NGERA me ke oumerang er tia el tekoi el kmo a Jehovah a kerekikl el omekerreu er kau? E le ta er a uchul a bleketakl el medung er a Biblia. Ngar er a 1 Pe. 5:7 e ngkmo: “Moterekokl a ikel rokui el tekoi el suebek a rengmiu er ngii, ele ng kerekikl el omekerreu er kemiu.” E kau, a kuk mekerang e mo ulterekokl a rengum el kmo a Jehovah el Dios a semeriar er kau?

A ta er a tekoi a kmo, ngulterekokl el soam el mo sechelil a chad el olecholt a blekeradel el ua blekerdelel a Dios. Me a reteru el chad el kaiuecholt a ungil omeruul e bekururau er a delongelir a blechoel el mo kmes a klausechelei er tir. E kid a medengei el kmo a Jehovah a kmal ungil a blekerdelel e bekururau el mo er a rokui el chad er a bek el sils. Ka molatk er tiang: “Ng meruul er a sils er ngii me ng dmiich el mor a re chad el di osisiu a re mekngit ma re ungil, e oltengel er a chull el mor a re meruul a ungil ma re meruul a mekngit.” (Mt. 5:45) Ngera ngrullii a dichel a sils me a chull? Ngokiu aika el tekoi e a Dios a meskid a keled e omekeek a rengud er a deurreng. (Rel. 14:17) Nguaisei, a Jehovah a kutmeklii a chutem el mo sebechel el duubech a betok el kall me a lmuut el bebil er a tekoi el mo uchul a deurreng er kid me a ungil keled.

Me ngera uchul me a rebetok a mad er a kall? E le remerreder er a beluu a blechoel el di mechesang el kirel a deruchellir er a chelsel a tekoi er a balatiks me a kerrekerengir, e bai diak lolatk el kirel a klungiolir a rechad. Me ngdi kmedu a Jehovah el mo sumecheklii tia el rolel a ngibeserreng el okiu sel bo lokngemedii tia el dereder er a beluulechad er chelechang, e leteketekii a Rengedel el Ngelekel a mo King er ngii. Sel taem e ngmo diak a chad el mad er a kall. Engdi  chelecha el taem e a Dios a omekerreu er a reblak a rengrir el mesiungel. (Psa. 37:25) Tiang a kmal olechotel a ulekerreuil a Dios.

A kmeed el sechelim a kongei el mengoit a temel el obengkem. Ngsebechel el mo melai a sikang el mengedecheduch er kau el kirel a somiu el terung. A ungil sechelei a kerekikl el lorrenges er kau sel mouchais er ngii er a mondai er kau me a tekoi el suebek a rengum er ngii. Me a Jehovah, nguaisei a blekerdelel? Ngkmal uaisei, e le ngsemeriar el orrenges a nglunguched. Me a Biblia a melisiich er kid el mo “blechoel el meluluuch.”​—Rom 12:12; 1 Th. 5:17.

A Jehovah, ngkongei er a uangera klemengetel el taem el orrenges er a nglunguchem? A Biblia a onger er tiang. A Jesus er a uchei er a lolilt er a remo apostol er ngii e “ng mle tal kesus el loluluuch el mor a Dios.” (Lk. 6:12) Ngar tia el nglunguchel e nglocha milsaod a blekerdelir me a ngklir a redisaiplo er ngii me a dirrek el chelitecheterir, e ullengit er a Demal me a lengesuir el melilt er tir. Me sera lengesecha sils, e a Jesus a mlo medengei el kmo ngmla melilt er tirke el rredemelel a mo mesiou el apostol er ngii. Me a Jehovah el ngikel el ‘onger a nglunguuch’ a kmal semeriar el lorrenges a rokui el nglunguuch el mera el ngar er a rengud. (Psa. 65:2) Me ngbleketakl el kmo a Jehovah a diak loluk er a temel el orrenges a nglunguuch el mo lmuut er a nglunguchel a chad el mla chemoit a betok el sikang el mesaod er a tekoi el suebek a rengul er ngii.

A ungil klausechelei a sebechel el mo mekngit a lsekum a tang a diak lekengei el lousubes er a tang. A lebebil er a taem e a meketeketang el klausechelei a metemall e le ngmeringel er tir el kausubes. Engdi Jehovah a kmal diak leuaisei. A Biblia a mengelechel er a remelemalt a rengrir el mo olengit a klausubes er a Dios e le “ng chubechub e mereched el ousubes a klengit.” (Isa. 55:6, 7) Ngera rullii a Dios me ngkongei el ousubes?

Ngsel klou el bltkil a rengul, el diak a tekoi el mo mekesiur. Ngkmal betik a rengul er a beluulechad, a uchul me ngulderechii a Ngelekel el Jesus el me olsobel er a rechad er a klengit me a ringelel a klechad. (Jn. 3:16) Engdi tia el olubet el tenget a sebechel el  remuul a lmuut el betok el tekoi, e le ngokiu ngii e a Dios a kongei el ousubes a kngterir tirke el betik er a rengul. A apostol el Johanes a milluches el kmo: “Ngdi docholt a kngtid er a Dios, e ng diak loiit a telbilel e melemalt, me ng mo ousubes a kngtid.” (1 Jn. 1:9) Me tia omerellel a Jehovah el kongei el ousubes a klengit a uchul me ngsebeched el melemolem el dmeu a rengud er a deleuill er kid me ngii. Me tia el ulekerreuil a ulterekokl el uchul a klou el deuil a rengum.

A mera el sechelid a ngosukid er sel taem el dousbech a ngeso. Me a Jehovah, nguaisei a blekerdelel? A Tekingel a kmo: “A lsekum ng moubuu [a ta er a mesiungel a Dios] e ng diak di le merekol blengkangk, ele RUBAK a mo ngosuir el mekiis.” (Psa. 37:24) Me a Jehovah a olengeseu er a remesiungel el okiu a kakerous el rolel. Me bo dosaod er a tekoi el dilubech er a beluu er a St. Croix el ta er a iungs er a Caribbean.

A resechelil a ta el ngeasek el redil a ulerrimel er ngii el mo osus er a banderang e ngii a dimlak lekengei e le ngklaumerang er ngii a uchul. Me a uriul er a loluluuch el olengit a ngeso er a Jehovah, e ngtilbir er a rengul el mo sumecheklii tia el tekoi. Me sera bo loruul er a report er ngii er a class e ngmlo mesaod el kirel a omengull el banderang. Me nguluusbech er a babier el A Babilengek el kirel a Cheldecheduch er a Biblia, e milsaod er a cheldecheduch el kirel a Sadrak me a Mesak, me a Abednego el mo smodii sel uchul me ngii el dil a dimlak lekengei el osus er a banderang. Me ngdilu el kmo: “A Jehovah a ulemekerreu er tirka el tedei el buik er a Hebru e le ngdimlak lekengei el mo osus er a bleob el chaus.” E a uriul e ngmirrous er tia el babier el mo er a rokui el ngalek, me te mle 11 er tir a kilengei el nguu tia el babier. Me seikid e ngmlo medengei el kmo a Jehovah a milsa klisichel me a llomeserreng me ngmlo sebechel el mesaod er tia el tekoi, me ngkmal mlo dmeu a rengul.

Me a lsekum ke mo omdasu el kmo a Jehovah a diak lomekerreu er kau, e molatk a bades er a Biblia el ua Psalm 34:17-19; 55:22; me a 145:18, 19. Moker er a rudam me a rudos el meketeketang el mesiou er sel rolel e a Jehovah a mla omekerreu er tir el me lmuut er chelechang. Me sel bo mousbech er a ngelsuil a Dios, e moluluuch el mo er ngii el olengit a ngeso. Seikid e ngmo sebechem el mesa rolel e a Jehovah a “kerekikl el omekerreu” er kau.