1-2. A tekoi el dilubech el mora Angelito, ngosisecheklid er a ngerang?

KAU, ke mukeroul el ngelekir a Resioning er a Jehovah? A leuaisei, e ngungil a lak mobes el kmo kau a diak msechelil a Jehovah e le tir el sechelil a Jehovah. Me a rechad er a blid a losiou er a Jehovah me a lak, me a derta er kid a kirel el di ngii el mekur a klausechelei er ngii lobengkel a Jehovah.

² Ka molatk er a tekoi el dilubech el mora odam el ngklel a Angelito. Ngmlukeroul el ngelekir a Resioning. Engdi sera lekekerei, e ngdimlak a kmes el deleuill er ngii lobengkel a Dios. Ngdmu el kmo: “Ak milsiou er a Jehovah e le ngmle soak el meruul aike el loruul a rechad er a blik.” Nguaisei, engdi a Angelito a mlo omuchel el mengoit a klou el taem el menguiu er a Tekingel a Dios e melebedebek aike el longuiu, e mlo blechoel el meluluuch el mora Jehovah. Me ngera dilubech? Ngdmu el kmo: “Ak mlo medengei el kmo, a di ta el rolel a kulekeed er ngak er a betik er a renguk el Demak el Jehovah, a okiu sel bo kudengelii.” Me a tekoi el dilubech el mora Angelito a rullid el mo melatk a bebil er a meklou a ultutelel el ker el kmo: Ngera klekakerous er a bo dodengelii a Jehovah me a bo dungil medengelii? E mekera e mo sebeched el mo ungil medengelii a Jehovah?

3. Ngera klekakerous er a bo dodengelii a Jehovah me a bo dungil medengelii?

³ Kede locha omdasu el kmo kede medengelii a Jehovah e le kid el medengelii a ngklel me a lechub a bebil el tekingel me a lechub e ngomerellel. Engdi tiang a diak lebelkul a kmo kede ungil medengelii a Jehovah. E le bo dungil medengelii, e ngkired el mengoit a taem el mesuub el kirel me aike el ungil blekerdelel. E seikid e kede mo medengelii sel uchul me ngmelekoi e meruul a tekoi. E tiang a ngosukid el mo medengei el kmo, a Jehovah ngkongei a uldesued, me a omelilt er kid, me a omerelled,  me a lechub e ngdiak. Me sel bo dodengei aike el soal a Jehovah a doruul, e ngkired el mo oltaut er a klengar er kid.

4. Ngmekerang e ngosukid a dolatk a kerebai el ngar er a Biblia?

⁴ A rebebil er a rechad a locha mo melenguul er kid e le ngsoad el mesiou er a Jehovah, e locha mo omtok er kid sel bo domuchel el ngar er a miting. Me nguaisei, engdi a lsekum e kede oumerang er a Jehovah, e ngkmal diak bo lechitid. Me kede mo omuchel el meleketek er a klausechelei er kid el obengkel a Dios el diak a ulebengelel. Ngmera el sebeched el mo ungil medengelii a Jehovah? Ochoi, ngsebeched! A kerebai el lullecholt a rediak lemecherrungel el chad el uai a Moses me a King David a ochotii el kmo ngsebeched el mo ungil medengelii a Jehovah. Me kede mo omtab aike el lurruul, e mo onger aika el eru el ker el kmo: Te milekerang e mlo medengelii a Jehovah? E ngera sebeched el suubii er a kerebai er tir?

5. A Moses, ngmillilt el mo mekerang?

⁵ A Moses a uleltaut aike el lesiluub. Ngar er a bekord el 40 a rekil, e ngileltii el mo obengterir a rechedal a Dios, el chad er a Israel, er a bai lolemolem el okedongall el kmo “ngelekel a ngelekel a Farao el redil.” (Heb. 11:24) A Moses a chilitii a ngarbab el deruchall. Me sera bo losebechakl er a rechad er a Israel, e ngmle medengei el kmo ngmo ongesechii a rengul a Farao, el ngii a mesisiich el merreder el lulemes er ngii a rechad el ua chelid. Tiang a mle mesisiich el olechotel a klaumerang! A Moses a uluumerang er a Jehovah. E a chouaitia el klaumerang a uchetemel a diak a ulebengelel el deleuill.​—Osi. 3:5.

6. Ngera sebeched el suubii er a kerebil a Moses?

⁶ Me ngera klubeled er tiang? Kid el rokui a di ua Moses el ngar ngii a omelilt el kired el meruul er ngii el kmo: Kid, kede mo mesiou er a Dios e mo obengterir a rechedal? Alta ngmo kired el chemoit a bebil el tekoi me bo el sebeched el mesiou er a Dios, me tirke el diak lodengelii a Jehovah a locha mo omtok er kid. Engdi a lsekum kede oumerang er a Demad el ngar er a eanged, e ngulterekokl a rengud el kmo ngmo ngosukid!

7-8. A Moses, ngmillemolem el mesuub el kirel a ngerang?

⁷ A Moses a millemolem el mesuub el kirel a blekerdelel a Jehovah e mirruul a Soal. El ua tiang, sel taem el Jehovah a ullengit er a Moses el mo oltobed er a rechad er a Israel er a Ekipten, e a Moses a dimlak lulterekokl a rengul e di millekoi el kmo ngdiak el rredemelel. Me a nger er a Dios a ulechotii a klechubechub er ngii, e le ngmle medengelii a uldesuel a Moses e ngilsuir. (Exo. 4:10-16) Sei a uchul me a Moses a mle sebechel el melekoi aike el mesisiich el kerrekeriil el mora Farao. E a uriul, e ngii el Moses a milsa Jehovah el ousbech er a klisichel el olsobel er a rechad er a Israel e okngemedii a Farao me a resoldau er ngii er a Bekerkard el Daob.​—Exo. 14:24-28; Psa. 136:15.

⁸ A uriul er a lomekrael er a rechad er a Israel a Moses el tuobed er a Ekipten, e te di milengeremrum. Me nguaisei, engdi a Moses a ulemtab er a kllourreng er a Jehovah el bedul tirka el chad el luleltobed er tir er a klsibai. (Psa. 78:40-43) Ngdirrek el milsa klengariourreng er a Jehovah er a lengedechii a uldesuel er sel taem er a lolengit er Ngii me lak lokngemedeterir a rechad er a Israel.​—Exo. 32:9-14.

9. A doltirakl er a Hebru 11:27, e ngmle uangera kesengel a deleuill er a Moses me a Jehovah?

⁹ E a uriul er a otebedir a rechad er a Israel er a Ekipten, e a deleuill er a Moses me a Jehovah a liluut el kmal mo kmes me ngdi ua lulemes er ngika el Demal el ngar er a eanged. (Monguiu  er a Hebru 11:27.) A Biblia a mesaod er tia el deleuill el kmo ngkmal mle kmes sel lolekoi el kmo: “A RUBAK a milengedecheduch er a Moses er medal el di ua chad a longedecheduch er a sechelil.”​—Exo. 33:11.

10. Ngera kired el meruul er ngii me bo dungil medengelii a Jehovah?

¹⁰ Me ngera klubeled er tiang? A bo dungil medengelii a Jehovah, e ngdiak di dosuub el kirel a blekerdelel, ngdirrek el kired el meruul er a soal. Chelecha el taem, e a Jehovah a “soal a rokui el chad a bo le sobel e bo lodengelii a klemerang.” (1 Ti. 2:3, 4) Me a ta er a rolel a doruul a soal a Jehovah a okiu sel dolisechakl er a rechad el kirel.

11. Ngmekera bo dungil medengelii a Jehovah lokiu sel dosisecheklterir a rechad el kirel?

¹¹ Kede blechoel el mo ungil medengelii a Jehovah lokiu sel dolisechakl er a rebebil el kirel. El ua tiang, kede mesa klechubechub er a Jehovah el kirir a rechad sel lomekrael er kid el mo metik er tirke el sorir el mo sechelil. (Jn. 6:44) E mesa el kmo a Tekingel a Dios el Biblia a ngar ngii a klisichel, e le ngosuterir tirke el dosuub a Biblia lobengterir el mo diak loruul a mekngit e mo melodech a klengar er tir. (Kol. 3:9, 10) E dirrek el mesa kllourreng er ngii el bedul a rechad er a basio el doldingel er ngii e le ngblechoel loldurech er kid el mo olengeseu er tir.​—Rom 10:13-15.

12. A doltirakl er a Exodus 33:13, e ngera ngullengit er ngii a Moses, e ngera uchul?

¹² A Moses a kmal milengreos er a deleuill er ngii me a Jehovah. A Jehovah a uluusbech er a Moses el mo meruul a betok el mengasireng el ureor, me a Moses a mle ungil medengelii a Jehovah. Engdi ngdirk ullengit er a Jehovah me lengesuir el kmal mo ungil medengelii. (Monguiu er a Exodus 33:13.) A Moses a mle 80 me a derengel a rekil er a lolengit er tia el tekoi, engdi ngmle medengei el kmo ngdirk betok a sebechel el mesuub el kirel ngika el betik er a rengul el Demal el ngar er a eanged.

13. Ngera ta er a rolel e kede ochotii el kmo kede mengreos er a klausechelei er kid me a Dios?

¹³ Ngera klubeled er tiang? Ngkmal kired el mengreos er a deleuill er kid me a Jehovah, alta kede mla mesiou er Ngii el kemanget el taem me a lechub e ngdi kedeb el taem. A ta er a rolel e kede ochotii el kmo kede mengreos er a klausechelei er kid me a Dios a okiu sel dongedecheduch er ngii lokiu a nglunguuch.

14. Ngera uchul me kede ousbech er a nglunguuch el lmuut el mo ungil medengelii a Dios?

¹⁴ A lsoam el mo kmeed el sechelil a chad, e ngkirem el blechoel el mengedecheduch er ngii. Me a lsoad a kmes el klausechelei el obengkel a Dios, e ngkired el blechoel el meluluuch el mo er ngii e diak demedakt el ouchais er ngii aike el mera el ngar er a rengud. (Efe. 6:18) A Krista, el kiei er a Turkey a kmo: “A bek el taem el kululuuch el ouchais er a Jehovah a uldesuek e kisang el lolengeseu er ngak, e a bltkil a renguk me a klaumerang er ngak er Ngii a mukeroul el mo klou. E sel kisa rolel a Jehovah a longer a nglunguchek, e ngosukak el omes er a Jehovah el Demak e dirrek el Sechelik.”

15. Ngmle uangera omesodel a Jehovah el kirel a King David?

¹⁵ Sera lemechell a King David, e a demal me a delal me a rechad el iliuekl er ngii a milengull er a Jehovah. Engdi a David a dimlak longull er a Jehovah e le telungalek er ngii el milengull er Ngii. Ngbai di mle ngii el toketekii a deleuill er ngii me a Jehovah a uchul me a Jehovah kmal mle betik a rengul er ngii. A Jehovah a di mle ngii el mesaod er a David el kmo ng ‘soal a rengul.’ (Rel. 13:22) Me ngmilekerang a David e kmal mlo kmeed er a Jehovah?

16. Ngera mle sebechel a David el suubii el kirel a Jehovah lokiu sel lomes a blebelel?

 ¹⁶ A David a milsuub el kirel a Jehovah lokiu a blebelel a Jehovah. A David er a lekekerei, e ngmilengoit a betok el sikang el ngar rikl, el omekerreu a chermel a demal el sib. Nglocha tiaikid sel taem el lulemuchel el melebedebek el kirel a blebelel a Jehovah. El ua tiang, a David sel lomes er a eanged sel leklebesei, e ngdimlak di lomes a betok el telael el btuch, e ngdirrek el mlo omtab a blekerdelel Ngike el ulemeob. Sei a uchul me ngmilluches el kmo: “Ngkmal bleketakl a eanged el olecholt er a klebkellel a Dios! Ng kmal bleketakl el olecholt a bla leruul!” (Psa. 19:1, 2) E sera lolatk el kirel a mengasireng el rolel e a rechad a ulebeob, e ngmiltebengii a llemesel a rengul a Jehovah. (Psa. 139:14) Me sera lolebedebek el kirel aika el urerel a Jehovah, e ngmlo mesa el kmo ngdiak el ngerang a lomekesiu er ngii el mora Jehovah.​—Psa. 139:6.

17. Ngera sebeched el suub sel dolebedebek el kirel a blebelel a Jehovah?

¹⁷ Ngera klubeled er tiang? Bo msemeriar a blebelel a Dios. Mongoit a taem el mo ungil omtab er tia el klebokel el chutem el bilebii a Jehovah, e bo el siich a rengum er ngii! A bek el sils er a klengar er kau, e molebedebek el kirel a blebelel a Jehovah el iliuekl er kau, el ua dellomel, me a charm, me a rechad, me a dirrek el ike el tekoi el losisecheklau el kirel a Jehovah. E seikid e ngmo sebechem el mesuub a betok el tekoi el kirel a betik a rengul el Demam. (Rom 1:20) E dirrek el mo sebechel a bltkil a rengum el mo er ngii el mengal mo mesisiich er a bek el sils.

18. A doltirakl er a Psalm 18, e ngera ngmiltebengii a David?

¹⁸ A David a miltebengii el kmo a Jehovah a ullengeseu er ngii. El ua tiang, sel taem el David a ulemekerreu a chermel a demal sib er a laion me a kuma, e ngmiltebengii el kmo a Jehovah a ngilsuir el mo omekoad aika el kdekudel el charm. Me sera bo lemesisiich er a mekoar el chad er a mekemad el Goliath, e ngmilsa el kmo a Jehovah a ngike el ulemekrael er ngii. (1 Sa. 17:37) E sera lechiis er a King Saul el mle mechechei er ngii, e ngmle medengei el kmo a Jehovah a ngike el ulsebelii. (Psa. 18, omesodel el ngar er a bebul) A David a ble lekedidai a rengul, e ngmlo omdasu el kmo ngdi mle ngii e kutmokl aika el rokui el tekoi. Engdi ngmle ngariou a rengul, me ngmle sebechel mtebengii el kmo a Jehovah a ullengeseu er ngii.​—Psa. 138:6.

19. Ngera sebeched el suubii er a kerebil a David?

¹⁹ Ngera klubeled er tiang? Ngdiak di dolengit a ngelsuil a Jehovah e lemerekong. Ngdirrek el kired el melasem el mo omtab el kmo ngoingerang e mekerang a Jehovah lolengeseu er kid. E le lsekum e ngariou a rengud, e kede medengei el kmo ngdiak el sebechel el di kid e kutmokl a rokui el tekoi, e a Jehovah a mo ngosukid el meruul aike el diak el sebeched el kutmokl. E a bek el taem el desa Jehovah el olengeseu er kid, e a deleuill er kid el obengkel a mengal mo mesisiich. A Isaac, el odam el ngar er a Fiji, el mla mesiou er a Jehovah el betok el rak a miltebengii a klemerang er tia el tekoi. Ngmelekoi el kmo: “Sel kulatk er a klengar er ngak, e ngsebechek el mesa rolel e a Jehovah a ngilsukak el ulemuchel er sel taem er a kusuub a Biblia el me lmuut er chelechang. Sei a uchul me a Jehovah a kmal merang er a uldesuek.”

20. Ngera sebeched el suubii er a deleuill er a David me a Dios?

²⁰ A David a uluukerebai a blekerdelel a Jehovah. A Jehovah a milebid el mo sebeched el oukerebai a blekerdelel. (Gen. 1:26) Me a cherengel a taem el dosuub el kirel a blekerdelel a Jehovah, e ngmo sebeched el lungil oukerebai er ngii. A David a kmal mlo ungil medengelii a  Demal, me ngmle sebechel oukerebai er ngii er a blekerdelel el bedul a rebebil. Ka molatk er a ta el olechotel. A David a mlora klengit el omtok er a Jehovah er a lerebet er a laokreng el obengkel a Bathseba e lokodir a bechil ngii el redil. (2 Sa. 11:1-4, 15) Engdi Jehovah a ullecholt a klechubechub el mora David, el ngii a chad el dirrek el ullecholt a klechubechub el mora rebebil. Me a David a kmal mle ungil a deleuill er ngii me a Jehovah a uchul me a rechad er a Israel a kmal mle betik a rengrir er ngii, me a Jehovah a uluusbech er ngii el kerebai el kirir a rekuk bebil el king er a Israel.​—1 Ki. 15:11; 2 Ki. 14:1-3.

21. A doltirakl er a Efesus 4:24 me a 5:1, e ngera duubech sel doukerebai er a Dios?

²¹ Ngera klubeled er tiang? Ngkired el mo oukerebai er a Dios me a lechub e kede “melasem el mo ua ingii.” A doruul uaisei, e ngmo uchul a klungioled e dirrek el ngosukid el mo ungil medengelii. Me sel doukerebai a blekerdelel a Dios, e kede ochotii el kmo kede ngelekel.​—Monguiu er a Efesus 4:24; 5:1.

22-23. Ngera mo duubech sel doltaut aike el tekoi el desuub el kirel a Jehovah?

²² Ngdi uaike bla desaod, ngsebeched el mesuub el kirel a Jehovah lokiu a blebelel me a dirrek el Tekingel el Biblia. Tia el ileakl el babier a mui er a kerebai er a reblak a rengrir el mesiungel a Dios el sebeched el oukerebai er tir, el ua Moses me a David. A Jehovah a mla rullii a ngerechelel. Me chelechang e ngkired el meruul er a ngerecheled el mo mesuub a lmuut el betok el kirel.

²³ Ngdiak bo demeterob el mesuub el kirel a Jehovah. (Oli. 3:11) A klou a ultutelel el tekoi a kmo, ngdiak el klungel a klemedengei er kid el kirel a Jehovah, e ngbai rolel a doltaut ngii el klemedengei er kid el kirel. Me a lsekum kede oltaut a tekoi el desuub e melasem el oukerebai er ngika el betik a rengul Demad, e ngmo melemolem el olekeed er ngii er kid. (Jak. 4:8) Ngokiu a Tekingel, e ngoterekeklii a rengud el kmo ngkmal diak bo lechititerir tirke el melasem el mo ungil medengelii.