1. Ngmilekera Abraham e ochotii el kmo ngmle mui el oumerang er a melemalt el kerrekerilel a Jehovah? (Momes er a siasing er a uchelel a suobel.)

“NGIKEL oukerrekeriil er a beluulchad el rokir a kirel meruul a llemalt.” (Genesis 18:25) A blak a rengul el Abraham a uleker er a ker el dimlak lebelkul a kmo ngmle telkib el rrau a rengul. A keril a bai ulechotii el kmo ngmle ulterekokl a rengul el kmo a Jehovah a mo oukerrekeriil er a beluu er a Sodom me a Gomora el ngar er a melemalt e tabesul el rolel. Ngmle ulterekokl a rengul el kmo a Jehovah a kmal diak el sebechel el omals er a remelemalt el ua redengerenger. Ngkmal dimlak leuaisei a uldesuel a Abraham. E a uriul e a Jehovah a dilu el kmo Ngii el “RUBAK a mesisiich el osebechekliu, ng cherrungel e melemalt el ngar a rokui el rolel. A Dios er kemiu a blak a rengul e merang, ng meruul a llemalt ma ungil.”​—Duteronomi 31:19; 32:4.

2. Ngera me ngkmal diak el sebechel a Jehovah el mo chebirukel a tekoi el loruul?

² Ngera me ngkmal mle ulterekokl a rengul a Abraham el kmo, a Jehovah a di blechoel el meruul a llemalt? E le Jehovah a kot el ungil el kerebai el kirel a llemalt. E a tekoi el “llemalt” me a “diak  longebirukel el omeruul” a blechoel el lousbech er ngii er aike el Bades el tekoi er a Hebru el osisiu a belkul. Me a Jehovah a melemalt a llechul a uchul, me ngdi blechoel el melemalt a tekoi el loruul el mo lmuut er a taem el loukerrekeriil. E a Biblia a kmo: “A RUBAK a soal a llemalt ma diak longebirukel el omeruul.”​—Psalm 33:5.

3. Ka msodii a rolel a chelebirukel el ngar er ngii er chelechang.

³ Ngkmal mengelaod a rengud sel dodengei el kmo, a Jehovah a mera el tabesul a loruul a tekoi. Me nguaisei, engdi a beluulechad el dekiei er a chelsel a kmal mui er a chebirukel el omeruul. El ua tiang, te ngar er ngii a rechad el mla mo kelebus el kirel a klengit el dimlak lerellii. Engdi ngoeak a skeng er a DNA, e ngmla obeketakl el kmo a rebebil er tir a dimlak letemellii a tellemall, engdi te mla mekelebus el betok el rak el kirel ngii el klengit. Me a bebil er aika el chebirukel el omeruul a mla mo uchul, a ngasecherreng me a meringel el uldasu. Me nguaisei, engdi ngar er ngii a ta er a chebirukel el omeruul el lmuut el meringel er kid el loutekangel er ngii. E tiang ngerang?

4. Ngmekera e sebechel el measem a klaumerang er a Rekristiano?

⁴ A Rekristiano a omdasu el kmo, a chelebirukel a di meketmokl er a ikrel a ongdibel er a Rekristiano. Me nguaisei, engdi ngmo measem a klaumerang er kid sel domes a chebirukel el tekoi el meketmokl er a chelsel a ongdibel. Me a lsekum e tiang a duubech, e ke mo mekerang? Ke mecherei ngii el tekoi me ngmelibas er kau?

5. Ngera me ngdiak el kirel el mo mechas a rengud sel ledubech a chelebirukel er a chelsel a ongdibel?

⁵ Kid el rokui a diak demecherrungel me kede dirrek el mo remuul a cheleuid, me ngar er ngii a techall el bo domdasu el kmo a chad a rirellii a chebirukel el omeruul el bedulkid, me a lechub e ngkuk kid a mo mekngit a omerelled el bedul a tang er a chelsel a ongdibel. (1 Johanes 1:8) Me nguaisei, engdi aika el tekoi a diak leblechoel el duubech, engdi sel lebo er ngii, e tirke el blak a rengrir el Kristiano a diak bo lemechas a rengrir me a lechub e lemesibas. A Jehovah a mla meskid a ulekrael el ngar er a Biblia el ngosukid, me ngsebeched el melemolem el blak a rengud el mo lmuut er a taem el bo dechermii a chelebirukel el omeruul el mla er a rudam me a rudos er kid.​—Psalm 55:12-14.

6, 7. Ngera el chebirukel el omeruul a lechilarm er ngii a ta el odam, e ngera el blekeradel a ngilsuir?

⁶ Ka molatk er a tekoi el dilubech el mo er a Willi Diehl. Sera uchelel a rak er a 1931, e ngika el odam a ulemuchel el blak a rengul el mesiou el ngar er a Bethel er a Bern er a beluu er a Switzerland. E sera 1946, e ngmlo er sel ongeai el Skuul er a Gilead er a New York, er a beluu er a Merikel. E a uriul er a letobed er tia el skuul, e ngmlo mesiou el odam el oldingel a ongdibel er a beluu er a Switzerland. Me ngar sel cheldecheduch el kirel ngii el Brother Diehl e ngdilu el kmo, sera May 1949, e ngmilsubed er a obis er a Resioning er a Jehovah er a Switzerland el kmo, ngmelatk el mo bechiil. Me tirke el lodam el uluungerachel a dilu er ngii el kmo, ngmo diak el sebechel el meruul aike el ngerechelel el lurruul er sel taem. Ngdi mo sebechel el pioneer e merekong. Me ngdilu el kmo: “Ngmlo diak el sebechek el oltobed a cheldecheduch. E a rechad a mlo diak loutkeu er kemam el di ua le milsuld a ngklam.”

⁷ Me ngmilekerang a Brother Diehl? Ngdilu el kmo: “Aki mle medengei el kmo a chebechiielam a diak lomtok a bades, me aki di mlo ultuil a klaumerang er kemam er a Jehovah e meluluuch el kirel.” Alta e a rebebil er a rudam a dimlak a ungil el klemedengei er tir er a osengel a  Jehovah el kirel a chebechiil, engdi a cherengel a taem, e ngmlo mesmechokl a uldesuir me ngmlo sebechel ngika el odam el lmuut el ngmai aike el dimla ngerechelel er a ongdibel. Me a Jehovah a kmal ulemekngeltengat er ngii el kirel a blakerreng er ngii. * (Momes er a footnote.) Me ngungil a dolatk el kmo: ‘Oleko ak mo chormii a chelebirukel el omeruul, e ngmo klou a renguk e mengiil er a temel a Jehovah el mo sumecheklii a tekoi? Me a lechub ak di mo ultuil er a uldesuek el mo osiik a rolel e ak meklemeltii ngii el chebirukel el tekoi?’​—Osisechakl 11:2; monguiu er a Mika 7:7.

8. Ngera me ngklou a techall el bo lecheleuid a uldesued el omdasu el kmo, kid me a lechub a rebebil a chormang er a chebirukel el omeruul?

⁸ Me a lsekum e ke omdasu el kmo ngar er ngii a bebil el chebirukel el omeruul er a chelsel a ongdibel, e lak mobes el kmo nglocha cheleuid a uldesuem. E ngera uchul? Kede rokui el diak demecherrungel e dirrek el locha diak dungil medengelii a blekeradel el meketmeklang. Ngdirrek el diak a ungil el klemedengei er kid er a klemerang el kirel a tekoi. Alta e ngmelemalt a uldesued me a lak, me kid a di kired el meluluuch el mo er a Jehovah el kirel tia el omeruul, e mo ultuil a klaumerang er kid er Ngii, e dirrek el melemolem el blak a rengud. Ngoeak tiang e ngsebeched el mukerreu me ngdiak bo ‘doltelechakl er a RUBAK.’​—Monguiu er a Osisechakl 19:3.

9. Ngera el tekoi a bo dosaod er tia el suobel me sel ongingil?

⁹ Me bo dosuub el kirel a edei el rolel e a rechedal a Jehovah er a taem er a Biblia a mlo chuarm er a chelebirukel el omeruul. Ngar tia el suobel, e kede mo mesaod er a ngelekel a ngelekel a ngelekel a Abraham el Josef me a tekoi el blo lechebangel er ngii el obengterir a rubekul. E ngar er a ongingil el suobel, e kede mo mesaod el kirel a omerellel a Jehovah el mo er a King el Ahab, me a dirrek el tekoi el dilubech el mo er a Petrus er a lengar er a Antiok er a beluu er a Siria. Me sel dosaod er tirka el chad e ngungil a dolatk er a rolel e ngsebeched el melemolem el ultaut a osenged er a Jehovah, e omekerreu er a deleuill er kid me ngii el ileakl a lsekum kede omdasu el kmo, kede chuarm er a chebirukel el omeruul.

10, 11. (a) Ngera el chebirukel el omeruul a lechilarm er ngii a Josef? (b) Ngera el techall a lengiluu a Josef er a lengar er a kelebus?

¹⁰ A Josef a kmal mle blak a rengul el mesiungel a Jehovah el mlo chuarm er a chebirukel el omerellir a rengodech el chad. Engdi sel kot el mle meringel er ngii omeruul a mekngit el omerellir a rubekul. Sera ledirk el 17 a rekil, e a rubekul a mildechemii e ulterur me ngmlo sibai. E a uriul, e ngmilengai el mo er a Ekipten. (Genesis 37:23-28; 42:21) E ngar er a chelsel tia el ngodech el beluu, e ngmlo kelebus el kirel a ultelechakl el kmo ngmillasem el olterebek er a redil. (Genesis 39:17-20) Me aika el ringel el lechilarm er ngii a Josef a millemolem el bekord el 13 el rak. Me ngera kede suubii er a tekoi el dilubech el mo er a Josef el sebechel el ngosukid er sel taem el bo dechermii a chebirukel el omerellir a rudam er kid?

 ¹¹ Sel taem er a lekelebus a Josef, e ngike el oungerachel er a imelel a king a dirrek el mlo kelebus. E a ta er a kesus e ngika el oungerachel er a imelel a king a ulemerrous, e a Jehovah a ngilsuir a Josef el mo sebechel el smodii a belkul a berrusel ngii el chad. Ngsilodii el kmo, ngika el chad a mo mengubet er a kelebsengel el lmuut el mo mesiou er a Farao. Me a Josef a uluusbech er tia el techall el smodii a blekeradel el lechelebangel er ngii. Me ngsebeched el ngmai a klubeled er a tekoi el ledilu Josef me a dirrek el tekoi el ngii a dimlak el losaod.​—Genesis 40:5-13.

12, 13. (a) Kede mekera e medengei el kmo, a Josef a dimlak di lemereched el kongei er a chebirukel el omeruul el bo lecharm er ngii? (b) Ngera ngdilu Josef el mo er ngike el oungerachel a imelel a king?

¹² Monguiu er a Genesis 40:14, 15. Ngsebeched el mesang el kmo, a Josef a dilu el kmo te “rircherechak.” A tekoi el lousbech er ngii a Biblia a sebechel el belkul a “merechorech.” Me ngmeketeklii el kmo, ngmle chuarm er a chebirukel el tekoi. A Josef a dirrek el mle bleketakl el kmo, ngdimlak a telemellel e mla mekelebus el kirel ngii el klengit. Sei a uchul me ngullengit er ngika el oungerachel a imelel a king me bo louchais er a Farao el kirel. E ngera mle moktek er ngii? Ngdilu el kmo: Me bok “tobed er tial kelebus.”

¹³ Me a Josef, ngdi mle mereched el kongei er tia el blekeradel el lechelebangel er ngii el dimlak loruul a ngii di el ngerang el kirel? Ngdiak! Ngmle ungil medengei el kmo, ngchuarm er a betok el chebirukel el tekoi. Sei a uchul me ngmilsaod er tia el blekeradel el mo er ngike el  oungerachel a imelel a king, e le ngmillatk el kmo ngmo sebechel el ngosuir ngii el Josef. Engdi ngsebeched el mtebengii el kmo, a Josef a dimlak louchais er a ngii di el chad el mo lmuut er a Farao el kmo a rubekul a rirecherechii. E le sera lemei a rubekul er a beluu er a Ekipten e le semecheklii a deleuill er tir me a Josef, e a Farao a milengemedaol er tir el mo kiei er a Ekipten e dilu el kmo a “klungiolel a chutem” a mo kloklir.​—Genesis 45:16-20.

14. Ngera mo omekerreu er kid me ngdiak dedu mekngit el mo er a chad er sel taem el dechuarm er a chelebirukel el omeruul er a chelsel ongdibel?

¹⁴ A lsekum kede omdasu el kmo kede chuarm er a chebirukel el omeruul el ngar er a chelsel a ongdibel, e ngkmal kired el mo kerekikl me lak dosaod er ngii el mo er a rechad. Engdi a lsekum a odam er kid a ruebet er a oberaod el klengit, e ngkmal kired el mo olengit a ngeso er a remechuodel e subedeterir el kirel. (Levitikus 5:1) Me nguaisei, engdi ngbetok el tekoi a duubech el ngii a diak loberaod el klengit, me seikid e ngsebechir a reteru el chad el di tir el sumechii a tekoi el diak el louchais er a ngii di el chad el mo lmuut er a remechuodel. (Monguiu er a Mateus 5:23, 24; 18:15.) Mada me bo leblak a rengud e doltaut a omellach er a Biblia sel leduubech aika el tekoi. A lebebil er a taem, e kede mo mtebengii el kmo ngdimlak a ungil klemedengei er kid er a tekoi, me ngdiak demera el chuarm er a chebirukel el omeruul. Seikid e ngkmal mo ungil a rengud, e le ngdimlak bo duchul el lluut el mo meringel a blekeradel e le kid el dilu mekngit el bedul a odam er kid! Lak dobes, a dungil me a demekngit, me ngdi mo uchul a klengiterreng a lsekum kede dmu mekngit el tekoi e bai di rullii a tekoi el lmuut el mo chetituokel. Me a blakerreng er kid el mo er a Jehovah me a rudam er kid, a omekerreu er kid me ngdiak derellii tia el cheleuid el tekoi. A ta er a milluches er a psalm a mesaod el kmo, ngar er ngii a “chad el . . . blechoel di meruul a melemalt.” Me a chad el uaisei a blekerdelel a “diak lolaes er a re bebil er a re chad . . . ma ka lomerk a klsuul el chisir a re ngar bita er ngii.”​—Psalm 15:2, 3; Jakobus 3:5.

15. Ngmekera deleuill er a Josef me a Jehovah e mlo klengeltengat?

¹⁵ Ngsebeched el suubii a lmuut el ta er a klou a ultutelel el tekoi er a blekerdelel a Josef. Ngar er a chelsel aike el 13 el rak el lecharm er a chelebirukel, e ngulechotii el kmo ngulemes a tekoi el ua osengel a Jehovah. (Genesis 45:5-8) Ngdimlak a ta el bo loltelechakl er a Jehovah el kirel a tekoi el blo lechelebangel er ngii. Nguaisei, ngmillatk er a chelebirukel el tekoi el lecharm er ngii, engdi ngdimlak lebechei aika el tekoi me lerellii el mo mekngit a uldesuel. E a ngaruchei, e ngdimlak lebechei a chelitecheterir me a mekngit el omerellir a rechad, me bo luchul e loridii a kmes el deleuill er ngii me a Jehovah. Me a blakerreng er a Josef a mlo uchul me ngmlo er ngii a techellel el mesa Jehovah el sumecheklii a chelebirukel, e dirrek el ulemekngeltengat er ngii me a telungalek er ngii.

16. Ngera me ngkmal kired el lmuut el mo olekes er a deleuill er kid me a Jehovah, sel bo decharm er a chelebirukel er a chelsel a ongdibel?

¹⁶ Me ngdi osisiu, ngkmal kired el mo omekerreu e mengreos er tia el deleuill er kid me a  Jehovah. Ngkmal diak el kired el mechei a chelitecheterir a rudam er kid me bo luchul, e doridii a kmes el deleuill er kid me ngika el betik er a rengud el Dios el dongull er ngii. (Rom 8:38, 39) Me a lsekum kede mo chuarm er a chebirukel el omeruul er a chelsel a ongdibel, e bo doukerebai er a Josef el lmuut el olekes er a deleuill er kid me a Jehovah. Dolasem el mo omes a tekoi el ua osengel a Jehovah. Sel dodengei el kmo kede mla remuul aike el sebeched el kirel a tekoi el oltirakl a omellach er a Biblia, e ngmocha taem el debecherei a Jehovah me loungerachel er ngii. Ngulterekokl a rengud el kmo ngmo sumecheklii er sel kot el ungil temel el ngar er a rolel er Ngii.

17. Kede mekerang e ochotii el kmo kede oumerang er “ngikel oukerrekeriil er a beluulchad”?

¹⁷ Me a klemengetel a taem el dekiei er a chelsel tia el mekngit el beluulechad, e kede ungil medengei el kmo kede mo chuarm er a chebirukel el omeruul. Nglocha diak deblechoel el mo chelebangel a chelebirukel el omeruul er a chelsel a ongdibel. Engdi a lsekum e ngmo uaisei, e lak demesibas. (Psalm 119:165) Bai bo leblak a rengud el mo er a Dios, e doluluuch el olengit a ngeso e bo dultuil er ngii. Lak dobes el kmo, kid el diak demecherrungel a uchul me nglocha sebechel el mo cheleuid a uldesued el kirel a tekoi, e dirrek el locha diak dodengei a rokui el tekoi el dilubech. Bo doukerebai er a Josef, e dongeroid er kid er a mekngit el tekoi el di sebechel el rullii a tekoi el mengal mo chetituokel. Me lak dolasem el di kid el ultuil er a di kid, e bai bo leblak a rengud e leklou a rengud el mengiil er a Jehovah el mo sumecheklii ngii el mondai. A bo deuaisei, e kede nguu a kengei er a Jehovah e ngii a mo omekngeltengat er kid el ua lurruul el mo er a Josef. Ngsebechel el mo ulterekokl a rengud el kmo, a Jehovah el “ngikel oukerrekeriil er a beluulchad” a di blechoel el meruul a llemalt, e le “ng cherrungel e melemalt el ngar a rokui el rolel.”​—Genesis 18:25; Duteronomi 32:4.

18. Ngera kede mo mesaod er a ongingil el suobel?

¹⁸ Ngar er a ongingil el suobel, e kede mo mesaod a lmuut el eru el kerebai er a rechedal a Jehovah el mle chelebangel a chelebirukel el omeruul er a taem er a Biblia. Aikang a mo ngosukid el mo mesang sel rolel, e a klengariourreng me a klausubes a sebechel el ngosukid el mo oukerebai er a osengel a Jehovah el kirel a llemalt.