1. Ngera klekakerous er aike el tekoi el dousbech me aike el kuk di soad?

 NGKMAL di kesai el tekoi a dousbech me bo el sebeched el melemolem el ngar. Kede di ousbech a kall me a bail me a blai. Engdi kid a rechad a kmal diak bo lak a soad. Me a rebetok el chad a diak lolechesuar el kmo ngdiak lousbech aike el rokui el sorir el klalo.

2. Ngera bebil er a klalo el sorir a rechad?

² A chad el kiei er a chebuul el beluu a locha mo soal a klalo el kuk ngodech er aike el soal ngike el chad el kuk kiei er a merau el beluu. Ngar er a bebil beluu e a rechad a sorir el mo er ngii a mobile phone er tir me a lechub a chotobai me a lechub e ngmo er ngii a telkib el chetemir. E ngar er a kuk bebil beluu e a rechad a sorir a meringel a cheral el bail me a meklou el blai me a lechub e ngmeringel a cheral el mlai. Me nguaisei, engdi a lak dekerekikl e ngsebechel a betok el udoud me a beluu el dekiei er ngii el mo uchul e kede omuchel el mo soad a betok el klalo el diak dousbech me a lechub e ngkmal meringel er kid el omechar.

3. Ngerang a skel a kerruul?

³ Ngerang a skel a kerruul? Tiang a uldesuel a chad el soal a klalo el  kuk ngaruchei er a deleuill er ngii me a Dios. Ngdiak lemokngemed a soal me aike el lousbech me ngdi melemolem el osiik a betok. Me a rechad el diak el betok a ududir me a lechub e ngdiak el sebechir el omechar a meringel a cheral el klalo, a dirrek el sebechir el mo mechesang el kirel a skel a kerruul. Seikid e ngmo diak lenguu a Rengedel a Dios el mo kot er a klengar er tir.​—Heb. 13:5.

4. Ngmekerang a Satan a lousbech a “ngibes er a mad”?

⁴ A Satan a kot el soal a bo domdasu el kmo ngmo uchul a deuil a rengud a lsekum ngmo betok a klokled. Me ngousbech er tia el beluulechad er ngii me a “ngibes er a mad” el mengesuseu er kid el mo soad a betok el klalo. (1 Jn. 2:15-17, BT; Gen. 3:6; Osi. 27:20) Kede blechoel el omes e orrenges a advertisement el meruul er kid el mo soad el omechar a beches el klalo. Ngmla ta el mocherar a klalo el di mulemes er ngii er a advertisement e mo soam me ke mecherar? A lsekum e nguaisei, e ke locha mo medengei er a uriul el kmo ngdimlak mousbech er tia el klalo. Me a lsekum kede di omechar a klalo el diak dousbech e ngdi kid el rullii a klengar er kid el mo meringel. E le aikang a sebechel el osengkid me ngmo diak dungil mesiou er a Jehovah. El ua tiang, ngmo diak a temed el mesuub er a Biblia, e dongetmokl er kid el mo er a miting me a lechub e kede mo oldingel a obliil. Me lak mobes er a uleklatk er a apostol el Johanes el kmo: “A beluulchad ma ikel rokui el ngar a chelsel . . . a di mei el remiid.”

5. Ngera sebechel duubech el mo er tirke el mengoit a klisichir el di osiik a betok el klalo?

⁵ A Satan a kmal soal a dousbech a klisiched el mengereker a betok el udoud er a bai dousbech er ngii el mesiou er a Jehovah. (Mt. 6:24) Engdi a lsekum kede di mo mechesang el osiik a betok el klalo el di kired e ngmo diak a mera el belkul a klengar er kid. Ngdirrek el sebechel el mo meringel a uldesued me a lechub e ngmo betok a belsed. Ngdirrek el mo uchul e ngmo mechitechut a klaumerang er kid er a Jehovah me a Rengedel. (1 Ti. 6:9, 10; Och. 3:17) A Jesus a dilu el kmo a “ngibes er a kerruul” a ua toched el sebechel el chuchebii a tane me ngdiak ledubech e lemukeroul el mo ourodech.​—Mk. 4:14, 18, 19.

6. Ngera kede suubii er a omerellel a Baruk?

⁶ Ka molatk er a Baruk el mle melechesel a profet el Jeremia. Sera lomuchel el “osiik a ngarbab el tekoi” el di kirel, e a Jehovah a milengelechel er ngii el kmo, ngdi kmedu el mo melemall er a Jerusalem. Engdi ngtilbir el mo er a Baruk el kmo ngmo osebelii a klengar er ngii. (Jer. 45:1-5) A Baruk a mle kirel el diak lolatk a betok el tekoi. E le Jehovah a kmal diak bo lomekerreu a kloklir a rechad. (Jer. 20:5) Me chelechang e kede kiei er a ulebongel er tia el beluulechad er a Satan. Me ngkmal diak el taem el dongudel a betok el klokled. Ngdirrek el diak el kired el omdasu el kmo a uriul er a kloul ringel e ngdirk medechel aika el klokled, alta e ngkmal mekreos er a rengud.​—Osi. 11:4; Mt. 24:21, 22; Lk. 12:15.

7. Ngera kede mo mesaod er chelechang, e ngera uchul?

⁷ Me ngmekerang e sebeched kid me a telungalek er kid el melemolem el meruul a meklou a ultutelel el tekoi er a klengar? Ngmekerang a dongeroid er kid er a skel a kerruul? Ngmekerang e mo diak di lsebek a rengud el kirel aike el dousbech? A Jesus a meskid a kot el ungil el ulekrael el ngar sel Cheldecheduch el Ngar er a Rois. (Mt. 6:19-21) Me bo donguiu e dosaod er a Mateus 6:25-34. Tiang a mo oterekokl a rengud el kmo ngkmal kired el osiik er a Rengedel a Dios el kot, el diak el klalo.​—Lk. 12:31.

8, 9. (a) Ngera me ngdiak el kirel el suebek a rengud el kirel aike el dousbech? (b) Ngera ngmedengei a Jesus el kirir a rechad me aike el lousbech?

⁸ Monguiu er a Mateus 6:25. A Jesus a mle  medengei el kmo a redisaiplo er ngii a mle suebek a rengrir el kirel a kelir me a imelir me a bilir. Tiaikid a uchul me ngar sel Cheldecheduch el Ngar er a Rois, e ngdilu er tir el kmo: “Lak el sebek a rengmiu” el kirel a klengar er kemiu. Ngmle soal el ngosuterir el mo medengelii a uchul me ngdiak el kirir el suebek a rengrir el kirel aika el tekoi. Ngdirrek el mle medengei el kmo a lsekum te kmal mo suebek a rengrir el kirel aike el lousbech, e ngsebechir el obes er a klou a ultutelel el tekoi er a klengar. A Jesus a kmal mle betik a rengul er a redisaiplo er ngii a uchul me ngar er a cheldechedechal, e ngmle eua el taem el longelechel er tir el kirel tia el tekoi.​—Mt. 6:27, 28, 31, 34.

⁹ Ngera uchul me a Jesus a omeklatk er kid me lak lsebek a rengud el kirel a keled me a imeled me a biled? Kid, ngdiak dousbech a kall me a bail? Kede kmal lousbech! Me a lsekum e ngdiak a ududed el mechar aikang e ngulterekokl el mo suebek a rengud. A Jesus a mle ungil medengei aike el lousbech a rechad, e mle medengei el kmo “sel bo lekeed a ulebongel er a beluulchad” e a redisaiplo er ngii a mo meringel a klengar er tir. (2 Ti. 3:1) Me chelechang e ngkmal meringel er a rechad el metik a urerir me a dirrek el klalo a di merael el mo meringel a cheral. Me ngar er a betok el beluu e a rechad a kmal chebuul e di kesai me a lechub e ngdiak a kelir. Me nguaisei, engdi Jesus a mle medengei el kmo a klengar er a chad a lmuut el klou a ultutelel er a ‘kall ma ilumel ma ikel lousbech.’

10. Ngera klou a ultutelel el tekoi er a klengar el ledillii a Jesus er sera lolisechakl er a rultirakl er ngii el mo meluluuch?

¹⁰ A uchei e a Jesus a ullisechakl er a redisaiplo er ngii el kmo sel loluluuch e ngkirir el olengit er a Demerir el ngar er a eanged me lebesterir aike el lousbech. Me ngmle sebechir el dmu el kmo: “Beskemam a kelam el ikel kim ousbech er chelechal sils.” (Mt. 6:11) E a kuk ta er a taem e ngdilu er tir me loluluuch el kmo: “Beskemam er a bek el sils a kim ousbech el kall.” (Lk. 11:3) Engdi tiang a diak lebelkul a kmo ngkired el di melatk el melai aike el dousbech er a bek el taem. E le Jesus a dilu er a rultirakl er ngii el kmo ngklou a ultutelel el loluluuch me lemei a Rengedel a Dios er a bai di lolatk el kirel aike el lousbech. (Mt. 6:10; Lk. 11:2) Me a Jesus a milengelaod er a redisaiplo er ngii me bo lak lesebek a rengrir er aike el lousbech er sera losaod er a rolel e a Jehovah a omekerreu a rokui el blebelel.

11, 12. Ngera kede suubii er a rolel e a Jehovah a omekerreu a suebek el charm? (Momes er a siasing er a uchelel a suobel.)

¹¹ Monguiu er a Mateus 6:26. Ngkired el melatk a “suebek el charm.” Alta e ngkmal mekekerei el charm, engdi ngsebechel el kmang a betok el kall. Oleko aika el charm a ua klungel a bedengel a chad e ngsebechel el kmang a betok el kall el kuk betok er aike el lekang a chad. Aika el charm a menga rodech me a tane me a mekekerei el charm me a dirrek el chulad. Engdi ngdiak lolalem e lomekeroul a kelel. A Jehovah a omsang aike el rokui el lousbech. (Psa. 147:9) Me ngdiak lebelkul a kmo ngomelecha kall er a chelsel a ngerel! Aika el charm a kirel el di ngii losiik a kelel, engdi a kelel a ngar er ngii me ngdi ngerechelel el mo osiik.

¹² A Jesus a kmal mle ulterekokl a rengul el kmo a Demal a omekerreu a charm, me ngdirrek el mo omekerreu er a rechad. ^[1] (1 Pe. 5:6, 7) Me nguaisei, engdi kid a di ua suebek el charm el diak el kired el mo mesaik. Ngkmal kired el oureor el omekeroul a keled me a lechub e kede mengereker a cheral a keled, e a Jehovah a sebechel el omekngeltengat er kid. Mo lmuut er sel taem el bo lak a ududed me a lechub e ngkeled me ngii a di omeskid aike el dousbech. Ngsebechel el ousbech er a rebebil el mo merous aike el ngar er ngii er tir. Ngdirrek el mla kutmokl a basio el bo lekiei er ngii a charm. Ngmla msang a duch er ngii el sebechel el rullii a lukel, e dirrek  el mla remuul a betok el klekedall el sebechel el lousbech el meruul aika el lukel. Me ngkmal sebechel el ngosukid el sikii a rolel e ngmo er ngii a ungil el basio el dekiei er ngii kid me a telungalek er kid.

13. Ngera el tekoi a meketeklii el kmo ngkuk klou a belkud er a suebek el charm?

¹³ A Jesus er a uriul er a lomeklatk er a redisaiplo er ngii el kmo a Jehovah a omekang a suebek el charm, e ngdilu er tir el kmo: “Kemiu a kuk meklou a belkmiu er a betok el chesisebangiau!” (Momekesiu er a Lukas 12:6, 7.) Me sera ledelii tia el tekoi a Jesus, e ngmlo melatk el kmo ngkmal di kmedu el mo tongetengii a klengar er ngii el kirir a rokui el chad. Me ngmera el tekoi, a Jesus a dimlak lemad el kirel a suebek el charm me a ngii di el charm, ngbai mlad el kired me bo el sebeched el mo kiei el mo cherechar.​—Mt. 20:28.

14. A chad el di suebek a rengul, ngdiak el sebechel el mekerang?

¹⁴ Monguiu er a Mateus 6:27. Ngera mle belkul a tekingel a Jesus er a ledu el kmo ngdiak el sebeched el dochelii a telkib er a klengar er kid a lsekum ngmo suebek a rengud? Ngbelkul a kmo kid a diak el sebeched el telkib el komengetii a klengar er kid a lsekum ngdi suebek a rengud el kirel aike el dousbech er a bek el sils. Ngbai sebechel el mo uchul a ringelel a uldesued me kede mo smecher e mad.

15, 16. (a) Ngera kede suubii er a rolel e a Jehovah a omekerreu a bung er a ked? (Momes er a siasing er a uchelel a suobel.) (b) Ngera el ker a kired el melatk, e ngera uchul?

¹⁵ Monguiu er a Mateus 6:28-30. Ngungil a rengud sel dodengei el kmo ngar ngii a ungil biled, el ileakl sel bo doldingel a obliil me a lechub e kede mo er a miting me aike el meklou el ongdibel er kid. Engdi a ker a kmo, me ngkirel el mo  ‘suebek a rengud er a biled’? A Jesus a liluut el omeklatk er a redisaiplo er ngii er sel rolel e a Jehovah a omekerreu a blebelel. Ngulemekesiu er tiang el mo er sel rolel “a bung a le dubech.” Aika el bung a diak lorasem a bilel, engdi ngkmal imis el klebokel, sei a uchul me a Jesus a dilu el kmo: “A King Salomon a kmal mle merau e ngdi dimlak le klebokel el ua ikal bung”!

¹⁶ Ka molatk er a tekingel a Jesus er a uriul er tiang el kmo: “A Dios omail a chudel . . . A le ua isei e ng diak bai le blak a rengul el omail er kemiu? Kemiu a meral diak moumerang.” Me a Jehovah a ulterekokl el meruul el uaisei, me a redisaiplo er a Jesus a mle kirir el melisiich a klaumerang er tir. (Mt. 8:26; 14:31; 16:8; 17:20) Ngmle kirir el mo mui el oumerang el kmo a Jehovah a kmal soal el omekerreu er tir, e dirrek el dilu el kmo ngmo meruul er tia el tekoi. E kid a kuk mekerang? Kede oumerang el kmo a Jehovah a mo omekerreu er kid?

17. Ngera sebechel el tomellii a deleuill er kid me a Jehovah?

¹⁷ Monguiu er a Mateus 6:31, 32. A rebetok el chad el diak lodengelii a Jehovah a kmal mechesang el kirel a skel a betok el udoud me a klalo. Engdi a lsekum kede mo uaisei, e ngsebechel el metemall a deleuill er kid me ngii. Kede medengei el kmo a Jehovah a Demad, e ngii a kmal betik a rengul er kid. Ngdirrek el ulterekokl a rengud el kmo a lsekum kede meruul a soal, e nguu a Rengedel el mo kot er a klengar er kid, e ngmo meskid aike el rokui el dousbech me a lmuut el bebil. Kede dirrek el medengei el kmo a ungil deleuill er kid lobengkel a Jehovah a mo uchul a deurreng er kid e dirrek el ngosukid me ngmo dmeu a rengud “a le ngar ngii a biled ma keled.”​—1 Ti. 6:6-8.

18. A Jehovah, ngungil medengei a ngera el kired? E ngera ngmo meruul el kired?

¹⁸ Monguiu er a Mateus 6:33. A lsekum kede nguu a Rengedel a Jehovah el mo kot e ngmo meskid aike el rokui el dousbech. A Jesus a silodii a uchul me ngulterekokl a rengud el kirel tia el telbiil er a ledu el kmo: “A Dios er ngak a mo meskemiu a ikel rokui el mousbech.” Me a Jehovah a ungil medengei aike el dousbech el mo lmuut er a taem el dimlak dodengei el kmo kede ousbech er ngii. (Fil. 4:19) Ngungil medengei el kmo ngera el biled a mechetong, e dirrek el medengei el kmo ngera el kall a dousbech. Ngdirrek el medengei el kmo kid me a telungalek er kid a ousbech er a ungil el delengchekled. Me ngulterekokl el mo meskid aike el rokui el kid a kmal ousbech.

19. Ngera me ngdiak el kirel el mo suebek a rengud el kirel a ngar medad?

¹⁹ Monguiu er a Mateus 6:34. A Jesus a liluut el melekoi er a redisaiplo er ngii el kmo: “Lak el sebek a rengmiu.” A Jehovah a mo meskid aike el rokui el dousbech er a bek el sils. Me ngdiak el kirel el kmal mo suebek a rengud el di melatk el kmo ngera mo duubech er a ngar medad. E le lsekum kede mo uaisei, e ngmo diak dultuil er a Jehovah el kirel aika el tekoi, el mo uchul e ngmetemall a deleuill er kid me Ngii. Me ngbai kired el mo mui el oumerang er Ngii.​—Osi. 3:5, 6; Fil. 4:6, 7.

20. (a) Ngera el turrekong a soam el oureor el kirel? (b) Ke mekerang e omekbeot er a klengar er kau?

²⁰ Ngkmal klengiterreng a lsekum ngmo diak a temed el ungil mesiou er a Jehovah, e le kid el di mechesang el osiik a betok el kerruul! Ngbai kmal kired el msang a Jehovah aike el kot el ungil er kid. Ka molatk, ngsebechem el melukl el mo er aike el ongdibel el ousbech ngeso el kirel a omesiou? Ngsebechem el mo pioneer? Me a lsekum ke pioneer, e ke melatk el mo er a Skuul el Kirir a Rumerk er a Rengedel a Dios? Ngsebechem el mengoit a sesei el temem el olengeseu er a Bethel me a lechub a blil a oliuid? Me a lechub e ke mo oureor er a Local Design/Construction me a lechub e ke ousbech a temem el teloi er a ureor er a okedecherul a Blil a Ongdibel? Molatk aike el tekoi el sebechem el kutmokl me bo lebeot a klengar er kau me bo el sebechem el ungil el ousbech a temem me a klisichem el teloi a ureor el kirel a Renged. A baks el “ A Rolel a Cho Momekbeot er a Klengar er Kau” a meskau a bebil el ungil el ulekrael el kirel tiang. E moluluuch el mo er a Jehovah me lengesukau el mo ungil melilt a tekoi el moruul, e momuchel el melodech aike el kirem el melodech er a klengar er kau.

21. Ngera el tekoi a ngosukau el mo kmeed er a Jehovah?

²¹ A Jesus a ulsisecheklid el mo osiik er a Renged el kot. Me sel doruul el uaisei, e ngmo diak di lesebek a rengud el kirel aike el dousbech. Kede olekeed er kid er a Jehovah e le kede oumerang el kmo ngmo omekerreu er kid. Kede dirrek el mesuub el mo meduch el omtebechel a rengud me ngdiak di domechar a rokui el soad me a lechub e ngklalo er tia el beluulechad alta e ngsebeched el mechar. A lsekum kede omekbeot er a klengar er kid er chelechang, e ngosukid me kede melemolem el blak a rengud el mo er a Jehovah e mo sebeched el “mo nguu a meral klengar” el letilbir el kired.​—1 Ti. 6:19.