1. Ngera el omelsemai a blo lechebengelii a Josef, e ngerang mirruul er ngii?

 A NGELEKEL a Jakob er a Josef a chilebengelii a meringel el omelsemai. A bechil a mastang er ngii er a Potifar a dilu er ngii el kmo: “Mei me bo mobengkek el bad.” Ngdi Josef a ultngeklii. A chad er chelecha el taem a locha mo melatk, ‘Ngera uchul me a Josef a dimlak lekengei el mo meruul er tiang?’ A Potifar a mle dibus. E a Josef a mle mesiou me ngika el redil a mle sebechel rullii a klengar er ngii el kmal mo meringel a lsekum e ngkotouar. Nguaisei engdi a Josef a kmal dimlak lekengei el mo bad lobengkel. E ngerang? Ngdilu el kmo: “Ng mekera e sebechek el mo meruul er cho ua tial mekngit el tekoi e mor a klengit el omtok er a Dios?”​—Gen. 39:7-12.

2. Ngmilekera Josef e medengei el kmo a laokreng a klengit lomtok er a Dios?

² Ngmilekera Josef e medengei el kmo a laokreng a “klengit”? A Llach er a Moses el mle uldimukl er ngii a “lak bo le melaok a rengum,” a milluches er a 200 el rak er uriul er tiang. (Exo. 20:14) Nguaisei engdi a Josef a mle ungil medengelii a Jehovah a uchul me ngmle sebechel mtebengii el kmo, ngngera deleboes er osengel. El ua tiang, ngika locha kmal mle medengei el kmo a Jehovah kiltmeklii a chebechiil el delongelel a sechal me a redil. E locha mle medengei a chisel a delal mechas er a Sara el kmo, ngmle eru el taem el Jehovah mlo ngosuir me ngmelemolem loba blakerreng er a chebechiielel ngii me a Abraham. A Dios a mirruul er osisiu el tekoi el kirel a bechil a Isak er a Rebeka. (Gen. 2:24; 12:14-20; 20:2-7; 26:6-11) Me a Josef er a lolatk e lolebedebek aika el tekoi e ngmlo sebechel mtebengii a ungil me a mekngit er osengel a Dios. E ngii el kmal mle betik a rengul er a Dios er ngii, a uchul me ngdirrek  el kmal mle betik a rengul er a melemalt el llechul, me ngrirellii er a rengul el mo oltirakl.

3. Ngera kede mo mesaod er tia el suobel?

³ Kau, ngbetik a rengum er a llemalt? Nglocha kmal uaisei. Engdi kid el rokui a diak demecherrungel me a lsekum e ngdiak dekerekikl, e ngsebeched el mechetikaik er a uldasu er tia el beluulechad el kirel a llemalt. (Isa. 5:20; Rom 12:2) Me kede mo mesaod el kmo ngngera llemalt me a uchul e ngmo klungioled a bo lebetik a rengud er a llemalt. E a uriul e kede mo mesaod a edei el tekoi el sebeched el meruul el melisiich er a bltkil a rengud el kirel a melemalt el llechul a Jehovah.

4. Ngera el cheleuid luldasu a lobang a rebebil el kirel a llemalt?

⁴ A remengeteklel a klechelid er a taem er a Jesus a ulemdasu el kmo te kmal melemalt el chad. Me nguaisei engdi Jesus a uluuketui er tir e le te uluukerrekeriil er a rechad e di tir el meruul a llecherir el kirel a llemalt. (Osi. 7:16; Lk. 16:15) A rebebil er a rechad er chelecha el taem me te uaisei. Te melekoi el kmo te meruul a llemalt engdi te oukerrekeriil er a rechad loltirakl er a uldesuir er a llemalt. Te mekedidai a rengrir e omdasu el kmo te kuk ungil er a rebebil. A Dios a kmal diak el soal aika el blekeradel, me ngii a diak el rolel a llemalt.

5. A doltirakl er a Biblia, e ngngera llemalt? Mosaod a bebil olechotel.

⁵ A llemalt a mera el ungil blekeradel. Tia belkul a kmo kede meruul a tekoi el melemalt er osengel a Jehovah. Ngar er a Biblia e aike el tekoi el melutk er a “llemalt” a mesaod el kirel a dekiei loltirakl a ngarbab el llechul a Jehovah. El ua tiang, a Jehovah dilu er a rulterau a klalo el kmo ngkirir lousbech a “melemalt el olebedabel.” (Dut. 25:15) Me a Kristiano el soal mo melemalt er osengel a Dios a kirel mo melemalt a rolel a loruul a siobai. A melemalt el chad a diak el soal lomes er a ngii di el chad el mo chuarm er a chelebirukel. E a chad a lsoal mo “ungil er a rengul” a Jehovah e ngkirel melatk el kmo, ngngera osengel a Jehovah el kirel a omelilt el loruul.​—Kol. 1:10.

6. Ngera uchul me ngsebechel lulterekokl a rengud el kirel aike el ledu Jehovah el kmo ngungil me a mekngit? (Isaia 55:8, 9)

⁶ A Biblia mesaod er a Jehovah el kmo nguchul a rokui el llemalt. Sei a uchul me ngokedongall el ‘ngike el lekiei er ngii a llemalt.’ (Jer. 50:7, NW) Ngii el Ulemeob a uchul me ngdi ta el ngii a ngar ngii a llemeltel lolterekokl el kmo, ngngera ungil me a mekngit. E ngii el cherrungel a uchul me a osengel el kirel a ungil me a mekngit a kuk ngarbab er kid, el cheltikaik le ngdiak demecherrungel e ngar er a klengit. (Osi. 14:12; monguiu er a Isaia 55:8, 9.) Me nguaisei kid a rruul lokesiul a Dios a uchul me ngsebeched el kiei loltirakl a llechul el kirel a llemalt. (Gen. 1:27) E kmal soad el meruul el uaisei. Bltkil a rengud el mora Demad a uchul me kede mora tkurrebab el klisiched el oukerebai er ngii.​—Efe. 5:1.

7. Ngera uchul me ngkirel ngar ngii a ulterekokl el rolel a doruul a tekoi? Momekesiu.

⁷ Kede ngmai a klungioled sel doltirakl a llechul a Jehovah el kirel a ungil me a mekngit. Ngsebechem el mtebengii a uchul? Molatk ulekum a derta el bank a mla er ngii klisichel el olterekokl er a kerresel a udoud me a lechub a lsekum a derta el kombalii er a construction a sebechir el di tir el olterekokl a rolel a loluk e lomekedechor. Ngmo uchul a klou el tellemall. Me a lechub a rechad er a osbitar a diak a ulterekokl el rolel a ukeruul loltirakl er ngii, e te mad a resmecher. Nguaisei sel lengar ngii a ulterekokl el rolel a doruul a tekoi e kede mukerreu. Ngdi osisiu a llechul a Dios el kirel a ungil me a mekngit a omekerreu er kid.

8. Ngera el klengeltengat a medechel el kirir tirke el sorir el meruul a llemalt?

 ⁸ A Jehovah omekngeltengat er tirke el melasem el kiei loltirakl a llechul. Ngtibir el kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.” (Psa. 37:29) Ka molatk er a kltarreng, budech, me a deurreng el mo er ngii a lsekum a rokui el chad oltirakl a llechul a Jehovah. A Jehovah soal chouaisei el klengar el kirem. Me kid el rokui a kmal betok a uchul me ngbetik a rengud er a llemalt! Ngmekera desisichii a bltkil a rengud el kirel tia el blekeradel? Ka me dosaod a edei el rolel.

9. Ngera mo ngosukid el mo betik a rengud er a llemalt?

⁹ Kot: Bo lebetik a rengum er ngike el meruul aika el llach. Ngkired el mekurulii a bltkil a rengud el mo er Ngike el meruul a llach el kirel a ungil me a mekngit. Seikid e ngmo sebeched el mo betik a rengud er a llemalt. Sel lemenga el mo mesisiich a bltkil a rengud el mora Jehovah me ngii a menga el mo soad el kiei loltirakl a melemalt el llechul. Ngdi ua tiang: A lsekum a Adam me a Eva mle betik a rengrir er a Jehovah e ngkmal dimlak bo lotngeklii a melemalt el llechul.​—Gen. 3:1-6, 16-19.

10. Ngmilekera Abraham e mlo dmolech a klemedengei er ngii el kirel a uldesuel a Jehovah?

¹⁰ Ngkmal diak el soad el mo rullii a osisiu el cheleuid el tekoi lerirellii a Adam me a Eva. Ngsebeched loibngid er tia el blekeradel a lsekum e kede melemolem el mesuub el kirel a Jehovah, moba omereng el saul el kirel a blekerdelel, e melasem el mo medengelii a rolel e ngomdasu. Sel doruul el uaisei e a bltkil a rengud el mo er ngii a mukeroul. Molatk er a Abraham. Ngika kmal mle betik a rengul er a Jehovah. Mo lmuut er a bo lemeringel er ngii a omtab a belkul omelilt er a Jehovah me ngdimlak bo lomtok. Ngbai millasem el lmuut el mo ungil medengelii a uldesuel a Jehovah. El ua tiang, sera lesubii el kmo a Jehovah a mo olekngemed er a Sodom me a Gomora, e ngmlo bekikl el kmo “[ngika el] oukerrekeriil er a beluulchad el rokir” a mo lokngemedeterir a remelemalt lobengterir a redengerenger. Ngmillatk el kmo a Jehovah a kmal diak el sebechel rullii chouaitia el tekoi me a uchul me nguleker er ngii a bebil ker. A Jehovah uleba kllourreng longer er a Abraham. Me a Abraham a mlo mtebengii el kmo a Jehovah omes a reng er a derta el chad e kmal diak el sebechel lomals er a rediak a telemellir lobengterir a redengerenger.​—Gen. 18:20-32.

11. Ngmilekera Abraham e ochotii el kmo ngmle betik a rengul er a Jehovah e oumerang er ngii?

¹¹ Tia el cheldechedechal a Abraham lobengkel a Jehovah a kmal klou a lerirellii el mo er ngii. Nglocha kmal rirellii el lmuut el mo betik a rengul er a Jehovah e mengull er ngii. Betok el rak er uriul e ngmlo er ngii a meringel el omeasem el kirel a klaumerang er a Abraham er a Jehovah. A Jehovah ullengit er ngii me letengetengii a betik er a rengul ngelekel el Isak. Tiakid el taem e a Abraham a kmal mla mo ungil medengelii a Jehovah me ngdimlak loker a ker. Ngbai mirrael el mo kutmeklii a ongtil a Jehovah. Me nguaisei engdi ka molatk er a ringel lulemelechesiu er ngii er a longetmokl er ngii el kirel tia el tekoi. Nglocha kmal mlo melatk aike el bla lesuub el kirel a Jehovah. Ngmle medengei el kmo a Jehovah a kmal diak bo lerellii a chelebirukel me a lechub e ngngii di el tekoi el diak el ngar er a rolel a bltikerreng. A doltirakl a tekingel a apostol Paulus, e a Abraham a milerriter el kmo a Jehovah sebechel lokisii a ngelekel er a Isak. (Heb. 11:17-19) A Jehovah tilbir el kmo a  Isak a mo demal a renged me nguaisei engdi ngar tiakid el taem e a Isak a dirkak bo loungalek. Ngkmal mle betik a rengul er a Jehovah me nguluumerang el kmo a Demal a meruul a llemalt. Me alta ngkmal mle meringel er a Abraham engdi nguleak a klaumerang e ngullengesenges.​—Gen. 22:1-12.

12. Ngmekera sebeched loukerebai er a Abraham? (Psalm 73:28)

¹² Ngmekera sebeched loukerebai er a Abraham? Ngkired el melemolem el mesuub el kirel a Jehovah. Sel doruul el uaisei e kede lmuut el mo kmeed er ngii e lmuut el mo dmolech a bltkil a rengud el mo er ngii. (Monguiu er a Psalm 73:28.) Kede train er a ukltked el mo oltirakl er a uldesuel a Dios. (Heb. 5:14) Me sel lolasem el mengesuseu er kid a chad el mo meruul er a tekoi el mekngit e ngdiak demechetakl. Kede mo ouketui a ngii di el omeruul luchul a ringel el mo er ngika el Demad el ngar er a eanged, e tomellii a deleuill er kid me ngii. Ngera dirrek el ta er a rolel e kede ochotii el kmo ngbetik a rengud er a llemalt?

13. Ngmekera sebeched el meruul a llemalt? (Osisechakl 15:9)

¹³ Ongerung: Bek el sils e momekeroul er a bltkil a rengum el kirel a llemalt. Ngsebeched el mekurulii a bltkil a rengud el mora melemalt el llechul a Jehovah el ua rolel a dolisiich a muscles er kid. Ngkired el meringel loureor el meruul er ngii er a bek el sils. Tia diak lemeringel a doruul er ngii. A Jehovah a kmal diak bo longerechir er kid el mo meruul er a tekoi el diak el sebeched. (Psa. 103:14) Ngolterekokl er a rengud el kmo ng “betik a rengul er a chad el meruul a melemalt.” (Monguiu er a Osisechakl 15:9.) A lsekum e kede meruul a ileakl el turrekong el ngar er a omesiunged el mora Jehovah e kede mo blak a rengud el meruul aike el luchul e kede mo otutii. Ngdi osisiu el kirel a omeruul el llemalt. A Jehovah oba kllourreng lolengeseu er kid me a cherengel a taem e kede mukeroul.​—Psa. 84:5, 7.

14. Ngera “llemalt el mo ua ia le tekerngel a ulumiu,” e ngera uchul me kede ousbech er ngii?

¹⁴ A Jehovah oeak a bltikerreng e ngomeklatk er kid el kmo a omeruul el llemalt a diak  lemeringel. (1 Jn. 5:3) E ngbai mekerreuid, e kid a ousbech a ulekerreu er a bek el sils. Lak mobes aike el klekedall er a mekemad el lulsaod a apostol Paulus. (Efe. 6:14-18) Ngera el klekedall a ulemekerreu er a chaidirengul a soldau? Ngllemalt el mo uai a tekerengel a ulud, el ngii omtechei a melemalt el llechul a Jehovah. Ngdi ua tekerengel a ulud lomekerreu er a chaidirengud, a melemalt el llechul a Jehovah a mekerreuii a rengud, el ngike el mera el chad er a chelsed. Mada doterekeklii el kmo kede oubail a klekedelled er a mekemad el ngii a uldimukl er ngii a llemalt el uai a tekerengel a ulud!​—Osi. 4:23.

15. Ngmekera sebechem el milau er a llemalt el mo uai a tekerengel a ulud?

¹⁵ Ngmekera sebechem el milau er a llemalt el mo uai a tekerengel a ulum? Ngsebechem el meruul el uaisei loeak sel molatk a llechul a Jehovah sel moruul omelilt er a bek el sils. Sel molilt a tekoi el mosaod, ongngak el morrenges, tekoi el momes, me a lechub e ng book el monguiu e a kot e di lekau loker: ‘Ngera ak mo omekeek er a renguk? A Jehovah ngmo kongei er tia el tekoi? Me a lechub e tiang ngmelisiich a deleboes, omelemall er a rechad, rechorech, omelatk er a di kid, el ngii a tekoi el diak lemelemalt er osengel a Jehovah?’ (Fil. 4:8) A lsekum omelilt el moruul a oltirakl er a soal a Jehovah, e a melemalt el llechul a mo omekerreu er a rengum.

16-17. Ngmekera Isaia 48:18 e olterekokl er a rengud el kmo ngsebeched el kiei loltirakl a llechul a Jehovah el mo cherechar?

¹⁶ Kau a lebebil e ke kora mo bekikl el kmo, ngmera el sebechem loltirakl a melemalt el llechul a Jehovah er a bek el sils el mo betok el rak? Molatk er a okesiu lousbech er ngii a Jehovah el ngar er a Isaia 48:18. (Monguiu.) Jehovah tibir el kmo a llemelted a sebechel mo ua “chedesaoch er a daob.” Ka molebedebek er kau el dechor er a bkul a chelechol lomes a chedesaoch el me subechii er a chelechol e omelechesiu er kau el budech. Ke mo bekikl el kmo aika el chedesaoch a mo el stob el mei? Ngkmal diak! Ke medengei el kmo a chedesaoch aikakid er a leuaisei el betok el telael el rak e kmal diak a ta el bo el stob.

¹⁷ A llemeltem a kmal sebechel mo ua chedesaoch er a daob! Ngmekera mo uaisei? Sel lebo el kirem el meruul er a omelilt e a kot e molatk er a soal a Jehovah omoruul er ngii. E motireklii. Alta ngkmal mo meringel er kau el meruul er ngii me a lak, me a betik a rengul el Demam a di mo blechoel lobengkem e mo ngosukau el melemolem el meruul a llemalt er a bek el sils.​—Isa. 40:29-31.

18. Ngera uchul me ngkired el kerekikl me ngdiak bo doukerrekeriil er a rechad loba uldesued el kirel a llemalt?

¹⁸ Ongedei: Becherei a kerrekeriil me lengar chimal a Jehovah. Chelecha el dolasem el kiei loltirakl a melemalt el llechul a Jehovah e ngkired el kerekikl me ngdiak bo doukerrekeriil er a rechad e desal kmal mo melemalt. Ngdiak doltengel osenged er a rechad e bo doukerrekeriil er tir loba uldesued el kirel a llemalt, e ngbai kede melatk el kmo a Jehovah “ngikel oukerrekeriil er a beluulchad el rokir.” (Gen. 18:25) Jehovah dimlak loterekeklii el kmo ngkid a oukerrekeriil. E ngbai Jesus a dilu el kmo: “Lak moukerrekeriil er a re chad, me lak bo loukerrekeriil er kemiu a Dios.”​—Mt. 7:1. *

19. Ngmilekera Josef e ochotii el kmo nguluumerang er a rolel a Jehovah loukerrekeriil?

¹⁹ Ka deluut el melatk er a kerebil a melemalt el chad el Josef. Ngika dimlak loukerrekeriil  er a rechad, mo lmuut er tirke el mle mekngit a omerellir el mo er ngii. A rubekul a chillebedii, ulterur el mo sibai, e rirellii a demerir el mo omdasu el kmo ngmla mad. Betok el rak er uriul e ngliluut el mo kasoues ngii me a telungalek er ngii. Chelecha ngmla mo mesisiich el merreder er a beluu me ngmle sebechel loukerrekeriil er a rubekul e melaitechei. A rubekul a mle bekikl el kmo ngmo el mo meruul el uaisei alta te kmal ouuchel a rengrir el kirel omerellir el mo er ngii. Me nguaisei engdi a Josef ulelterekokl a rengrir el kmo: “Lak kom medakt; ng diak el sebechek el mor a deruchellel a Dios.” (Gen. 37:18-20, 27, 28, 31-35; 50:15-21) Josef a mle ngariou a rengul e milecherei a Jehovah me ngngii oukerrekeriil.

20-21. Ngkired el mekerang me ngdiak bo domdasu el kmo kede kmal melemalt?

²⁰ Kede ua Josef el mecherei a kerrekeriil er chimal a Jehovah. El ua tiang, ngkmal diak doruul er kid el leko kede medengei a uchul me a rudam me a rudos er kid a meruul aike el loruul. Ngdiak el sebeched el menguiu a reng. “Ngdi RUBAK a merriter a reng.” (Osi. 16:2) Ngika betik a rengul er a rokui el chad, el chad er a kakerous el beluu, siukang, me a renged. Ngmelisiich er kid el kmo ‘mbok a rengmiu.’ (2 Ko. 6:13, NW) Ngdiak dosiik a rolel e doukerrekeriil er tir, e ngbai kede osiik a rolel e mo betik a rengud er a rokui el chedal a telungalek er kid er a klereng.

²¹ Tia dirrek el belkul a kmo ngdiak doukerrekeriil er tirke el ngar er a ikrel ongdibel. (1 Ti. 2:3, 4) Kau ke mo oukerrekeriil er a chedam el diak el lengar er a klemerang e melekoi el kmo, “Ngika kmal diak a rolel e lebe er a klemerang”? Ngkmal diak! E le tia belkul a kmo kede omdasu el kmo kede kmal melemalt. Jehovah a kmal dirk omesterir a “rokui el chad er a bek el beluu” a techellir el mo obult. (Rel. 17:30) Lak dobes el kmo a Jehovah omes er tirke el omdasu el kmo te kmal melemalt el kmo te diak lemelemalt el chad.

22. Ngera uchul me ke mla rullii er a rengum el mo meruul a llemalt?

²² A bltkil a rengud el kirel a melemalt el llechul a Jehovah a mo uchul a klou deurreng e dirrek el mo ngosuterir a rechad el mo kmeed er kid me a Dios er kid. Me dolemolem el “songerenger e meched a [rengud] era llemalt.” (Mt. 5:6, BT) Bo lulterekokl a rengum el kmo a Jehovah a kmal dmeu a rengul sel lomes er kau el kmal melasem el meruul a llemalt. Alta rechad a kmal di merael el menga el mo diak loruul a llemalt, engdi bo lemechelaod a rengum! E lak mobes el kmo a “RUBAK a . . . betik a rengul er a re melemalt el chad.”​—Psa. 146:8.