum el ngii a tekoi el diak er ngike el omecheracheb.”​—2 Timothy 2:24.

• MOLEMOLEM EL MELISIICH ER A RENGUM. A rechad el omcheracheb a sebechir el mereched el dongchii a chad el mechitechut a uldesuel, me tirke el meringel er tir el di tir mesebechakl er tir. Me nguaisei, engdi te mo cheroid er kau a lsekum e te mtebengii el kmo ngdiak besterir a techellir me longedereder er kau.

• MOUCHAIS ER A TA ER A CHAD. A ta er a mle sensei a kmo: “Ak mengelechel er tirke el chuarm er a ulecheracheb el kmo, mouchais er a ta er a chad. E tiang a melemalt el tekoi e dirrek el sebechel el ngosuir a chad me ngmo diak lemucheracheb er a rebebil.”