KAU, ke oureng el meruul er a ta er a rolel a omesiou er a ongdibel el diak el sebechem el rullii er chelechang? Alta e ngerachel el mla moterekokl er a ta er a rechad. Me a lechub e ngtechall er a omesiou el mulebang er a uchei. Engdi a rekim, me a chelitechetul a bedengem, me a mekngit el keizai, me a lechub e ngerachel er a telungalek a uchul me ngdikea el sebechem el remuul a betok. Me a lechub e ngomeldechel a tekoi er a cheldebechel a uchul me ngmlo diak moruul er a rolel a omesiou el murruul er ngii el kemanget el taem. Me a ngii di el tekoi el uchul tiang, e ke locha mo omdasu el kmo kau a diak moruul aike el rokui el sebechem er a omesiungem el mora Dios. Ngar er a chelsel a chouaika el blekeradel, e ngulterekokl el mo mechitechut a rengum a lebebil er a taem. Me a leuaisei, e ngera sebechel ngosukau me lak di leblechoel el mo mechitechut a rengum e bo lekesib a rengum? Ke mekera e lomelemii a deurreng er kau?

Ngsebeched el suubii a klou a ultutelel el tekoi el kirel a rolel a lolemolem el dmeu a rengud er a blekerdelel a Johanes el Chad er a Techolb. A Johanes a uleldeu er a rengul er a kmal ungil techall er a omesiou, engdi nglocha dimlak lomdasu el kmo ngmo uaisei a blekerdelel a klengar er ngii. Nglocha dimlak lomdasu el kmo a klemengetel a taem el lengar er a kelebus a kuk mo kemanget er a temel a omesiungel. Nguaisei engdi ngdi millemolem el dmeu a rengul er a klemengetel a klengar er ngii. Me ngera ngilsuir? E kede mekera e lomelemii a deurreng er kid alta e ngmo mechitechut a rengud?

Ngar er a bekord el April er a 29 C.E., e a Johanes a ulemuchel er a ureor el Jehovah milsang, el mlo mengetmokl a uldesuir a rechad el kirel a merekung el Mesias, er a lolekoi el kmo: “Mobult el mo cheroid er a kngtmiu, ele Rengedel a eanged a kmedang!” (Mt. 3:2; Lk. 1:12-17) Me a rebetok a ulerrenges, e mirrael er a kemanget el omerael el mo orrenges er ngii, e dirrek a rebetok a ulebult er a kngterir e mlo metecholb. A Johanes a dirrek el ulemeklatk er tirke el leko te kmal melemalt el mengeteklel a klechelid el kirel a kerrekeriil el mo er tir a lsekum e ngdiak lolodech a blekerdelir. (Mt. 3:5-12) E dirrek el rirellii sel kot el klou a ultutelel el tekoi el ngar er a omesiungel er a letechelbii a Jesus er a bekord el October er a 29 C.E. Ngulemuchel er seikid el taem e a Johanes a ulemekrael er a rechad me bo loltirakl er a Jesus, el ngii ngike el ngar er a telbiil el Mesias.​—Jn. 1:32-37.

 Tia el ileakl el ngerechelel a Johanes a uchul me a Jesus a mle sebechel el melekoi el kmo: “A Johanes el Chad er a Techolb a ngarbab er a re bek el chad er uchei er ngii.” (Mt. 11:11) A Johanes a ulterekokl el uleldeu a rengul er aike el klengeltengat el lengilai. Me te betok a di ua Johanes el mla ngmai a klengeltengat el mla er a Dios. Ka molatk er a odam el ngklel a Terry. Ngii me a bechil er a Sandra a mla ngar er a mui el taem el omesiou el kuk betok er a 50 el rak. A Terry a melekoi el kmo: “Ak mla oldeu er a renguk er a betok el kmal ungil techall er a omesiou. Ak mla mesiou el pioneer, Bethelite, special pioneer, circuit overseer, district overseer e chelechang e ak mla lmuut el mo mesiou el special pioneer.” Nguchul a deurreng sel dengai a ileakl el rolel a omesiou, engdi kede ousbech er a blakerreng me bo el sebeched el melemolem el dmeu a rengud, sel lemengodech a blekeradel, el di uaike el bo dosuub er a kerebil a Johanes.

A Johanes el Chad er a Techolb a millemolem el dmeu a rengul e le nguleba omereng el saul el kirel aike el techall el lullab. Ka molatk er tiang. A uriul er a lemetecholb a Jesus, e a ildisir a rechad el uleltirakl er a Johanes a di mirrael el mo mekesai e tirke el uleltirakl er a Jesus a di mirrael el mo betok. A rulebengkel er a Johanes a mlo suebek a rengrir el kirel tiang me te mlo er ngii e kmo: “Chelechang e ng melecholb er a re chad, ma re bek el chad a di mocha er ngii!” (Jn. 3:26) Me a Johanes a millekoi el kmo: “A redil el mo bechiil a mor ngikel sechal el mo bechil; ngdi sechelil ngikel mo bechiil el chad a ungil a rengul sel le dechor el orrenges er a ngerel a sechelil. Me ngak a ua isei el mla mo cherrungel a deuil a renguk.” (Jn. 3:29) A Johanes a dimlak longaiuechit er a Jesus, me a lechub e lomdasu el kmo a ureor el lurruul er ngii a diak a ultutelel e le ureor el lurruul er ngii a Jesus a lmuut el klou a ultutelel. Ngbai di millemolem el dmeu a rengul e le ngmilengreos er sel deruchellel el “sechelil ngikel mo bechiil.”

A uldesuel a Johanes a ngilsuir el melemolem el dmeu a rengul alta ngdimlak lebeot tia el omesiungel. El ua tiang, a Johanes a milechell el Nasarait me ngmle mekull a lolim a bilong. (Lk. 1:15) Me a Jesus er a losaod er a beot el rolel a klengar er ngii, e ngdilu el kmo, “A Johanes er a le mei, e ng ulelsengerenger e dimlak lolim a bilong.” Nguaisei engdi a Jesus me a redisaiplo er ngii a dimlak loltirakl a telbiil el kirir a re Nasarait e mle sebechir el meruul a tekoi el di ua rebek el chad. (Mt. 11:18, 19) A Johanes a dirrek el dimlak loruul a mengasireng el tekoi, engdi ngmle medengei el kmo a redisaiplo er a Jesus, el uldimukl er a rebebil el ulebengkel, a mle sebechir el meruul a ongasireng. (Mt. 10:1; Jn. 10:41) Engdi ngdimlak lebechei aika el kakerous el blekeradel me longesang er ngii, e bai kmal mle mechesang er a omesiungel el lebilsa Jehovah.

Me a lsekum e kede dirrek el mo mengreos er a rolel a omesiunged er chelechang, e ngsebeched el melemolem el dmeu a rengud. A Terry el dulsaod er ngii er a uchei a kmo: “Ngmle blak a renguk er a derta er aike el rolel a omesiou el kullab.” Me sel lolatk el kirel a klengar er ngii el milsiou el mui el taem, e ngmelekoi el kmo, “Ngdiak a ngera el kuuchel a renguk er ngii, ngbai kmal ungil a renguk sel kulatk aike el ungil tekoi el dilubech er a klengar er ngak.”

Ngsebechel lmuut el mo dmeu a rengud a lsekum kede melatk er sel uchul me ngkmal ileakl a omesiunged el mora Jehovah, el ngii a ileakl el techelled el mo “kldemel a Dios er a ureor.” (1 Ko. 3:9) Ngdi ua mekreos el klalo el melemolem el klebokel sel deblechoel el omtanget er ngii, kid a melemolem el dmeu a rengud a lsekum kede blechoel melatk er a ileakl el techall el dobang el oureor el obengkel a Jehovah. Ngdiak dekengei el omekesiu aike el doruul el mora ike el loruul a rebebil. E diak bo domdasu el kmo a ureor el lebilskid a Jehovah a diak el sal klou a ultutelel el uaike el ureor el lebilsterir a rebebil.​—Gal. 6:4.

A Johanes a locha mle medengei el kmo a omesiungel a diak lolemolem el kemanget el taem, engdi nglocha dimlak lomdasu el kmo ngdi mereched el mo merek. (Jn. 3:30) Sera 30 C.E., el bekord el elolem el buil er a uriul er a lemetecholb a Jesus, e a King Herodes a ulsisebii a Johanes er a kelebus. Me nguaisei, engdi a Johanes a millemolem el ousioning er a bek el techall. (Mk. 6:17-20) Me ngera ngilsuir el lomelemii a deurreng er ngii er a chelsel aika el mengedechang el blekeradel er a klengar er ngii? Ngmillemolem el ultaut a osengel er a tekoi er a klereng.

Me a Johanes er a lengar er a kelebus, e nglocha rirenges a chisel a omesiungel a Jesus el di milleketek. (Mt. 11:2; Lk. 7:18) Me ngmle ulterekokl a rengul el kmo a Jesus a Mesias, engdi nglocha mlo melatk el kmo ngmekera Jesus e mo oltaut a rokui el tekoi el lolekoi a Bades el kirel a Mesias el mo kutmokl. Me a Mesias a mle kirel el mo nguu a deruchellel el king, me tiang belkul a kmo ngdi kmedu el mo omuchel a omengederederel  a Jesus? Tiang mo uchul e a Johanes a mo tuobed er a kelebus? A Johanes a mle soal el mo medengei a lmuut el betok el kirel aike el bo loruul a Jesus, me nguldercheterir a reteru er a redisaiplo er ngii el mo oker er a Jesus a ker el kmo: “Kau ke ngikel le dilu Johanes el kmo ng kirel el mei, ma lechub e ng dirk ngar ngii a kimongiil er ngii?” (Lk. 7:19) Me sera lluut el mei, e a Johanes a mle blak a rengul el orrenges er tir er a losaod el kirel a Jesus el meruul a mengasireng el tekoi e ledu er tir me bo louchais er ngii el kmo: “A re meiko a mocha omes, ma re chitechut a mocha merael, ma re chebedes a mekikidang, ma re mechad a mocha orrenges, ma re mlad a luutal mo chad, ma Ungil Chais a mosisecheklang el mor a re mechebuul.”​—Lk. 7:20-22.

Me a Johanes a ulterekokl el kmal mlo mesisiich a rengul er a lerenges aika el chais. Ngulterekeklii el kmo a Jesus a oltaut aike el ulaoch el kirel a Mesias. Me alta e a demiel a Jesus a dimlak bo luchul e ngtuobed er a kelebus a Johanes, engdi Johanes a mle medengei el kmo a omesiungel a mla er ngii a ultutelel. Me alta ngchilebangel aika el blekeradel, engdi ngmla er ngii a ungil uchul e ngmle dmeu a rengul.

Me kede ua Johanes, a lsekum e ngmo ultaut a osenged er a tekoi er a klereng, e ngmo sebeched el outekangel el oba deurreng me a kllourreng. (Kol. 1:9-11) Ngsebeched el meruul er tiang lokiu sel donguiu er a Biblia e dolebedebek aike el donguiu, e tiang a mo ngosukid el mo medengei el kmo a ngii di el ngerang el doruul el ngar er a omesiunged a ngar ngii a ultutelel. (1 Ko. 15:58) A Sandra a melekoi el kmo: “Sel kunguiu er a ta el bliongel er a Biblia er a bek el sils, e tia ngosukak el mo kmeed er a Jehovah. Ngosukak el mo ultaut a osengek er a Jehovah el diak di kulatk el kirek.” Ngdirrek el sebeched el omtab a chisel a ureor er a Renged, el sebechel ngosukid el mo diak di dolatk er kid, kede bai melatk el kirel aike el tekoi el longetmokl a Jehovah. A Sandra a melekoi el kmo: “Aike el prokuram er a JW Broadcasting^® a ngosukid el mo kmeed er a cheldebecheled, e tia ngosukid el lomelemii a deurreng er kid el ngar er a omesiunged.”

Ngar sel telkib el taem el lulemerk er a klumech a Johanes el Chad er a Techolb, e ngulemerk er ngii el “ultebechel e mesisiich el ua Profet Elias” e dirrek el ua Elias, el di mle “chad el ua ikid.” (Lk. 1:17; Jak. 5:17) Me a lsekum kede mo oukerebai er ngii el uleba omereng el saul e mle ultaut a osengel er a omesiungel el mora Jehovah, e ngsebeched el melemolem el dmeu a rengud el meruul er a omesiunged, alta kede mo chelebangel a kakerous el blekeradel er a klengar.