A SEBEKRENG a sebechel mo ua klou el berraod el mekberedii a rengul a chad. (Osi. 12:25) Kau, ke mla chormii a ringelel a sebekreng? A lebebil e ke mo omdasu el kmo, ngmla mo diak el sebechem el mtekengelii? A le uaisei e ngkmal diak di lekau el tang omdasu el uaisei. A rebetok er kid a locha mla mo omekerreu er a smecher, mla mad a betik er a rengud, chuarm er a telemellel a beluu, me a lechub e ngta er a blekeradel el ngii a uchul me ngmesaul a bedenged, rengud, me a uldesued. Engdi ngngera sebechel ngosukid el outekangel sel bo lsebek a rengud? *

Ngsebeched el suubii el mo meduch loutekangel er a sebekreng sel dorriter er a kerebai er a King David. Ngika mlo chobangel a betok el meringel el blekeradel el bebil er ngii a mle sebechel mo uchul a klengar er ngii. (1 Sa. 17:34, 35; 18:10, 11) Ngera ngilsuir loutekangel a sebekreng? Ngmekera sebeched loukerebai er ngii?

A David a mle chelebangel a kakerous el mondai er a osisiu el taem. Molatk er a tekoi el dilubech er a lechiis er a King Saul. A David me a rechedal er a bo rrei er uriul er a loumekemad e te miltik el kmo a recherrouir a mla ruchorech a kloklir, sueseb a blirir, e ngoititerir a rechedal a telungalek er tir. Ngmilekera David? “David ma re chedal el ulebengkel a uleldiu el lmangel el dimlak bo le chelellakl el mor a lekea klisichir el lmangel.” A dirrek el dilechelir a sebekreng er ngii a “re chedal a mlo melekoi a otechel er a bad.” (1 Sa. 30:1-6) Me a David a mle chelebangel a edei el tekoi er osisiu el taem: Tellemall el mora telungalek er ngii, rechedal a mo el mekodir, me a King Saul el oltoir er ngii. Molatk er a sebekreng el luleba David!

Ngngera mirruul er ngii? Ngdi mle mereched el mo ‘smisichii a rengul er a RUBAK el Dios er ngii.’ Ngmilekera David e meruul er tiang? A David a mle blekerdelel meluluuch el mora Jehovah el kirel a ngeso e dirrek el melatk er a rolel e a Jehovah ullengeseu er ngii er a ngar er a mong. (1 Sa. 17:37; Psa. 18:2, 6) A David a mle medengei el kmo ngkirel lolengit a ulekrael er a Jehovah me ngulleker er ngii el kmo ngngera ungil loruul er ngii. Uriul er a bo lodengelii a kirel el meruul er ngii e ngdi mle mereched el mo rullii. Me a Jehovah ulemekngeltengat er ngii me a rechedal me ngmlo sebechir el lmuut el ngoititerir a telungalek er tir e ngma kloklir. (1 Sa. 30:7-9, 18, 19) Ke miltab aike el edei el tekoi el lurruul a David? Ngmilluluuch el mora Jehovah, millatk er a rolel e a Jehovah ullengeseu er ngii er a ngar er a mong, e mlo oltirakl a ulekrael er a Jehovah. Ngmekera sebeched loukerebai er a David? Molatk a edei el rolel.

1. Moluluuch. Ngii di el taem el bo lsebek a rengud e ngsebeched el meluluuch el mora Jehovah lolengit er a ngelsuil me a llomeserreng er ngii. Ngkmal sebechel kobekeklii a rengud sel douchais er ngii aike el rokui el ngar er a rengud. Me a lechub e ngsebeched el di ngar er a rengud e dulii a kedeb el nglunguuch a lsekum e ngdiak el sebeched el kemanget el mengedecheduch er ngii. Bek el taem el debora er a Jehovah el kirel a ngeso e kede ochotii a klaumerang el lulebang a David er a ledu el kmo: “A RUBAK a risois er ngak, e cheuotelek, e osebelek; ng Dios er ngak,  e risois er ngak, el ngii a omertelek.” (Psa. 18:2) Me a nglunguuch ngmera el loureor? A pioneer el odos el Kahlia a kmo: “Uriul er a kululuuch e ak mo omelechesiu er a budech. A nglunguuch a ngosukak el mo oba uldesuel a Jehovah e smisichii a klaumerang er ngak er ngii.” Nguaisei a nglunguuch a sengk er a Jehovah el ngii a ngosukid loutekangel aike el uchul a sebekreng.

2. Molatk. Sel molebedebek er a klengar er kau, e ngsebechem el lmatk aike el taem el mlo sebechem loutekangel er a blekeradel el ngelsuil a Jehovah uchul? Sel dolatk er a rolel e a Jehovah olengeseu er kid me a dirrek el remesiungel er a ngar er a mong e ngmeskid a budech e smisichii a klaumerang er kid. (Psa. 18:17-19) A Joshua el ta er a remechuodel a melekoi el kmo: “Ngngar ngii a list er ngak er aike el nglunguchek el lulenger a Jehovah. Tia ngosukak el mo melatk aike el taem el kullengit a ileakl el tekoi er ngii e ngmilskak sel kmal kuluusbech er ngii.” Chochoi, sel dolatk aike el bla leruul a Jehovah el kired e ngmeskid a klisiich el dousbech er ngii el mo outekangel a sebekreng.

3. Moltirakl. Uchei er a dolilt el kmo ngngera kede mo meruul er ngii, e ngsebeched el mora Tekingel a Dios el kirel a ulekrael. (Psa. 19:7, 11) A rebetok a metik el kmo sel le research el kirel a bades e te mo ungil medengelii a rolel e ngsebechir loltaut er ngii er a klengar er tir. A Jarrod el ta er a remechuodel a kmo: “Sel kurruul a research e ngngosukak el mo mes a rokui el otutel a bades e mo medengei a louchais er ngak a Jehovah. Tia rullii a bades el mora renguk me ngmo sebechek loltaut a ulekrael er ngii.” Sel dosiik a ulekrael er a Jehovah loeak a Biblia e doltaut e kede mo meduch loutekangel a sebekreng.

A David a mle medengei el kmo ngdi oeak a ngelsuil a Jehovah a uchul me ngsebechel loutekangel a sebekreng. Ngkmal uleba omereng el saul el kirel a ulengesuil a Jehovah me ngdilu el kmo: “Dios er ngak a uchul e ng sebechek el ongengur a cheuatel. Ngii a Dios el miltuchulak er a klisiich, e rirellak mak selebechakl.” (Psa. 18:29, 32) Kede locha mo omdasu el kmo a ringel el dechelebangel a di ua cheuatel el diak el sebeched el ongengur. Engdi ngoeak a ngelsuil a Jehovah e ngsebeched el oeong a ngii di el ringel el bo dechebangel! Chochoi sel doluluuch el lolengit a ngelsuil a Jehovah, dolatk aike el rokui el bla leruul el kired, e dotirakl a ulekrael er ngii e ngkmal sebechel mo ulterekokl a rengud el kmo ngmo meskid a klisiich me a llomeserreng el dousbech er ngii el mo outekangel a ngii di el uchul a sebekreng!