A rebebil el di merechereched el menguiu er tia el cheldecheduch a locha mo omdasu el uaisei. Engdi tiang a mesaod er a reteru el chad el tir a di osisiu a ngklir e kede ngmai a klubeled er tiang sel dorriter a tekoi el dilubech.

King Saul a mla er ngii a reteuid el ngelekel el sechal me a reteru el ngelekel el redil. A Jonathan a ketengel a Saul el sechal. A uriul e ngmlo er ngii a ngelekel el sechal el Mefiboseth er a kankiubain er ngii er a Rispa. A Jonathan me ngdirrek el mla er ngii a ngelekel el sechal el ngklel a Mefiboseth. Me a King Saul a mla er ngii a ngelekel el sechal me a ngelekel a ngelekel el sechal el di diul a ngklir el Mefiboseth.

A King Saul a ulebult el mo omtok er a rechad er a Gibeon e millasem el omekoad er tir el rokui. A rebetok er tir a lulekodeterir. Tia kmal mle cheleuid el omeruul. E ngerang? E le sera taem er a Josua e a rechad er a Israel a rirellii a telbiil er a budech lobengterir a rechad er a Gibeon.​—Jos. 9:3-27.

Tia el telbiil a kmal dirk uluureor er a temel a King Saul. Ngika mlo diak loltirakl er tia el telbiil e millasem lomekoad er tir. Tia uchul me ngmla er ngii a “klengit er a koadelchad . . . [er] a Saul ma telungalek er ngii.” (2 Sa. 21:1) E a David a mocha king. Me a rechad er a Gibeon el silobel a mlo mengedecheduch er ngii el kirel. A David ulleker er tir el kmo ngmekera lesemecheklii a kngtil a Saul e bo lsebechel a Jehovah lomekngeltengat er a beluu. Tirka dimlak lolengit a udoud te bai ullengit me bo lokodeterir a reteuid er a rengelekel ngika el “chad el ulemekoad” er tir. (Ule. 35:30, 31) Me a David a kilengei er a ongterir.​—2 Sa. 21:2-6.

A Saul me a Jonathan a mla mad er a mekemad, engdi ngelekel a Jonathan er a Mefiboseth a dirk chad. Ngika er a lengalek e ngrirebet me ngmle chitechut me ngdimlak leteloi er a demal rubak er a bo loldechelakl er a rechad er a Gibeon. A David a rirellii a telbilel lobengkel a Jonathan el ngii a dirrek el mlo uchul a klungiolir a rengelekel, luldimukl er a Mefiboseth. (1 Sa. 18:1; 20:42) A Biblia kmo: “A king [David] a ulechotii a klechubechub el mora Mefiboseth, el ngelekel a Jonathan el ngelekel a Saul, e le ngrirellii a telbiil er medal a Jehovah.”​—2 Sa. 21:7, NW.

Me nguaisei engdi David a kilengei er a ongterir a rechad er a Gibeon. Me ngmilsterir a reteru el ngelekel a Saul el sechal, el ta er tir a Mefiboseth, me a reteim er a rengelekel a ngelekel. (2 Sa. 21:8, 9) Tia el omerellel a David a silemechklii a koadelchad el ble lechelsechusem er ngii a beluu.

Tia diak di louchais er kid el kirel a tekoi el dilubech er a reksi. A llechul a Dios a bleketakl. Ngmelekoi el kmo: “Re ngalek me ng diak le mokoad el kirel a tellemall el le riruul a re demerir ma re derrir.” (Dut. 24:16) Me a Jehovah diak bo lekengei er a kodellir tirka el teru el ngelekel a Saul el sechal me a reteim er a rengelekel a ngelekel a lsekum e ngdimlak a telemellir. Tia el llach a dirrek el dilechelir el kmo: “A chad a mo mokoad el di kirel a ikel tellemall el ngii a riruul.” Me ngbelkul a kmo tirka el ngelekel a Saul a locha dirrek el mle teloi er ngii er a lolasem lolekngemed er a rechad er a Gibeon. Me te merridm el kirel a kngterir.

Tia el cheldecheduch ochotii el kmo a chad a diak el sebechel lomdasu me a lechub e ngdmu el kmo, ngdiak a telemellel le ngii a di uleltirakl a ulekrael. A ta el osisechakl a kmo: “Bo mkerekikl er a rael el moeak ngii, ma rokui el rolem di bo lungil.”​—Osi. 4:24-27; Efe. 5:15.