1-2. Ngera rullii a Jehovah el mo kongei er a omengull er kid?

 NGNGERA ke mo melatk sel mrengesii a tekoi el “omengull”? Ke locha mo melatk er a odam el outubuach er bita er a dukllel e meluluuch el ouchais er a Jehovah aike el ngar er a rengul. Me a lechub e ke melatk er a telungalek el kmal dmeu a rengrir el mesuub er a Biblia.

² Tirka el chad el ngar er a derta er aika el blekeradel a teloi er a bedengel a omengull. A Jehovah ngmo kongei omengull er tir? Chochoi a lsekum e ngoltirakl er a soal me tir a meruul er ngii le ngbetik a rengrir e mengull er ngii. Kid a kmal betik a rengud er a Jehovah. Kede medengei el kmo ngrredemelel omengull er kid, e kmal soad omengull a lengar sel kot lungil rolel.

3. Ngera kede mo mesaod er tia el suobel?

³ Ngar tia el suobel e kede mo mesaod er a bedengel omengull el lekilengei er ngii a Jehovah er a ngar er a mong me a eai el rolel omengull el lekengei er chelecha el taem. Sel dosaod aikang e bo dolatk a rolel e ngsebeched el remuul aika el bedengel omengull er kid el lmuut el mo ungil. Kede dirrek el mo mesaod a uchul me a mera el omengull a meskid a deurreng.

4. Te milekera remengull er a Jehovah el kiliei er uchei er a Rekristiano e ochotii el kmo te mengull e betik a rengrir er ngii?

⁴ A Abel, Noah, Abraham, me a Job a blak a rengrir el chad el kiliei er uchei er a taem er a Rekristiano el ulechotii el kmo ngbetik a rengrir e mengull er a Jehovah. Te milekera ochotii? Ngoeak a blekongesenges me a klaumerang er tir me a tengetengir. A Biblia diak louchais er kid a rokui el tekoi el mle  kirir el meruul. Me nguaisei engdi ngbleketakl el kmo te mlora tkurrebab el sebechir el oldanges er a Jehovah e ngii a kilengei omengull er tir. A uriul e a Jehovah milsterir a ruldidellel a Abraham a Llach er a Moses. Aika el Llach a mle uldimukl er ngii a komakai el ulekrael el kirel a rolel a omengull el lekengei er ngii a Jehovah.

5. A uriul er a kodellel me a okisel a Jesus e ngngera milengodech er a mera el omengull?

⁵ Uriul er a kodellel me a okisel a Jesus e a Jehovah mlo diak longerechir er a rechad el mo mengull er ngii loltirakl er a Llach er a Moses. (Rom 10:4) A Rekristiano a mlo kirir loltirakl er a beches el llach, el ngii a “llach ra Kristus.” (Gal. 6:2, BT) Te olengesenges er tia el “llach” loeak sel loltirakl er a kerebil a Jesus me a osisecheklel el diak loeak a mo medengei e oltirakl a betok el llach. Chelecha el taem e a Rekristiano a mora tkurrebab el sebechir loukerebai er a Kristus me lodeuir a rengul a Jehovah e ‘lebetik er a ulengull.’​—Mt. 11:29.

6. Ngmekera sebeched el ngmai a klungioled er tia el suobel?

⁶ Chelecha el bo dosaod aika el bedengel omengull er kid e di lekau loker, ‘Ngera kmla remuul lolengeriakl er a rolel a kuruul er tia el bedengel omengull?’ Ngdirrek el sebechem loker, ‘Ngsebechek el rullii tia el omengull er ngak el lmuut el mo ungil?’ Nguaisei el kirem el dmeu a rengum el kirel aike el moruul er chelechang engdi ngdirrek el soam el meluluuch losiik a rolel e ngsebechem el lmuut el olengeriakl.

7. Ngua ngera uldesuel a Jehovah el kirel sel doluluuch el mo er ngii el ngar er a rengud?

⁷ Kede mengull er a Jehovah sel doluluuch. A Biblia omekesiu a nglunguched el mora ochod el ble lekerekikl el meruul e melenget er a chedaol tento me a templo. (Psa. 141:2) Tia el ochod a rirellii a ungil bau el uldeuir a rengul a Jehovah. Ngdi osisiu, a Jehovah a “dmeu a rengul” sel doluluuch el ngar er a rengud el mo er ngii, mo lmuut me a lsekum e ngdiak ledmolech a tekinged. (Osi. 15:8; Dut. 33:10) Me ngngar ngii a ungil luchul e ngsebeched loumerang el kmo a Jehovah a soal lorrenges er kid sel douchais er ngii er a bltkil a rengud el mo er ngii me a omereng el saul er kid. Ngsoal a douchais er ngii aike el mengesang er kid, aike el tekoi el dolatk el kirel, me a urunguled. A uchei er a omoluluuch el mora Jehovah, e bo mkerekikl el melatk a obo molekoi. Sel moruul el uaisei e ke mo msa Demam el ngar er a eanged sel kot lungil a bul “ochod.”

8. Ngera ileakl techall a dobang el mo oldanges er a Dios?

⁸ Kede mengull er a Jehovah sel doldanges er ngii. (Psa. 34:1) Kede odengesii a Jehovah sel douchais el kirel a blekerdelel me a urerel. A odanges a me tuobed er a rengul a chad el oba omereng el saul. Sel dongoit a taem el melebedebek aika el rokui el ungil el bla leruul a Jehovah e ngdiak bo lak a uchul e ngkired loldanges er ngii. A ureor er a berkel a klumech a meskid a kmal ungil techall el mo “oldars a tenget er odanges el mor a Dios, el ngii a urerel a ngor.” (Heb. 13:15) Ngdi uai sel dongoit a taem el melatk a mo nglunguched, kid me ngdirrek el kired el kerekikl el melatk aika el bo dolekoi sel doldingel. Ngsoad a “tenget er odanges” er kid a bo el sel kot lungil. Kede mengedecheduch el ngar er a rengud sel douchais a klemerang er a rechad.

9. Ngdi ua rechad er a Israel er a irechar, ngmekera mo uchul a klungioled sel debora miting? Mouchais er a rolel a miting a mla ngosukau.

 ⁹ Kede mengull er a Jehovah sel debora miting. A rechad er a Israel er a irechar a ledilu er tir el kmo: “A chelsel a tal rak e a re bek el sechal a edei el le bor medal a RUBAK er sel blil omengull el meluluuch.” (Dut. 16:16) Ngmle kirir el mechei a delengcheklir me a dellemelir me ngmedechel el diak a mengkar. Me nguaisei engdi Jehovah tilbir el mo er tir el kmo: “Ng diak a mo melasem el mo nguu a belumiu er a chelsel a ikel edei er a tal rak el ber medak el RUBAK el Dios er kemiu.” (Exo. 34:24) Te mle mui loumerang er a Jehovah a uchul me te mlora ika el chedaol sils er a bek el rak. Te ngilai a klungiaol el ngar er a betok el rolel. Te milenglou a klemedengei er tir er a Llechul a Dios, millebedebek er a ungilreng er ngii, e milengoit a taem el kasisiich tir me a rekldemir er a klaumerang. (Dut. 16:15) Kid me kede ngmai a osisiu el klungiaol sel dosiik a bek el rolel a mora miting. E molatk er a deuil a rengul a Jehovah sel deketmeklid el mo onger.

10. Ngera uchul me a omengitakl a klou a ultutelel er omengull er kid?

¹⁰ Kede mengull er a Jehovah sel dongitakl lobengterir a rudam me a rudos er kid. (Psa. 28:7) A rechad er a Israel ulemes er a omengitakl el klou a ultutelel telengtengil omengull er tir. A King David a ngilelteterir a re 288 el Levait el mo chad er omengitakl er a templo. (1 Kr. 25:1, 6-8) Chelecha el taem e ngsebeched lochotii a bltkil a rengud el mora Dios sel dongitakl a chelitakl er odanges. A chikled a diak el sel kot el klou a ultutelel. Molatk er tia el okesiu. Sel dongedecheduch e kede “blechoel el mo e mecheuid” me nguaisei engdi tia diak leterebengid el mengedecheduch sel dengar ongdibel me a odingel. (Jak. 3:2) Ngdi osisiu, ngdiak el soad el mecherei a chikled me lerellid el mo diak dongitakl odanges el mora Jehovah.

11. El ua losaod a Psalm 48:13, ngngera uchul me ngkired el kutmeklii a schedule er kid el mesuub er a Biblia el telungalek?

¹¹ Kede mengull er a Jehovah sel dosuub er a Tekingel e dolisechakl er a rengeleked el kirel. A Ulengull el Sils a milsterir a rechad er a Israel a techall el mo meche urerir er a bek el sils e mo melisiich er a deleuill er tir me a Jehovah. (Exo. 31:16, 17) Tirke el mle blak a rengrir a ullisechakl er a rengelekir el kirel a Jehovah me a ungilreng er ngii. Ngkmal kired el rullii a schedule er kid el menguiu e mesuub er a Tekingel a Dios. Tia telengtengil omengull er kid el mora Jehovah, ngdirrek el ngosukid el mo kmeed er ngii. (Psa. 73:28) E sel dedak el telungalek el mesuub e ngsebeched el ngosuterir a rebeches el telecheroll, el tir a rengeleked, el mekurulii a kmes el deleuill er tir me a Demad el ngar er a eanged.​—Monguiu er a Psalm 48:13.

12. Ngera kede suubii er a osengel a Jehovah el kirel a urerir tirke el mirruul a klekedall er a chedaol tento?

¹² Kede mengull er a Jehovah sel domekedechor e de maintain a basio er omengull. A Biblia melekoi el kirel a okedecherul a chedaol tento me a klekedellel el kmo ng “chedaol el ureor.” (Exo. 36:1, 4, NW) Jehovah dirrek lomes a okedecherul a Blil a Ongdibel me aike el basio el kirel omesiou er a Dios er chelechang el chedaol ureor. A rebebil er a rudam me a rudos a ousbech er a klou el temir el meruul aika el ureor. Kid, ngdiak de kmal loba omereng el saul el kirel aika el urerir el kirel a Renged? Nguaisei, te dirrek el omerk er a klumech. A rebebil a locha kmal sorir el mo pioneer. A remechuodel a sebechir  lochotii a ngelsurir el kirel a ureor lomekedechor loeak sel lerelleterir tirka el odam me a odos el mo pioneer a lsekum ngsebechir. Me a lengar ngii a duch er kid er a ureor lomekedechor me a lak me kid el rokui a sebeched el olengeseu el mengetmokl e maintain aika el basio.

13. Ngkirel mo uangera osenged el kirel a tengetenged el mora ureor el kirel a Renged?

¹³ Kede mengull er a Jehovah sel dolenget lolengeseu a ureor el kirel a Renged. A rechad er a Israel a dimlak el kirir el mora medal a Jehovah el di chim. (Dut. 16:16) Ngmle kirir lolab a sengk loltirakl er sel sebechir. Ngoeak tiakid el rolel e te ulechotii a omereng el saul er tir el kirel aike el mileketmokl el mo uchul a klungiolir. Ngmekera dochotii a bltkil a rengud me a omereng el saul er kid el mora Jehovah el kirel aike el loruul el kired? A ta er a rolel a sel dolenget a udoud el kirel ongdibel me a ureor er a beluulechad el rokir loltirakl er sel sebeched. A apostol Paulus a kmo: “Le ngar ngii er a rengmiu a meruul er ngii, e a ikel ngar ngii er a chad a kmal di ungilbesul er a Dios, ele ng diak longerechir er a diak er a chad.” (2 Ko. 8:4, 12) Mo lmuut me a lak el betok engdi Jehovah a kmal mengreos a tengetenged el ngar er a rengud el mo er ngii.​—Mk. 12:42-44; 2 Ko. 9:7.

14. A doltirakl er a Osisechakl 19:17, e ngua ngera osengel a Jehovah el bedul aike el ngelsuid el mora rudam er kid lousbech a ngeso?

¹⁴ Kede mengull er a Jehovah sel dolengeseu er a rudam me a rudos er kid lousbech a ngeso. A Jehovah tilbir el kmo ngmo omekngeltengat er tirke el chad er a Israel el olengeseu er a remechebuul. (Dut. 15:7, 10) Chochoi a Jehovah omes a bek el ngelsuid el mora kldemed er a klaumerang el chebuul el sengk er kid el mo er ngii. (Monguiu er a Osisechakl 19:17.) El ua tiang, a apostol Paulus ulemekedong a sengk luldurokl a Rekristiano er a Filipi el mo er ngii el kmo “ng ua ungil a bul el tenget el mor a Dios, el uldars el odeuir a rengul.” (Fil. 4:18) Momes el meliuekl er a ongdibel e di lekau loker, ‘Ngngar ngii a chad el sebechek el ngosuir?’ A Jehovah kmal dmeu a rengul sel lesekid lousbech a temed, klisichel a bedenged, duch er kid, me aike el ngar ngii er kid lolengeseu er a remechebuul. Ngomes er ngii el telengtengil omengull er kid.​—Jak. 1:27.

15. A mera el omengull ousbech a taem me a meringel lureor, engdi ngngera uchul me ngdiak lemeringel er kid?

¹⁵ A mera el omengull ousbech a taem me a meringel lureor. Engdi ngdiak lemeringel er kid. (1 Jn. 5:3) E ngera uchul? E le kede mesiou er a Jehovah le ngbetik a rengud er ngii. Ka molatk er a kekerei el ngalek el soal lomsa demal a kmung ngerang. Nglocha mo mengoit a betok el sikang el lousunga. Ngika el ngalek a diak louuchel el kirel aika el betok el sikang el bla lechoit. Ngbetik a rengul er a demal me ngkmal dmeu a rengul lomsang tia el sunga. Ngdi osisiu, bltkil a rengud el mora Jehovah a uchul me ngkmal dmeu a rengud lousbech a temed me a klisichel a bedenged el mengull er ngii.

16. A doltirakl er a Hebru 6:10, e ngngua ngera osengel a Jehovah el kirel aike el doruul el loldeu er a rengul?

¹⁶ A ruungalek a diak longerechir osisiu el tekoi er a rengelekir. Te medengei el kmo ngkakerous a blekerdelir me aike el sebechir el meruul. Ngdi osisiu, a Demad el ngar er a eanged a medengei aike el sebeched el remuul. Kau a locha sebechem el remuul a betok  er tirke el bebil modengelterir. Me a lechub e ngdiak el sebechem el remuul a betok er a rebebil e le ke klunga el chad, ngchelitechetul a bedengem, me a lechub e ngngerechelem er a telungalek. Lak bo lemechitechut a rengum. (Gal. 6:4) A Jehovah kmal diak bo lobes a urerem. A lsekum e ke meruul er sel sebechem el melemalt a moktek er kau, e ke odeuir a rengul. (Monguiu er a Hebru 6:10.) A Jehovah dirrek el mes aike el soam el meruul. Ngkmal soal a bo ledeu a rengum er aike el sebechem el meruul el ngar er a omengull er kau el mo er ngii.

17. (a) A lsekum e kede metik el kmo ngmeringel er kid a meruul er a ta er a bedengel omengull er kid e ngsebeched el mekerang? (b) Ke milekera mongeseu er a ta er aike el ngar sel baks el “ Mdechelir a Deurreng er Kau”?

¹⁷ Engdi kede mo mekera a lsekum e ngmeringel er kid a teloi a bebil el rolel a omengull el ua omesubed el di kid el tang me a lechub e ngousioning er a buai? Kede mo metik el kmo sel bo deblechoel el meruul er ngii e ngmo soad me kid a ngmai a klungioled er ngii. Ngsebeched lomekesiu er ngii el mora exercise me a lechub e ngousekool er a ta er a bedengel a tumetum. A lsekum kede meruul er ngii el ouralmesils e ngdiak a klungiolel. Engdi ngngera duubech a doruul er ngii er a bek el sils? A uchelel e kede locha mo mengoit a sesei el bung el meruul er ngii e mekekokid el menglou er a temed er a bek el sils el meruul er ngii. Sel desa klungiolel a blakerreng er kid el meruul er ngii e ngmo soad el blechoel el meruul er ngii. Tia di osisiu el kirel omengull er kid.

18. Kede mekera otutii a moktek er kid el ngar, e ngera mo duubech sel derellii tiang?

¹⁸ Sel bo dongull er a Jehovah loba rengud el rokir e kede otutii sel moktek er kid el ngar. Seikid e ngmo er ngii a deurreng me a belkul a klengar er kid me kid a nguu omelatk el mo mengull er a Jehovah el mo cherechar. (Osi. 10:22) Ngbudech a uldesued le kede medengei el kmo a Jehovah olengeseu er a remengull er ngii sel bo lechebangel a mondai. (Isa. 41:9, 10) Ngkmal betok a ungil luchul e ngdmeu a rengud er omengull er kid el mora betik a rengul el Demad el ngii a kmal rredemelel “a klebkall, ma odanges,” er a rokui el blebelel!​—Och. 4:11.