NGAR er a Biblia, e kede menguiu el kirir a reblak a rengrir el “chad el ua ikid.” (Jak. 5:17) El ua tiang, ngbeot er kid el mo medengei a belkul a tekingel a Paulus er a ledu tekoi el ngar er a Rom 7:21-24 el kmo: “A le soak el meruul a ungil, me ngii a di mekngit a bo kngiltii el meruul er ngii. . . . Kele kkol chebuul el chad!” A chouaika el uldasu a kmal melisiich er kid er sel taem el doutekangel a chelitechetul a klechad er kid.

Engdi a Paulus a dirrek el milsaod el kirel a kuk bebil er a uldesuel. Ngar er a Galatia 2:20, e ngmle ulterekokl a rengul el melekoi el kmo a Jesus a “mle betik a rengul er [ngii] me ng tilengetengii a klengar er ngii el [kirel].” Kau, ke omdasu el uaisei? Nglocha diak el blechoel uaisei a uldesuem.

Me a lsekum e kede dirk omdasu el kmo ngdiak a ultuteled e le ngklengit el durruul er a uchei, e nglocha mo diak doumerang el kmo a Jehovah a betik a rengul e mla ousubes er kid, e dirrek el mo meringel er kid el omes er a tengetengel a Jesus el ua ileakl el sengk el di kired. A Jesus, ngmera el soal a domes er tia el tengetengel el ua sengk? A leuaisei, e ngera sebechel ngosukid el mo uaisei uldesued? Ka me bo dosaod aika el eru el ker.

Nguaisei, a Jesus a soal a domes er a tengetengel el ua ileakl el sengk el mei er kid. Ngmekera mo ulterekokl a rengud el kirel tiang? Ka molatk er a tekoi el dilubech er a Lukas 23:39-43. A chad el deleel er a teluo el kerrekar er bita er a Jesus a kongei el kmo ngmirruul a mekngit el tekoi. E tia locha kmal mle oberaod el tekoi e le chouaitia el rolel a blals a di mle kirel el mo er tirke el mirruul a kmal mekngit el tekoi. Me ngii el chad a kmal mle meringel a uldesuel me ngullengit er a Jesus el kmo: “Sel bo msiseb er a Rengedem, e lak mobes er ngak.”

Me ngmilekerang a Jesus? Ka molatk er a ringel el blo lolechesuar er a lechisngekl e lomes er ngii el mekngit el chad. Me alta e ngkmal mle meringel, engdi a Jesus a mle klikmechur e milengelaod er ngii el chad. Ngdilu el kmo: “Ak kmal dmu er kau el kmo chelechal sils e ke mo obengkek el ngar a Baradis.” A Jesus a mle sebechel el di dmu er ngii el chad el kmo a “Ngelekel a chad [a] mlei el . . . mengkengkii a klengar er ngii el ngbetir ar betok.” (Mt. 20:28, BT) Engdi a Jesus a bai milsaod el kmo a tengetengel a mle sebechel el mo uchul a klungiolel ngii el chad. Ngmle ungil a cheldechedechal e uluusbech a tekoi el “kau” me “ngak.” E dirrek el dilu er ngii el chad el kmo ngmo kiei er a baradis er tia el chutem.

Me ngulterekokl a Jesus el mle soal ngii el chad a bo lodengei el kmo a tengetengel a dirrek el mo uchul a klungiolel. Me a lsekum a Jesus a mle uaisei a uldesuel el kirel a mekngit el chad el dirkak a techellel el mesiou er a Dios, e ngulterekokl el di osisiu a uldesuel el kirel a mla metecholb el Kristiano el mesiou er a Dios. Me a leuaisei, e ngera sebechel el ngosukid el kmal mo oumerang el kmo a tengetengel a Kristus a mo uchul a klungiolel a derta er kid?

A omesiungel a Paulus a mla er ngii a lerellii el kirel a osengel er a tengetengel a Jesus. Ngoeak a  ngera el rolel? Ngmilsaod el kmo: “Ak mereng a sulel a Kristus Jesus el Rubak er kid, el silisichii a renguk er a urerek. Ak mereng a sulel, ele ng di mle ungil er a rengul a tutkak el mo mesiou er ngii. A ngar a mong e ak millekoi a mekngit el kirel, e uleldechelakl, e uleltuub er ngii.” (1 Ti. 1:12-14) A ngerachel el mloterekokl er a Paulus a ulterekeklii a rengul el kirel a klechubechub, me a bltikerreng me a klaumerang er a Jesus el bedul ngii. A Jesus a dirrek el mla meskid a ngerecheled el mo omerk er a ungil chais. (Mt. 28:19, 20) Me kid, nguaisei a uldesued el kirel a omesiunged?

A Albert, el liluut el mo mesiou er a Jehovah er a uriul er a lemesuld a ngklel el bekord el 34 el rak a mesaod el kmo: “Ngmeringel er ngak el obes a mekngit el tekoi el kurruul er a ngar er a mong. Engdi sel kuruul er a omesiungek, e ak di ua apostol Paulus, el omes el kmo a Jesus a mla meskak a ngerechelek el omerk er a klumech. Me tia rullak el mo dmeu a renguk e mo ungil a uldesuek el kirek, me a klengar er ngak me a ngar medak el klebesei.”​—Psa. 51:3.

A Allan, el mirruul a betok el delengerenger me a mekngit el omeruul er a uchei er a bo lodengelii a klemerang a kmo: “Ak dirk melatk aike el rokui el tekoi el kriruul el omekcharm er a rechad. Me a lebebil er a taem, e tia rullak el kmal mo mechitechut a renguk. Engdi ak mereng a sulel a Jehovah el kongei er a mekngit el chad el uai ngak el mo omerk er a ungil chais el mora rebebil. Me sel kumes er a rechad el kongei er a ungil chais, e tia omeklatk er ngak el kirel a ungilreng me a bltikerreng er a Jehovah. Ak mo medengei el kmo ngousbech er ngak el mo olengeseu er a rebebil el tir a dirrek el mirruul a mekngit el tekoi.”

A omesiunged a rullid el mo ultaut a osenged er a ungil omeruul me a ungil uldasu. E dirrek el oterekeklii a uldesued er a klechubechub, me a bltikerreng, me a klaumerang er a Jesus el bedul kid.

Kede locha dirk mo mekngit a rengud el kirel a klengit el durruul er a ngar er a mong, el mo lmuut er sel taem el mekngit el blekeradel er a Satan a mo nguemed. Me ngera sebechel el ngosukid el mo omtok a chouaika el uldasu?

A Jean el blechoel el mo ouuchel a rengul el kirel a eru el blekerdelel a klengar er ngii er a dirk el ngalek a melekoi el kmo: “Ngkmal soak sel tekoi el kmo ‘A Dios a lmuut el klou ra rengud.’” (1 Jn. 3:19, 20) Kid me ngdirrek el sebechel el mo mechelaod a rengud sel dodengei el kmo a Jehovah me a Jesus a medengei el kmo kede ngar er a klengit. Lak dobes el kmo, ngulekiu a bltikerreng e te kiltmeklii a olubet, el diak el kirir a remecherrungel el chad, e ngbai kirir tirke el mla obult er a kngterir.​—1 Ti. 1:15.

Kede oterekeklii a rengud er tia el mekreos el klemerang sel dekerekikl el melebedebek el kirel a omerellel a Jesus el bedul a rediak lemecherrungel el chad me sel dolasem er a tkurrebab el sebeched el meruul er a ngerachel el bla loterekeklii er kid. Me sel doruul el uaisei, e kede mo ua Paulus el sebeched el melekoi el kmo: A Jesus a “betik a rengul er ngak me ng tilengetengii a klengar er ngii el kirek.”