1. Ngkirel mo uangera osenged el kirel tia el techall el sebeched el meluluuch el mora Jehovah?

 NGIKE EL milebii a eanged me a chutem a mla meskid a kmal mekreos el sengk. Ngsebeched el meluluuch el mo er ngii. Molatk er tiang: Ngkmal sebeched louchais er a Jehovah aike el rokui el ngar er a rengud er a ngii di el taem el ngar er a ngii di el omelekoi, e diak dousbech a appointment. Ngsebeched el meluluuch el mo er ngii er a bet er osbitar me a lechub e ngblil a kelebus, e ulterekokl a rengud el kmo ngika el betik a rengul el Demad a rongesid. Kede kmal oba omereng el saul el kirel tia el sengk.

2. Ngmilekera King David e ochotii el kmo a nglunguuch a kmal mle mekreos er a rengul?

² King David a ulemes er a nglunguuch el kmal mekreos. Ngmilengitakl el mora Jehovah el kmo: “A nglunguchek bo le ua ochod er medam.” (Psa. 141:1, 2) A reprist er a taem er a David a kmal mle kerekikl er a loruul er a ochod el luluusbech er ngii el kirel a mera el omengull. (Exo. 30:34, 35) Me a David el luluusbech er a ochod el mesaod er a nglunguuch a ochotii el kmo, ngmle soal mo kerekikl el melatk aike el bo lolekoi el mora Demal el ngar er a eanged. Tiakid a dirrek el soad el meruul er ngii. Ngkmal soad a nglunguched a lodeuir a rengul a Jehovah.

3. Ngkired el oba ngera el uldasu sel doluluuch el mora Jehovah?

³ Ngkmal diak el soad loba bleot el reng sel doluluuch el mora Jehovah. Ngbai sel doluluuch e ngkired lochotii a dmolech el omengull. Molatk aike el mengasireng el ues el lules a Isaia, Esekiel, Daniel, me a Johanes. Aika kakerous el ues engdi ngngar ngii a ta el tekoi el losisiu er ngii. Ngmeskid a siasing er a Jehovah el klamiokel el king. A Isaia “milsa RUBAK . . . Ng mle dengchokl er a kingellel er omerreder el klider el ngar bab.” (Isa. 6:1-3) A Esekiel a milsa Jehovah el ngar er a kuruma  er ngii el “ngii el rokir a di mle medidiich er osisiu el kerdel a ngau. Sel llomes a mlar ngii er ngii a ikel bek el bedengel a chiro er orrekim.” (Ese. 1:26-28) A Daniel a milsa “ngikel mle ngar er a irechar el mei” el oubail er a becheleleu e a kingellel er omerreder a kmard er a ngau. (Dan. 7:9, 10) E a Johanes a milsa Jehovah el dengchokl er a kingellel er omerreder el mle iliuekl er ngii a orrekim el kora bedengel a emerald. (Och. 4:2-4) Sel dolatk er a klebkellel a Jehovah e ngmekltkid el kmo, a nglunguuch a kmal ileakl el techall e kmal klou a ultutelel a doruul er ngii loba dmolech el omengull. Me nguaisei, engdi ngera ungil doluluuch el kirel?

4. Ngera kede suub er a uchelel a nglunguchel a Jesus er sel kerebai el kirel a nglunguuch el ngar er a Mateus 6:9, 10?

⁴ Monguiu er a Mateus 6:9, 10. A Jesus a ullisechakl er a redisaiplo er ngii el ngar sel Cheldecheduch el Ngar er a Rois er a rolel a nglunguuch el odeuir a rengul a Dios. Uriul er a ledu el kmo “ng ua tiakid cho moluluuch,” e ngdilu aike el meklou a ultutelel el tekoi el uldimukl er a moktek er a Dios. Aikang a: lemechedaol a ngklel a Jehovah, Renged el di kmedung el mei el ngii a mo okngemedeterir a rumtok er a Dios, me a klengeltengetel a Dios er a ngar medad el kirel tia el chutem me a rechad. Aika el tekoi sel bo luldimukl er a nglunguched e kede ochotii el kmo, a moktek er a Jehovah a klou a ultutelel er kid.

5. A Jehovah ngorrenges sel doluluuch el kirel aike el dousbech?

⁵ Ngar er a ongingil tedebechel tia el nglunguuch e a Jesus ochotii el kmo ngsebeched el meluluuch el kirel aike el dousbech. Ngsebeched lolengit er a Jehovah me lebeskid a keled el kirel chelecha el sils, me lousubes a kngtid, lomekerreu er kid me lak demekesuseu, e losebelid er ngike el mekngit. (Mt. 6:11-13) Sel dolengit aika el tekoi er a Jehovah e kede ochotii er ngii el kmo, kede kmal lousbech er a ngelsuil e kmal soad el nguu a kengei er ngii.

6. A tekoi el doluluuch el kirel, ngkmal kirel di aike el tekoi el ngar er a kerebai el kirel a nglunguuch? Mosaod.

⁶ A Jesus a dimlak longerechir er a rultirakl er ngii me bo lolekoi aika el osisiu el tekoi el ngar er a nglunguchir. Ngar aike el bebil er a  nglunguchel, e a Jesus a milluluuch el kirel a kakerous el tekoi el mle meklou a ultutelel er ngii er seikid el taem. (Mt. 26:39, 42; Jn. 17:1-26) Me ngdi osisiu, ngsebeched el meluluuch el kirel aike el tekoi el debekikl er ngii. Sel bo lekired el meruul a omelilt, e ngsebeched el meluluuch lolengit er a llomeserreng me a sekutaberreng. (Psa. 119:33, 34) Sel bo doruul er a meringel el ngerachel e ngsebeched el meluluuch lolengit er a ngeso el mo medengei aike el kired el meruul. (Osi. 2:6) A ruungalek a sebechir el meluluuch el kirir a rengelekir, a rengalek a sebechir el meluluuch el kirir a rechad er a blirir, e kid el rokui a kmal sebeched, e dirrek el kired el meluluuch el kirir a remesuub a Biblia me tirke el domerk el mo er tir. Me nguaisei a nglunguched a diak lekirel di tekoi er ongit.

7. Ngera uchul me ngdiak el kired lobes el meluluuch el oldanges er a Jehovah?

⁷ Ngkmal diak el kired lobes el meluluuch el oldanges er a Jehovah. Ngdiak a rredemelel a nguu odanges el ua Dios er kid. Ngii “a ungil, e ousubes a tellemall.” Ngdirrek el ‘chubechubchad e ungil el Dios, ng meoud el ngmasech a rengul e a bltkil a rengul ma blakerreng er ngii a diak a ulebengelel.’ (Psa. 86:5, 15) Me ngkmal betok a ungil luchul me ngkired el oldanges er a Jehovah.

8. Ngera bebil er a tekoi el sebeched loureng a sulel a Jehovah el kirel? (Psalm 104:12-15, 24)

⁸ Aika diak di lerellid el mo oldanges er ngii, ngdirrek el rullid el mo mereng a sulel el kirel aika el bla lebeskid. El ua tiang, ngsebeched el mereng a sulel kirel a betok el ungil chiro el deues er a bung, betok el kakerous e ungil a chazi er ngii el kall, me a deurreng el mei loeak a kmes el deleuill er kid me a rebebil. Ngika el betik a rengul el Demad a meskid aikang me a lmuut el betok el oldeu er a rengud. (Monguiu er a Psalm 104:12-15, 24.) E a lmuut el klou a ultutelel, a kede mereng a sulel a Jehovah el kirel aika el betok el kall er a klereng el lomeskid me a omelatk el dobang el kirel a ngar medad.

9. Ngera sebechel ngosukid me ngdiak dobes el mereng a sulel a Jehovah? (1 Thesalonika 5:17, 18)

⁹ Ngkmal sebechel mo beot er kid obes el mereng a sulel a Jehovah el kirel aike el loruul el kired. Ngera sebechel ngosukau me  ngdiak mobes? Ngsebechem el rullii a list er aike el tekoi el bla moluluuch el kirel e mo chuib a taem e ke kuk omes er ngii el kmo, ngngera er ngii a bla longer a Jehovah. E moluluuch el mora Jehovah el mereng a sulel el kirel. (Monguiu er a 1 Thesalonika 5:17, 18.) Molatk er tiang: Ngkmal mo dmeu a rengud sel sekum a rechad olecholt er kid omereng el saul. Ngdi osisiu, sel diak dobes el mo mereng a sulel a Jehovah el lulenger a nglunguched, e ngkmal mo dmeu a rengul. (Kol. 3:15) Me nguaisei, ngngar ngii a lmuut el ta er a klou a ultutelel luchul me ngkired el mereng a sulel a Dios er kid.

10. El ua losaod a 1 Petrus 2:21, ngera uchul me ngkired el mereng a sulel a Jehovah el ulderchii a Ngelekel el mei er tia el chutem?

¹⁰ Monguiu er a 1 Petrus 2:21. Ngkired el mereng a sulel a Jehovah el ulderchii a Ngelekel el me olisechakl er kid. Sel dosuub er a klengar er a Jesus e kede suub a betok el kirel a Jehovah me a rolel e kede odeuir a rengul. E a lsekum e kede molecholt er a klaumerang er a tengetengel a Kristus e ngsebechel mo er ngii a kmes el deleuill er kid me a Jehovah el Dios e mo budech a delongeled kid me ngii.—Rom 5:1.

11. Ngera uchul me a nglunguched a kirel loeak a ngklel a Jesus?

¹¹ Kede mereng a sulel a Jehovah e le ngsebeched el meluluuch el mo er ngii loeak a Ngelekel. Ngokiu a Jesus e a Jehovah meskid aike el dolengit. Ngorrenges e onger aike el nglunguuch el oeak a ngklel a Jesus. A Jesus a dilu el kmo: “[Ak] mo remuul a ngii di le ngerang el molengit el oba ngklek, me bo lecholt a klebkellel a Chedam el okiu a Ngalek.”​—Jn. 14:13, 14.

12. Ngera dirrek el uchul me ngkired el mereng a sulel a Jehovah el kirel a Ngelekel?

¹² A Jehovah sebechel lousubes a kngtid le ngolubet el tengetengel a Jesus a uchul. A Bades a mesaod er a Jesus el “Ngarbab el Prist el [dengchokl er a] kingellel er a kadikm er a kingellel a Dios er a eanged.” (Heb. 8:1) A Jesus a “Rubak ra ngeso el kired el ngar medal a Dios.” (1 Jn. 2:1, BT) Me kede kmal oba omereng el saul el mora Jehovah el milskid a Ngarbab el Prist el medengei a chelitechetud e “meluluuch el kired”! (Rom 8:34; Heb. 4:15) Kede diak demecherrungel me a lemlak a tengetengel a Jesus e ngdiak el sebeched el meluluuch el mora Jehovah. Ke locha kmal mo kongei el kmo alta ngmo betok el di doreng a sulel a Jehovah el kirel a sengk er a Ngelekel me ngii a di ngesonges.

13. Ngmilekera Jesus e ochotii el kmo ngkmal betik a rengul er a redisaiplo er ngii er sel kesus er a uchei er a lemad?

¹³ Sel kesus er uchei er a lemad a Jesus, e ngmilluluuch el kemanget el taem el kirir a redisaiplo er ngii lolengit er a Demal “me [longkar] er tir er ngikel Mekngit.” (Jn. 17:15) A Jesus a mera el mle betik a rengul er tir. Ngika mocha chobengelii a kmal meringel el omelsemai engdi ngmillatk el kirir a redisaiplo er ngii.

14. Ngmekera dochotii a bltkil a rengud el mora rudam me a rudos er kid?

¹⁴ Kede oukerebai er a Jesus sel lak di dolatk aike el dousbech. E ngbai kede blechoel el meluluuch el kirir a rudam me a rudos er kid. Sel doruul el uaisei e kede olengesenges er a tekingel a Jesus el mo kaubltikerreng, e ochotii er a Jehovah a klungel a bltkil a rengud el mo er tir. (Jn. 13:34) A nglunguched el kirir a mo ngosuterir. A Tekingel a Dios a kmo, “a  nglunguchel a melemalt el chad a kmal klou a le rellii.”​—Jak. 5:16.

15. Ngera uchul me a rudam me a rudos er kid ousbech a nglunguched?

¹⁵ A rudam me a rudos er kid a kmal ousbech er kid el meluluuch el kirir e le te chelebangel a betok el ringel. Ngsebeched el meluluuch lolengit er a Jehovah me lengesuterir el outekangel a secherir, telemellel a beluu, mekemad, odechelakl, me a lmuut el bebil. Ngdirrek el sebeched el meluluuch el kirir a rudam me a rudos er kid el tir olengeseu er tirke el ousbech a ngeso. Ke locha medengelterir a rebebil el chelebangel chouaika el blekeradel. Kau, ngsebechem el ousbech a ngklir e meluluuch el kirir? Kede ochotii a mera el bltikerreng sel dolengit er a Jehovah me lengesuterir el outekangel.

16. Ngera uchul me ngungil doluluuch el kirir tirke el omekrael er kid?

¹⁶ Tirke el omekrael er a ongdibel a dirrek el kmal oba omereng el saul sel doluluuch el kirir, e tia kmal ngosuterir. A apostol Paulus a mle medengei el kmo ngkmal uluusbech er tiang. Ngdilu el kmo: “E dirrek el moluluuch el kirek, ma Dios bo le beskak a tekingel sel bochu kungedecheduch, me bo le sebechek el bekeu el mengedecheduch e olecholt er a klemera el ngar a Ebangkelio el dimlak lodengelii a re chad.” (Efe. 6:19) Ngdi osisiu, chelecha el taem e te betok a rudam el kmal meringel el oureor el omekrael er kid. Kede ochotii a bltkil a rengud el mo er tir sel doluluuch lolengit er a Jehovah me lomekngeltengat a urerir.

17-18. Oingerang e te locha mo olengit er kid el meluluuch el kirir a rebebil, e ngera kired el melatk?

¹⁷ A lebebil e te locha mo olengit er kid el meluluuch. El ua tiang, a odos a locha mo olengit er a kuk ta er a odos el ulebengkel el mora study er ngii me loluluuch. Ngika el odos a locha diak el sal medengelii a study er ngii me nglocha mo meluluuch el mengesimer er a omesubir. Ngoeak tia el rolel e ngsebechel mo medengei aike el sebechel meluluuch el kirel ngika el mesuub er a Biblia.

¹⁸ A odam a locha bo lolengit er ngii el meluluuch er a miting er a odingel me a lechub e ngmiting er a ongdibel. A rudam el meluluuch er aikakid el taem a kirir melatk er a moktek er a miting. A nglunguuch a diak dousbech er  ngii el mellach er a ongdibel me a lechub e kede meruul a announcement. A miting er a ongdibel a ousbech er a eim el bung el kirel a chelitakl me a nglunguuch, me a odam el mo meluluuch a diak el kirel ‘kemanget a nglunguchel,’ tokubets a lsekum e ngmeluluuch el melai er a chesmerel a miting.​—Mt. 6:7.

19. Ngera mo ngosukid el mo kltmokl el kirel a sils er a Dios?

¹⁹ Ngkired el rullii a nglunguuch el mo klou a ultutelel tekoi er a klengar er kid e le sils er a kerrekerilel a Jehovah a kmedang. A Jesus a millekoi el kirel tiang el kmo: “Bo mklekar e di blechoel el meluluuch me le bor ngii a klisichiu el mtekangel a rengmiu er a ikel rokui el mor ngii el tekoi.” (Lk. 21:36) Nguaisei, sel bo deblechoel el meluluuch e ngrullid el mo melemolem el klekar e kltmokl sel lemei a sils er a Dios.

20. Ngmekera nglunguched e mo uai a ungil a bul ochod?

²⁰ Ngera kede mla smaod? Kede kmal oba omereng el saul el kirel a nglunguuch. Aike el kot el meklou a ultutelel el tekoi el kired el meluluuch el kirel aike el uldimukl er a moktek er a Dios. Kede dirrek el mereng a sulel a Jehovah el kirel a Ngelekel me a omengederederel er a Renged, e meluluuch el kirir a rudam me a rudos er kid. A Jehovah a dirrek el soal a doluluuch el kirel aike el dousbech er a klengar me a dirrek el klereng. Sel bo dekerekikl el melatk aike el bo dolekoi er a nglunguched, e kede ochotii el kmo kede omes er a nglunguuch el kmal mekreos. A tekinged a mo uai a ungil a bul ochod el mora Jehovah, el rullii el mo “dmeu a rengul.”​—Osi. 15:8.