“Sel moluluuch e lak molekoi a betok el diak a ultutelel tekoi.”​—Mateus 6:7.

A Jehovah a diak el soal a domelekl a nglunguuch el bla de memorize me a lechub e ngar er a buk er a nglunguuch. Ngbai soal a lengar er a rengud el meluluuch el mo er ngii. Ka di molatk er kau el locha kmal mo seselk a rengum er a sechelim el di omelekl a osisiu el tekoi el mo er kau er a bek el sils. A rungil sechelei a bleketakl el chadecheduch el ngar er a rengrir. Me sel doluluuch el ousbech a tekinged, e kede ouchais aike el mera el ngar er a rengud el mora Demad el ngar er a eanged.

“E sel molengit, e ng diak mngai, ele ng mekngit a uldesuiu el kirel.”​—Jakobus 4:3.

Kede ulterekokl el medengei el kmo a Dios a diak bo longer a nglunguched a lsekum kede olengit a tekoi el diak el soal a doruul me a lechub e kede olab. El ua tiang, ngmo onger a nglunguchel a chad er a bakutsi alta tekingel a bleketakl louchais el kmo ngouketui a nglemokel me a klaumerang er a lusech? (Isaia 65:11; Lukas 12:15) Ngkmal diak bo longer er a chouaisei el nglunguuch! Me a lsoad a Dios a longer a nglunguched, e ngkirel el oltirakl aike el medung er a Biblia.

 “A lsekum a chad a diak lolengesenges a llach, e a Dios a mo chetil el orrenges a nglunguchel.”​—Osisechakl 28:9.

Ngar er a taem er a Biblia, e a Dios a dimlak longer a nglunguchir tirke el dimlak lolengesenges a melemalt el llechul. (Isaia 1:15, 16) Ngdirkak lemengodech a uldesuel. (Malakai 3:6) A lsoad a Dios a longer a nglunguched, e ngkired el mora tkurrebab el sebeched el kiei el oltirakl a llechul. Engdi ngkuk mekerang a lsekum kede mirruul a mekngit el tekoi er a ngar er a mong? Tia ngbelkul a kmo a Dios a diak a ta el bo lorrenges er kid? Ngkmal diak! A Dios a mo ousubes er kid a lsekum kede obult er a mekngit el omerelled e mora tkurrebab el sebeched el odeuir a rengul.​—Rellir 3:19.