1-2. Ngmekera kerebil a apostol Paulus e sebechel ngosuterir a remechuodel?

 A APOSTOL Paulus a kmal mle betik a rengul er a rudam er ngii. Ngkmal mle meringel loureor el omekerreu er tir. (Rel. 20:31) Sei a uchul me te kmal mle betik a rengrir er ngii. A remechuodel er a Efesus er a bo lodengei el kmo te diak lluut el mo mesang e te “lilangel.” (Rel. 20:37) Ngdi osisiu, a remechuodel a dirrek el kmal betik a rengrir er a rudam me a rudos er tir e kmal meringel loureor el olengeseu er tir. (Fil. 2:16, 17) Me nguaisei a remechuodel a lebebil e te mo chobangel omelsemai. Ngera sebechel ngosuterir sel leduubech tiang?

² Ngsebechir el melatk er a kerebil a Paulus. (1 Ko. 11:1) Ngika dimlak lolab a klisichir a rechanghel. Ngika diak el cherrungel el chad e ngar ngii aike el taem el blo loldechelakl er a rengul el mo meruul a llemalt. (Rom 7:18-20) Ngdirrek el mlo chobangel a betok el ringel. Me nguaisei, engdi ngdimlak el meterob me a lechub e loridii a deurreng er ngii. A remechuodel sel bo loukerebai er a Paulus e ngsebechir el mo mesisiich omelsemai el bo lechebangel e melemolem loba deurreng er tir el mesiou er a Jehovah. Ka me dosaod a rolel e ngsebechir el meruul er tiang.

3. Ngera kede mo mesaod er tia el suobel, e ngera ngmo ngosukid er ngii?

³ Ngar tia el suobel e kede mo omes a eua el omelsemai el bo lechelebangel a remechuodel: (1) ngngar ngii er a temir el omerk er a klumech me a meruul a ngerechelir, (2) mo ungil mengkerengel a sib lomekerreu er a delebechel, (3) outekangel a chelitecheterir, me a (4) outekangel a chelitecheterir a rebebil. Kede mo mesaod er a rolel e a Paulus a mlo mesisiich er aika el omelsemai me a rolel a remechuodel a sebechir loukerebai er ngii.

4. Ngera uchul me nglocha mo meringel er a remechuodel el teloi er a ureor er a berkel a klumech?

⁴ A uchul me ngmo omelsemai. A remechuodel a kmal betok a ngerechelir luldimukl er ngii a ureor er a berkel a klumech. El ua tiang, te oungerachel er sel miting el ngar ngii a le weekdays me a lechub e te meruul er a Omesubel a Biblia el Ongdibel. Te dirrek el oltobed a cheldecheduch. Te dirrek el meruul a betok el train er a re ministerial servant e dirrek el melisiich er a rudam me a rudos. (1 Pe. 5:2) A rekuk bebil oureor lomekedechor e maintain a Blil a Ongdibel me aike el basio el dousbech el kirel a omengull. Me nguaisei engdi te di ua rokui el chedal ongdibel el kot el klou a ultutelel lureor loruul er ngii a omerk er a klumech.​—Mt. 28:19, 20.

5. A Paulus ngkiltmeklii a ngera el kerebai el kirel omerk er a klumech?

⁵ Kerebil a Paulus. A Paulus ouchais er kid el ngar er a Filipi 1:10, NW er a uchul me ngmle sebechel ungil merkii a klumech: ‘Mngilt a lmuut el meklou a ultutelel el tekoi.’ A Paulus a ultireklii tia el tekingel. Ngika mlukngerachel el mo omerk er a klumech e mle betok el rak el lulemes er a ureor er a berkel a klumech el kot el klou a ultutelel tekoi er a klengar er ngii. Ngika ulemerk er aike lebla er ngii a ‘seked ma rekeblirir’ a rechad. (Rel. 20:20) Ngdimlak le schedule er a ileakl el taem el lomerk me a lechub e di lulemerk el di tang er a chelsel a ta el sandei. Ngbai uluusbech a bek el techall el mo omerk. El ua tiang, sera lengar er a Athens el mengiil er a resechelil e ngmirrekii a klumech el mora remeklou a ultutelir el chad me a rebebil er tir a kilengei er a klumech. (Rel. 17:16, 17, 34) Mo lmuut me a le “kelebus” me ngulemerk el mo er tirke el rokui el lilsterir.​—Fil. 1:13, 14; Rel. 28:16-24.

6. Ngera el training a lurruul a Paulus?

⁶ A Paulus a mle ungil lousbech a temel. Ngblechoel el olengit er a rechad el mo teloi er ngii lomerk. El ua tiang, ngar sel kot el omerollel el missionari e ngngiluu a Johanes Markus e ngar sel ongeru el omerollel e ngngiluu a Timothy. (Rel. 12:25; 16:1-4) Nguaisei a Paulus a kmal mle blak a rengul lolisechakl er tir el mo omekrael ongdibel, e mo ungil mengkerengel a sib, e mo meduch el olisechakl.​—1 Ko. 4:17.

7. Ngmekera remechuodel e sebechir el oltirakl er a Efesus 6:14, 15?

⁷ Klubeled. A remechuodel a sebechir loukerebai er a Paulus sel lak di loldingel obliil te dirrek el kltmokl el mo ousbech a bek el techall el omerk er a klumech. (Monguiu er a Efesus 6:14, 15.) El ua tiang, ngsebechir el omerk er a klumech sel le shopping me a lechub sel lengar er a urerir. Me a lechub sel leteloi er a ureor lomekedechor e ngsebechir el omerk er a klumech el mora retonari me a lechub e  tirke el olterau a klalo er tir. E ua Paulus, a remechuodel a sebechir lousbech aike el taem longoit lomerk er a klumech el train er a rebebil luldimukl er a ministerial servant.

8. A remechuodel nglocha kirir el mo mekerang a lebebil er a taem?

⁸ A remechuodel a diak el kirir el kmal mo mechesang el meruul a ngerechelir er a ongdibel me bo lak a temir loldingel. Ngkirir el oba tabesul uldasu me a lebebil e nglocha mo kirir el kotouar a bebil el ngerachel. Te locha mo melatk e meluluuch el kirel e mocha mtebengii el kmo ngdiak el sebechir el meruul er ngii e a osisiu e te meruul aike el lmuut el meklou a ultutelel. Aika el meklou a ultutelel el tekoi a uldimukl er a meruul er a omengull el telungalek er a bek el sandei, blakerreng er tir lomerk er a klumech, e olisechakl er a rengelekir el mo omerk. A rebebil a locha kmal meringel er tir a kotouar a ileakl el techall er omesiou engdi ngsebechel mo ulterekokl a rengrir el kmo a Jehovah medengei el kmo te oba tabesul uldasu el meruul a tekoi.

9. Ngera el omelsemai a lechebangel er ngii a remechuodel le ngkmal betok a kirir el meruul?

⁹ A uchul me ngmo omelsemai. A rechedal a Jehovah a mo chobangel a betok el ringel. Chelecha el taem er a uriul sils e kede rokui lousbech a omelisiich, ngeso, me a ongelaod. E a rebebil a locha mo ousbech a ngeso el mengeroid er tir er a mekngit el omeruul. (1 Th. 5:14) Me nguaisei el remechuodel a diak el sebechir el choroid a rokui el ringel el lechebangel a rechedal a Jehovah. Engdi Jehovah a soal a remechuodel a loruul aike el rokui el sebechir el mo melisiich e omekerreu er a resib er ngii. Me alta remechuodel a kmal betok a loruul engdi ngmekera sebechir el metik a taem el mo olengeseu er a resib?

10. El ua losaod a 1 Thesalonika 2:7, ngmilekera Paulus e ochotii el kmo ngulemekerreu er a rechedal a Jehovah?

¹⁰ Kerebil a Paulus. A Paulus a ulsiik a techall el mo chemat e melisiich er a rudam er ngii. A remechuodel a ungil loltirakl er tia el kerebai e mo ungil a omerellir el mora rechedal a Jehovah. (Monguiu er a 1 Thesalonika 2:7.) A Paulus ulelterekokl a rengrir a rekldemel er a klaumerang el kmo ngbetik a rengul er tir me a Jehovah me ngdirrek el kmal betik a rengul er tir. (2 Ko. 2:4; Efe. 2:4, 5) Paulus ulemes er a rechad er a ongdibel el sechelil e milengoit a taem el lobengterir. Ngulechotii el kmo nguluumerang er tir er a louchais er tir aike el tekoi el ble lebekikl el kirel me a dirrek el chelitechetul. (2 Ko. 7:5; 1 Ti. 1:15) Me nguaisei engdi ngika dimlak di lolatk a mondai er ngii, e ngbai mle soal lolengeseu er a rudam er ngii.

11. Ngera uchul me a Paulus a milsmechokl er a rudam me a rudos er ngii?

¹¹ A lebebil e a Paulus a mle kirel mesmechokl er a rudam me a rudos. Engdi ngika dimlak loruul uaisei le ngmle checherd a rengul. Ngbai milsmechokl er tir e le ngulemekerreu er tir e mle soal lomekerreu er tir er a tellemall.  Ngmillasem el meruul er a omesmechokl er ngii el mo beot er tir a mtebengii e mle soal a lebeot er tir a kongei er ngii. El ua tiang, ngar er a babilengel el mora rechad er a Korinth e ngmilsterir a mesisiich el omesmechokl. Uriul er a llechesii e ngulderechii a Titus el mo omes er tir. Ngkmal mle soal mo medengei el kmo ngua ngera uldesuir el kirel a babilengel. Nglocha kmal mlo dmeu a rengul er a lerenges el kmo te kilengei e uleltaut a omesmechokl er ngii!​—2 Ko. 7:6, 7.

12. Te mekera remechuodel e sebechir el melisiich er a rudam me a rudos?

¹² Klubeled. A remechuodel a sebechir loukerebai er a Paulus loeak sel longoit a taem lobengterir a rudam me a rudos. A ta er a rolel e ngsebechir el meruul er tiang a sel lemereched el mora miting e longedecheduch er tir e le kasisiich. Ngkmal diak lekemanget el taem a dousbech er ngii el mo dmu tekoi el melisiich er a odam me a lechub e ngodos. (Rom 1:12; Efe. 5:16) A remechuodel loukerebai er a Paulus a dirrek el smisicheterir a rudam me a rudos er tir loeak sel lousbech er a Tekingel a Dios el melisiich er tir e dirrek el olterekokl a rengrir er a bltkil a rengul a Dios el mo er tir. Me a lmuut kung, ngolterekokl a rengrir el kmo ngii me ngkmal betik a rengul er tir. Ngblechoel el mengedecheduch er tir e osiik a techall el mo chemat er tir. E sel bo el kirel mesmechokl er tir e a omesmechokl er ngii a mengai a uchetemel er a Bades. Ngdi bleketakl louchais aike el kirir el mesmechokl engdi ngungil mengedecheduch le ngomekerreu a uldesuir e soal a lekengei el nguu omesmechokl.​—Gal. 6:1.

13. A chelitecheterir a remechuodel ngsebechel rulleterir el mo uangerang a uldesuir?

¹³ A uchul me ngmo omelsemai. A remechuodel a diak lemecherrungel. Te di uai kid el rokui el mo remuul a cheleuid. (Rom 3:23) A lebebil e ngmo meringel er tir a moba tabesul uldasu el kirel a chelitecheterir. A rebebil a locha di mo melatk aikang me ngmo mechitechut a rengrir. A rekuk bebil a locha mo meruul excuse el kirel a chelitecheterir me ngdiak losmechokl omerellir.

14. A doltirakl er a Filipi 4:13, NW e ngmilekera klengariourreng e ngosuir a Paulus el mo outekangel a chelitechetul?

¹⁴ Kerebil a Paulus. A Paulus a mle ngariou a rengul me ngmiltebengii el kmo ngkmal diak el sebechel di ngii el mo mesisiich er a chelitechetul. Nguluusbech er a klisichel a Dios. A uchei e a Paulus a kmal mle blak a rengul loldechelakl er a Rekristiano. Engdi uriul e ngmlo medengei el kmo tia mekngit e kilengei el melodech a uldesuel me a blekerdelel. (1 Ti. 1:12-16) Ngoeak a ngelsuil a Jehovah e a Paulus a mlo betik a rengul, chubechub, e ngariou a rengul mengkerengel a sib. Ngika  kmal mle ungil medengei a chelitechetul engdi ngileltii el mo oumerang er a klausubes er a Jehovah e diak di lolatk a kngtil. (Rom 7:21-25) Ngdimlak lolasem el mo cherrungel el diak a telemellel e ngbai mle blak a rengul lomekeroul a blekerdelir a Rekristiano e uleltuil er a klisichel a Jehovah el mo kutmokl a ngerechelel.​—1 Ko. 9:27; monguiu er a Filipi 4:13, NW. *

15. Ngkirel mo uangerang osengir a remechuodel el kirel a chelitecheterir?

¹⁵ Klubeled. A rudam a diak lemetutk el mo mechuodel le tir el cherrungel. Me nguaisei engdi Jehovah mengerechir er tir el mo ouchais a cheleuid el omerellir e mo omekeroul a blekerdelir a Rekristiano. (Efe. 4:23, 24) A mechuodel a kirel merriter er ngii lousbech er a Tekingel a Dios e meruul omelodech. Seikid e a Jehovah mo ngosuir el mo dmeu a rengul e mo ungilbesul er aike el loruul.​—Jak. 1:25.

16. Ngera sebechel duubech a lsekum a mechuodel a di melatk a chelitechetul a chad?

¹⁶ A uchul me ngmo omelsemai. A remechuodel a locha mo medengei a chelitecheterir a rechedal ongdibel le te blechoel oureor lobengterir. A lsekum ngdiak el kerekikl e ngsebechir el mo checherd a rengrir, mekngit omerellir, e oukerrekeriil er tir. A Paulus a dilu el kmo a Satan a kmal soal a bo leuaisei omerellir.​—2 Ko. 2:10, 11.

17. Ngmle uangera osengel a Paulus el kirir a rudam me a rudos er ngii?

¹⁷ Kerebil a Paulus. Ngmillatk a ungil er a rudam me a rudos er ngii. Ngika mle ungil medengei a chelitecheterir, e le ngmla er ngii aike el taem el letilemellii a rengul. Me nguaisei engdi a Paulus a mle medengei el kmo ngngar ngii a klekakerous er a mekngit el omeruul me a mekngit el chad. Ngmle betik a rengul er tir me ngileltii el mo omes aike el ungil blekerdelir. A lsekum a rudam me a rudos er ngii a mle meringel er tir el meruul er a llemalt, e a mle uldesuel kirir a kmo ngmle ungil a moktek er tir engdi te uluusbech a ngeso.

18. Ngera ke suub er a omerellel a Paulus el mora Euodia me a Sintikei? (Filipi 4:1-3)

¹⁸ Molatk er a rolel e a Paulus a ngilsuterir a reteru el odos el mlara ongdibel er a Filipi. (Monguiu er a Filipi 4:1-3.) A Euodia me a Sintikei a milechei a klekakerous er a uldesuir me ngtomellii a delongelir. A Paulus a dimlak bo lemekngit er tir me a lechub e loukerrekeriil er tir, e ngbai millatk a ungil blekerdelir. Tirka mle blak a rengrir el odos el mla mesiou er a Jehovah el kemanget el taem. A Paulus a mle medengei el kmo a Jehovah kmal betik a rengul er tir. Ngii el millatk a ungil er tir a uchul me ngmle sebechel melisiich er tir el mo meruul a budech. Tia dirrek el uchul me  ngmle sebechel melemolem el dmeu a rengul e ngar ngii a mesisiich el deleuill er ngii me a rechedal tia el ongdibel.

19. (a) Ngmekera remechuodel el melemolem lungil osengir el kirir a rudam me a rudos er tir? (b) Ngera sebechem el suubii er sel siasing er a mechuodel el mengetmokl er a Blil a Ongdibel?

¹⁹ Klubeled. Remechuodel, momes aike el ungil el blekerdelir a rudam me a rudos er kau. Te diak el mecherrungel engdi a derta er tir a ngar ngii a ungil blekerdelir el soad. (Fil. 2:3) Nguaisei, el ngar ngii aike el taem el locha kirel a mechuodel el mo mesmechokl er a odam me a lechub e ngodos er ngii. Engdi ngkirir a remechuodel el mo ua Paulus el omes lengelakl aike el tekingir me a omerellir el omekseselkreng. Ngkirir lomes er a bltkil a rengrir el mora Jehovah, blakerreng er tir el dirk mesiou er ngii, e omes el kmo ngkmal sebechir el mo ungil. A remechuodel el blechoel el melatk a ungil el kirir a rechad a rullii a eltel a ongdibel el mo sebechir a rechad el mukeroul e dirrek el melechesiu er a bltikerreng.

20. Te mekera remechuodel e sebechir el melemolem el melai a klungiolir er a kerebil a Paulus?

²⁰ Ngmo ngosukemiu e remechuodel omolemolem el mesuub er a kerebil a Paulus. El ua tiang, ngsebechem el mora Watch Tower Publications Index, e mora “Paul” e mo er sel “example for elders.” Sel monguiu aika el suobel el ngar cheungel tiang e di lekau loker, ‘Ngmekera kerebil a Paulus e sebechel ngosukak el mo melemolem loba deurreng e meruul aika el betok el ngerechelek?’

21. Ngera sebechir a remechuodel el mo ulterekokl a rengrir er ngii?

²¹ Remechuodel, molatk el kmo a Jehovah diak longerechir er kemiu el mo cherrungel lungil e ngbai olengit er kemiu el lomelemii a blakerreng er kemiu. (1 Ko. 4:2) Jehovah a kmal uleba omereng el saul el kirel a meringel el urerel a Paulus me a blakerreng er ngii. Ngkmal dirrek el sebechel mo ulterekokl a rengmiu el kmo ngoba omereng el saul el kirel aike el rokui el moruul el ngar er a omesiungiu. A Jehovah kmal “diak . . . lobes a ureriu ma bltkil a rengmiu er ngii el mulechotii er cho mosiou er a re chedal.”​—Heb. 6:10.