1, 2. Te chelebangel a ngera el odechelakl a remesiungel a Jehovah?

 A ROKUI el mesiungel a Dios a mla outekangel a odechelakl el ulemuchel er a Abel el me lmuut er a reblak a rengrir el mesiungel er chelechang. A apostol el Paulus a dilu er a Rekristiano er a Hebru el kmo, “Kom mlo chuarm e uluutekangel er a ringel, e dimlak bo mechitechut” el millasem el melai er a kengei me a klengeltengat er a Jehovah. (Heb. 10:32-34) Me a Paulus a ulemekesiu a omerellir tirka el Kristiano el mo er tirke el chad er a klekool er a taem er a Grik, el milengaidesachel er a rurt me a klaibedechakl me a dirrek el boxing. (Heb. 12:1, 4) Me kid er chelechang a ngar er a klaidesachel el kirel a klengar, e le te ngar er ngii a recherroued el sorir el mengesang er kid el uchul me ngmo diak el deu a rengud er chelechang, e bo lak dengai a klengeltengat er a ngar medad.

² Sel kot el meringel el omengaibedechakl, a sel dolasem el omtok er a Satan me tia el beluulechad er ngii. (Efe. 6:12) Me ngkmal klou a ultutelel el bo leblak a rengud el oltngakl aike el osisecheklel me a uldasu el lolisiich, me a mekngit el omeruul el ua deleboes me a omelamech me a omelim el rrom me a usbechel a  mekngit el kar. Ngdirrek el kmal kired el melemolem el oumekemad, me bo demesisiich er aike el chelitechetud e lak bo lemechitechut a rengud.​—2 Ko. 10:3-6; Kol. 3:5-9.

3. Ngmekera Dios e osisecheklid el mo oumekemad er a recherroued?

³ Me a ker a kmo, ngmera el sebeched el mo mesisiich er a recherroued? Ngsebeched, engdi tiang a diak lebeot el tekoi! A Paulus a ulemekesiu er ngii el ua chad er a boxing er a ledu el kmo: Ng “diak kulik el ua kulik a eolt.” (1 Ko. 9:26, BT) Me kid a di ua chad er a boxing el kired el oumekemad el omtok er a cherroued. E a Jehovah a kmal soal el osisecheklid e ngosukid el meruul er tia el tekoi, me ngolengeseu er kid el ousbech er a Biblia. Ngdirrek el ngosukid el okiu aike el babilenged el mengai a uchetemel er a Biblia me a miting er a Rekristiano, me aike el ta el sils el ongdibel me a meklou el ongdibel. Me kau, ke oltirakl a rokui el ulekrael el mngai? A lsekum e ngdiak, e nglocha mo meringel er kau el omtok er a recherrouem, me ke mo ua ngike el chad el melik el di melik a eolt.

4. Ngmekerang e diak bo demechitechut er a mekngit?

⁴ Me ngkmal kired el di kltmokl er a bek el taem, e le recherroued a sebechir el oldechelakl er kid er sel taem el diak dekltmokl me a lechub e ngsel bo lemechitechut a rengud. A Biblia a mengelechel e dirrek el melisiich er kid el kmo: “Lak bo mechitechut er a mekngit; e bai bo mesisiich er ngii el meruul a ungil tekoi.” (Rom 12:21) Ngkmal sebeched el mo mesisiich er ngike el mekngit, a lsekum kede melemolem el oumekemad er ngii! Me nguaisei, engdi a lsekum e ngmo diak dekerekikl e mo diak doumekemad e a Satan me tia el beluulechad er ngii, me aike el chelitechetud a sebechel el mo mesisiich er kid. Mada bo leblak a rengud me lak bo lemechitechut a rengud e debechei a chimad me di lechelirarou!​—1 Pe. 5:9.

5. (a) A lsoad el mo nguu a kengei me a klengeltengat er a Dios, e ngkired el melatk a ngerang? (b) Kede mo mesaod er a rua techa el chad el ngar er a Biblia?

⁵ Me a lsekum e ngsoad el mo mesisiich e ngkired el blechoel el melatk er sel uchul me kede outekangel. E le ngsoad el nguu a kengei me a klengeltengat er a Dios. A Hebru 11:6 a kmo: “Ngii di le chad el mor a Dios a kirel el oumerang el kmo ng ngar ngii a Dios, e ngii a omesterir omeksullir tirkel osiik er ngii.” Me sel dosiik er a Jehovah e ngbelkul a kmo ngkired el mo blak a rengud el oureor el nguu a kengei er ngii. (Rel. 15:17) A Biblia a ouchais a betok el kerebai er a reblak a rengrir el sechal me a redil el mirruul er tia el tekoi. A Jakob me a Rahel, me a Josef me a Paulus a dirrek el mlo melechesuar a ringel er a uldesuir me a bedengir, engdi te mlo mesisiich. Me a blakerreng er tir a meketeklii el kmo a lsekum e ngmo blak a rengud el uai tir, e ngdirrek el mo sebeched el mukngeltengat er a Jehovah. Me bo desa rolel.

6. Ngera ngilsuir a Jakob el mo outekangel? Me ngera mlo rsel? (Momes er a siasing er a uchelel a suobel.)

⁶ A blak a rengul el Jakob a uluutekangel e milengaibedechakl, e le ngmle betik a rengul er a Jehovah, e milengreos er a deleuill er ngii lobengkel. Ngmle mui el oumerang er a telbilel a Jehovah el kmo, ngmo omekngeltengat er a ruldidellel a rsechel. (Gen. 28:3, 4) Me sera bochu el 100 a rekil e ngmilengaibedechakl er a anghel el melai a klengeltengat er a Dios. (Monguiu er a Genesis 32:24-28.) Me a Jakob, ngmilengaibedechakl el di uleak a klisichel? Ngdiak, engdi ngmle blak a rengul me ngulechotii el kmo ngblak a rengul el oureor el kirel a klengeltengat el bo lenguu! Me a Jehovah a ulemekngeltengat er ngii el kirel a ducherreng er ngii, e milsa beches el ngklel el Israel el belkul a kmo, ngike el  “Mengaibedechakl er a Dios.” Me a Jakob a ngiluu a omeksulel. Me kid a dirrek el uai ngii el oureor el melai er a kengei me a klengeltengat er a Jehovah.

7. (a) Ngera el tekoi a milengitechut er a rengul a Rahel? (b) Me ngmilekerang, e ngera el klengeltengat a lengiluu?

⁷ A Rahel el bechil a Jakob a dirrek el mle semeriar el mengiil er a taem el Jehovah a mo otutii a telbilel el mo er a bechil. Engdi a Rahel a mle kebai me ngdimlak el sebechel el mo oungalek, e tiang a tekoi el rullii a redil el kmal mo mekngit a rengul er sel taem er a Biblia. Me ngmilekerang a Rahel e melemolem el outekangel er tia el blekeradel el mle uchul a chelitechetul a rengul? Ngdimlak bo lemechitechut a rengul e bai millemolem el meluluuch el mo er a Jehovah. Me ngrirenges a nglunguchel a Rahel me ngmlukngeltengat el mlo sebechel el oungalek. Tiaikid a uchul me ngdilu el kmo: “Ak milengaidesachel er a meringel klaidesachel . . . mak mlo mesisiich”!​—Gen. 30:8.

8. Ngera el ringel a lechilarm er ngii a Josef? E mekerang e a omerellel a ungil el kerebai el kired?

⁸ Me a blakerreng er a Jakob me a Rahel a kmal mle klou a lerellii er a uldesuel a ngelekir er a Josef, e mlo sebechel el ngosuir er a meringel el taem er a klengar er ngii. Sera bo el 17 a rekil, e ngmlengodech a blekerdelel a klengar er ngii. A rubekul el tir a mle mechechei er ngii, a ulterur el mo sibai. E a uriul e ngmlo kelebus el betok el rak er a beluu er a Ekipten, alta e ngdimlak a telemellel. (Gen. 37:23-28; 39:7-9, 20-21) Engdi ngdimlak a ta el bo lemechitechut a rengul, me a lechub e ngkesib a rengul e lolasem el melaitechei. E ngera uchul? E le ngkmal mle mekreos er a deleuill er ngii me a Jehovah, e di mle blechoel el melatk er tia el deleuill er tir el terung. (Lev. 19:18; Rom 12:17-21) Me a kerebil a kmal sebechel el ngosukid. Alta e ngmle mekngit a klengar er kid er a demekekerei, me a lechub e ngua lak a omeltked er chelechang, engdi ngkired el melemolem el outekangel. A bo deuaisei, e ngoterekeklii a rengud el kmo a Jehovah a mo omekngeltengat er kid.​—Monguiu er a Genesis 39:21-23.

9. Ngmekerang e mo sebeched el oukerebai er a Jakob me a Rahel me a Josef?

⁹ Chelechang e kede dirrek el outekangel a meringel el blekeradel. Ke locha chuarm er a chelebirukel me a omengetukel me a omelenguul me a lechub e te rechad el mechechei er kau. Engdi lak bo lemechitechut a rengum e molatk er a Jakob me a Rahel me a Josef el millemolem el dmeu a rengrir e mesiou er a Jehovah. A Dios a millisiich e ulemekngeltengat er tir e le tir el milengreos er a deleuill er tir lobengkel. Te millemolem el outekangel e oureor el oltirakl a nglunguchir. Me kid el kiei er a taem er a uriul sils a uchul, me ngklou a ultutelel el dolisiich er a klaumerang er kid e dolemolem el oba omelatk el kirel a ngar medad! Me kau, ke kongei el mo blak a rengum el mengaibedechakl el belkul a kmo ngmo blak a rengum el melai er a kengei er a Jehovah?

10, 11. (a) Ngera me ngkired el outekangel me bo denguu a klengeltengat er a Dios? (b) Ngera ngosukid el mo ungil melilt a tekoi?

¹⁰ Ngera me ngkired el mengaibedechakl el melai a klengeltengat er a Dios? E le ngdiak demecherrungel a uchul, me ngkired el outekangel el oltngakl a mekngit el uldesued. A rebebil a outekangel me bo lungil a uldesuir el kirel a omesiungir, e a rebebil a outekangel el kirel a secherir me a kngtil a rengrir e le ngdi tir el tang. Te dirrek el ngar er ngii a rebebil el meringel er tir el ousubes er a rechad el tilemall a rengrir. Me kid el rokui a kired el outekangel e oumekemad el kirel a betok el tekoi el rullii el mo meringel er kid el mesiou er a Jehovah, el ngike el omekngeltengat er a reblak a rengrir, alta e kede mla mesiou er Ngii el betok el rak.

 ¹¹ Nguaisei, ngsebechel el mo meringel er kid el melemolem el Kristiano e dolilt a ungil tekoi, el ileakl sel dolasem el oltngakl a mekngit el uldesued. (Jer. 17:9) A leuaisei, e moluluuch el mo er a Jehovah e molengit er a chedaol reng er ngii me lengesukau. A nglunguuch me a chedaol reng a sebechel ngosukau el meskau a klisichem el mo meruul a llemalt, e dirrek el mo nguu a klengeltengat er a Dios. Me bo leblak a rengum el kiei el oltirakl a nglunguchem, e molasem el menguiu er a Biblia er a bek el sils, e moterekeklii a temem el mesuub el di kau el tang, me a temel a omengull el telungalek er kau.​—Monguiu er a Psalm 119:32.

12, 13. Te milekerang a reteru el Kristiano e mongeseu el mo mesisiich er a mekngit el uldesuir?

¹² Ngbetok a kerebai el ochotii a rolel e a Tekingel a Dios me a chedaol reng er ngii me aike el babilenged a Rekristiano a mla ngosuterir a rudam me a rudos er kid el mo oltngakl a mekngit el uldesuir. A ta el ngeasek a milenguiu er sel Awake! er a December 8, 2003 el dai er ngii a “How Can You Resist Wrong Desires?” Me ngmlo uangera uldesuel? Ngdilu el kmo: “Ak melasem el oltngakl a mekngit el uldesuek a uchul me sera kchiuii el kmo ‘te betok a blak a rengrir el oltngakl a mekngit el uldesuir,’ e ngrirellak el mo melatk el kmo ak dirrek el chedal tia el klodam. Me ngmlo diak kumdasu el kmo ngdi ngak el tang a uaisei a uldesuek.” Ngika dirrek el ngilai a klungiolel er a suobel el “Alternative Life-Styles​—Does God Approve?” el ngar sel Awake! er a October 8, 2003. Ngar tia el suobel e ngmlo melechesuar el kmo a  rebebil a chelebangel a odechelakl el di “ua ia toched” er a bedengir. (2 Ko. 12:7) Me nguaisei, engdi sel lolemolem el oltngakl e lolemolem el klikiid a omerellir, e ngmo er ngii a omeltkir el kirel a ngar mederir. Ngdirrek el dilu el kmo: “Tiaikid a uchul me ngsebechel el bek el sils el kulemolem el blak a renguk. E ak kmal oba omereng el saul e le Jehovah el ousbech er a cheldebechelel el ngosukid er a bek el sils, me ngsebeched el melemolem el ngar, e kiei er a chelsel tia el mekngit el beluulechad.”

¹³ Ka di molatk er a tekoi el dilubech el mo er a odos el ngar er a beluu er a Merikel. Ngmilluches el kmo: “Ngkmal soak el mereng a suliu el blechoel el omeka er kemam er aike el tekoi el ki mousbech er sel ungil blsechel. Ak blechoel el melatk el kmo aika el suobel a kmal di melutk er ngak. Ngmla mo betok el rak el kulasem el omtok er a blekerdelek el Jehovah a kmal chetil el blekeradel. Me a lebebil er a taem e ngkmal mo mechitechut a renguk el di mo soak el chemoit a rokui el tekoi. Ak ungil medengei el kmo a Jehovah a kmal chubechub e ousubes, engdi ngak el kongei el di omechei er tia el mekngit el uldesuek me ngmelemolem a uchul me ak melatk el kmo nglocha diak rredemelel a nguu a ngelsuil a Jehovah. E tiang a kmal klou a letemellii er a klengar er ngak. . . . Me sera kchiuii a suobel el ‘Kau Ngsoam el Mo Medengelii a Jehovah?’ el ngar er a Ongkerongel er a March 1, 2013 er a 12 el llel, e ak mlo medengei el kmo a Jehovah a kmal soal el ngosukak.”

14. (a) Ngmle uangera uldesuel a Paulus el kirel a ringelel? (b) Kede mekerang e mo mesisiich er a chelitechetud?

¹⁴ Monguiu er a Rom 7:21-25. A Paulus a mle ungil medengelii a ringelel a doumekemad a mekngit el uldesued me a chelitechetud. Me nguaisei, engdi ngmle ulterekokl a rengul el kmo, ngsebechel el mo mesisiich a lsekum ngmeluluuch el mo er a Jehovah, e mo ultuil er ngii el kirel a ngeso, e dirrek el meketeklii el kmo ngoumerang er a olubet el tengetengel a Jesus. E kid a kuk mekerang? Ngsebeched el mo mesisiich er aike el chelitechetud? Ngkmal sebeched, a lsekum kede mo ua Paulus el mo mui el ultuil er a Jehovah el kirel a ngeso, el diak di dultuil er a klisiched, e dirrek el mo oumerang er a olubet el tenget.

15. Ngmekerang a Jehovah e ngosukid me kede melemolem el blak a rengud el outekangel a ringel?

¹⁵ A lebebil er a taem e a Dios a mechikid me kede ochotii a delechel a uldesued el kirel a tekoi. El ua tiang, ngmo uangera uldesued a lsekum kid me a lechub a ta er a chad er a telungalek er kid a mo smecher er a oberaod el rakt, me a lechub e ngmo chuarm el chebirukel el omeruul a uchul? A lsekum kede mo mui el oumerang er a Jehovah, e kede olengit er ngii me lebeskid a klisiched el melemolem el blak a rengud e dmeu a rengud e dirrek el melisiich er a deleuill er kid lobengkel. (Fil. 4:13) A kerebai er a rebetok el Kristiano er a irechar me chelechang a ochotii el kmo, a nglunguuch a sebechel el smisichid e meskid a blekenged me ngsebeched el melemolem el outekangel.

16, 17. Ke mla tibir er a rengum el mo mekerang?

¹⁶ A Diabelong a kmal soal a bo lemechitechut a rengum e lemechirarou a chimam. Me bo leblak a rengum “e moreked a ungil” el tekoi. (1 Th. 5:21) Ngsebechem el mo kats er a Satan me tia el mekngit el beluulechad er ngii, me a dirrek el mekngit el uldesuem! Ngkmal sebechem, a lsekum ke mo mui el oumerang el kmo a Dios a mo smisichau e dirrek el ngosukau.​—2 Ko. 4:7-9; Gal. 6:9.

¹⁷ Mada molemolem el mengaibedechakl, e molemolem loutekangel. Seikid e ngmo ulterekokl a rengum el kmo a Jehovah a mo ‘oitel a klungiaol el ekor kau el olsesibes.’​—Mal. 3:10.