Ngdi kmedung e a Jehovah mo diak loba kllourreng el kirel tia el mekngit el blekeradel. A klsuul klechelid a mo mokngemed, cheldellel aika el renged el rokui a mo oldechelakl er a rechedal a Dios, e a Jehovah mo okngemedeterir a rokui el mekngit er a Armakedon. A Rekristiano kmal omes el beduluchei el kirel aikang.

Nguaisei, ngdiak dodengei a rokui el tekoi el mo duubech er a kloul ringel. El ua tiang, ngdiak dodengei el kmo ngmo omuchel er oingerang. Ngdiak dodengei el kmo ngera te mo melekoi aika el renged er a balatiks lomeklemalt er a uchul me te oldechelakl a klechelid. Ngdiak dodengelii a klemengetel a odechelakl el mora rechedal a Dios me a rolel a odechelakl el bo lousbech. E kmal diak dodengei el kmo ngera ngmo ousbech er ngii a Jehovah lolekngemed er a remekngit er a temel a Armakedon.

Me nguaisei engdi Bades a meskid aike el rokui el dousbech me bo lsebeched lomes el beduluchei loba ulterekokl el reng me a blekeu. El ua tiang, kede medengei el kmo kede kiei er a ulebongel er a “uriul sils.” (2Ti 3:1, BT) Kede medengei el kmo odechelakl el mora klechelid a “kesadel” a temel me lak lemokngemed a mera el klechelid. (Mt 24:22) Kede medengei el kmo a Jehovah mo olsobel er a rechedal. (2Pe 2:9) E medengei el kmo Ngike el lousbech er ngii a Jehovah el mo olekngemed er a remekngit e olsobel er a kloul seked er a temel a Armakedon, a melemalt e mesisiich.​—Och 19:11, 15, 16.

A blekeradel el mo duubech er a ngar medad a uchul me a rechad a “mo diak lodenge rengrir er a dakt.” Me nguaisei engdi sel donguiu e dolebedebek a rolel e a Jehovah ulelsobel er a rechedal er a ngar er a mong me aike el bla louchais er kid el kirel a ngar medad, e ngsebeched el “mekiis el mo dmangesbab,” lulterekokl a rengud el kmo a osebeled a kmedang.​—Lk 21:26, 28.