1-2. Ngera kede mo mesaod er tia el suobel?

NGBETOK a olechotel el kmo kede kiei er a ulebongel er tia el mekngit el blekeradel. Ngdi kmedung a Jehovah me a Jesus Kristus el mo olekngemed a rokui el kabelment el omtok er a Renged. Me a uchei er a lomuchel tiang, e a king er a diluches me a king er a dimes a mo kaumekemad e oldechelakl er a rechedal a Dios.

² Ngar tia el suobel, e kede mo mesaod er a ulaoch el ngar a Daniel 11:40–12:1. E mo mesuub el kmo ngtecha king er a diluches e mo mesaod er a uchul me ngchelellakl a rengud e oumerang el kmo a Jehovah a mo osebelid er a chelsel a ngii di el meringel blekeradel.

3-4. Ngtecha mla me duum el king er a diluches? Mosaod.

³ Sera 1991 e ngmlo diak a klisichel a Soviet Union, me a rechedal a Dios el mla er aike el beluu a mle mimokl el telkib el taem. A Daniel a mesaod er tia el ilmokl el kmo ngtelkib el “ngesou.” (Dan. 11:34) Seikid e te mlo mimokl el omerk er a klumech, me ngdi mle telkib e a ildisir a re publisher a milleketek el mo betok el telael. Cherengel a taem, e a Russia me aike el beluu lolengeseu er ngii a mlo beches el king er a diluches. Me ngua dulsaod, a kabelment el mo king er a diluches me a lechub e ngking er a dimes a kirel meruul a edei el tekoi:  (1) mengedereder aike el beluu el betok el chedal a Dios a kiei er ngii me a lechub e ngar ngii a odechelakl, (2) oeak a omerellir e te ochotii el kmo te cherrouel a Jehovah me a rechedal, e (3) oumekemad er ngike el omtok el king.

⁴ Aikakid a uchul me ngsebeched el melekoi el kmo a king er a diluches er chelechang a Russia me aike lolengeseu er ngii el beluu. (1) Te merrob er a urerir a rechedal a Dios el berkel a klumech, e omekcharm er a rebetok el dart el telael el rudam me a rudos el kiei er a belurir. (2) A omerellir ochotii el kmo te ouketui er a Jehovah me a rechedal. (3) Te melasem el melai er a klisichel a king er a dimes el Britain me a Merikel. Me bo dosaod a rolel e a Russia me aike lolengeseu er ngii el beluu a ochotii el kmo ngking er a diluches.

5. Ngera ngmesaod er ngii a Daniel 11:40-43?

⁵ Monguiu er a Daniel 11:40-43. Tia el ulaoch a mesaod el kirel a cherrengelel a taem er a ulebongel. Ngmesaod er a rolel e a king er a diluches me a king er a dimes a mo kaumekemad. A Daniel a ulemlaoch el kmo, ngar a taem er a ulebongel, e a king er a dimes a mo “oldechelakl” er a king er a diluches.​—Dan. 11:40.

6. Ngoeak a ngera el rolel e tirka el teru el king a dirk kaumekemad?

⁶ A king er a diluches me a king er a dimes a dirk kaumekemad el kirel a klisiich. El uai tiang, a uriul er a Ongeru el Mekemad e a Soviet Union a mlo mengedereder er a klou el tedobech er a Europe. Me seikid e a king er a dimes a mlo dmak ngii me a bebil er a beluu e omtok er a king er a diluches. Te tileketekii a cheldebechel el ngklel a NATO. Tirka el teru el king a melemolem el mengoit a betok ludoud el meruul a klekedellir er a mekemad. E a king er a diluches a oumekemad er a king er a dimes sel lolengeseu er a recherrouel el ngar a beluu er a Africa, Asia, me a Latin America. E ngar aika el mereko el rak e a Russia me a rechedal a mla mo mesisiich el beluu er a beluulechad. Te dirrek el oumekemad er a king er a dimes lousbech a computer. Te ousbech a prokuram er a computer el melemall a keizai me a kabelment er a belurir. A Daniel a dirrek el ulemlaoch el kmo a king er a diluches a melemolem el oldechelakl er a rechedal a Dios.​—Dan. 11:41.

7. Ngerang a “Beluu er a Nglat”?

⁷ A Daniel 11:41 a kmo a king er a diluches a mo “soiseb er a Beluu er a Nglat.” Tiang ngera el beluu? A irechar e ngmle beluu er a Israel, el “kmal ungil er a bek el beluu el rokui.” (Ese. 20:6) Ngmle klou a ultutelel e le tiaikid a lebla er ngii e mengull er a Jehovah. Engdi sera Pentekost er a 33 C.E. el mei, e sel “beluu” a dikea losaod el kirel a basio el ngar tia el chutem, e le chelechang e a rechedal a Jehovah a di mekelekelii a beluulechad. Me a leuaisei, e a “Beluu er a Nglat” er chelechang a blekerdelel a klengar er a rechedal a Jehovah el uldimukl er a omengull er tir lokiu a miting me a odingel a obliil.

8. Ngmilekerang a king er a diluches e soiseb er a “Beluu er a Nglat”?

⁸ Ngar a taem er a uriul sils, e a king er a diluches a mla mo betok el taem el lesiseb er a “Beluu er a Nglat.” El ua tiang, sel taem el Nazi Germany a mle king er a diluches, el ileakl er sera ongeru el mekemad,  e ngsiliseb er a “Beluu er a Nglat” lokiu sera loldechelakl e lomekoad er a rechedal a Dios. E a uriul er a Ongeru el Mekemad, me bo el king er a diluches a Soviet Union, e ngdirrek el siliseb er a “Beluu er a Nglat” lokiu sera loldechelakl er a rechedal a Dios e loldik er tir.

9. Ngmilekera Russia me aike el beluu lolengeseu er ngii e siliseb er a “Beluu er a Nglat” er aika el mereko el rak?

⁹ Ngar aika el mereko el rak, e a Russia me aike el beluu lolengeseu er ngii a siliseb er a “Beluu er a Nglat.” Lokiu a ngera el rolel? Sera 2017, e a Russia a tirrebengii a urerir a rechedal a Jehovah, e milengelebus er a rebebil el rudam me a rudos. Ngdirrek el milerrob a babilenged el uldimukl er a New World Translation, e ngilai a obis er kid, me a Blil a Ongdibel me aike el Assembly Hall. Me sera 2018, e a Chelechad er a Ruungerachel a dilu el kmo a Russia me aike el beluu lolengeseu er ngii a king er a diluches. Me a rechedal a Jehovah sel bo lecharm a odechelakl, e ngdiak bo el teloi a ultok me a lechub e lolodech a ngii di el tekoi er a kabelment. Te bai oltirakl a ulekrael er a Biblia el meluluuch el kirir “tirkel rokui el ngar a ngarbab el deruchall,” el ileakl sel bo lolilt a tekoi el kirel a ilmekled er a omengull er kid.​—1 Ti. 2:1, 2.

10. A king er a diluches, ngmo okngemedii a king er a dimes? Mosaod.

¹⁰ A ulaoch er a Daniel 11:40-45 a oumesingd el mesaod el kirel a king er a diluches. Me tiang belkul a kmo ngmo mesisiich er a king er a dimes? Ngdiak. A king er a dimes a dirk “chad” er sel taem el Jehovah me a Jesus a mo okngemed a rokui el kabelment er a rechad lokiu a mekemad er a Armakedon. (Och. 19:20) Ngera me kede oumerang er tiang? Me bo domes a omesodel a ulaoch el ngar a Daniel me a Ocholt el kirel tiang.

11. Ngera belkul a Daniel 2:43-45? (Momes er a siasing er a medal tia el babier.)

¹¹ Monguiu er a Daniel 2:43-45. A profet Daniel a mesaod er a klou el bleob el bedengel a rruul er a kakerous el deel. E a derta el klekedellel a bedengel a omtechei a kakerous el kabelment el mla mengedereder a beluu el rebetok el chedal a Dios a kiei er ngii. Aika el kabelment a milengedereder er a kakerous el taem. Me a ochil ngii el bleob el rruul er a chutem me a deel, a omtechei er a ulebongel el kabelment el ngii a Britain me a Merikel. Tia el ulaoch a ochotii el kmo a Britain me a Merikel a dirk mo mengedereder er sel taem el Rengedel a Dios a mo okngemed a rokui el kabelment er a rechad.

12. Ngomtechei er a ngerang a ongeuid el bdelul a tebelik el charm? E ngera uchul me ngklou a ultutelel el bo dodengelii?

¹² A apostol Johanes a dirrek el mesaod el kirel aike el kabelment el milengedereder er a rechedal a Jehovah. Ngmesaod aika el kabelment el kmo ngomtechei er a tebelik el charm el kleuid a bdelul. E sel ongeuid el bdelul a omtechei er a omengederederel a Britain me a Merikel. Tiang a kmal klou a ultutelel, e le ngdikea lmuut el ta er a bdelul loeak ullel. Me tia el ongeuid el bdelul a dirk mo mengedereder er sel taem el Kristus me a urrurt er ngii er a eanged a mei lokngemedii ngii me aike el rokui el medechel er ngika el tebelik el charm. *​—Och. 13:1, 2; 17:13, 14.

13-14. Ngtechang a “Kok, . . . er a beluu er a Makok,” e ngera rullii me ngmo oldechelakl er a rechedal a Dios?

¹³ A Esekiel a lilechesii a ulaoch louchais er kid a tekoi el locha mo duubech er a uchei er a bo lengemed a king er a diluches me a king er a dimes. A ulaoch el ngar a Esekiel 38:10-23; Daniel 2:43-45; 11:44–12:1; me a Ocholt 16:13-16, 21, a ua losaod a osisiu el tekoi. Me a lsekum nguaisei, e kede omdasu el kmo aikakid el tekoi a mo duubech.

¹⁴ Telkib el taem er a uriul er a lomuchel a kloul ringel, e “a re king er a beluulchad el rokir” a mekideb el mo ta el cheldebechel. (Och. 16:13, 14; 19:19) A Biblia a mesaod er tia el cheldebechel el “Kok, . . . er a beluu er a Makok.” (Ese. 38:2) Tia el cheldebechel a mo rullii a ulebongel el odelecheklir el mora rechedal a Dios. Ngera mo uchul tia el odechelakl? A ulochel a apostol Johanes el kirel tia el taem a mesaod a “meklou el chull el kor a bad” el oltilech er a recherrouel a Dios. Tia sebechel lomtechei er a mesisiich el klumech er a kerrekeriil el bo lomerk er ngii a rechedal a Jehovah. Me tiaikid el klumech a sebechel longesechii a rengul a Kok er a Makok me ngmo oldechelakl er a rechedal a Dios el di melatk a olekngemed er tir.​—Och. 16:21.

15-16. (a) Ngmesaod a ngera el tekoi a Daniel 11:44, 45? (b) Ngera mo duubech el mora king er a diluches me a Kok er a Makok?

¹⁵ Tia el mesisiich el klumech me a ulebongel el odelecheklir a recherrouel a Dios a di ua losaod a osisiu el tekoi el ngar a Daniel 11:44, 45. (Monguiu.) A Daniel a mesaod el kmo “a chais el ngar ongos ma diluches el mei” a mekdektii a king er a diluches “me ng kmal mo meringel el oumekemad.” E di mo soal “mekodeterir a re betok el chad.” A “re betok” a sebechel mesaod el kirir a rechedal a Jehovah. * Ngar tiang e a Daniel a locha mesaod el kirel a ulebongel el odelecheklir a recherrouel a Dios.

¹⁶ Me sel bo loldechelakl er a rechedal a  Dios a king er a diluches me a rokui el kabelment, e a Olab a Bek el Klisiich el Dios a kmal mo kesib a rengul, e seikid e ngomuchel a mekemad er a Armakedon. (Och. 16:14, 16) Seikid el taem, e a king er a diluches me aike el rokui el renged el toketekii a Kok er a Makok a mo nguemed, e kmal “diak a chad el ngar sei el mo ngosuir.”​—Dan. 11:45.

17. Ngtechang a Mikael el ngike el “klou el anghel” el ngar a Daniel 12:1, e ngera ngmo meruul?

¹⁷ Sel ongingil bades el ngar a Daniel, a lmuut el mo ungil smodii a rolel e a king er a diluches me a rechedal a mo nguemed, me a rolel e kede mo suobel. (Monguiu er a Daniel 12:1.) Ngera belkul tia el bades? A Mikael a ta er a ngklel a King er kid el Jesus Kristus. Ngmle “duum” el mengkar er a rechedal a Dios el ulemuchel er a 1914, er sera lemeteketek a Rengedel er a eanged. Ngdi kmedung e ngme “duum” me a lechub e ngmo olekngemed er a recherrouel er a mekemad er a Armakedon. Tia el mekemad a mo ulebengelel sel losaod er ngii a Daniel el kmo ng “taem er a chelebuul” el dirkak a ua ingii. A ulochel a Johanes el ngar a Ocholt a mesaod er tia el taem el kmo ng “kloul ringel.”​—Och. 6:2; 7:14, BT.

18. Ngera uchul me ngmelemolem el chelellakl a rengud?

¹⁸ Ngsebechel di melemolem el chelellakl a rengud el kirel a ngar medad, e le Daniel me a Johanes a mesaod el kmo a Jehovah me a Jesus a mo olsobel er a remesiungir er a taem er a kloul ringel. A Daniel a mesaod el kmo a ngklir tirke el mo suobel a mo “llechukl er a babier er a Dios.” (Dan. 12:1) Ngmekera ngkled e mo llechukl er sel babier? Ngkired lochotii el kmo kede oumerang er a Jesus, el Ngelekel a Sib er a Dios. (Jn. 1:29) E kired el tibir er a rengud el mora Dios e mo metecholb. (1 Pe. 3:21) Ngdirrek el kired lolengeseu er a Rengedel a Dios lokiu sel dengesuterir a rebebil el mo mesuub el kirel a Jehovah.

19. Ngkired el mekerang er chelechang, e ngera uchul?

¹⁹ Me chelechang e ngkired el melisiich er a klaumerang er kid er a Jehovah me a cheldebechelel. Ngtaem el dolengeseu er a Rengedel a Dios. Sel doruul el uaisei, e kede mo suobel er sel taem el Rengedel a Dios a mo okngemedii a king er a diluches me a king er a dimes.