Ngar sel mlo merek el suobel, e kede milsaod er a olangch el ledillii a Jesus. Ngii el olangch a bleketakl el ochotii el kmo a Rengedel a Dios a mla meteketek el ngar a eanged, e a Jesus Kristus a King er ngii.

A Biblia a mesaod el kmo sera lenguu a klisichel a dereder a Jesus e nguldikii a Satan me a rechanghel er ngii er a eanged. Me chelechang e ngdi sebechir el meruul a tekoi el ngar tia el chutem, el ta er a uchul me ngkmal mla mo mekngit a blekeradel er sera 1914 el mei.​—Ocholt 12:7, 9.

Alta e ngdi merael el mo mekngit a blekeradel, engdi a Jesus el King er a Rengedel a Dios a mla kutmokl a tekoi el lolengeseu er a rechad el ngar tia el chutem. Ngdmeu a rengud er a osisecheklel a Biblia el meliuekl er a beluulechad el Jesus a ulemlaoch el kirel, el uchul me a rebetok a mesuub e oltaut a omellach er a Biblia er a klengar er tir. (Isaia 2:2-4) A rebetok el miliol a mla mo dmeu a rengrir el telungalek, e kerekikl me ngdiak bo el sibil a urerir me a kloklir. Ngblak a rengrir el mesuub me bo luchul a klungiolir er chelechang, e tia rulleterir me te mo chad el Dios a kongei er tir el mo chederedall er a Rengedel.

Alta Jesus a mla mo mengedereder el ngar a eanged, engdi a kabelment er a klechad a dirk mengedereder er tia el chutem. Me nguaisei, engdi Dios a dilu er a Jesus el kmo: “Mongedereder er a re cherrouem.” (Psalm 110:2) Me ngdi kmedung a Jesus el mo okngemedeterir a rokui el omtok, e mo mesterir a ulengull tirke el kongei el olengesenges er a Dios.

Seikid el taem, e a Rengedel a Dios a mo

• Okngemed a klsuul klechelid. Aike el klechelid el olisechakl a blulak el kirel a Dios e mla remuul a klengar er a rechad el mo meringel a di mo nguemed. A Biblia omekesiu a klsuul klechelid el ua prostitute. A rebetok el chad a kmal mo mechas a rengrir sel lemokngemed a klsuul klechelid.​—Ocholt 17:15, 16.

• Okngemed a omengederederir a rechad. A Rengedel a Dios a mo okngemed a rokui el omengederederir a rechad.​—Ocholt 19:15, 17, 18.

• Okngemedeterir a remekngit el chad. Ngera mo duubech el mo er tirke el di sorir el meruul a mekngit e chetirir lolengesenges er a Dios? A “Dios a mo melai er a re dengerenger el oltobed er tir er a beluu.”​—Osisechakl 2:22.

• Okngemedii a Satan me a rechanghel er ngii. A Satan me a rechanghel er ngii a mo diak lsebechir el “mengeblad a beluu.”​—Ocholt 20:3, 10.

Aikang, ngera belkul el kirir tirke el kongei er a Rengedel a Dios?

A Jesus el mengedereder el King el ngar a eanged, a mo meruul a lmuut el betok er a ngii di el chad el mla merreder. E a 144,000 el mengedereder lobengkel el tir a mlengilt er a delongelir a rechad a mo olengeseu er ngii. (Ocholt 5:9, 10; 14:1, 3) Ngmo mesa el kmo a soal a Dios a meketmokl er tia el chutem. Ngera ngmo meruul a Rengedel a Dios el kirel a klechad?

• Ngmo okngemed a secher me a kodall. “Ng mo diak a tal chad el kiei er a beluad el lmuut el mo mengeremrum el kmo ng smecher,” e “dikea lluut el mor ngii a kodall.”​—Isaia 33:24; Ocholt 21:4.

• Ngmo toketekii a mera el budech me a ulekerreu. ‘A re chedam, [ak] besterir a klengeltengat ma budech,’ e te “mo kiei el ngar a budech er bita er a dellemelir el bilong ma kerrekar er tir el fig, el diak a mo omekdakt er tir.”​—Isaia 54:13; Mika 4:4.

• Ngmo mesterir a rechad a ungil lurerir. “Ng mo cherrungel a deuil a rengrir er a ikel uluureor el kirel. A ureor el bo loruul a di mo ungil.”​—Isaia 65:22, 23.

• Ngmo sumechokl a telemellel a eltel, debel me a chetemel a beluulechad. “A ked a mo dmeu a rengul, ma bung a mo omung er a cheloit el beluu.”​—Isaia 35:1.

• Ngmo osisecheklterir a rechad er a rolel e ngsebechir el kiei el mo cherechar. “A diak a ulebengelel klengar a belkul a kmo, bo lodengelkau el di ta el meral Dios, e bo lodengelii a Jesus Kristus el ngikel mulderchii el mei.”​—Johanes 17:3.

A Dios a soal obo moldeu a rengum er aika el klengeltengat. (Isaia 48:18) A ongingil suobel a mo mesaod aike el sebechem el meruul er chelechang me bo mnguu tia el mengasireng el klengar er a ngar medad.