A uchei er a kodellel, e a Jesus a milengedecheduch el obengterir a reteua er a redisaiplo er ngii el Petrus, Jakobus, Johanes me a Andreas. Sera lomlaoch el kirel a olengchelel a demiel el mo er ngii er a uriul el sils, e nguleker er a klou a ultutelel el ker el kmo: “Ma le ua isei, e ng techa ngikel blak a rengul e mellomes a rengul el mesiou? Ng ngikel chad el mastang er ngii a mla tutkii el mo oungerachel er tirkel bebil er a re mesiou e omesterir a kelir er sel belsechel.” (Mateus 24:3, 45; Markus 13:3, 4) Me a Jesus a millisiich er a redisaiplo er ngii el kmo ngii el “mastang” er tir a uchul me ngmo melilt er tirke el mo omesterir a rultirakl er ngii a okelel a klereng er tir er a taem er a ulebongel. Me te rua techang a toketekii ngika el mesiou?

Ngkekerei el cheldellir a rengellitel el oltirakl er a Jesus. Ngika el “mesiou” a rullii a Chelechad er a Ruungerachel er a Resioning er a Jehovah. Te omesterir a rekldemir el mesiou er a Jehovah a kall er a klereng er sel ungil el blsechel. Me aki ultuil er ngika el blak a rengul el mesiou el mo blechoel el omeskemam a ‘kelam . . . er sel kirel belsechel.’​—Lukas 12:42.

Ngomecheliu er a blil a Dios. (1 Timothy 3:15) A Jesus a milsa ngerechelel ngika el mesiou el mo oungerachel er a ureor er a cheldebechelel a Jehovah el ngar tia el chutem, el oeak sel lomekerreu aike el rokui el kloklel tia el cheldebechel, e lomekrael er a ureor er a berkel a klumech, e lolisechakl er kemam el okiu aike el ongdibel er kemam. Me nguaisei, a “blak a rengul e mellomes a rengul el mesiou” sel lomeskemam a kall er a klereng el okiu aike el babier el ki mousbech sel ki moruul er a omesiungam, me a dirrek el okiu aike el prokuram er a miting me aike el ileakl el ongdibel er kemam, e aki ngmai aike el ki mousbech er sel ungil el blsechel.

Ngika el mesiou a blak a rengul el oltirakl a klemerang er a Biblia e oltaut er a ngerechelel el omerk er a ungil chais, e dirrek el mellomes a rengul el lomekerreu aike el rokui el tekoi el ngar tia el chutem el Kristus a ulelterekokl er ngii. (Rellir 10:42) A ngelsecheklel a ildisir a Resioning me aike el betok el tekoi el omeskemam a Jehovah a olecholt el kmo ngomekngeltengat er a ureor el loruul er ngii a blak a rengul e mellomes a rengul el mesiou.​—Isaia 60:22; 65:13.

• Ngtechang a lullilt er ngii a Jesus el mo omesterir a redisaiplo er ngii a okelel a klereng?

• Ngoeak a ngera el rolel e ngika el mesiou a blak a rengul e mellomes a rengul?