1. A Jehovah ngera ngomes er a rechedal?

A JEHOVAH EL DIOS a “dmeu a rengul er a re chedal.” (Psa. 149:4) Tia kmal rullid el mo dmeu a rengud! A Jehovah a mes a ungil blekerdeled, e mes a klungioled, e omekrael er kid el mo er Ngii. A lsekum e kede mo oba blakerreng el mo er ngii e ngmo sechelid el mo cherechar!​—Jn. 6:44.

2. Ngera uchul me a rebebil a meringel er tir omera el kmo a Jehovah a betik a rengul er tir?

² A rebebil a locha mo melekoi el kmo, ‘Ak medengei el kmo a Jehovah a betik a rengul er a rechedal el rokui, engdi ngmekera mo ulterekokl a renguk el kmo ngbetik a rengul er ngak?’ Ngera rullii a chad el mo oker er tia el ker? A Oksana * el kmal mle meringel a klengar er ngii er a lengalek a kmo: “Ngkmal mle dmeu a renguk er sera kmetecholb e kumuchel el pioneer. Engdi 15 el rak er uriul e a mekngit el tekoi el dilubech el mei er ngak er a kngalek a mlo medmedum er a uldesuek. Me ak mlo omdasu el kmo ak mla oridii a kengei er a Jehovah e diak rredemelel a bltkil a rengul.” A Yua el pioneer el odos el dirrek el kmal mle betok a mondai er ngii er a lengalek a melekoi el kmo: “Ak miltecholb e le ngmle soak el loldeu er a rengul a Jehovah engdi a kulemdasu el kmo a Jehovah a kmal diak el sebechel el mo betik a rengul er ngak.”

3. Ngera kede mo mesaod er tia el suobel?

³ Me ke locha uai tirka el blak a rengrir el odos el omdasu el kmo a Jehovah a kmal diak el sebechel el mo betik a rengul er kau. Ngera uchul me ngkirel mo ulterekokl a rengum el kmo, a Jehovah a mera el omekerreu er kau? E ngera sebechel ngosukau sel bo momdasu el kmo a Jehovah a diak el betik a rengul er kau? Ka me bo dosaod a nger er aika el ker.

4. Ngera uchul me ngkengaol a doumededenger er a bltkil a rengul a Jehovah el mei er kid?

⁴ A bltikerreng a mesisiich e sebechel el odbechid el mo meruul a tekoi. Me a lsekum e ngulterekokl a rengud er a bltkil a rengul a Jehovah el mei er kid e ngmo odbechid el mo mesiou er ngii loba blakerreng alta ngar ngii a ringelel a klengar er kid. Engdi a lsekum e kede oumededenger er a bltkil a rengul a Dios el mei er kid e ‘ngmo diak a klisiched.’ (Osi 24:10, NW) E sel bo el mechitechut a rengud e bo lak doumerang er a bltkil a rengul a Jehovah e ngmo meringel er kid a omtok a odelecheklel a Satan.​—Efe. 6:16.

5. Ngera mla duubech el mora rebebil le tir loumededenger er a bltkil a rengul a Jehovah el mo er tir?

⁵ A rebebil er a rudam me a rudos er chelechang a mla mo mechitechut a klaumerang er tir e le te oumededenger er a bltkil a rengul a Jehovah el mo er tir. A ta er a remechuodel el James a ngklel a melekoi el kmo: “Alta ngkmal mle dmeu a renguk el mesiou er a Bethel me a omesiungek el ngar ongdibel er a ngodech el omelekoi, engdi ak mlo omdasu el kmo a Jehovah a diak el deu a rengul er ngak. Ngmla er ngii a taem el blo kumdasu el kmo a Jehovah a diak lorrenges er ngak sel kululuuch.” A Eva el dirrek el ngar er a mui el taem el omesiou a kmo: “Ak mlo mesa el kmo ngkengaol sel doumededenger er a bltkil a rengul a Jehovah e le ngdi metemall a omesiunged el mo er ngii. Nguchul me ngmo diak el soam el meruul a tekoi el ngar omesiungem el mora Jehovah e mo diak a deurreng er kau el mesiou er Ngii.” A Michael el ta er a remechuodel e dirrek el regular pioneer a melekoi el kmo: “A lsekum e ngdiak moumerang el kmo a Dios a betik a rengul er kau, e ke oberius el mo cheroid er Ngii.”

6. Ngera kired el meruul er ngii sel bo doumededenger er a bltkil a rengul a Jehovah?

⁶ Aika el experience a ochotii el kmo ngmo uchul a telemall sel doumededenger er a bltkil a rengul a Jehovah. Ngera kired el meruul er ngii sel bo domdasu el uaisei? Ngkired el di mereched el otngeklii tia el uldasu! Molengit er a Jehovah me lengesukau el chollakl a ‘ringelel a uldesuem’ loba ‘budech er a Dios, el . . . mtebechelii a rengum ma uldesuem.’ (Psa. 139:23, NW; Fil. 4:6, 7) Lak mobes el kmo ngdiak el di kau el tang a chuarm er tia el tekoi. Te ngar ngii a rudam me a rudos el dirrek el oldechelakl er tia el uldasu. Ngdirrek a remesiungel a Jehovah er a irechar me te mlo chelebangel er ngii. Ka molatk aike el sebeched el suub er a apostol Paulus.

7. Ngera el mondai a ble lechebangel a Paulus?

⁷ Kau, ke omelechesiu er kau el kmal mla mo oberaod er a betok el ngerechelem e omomdasu el kmo ngmla mo diak el sebechem? Ke di ua apostol Paulus. Ngika kmal mle suebek a rengul el “kirel a ikelesia el rokui.” (2 Ko. 11:23-28) Ngngar ngii a secherel a bedengem el uchul me a lebebil e ngmo diak el deu a rengum? A Paulus a mla er ngii a “secher el ulemekringel er a [bedengel] el ua ia toched.” Ngkmal mle soal a bo lak tia el toched er ngii. (2 Ko. 12:7-10) Kau, ngmechitechut a rengum er a betok el chelitechetum? A Paulus a mlo uaisei a uldesuel a lebebil er a taem. Ngdilu el kmo, “kele kkol chebuul el chad” le ngkmal di uleldechelakl a chelitechetul.​—Rom 7:21-24.

8. Ngera ngilsuir a Paulus el outekangel?

⁸ Me alta Paulus a mlo chelebangel a betok el omelsemai me a mengitechut el blekeradel engdi ngmillemolem el mesiou er a Jehovah. Ngera ngilsuir el melemolem el outekangel? Alta ngmle medengei a chelitechetul engdi ngmle mesisiich a klaumerang er ngii er a olubet. Ngmle medengelii a telbilel a Jesus el kmo “tirkel rokui el mo oumera er a [Jesus] a . . . mo ngar el diak a ulebengelel.” (Jn. 3:16; Rom 6:23) Nguaisei, a Paulus a uluumerang er a olubet. Ngmle ulterekokl a rengul el kmo a Jehovah a kltmokl el mo ousubes er tirke el ruebet er a klengit engdi te obult er a kngterir.​—Psa. 86:5.

9. Ngera kede suub er a tekingel a Paulus el ngar er a Galatia 2:20?

⁹ A Paulus a dirrek el kmal uluumerang er a bltkil a rengul a Dios el mlocholt loeak a Kristus. (Monguiu er a Galatia 2:20.) Molatk a tekoi er a ulebengelel tia el bades. A Paulus a kmo: “Ngelekel a Dios, el ngikel mle betik a rengul er ngak me ng tilengetengii a klengar er ngii el kirek.” A Paulus a dimlak lomdasu el kmo ngkmal mle mekngit me ngdiak el sebechel a Dios el mo betik a rengul er ngii. Me a lechub e lomdasu el kmo ngsebechek el mesa uchul me a Jehovah a betik a rengul er a rudam me a rudos engdi ngdiak el betik a rengul er ngak. A Paulus a ulemeklatk er a rechad er a Rom el kmo: “Ser a dirk de ngar a klengit, e a Kristus a mlad el kired.” (Rom 5:8) A bltkil a rengul a Dios a diak longetukel!

10. Ngera kede suub er a Rom 8:38, 39?

¹⁰ Monguiu er a Rom 8:38, 39. A Paulus a kmal mle ulterekokl a rengul er a bltkil a rengul a Dios. Ngmilluches el kmo ngdiak a “sebechel el choridid er a bltikerreng er a Dios.” A Paulus a mle medengelii a kllourreng er a Jehovah el mora rechad er a Israel. Ngdirrek el mle medengei  el kmo a Dios a ulechotii a klechubechub el mo er ngii. Ngsebeched el smodii a uldesuel a Paulus el ua tiang, ‘A lsekum a Dios a ulderchii a Ngelekel el me mad el kirek, e ngera uchul me a kuumededenger er a bltkil a rengul?’​—Rom 8:32.

11. Alta Paulus a riruul a klengit el uaike losaod a 1 Timothy 1:12-15, engdi ngera uchul me ngmle ulterekokl a rengul el kmo a Dios a betik a rengul er ngii?

¹¹ Monguiu er a 1 Timothy 1:12-15. Nglocha mla er ngii a taem el uldesuel a Paulus a mengarm er ngii el kirel aike el mekngit el lurruul er a ngar er a mong. Ngdi mle ngii el melekoi el kmo, “ngak ngikel kot el tkul a mekngit” er tir el rokui. A Paulus er a uchei er a bo lodengelii a klemerang e ngmle meringel el omekcharm er a Rekristiano el mo lmuut er aike el mats er a ngodech el beluu. Ngulelsiseb er a Rekristiano er a blil a kelebus e dirrek el kilengei a uldesuir a rechad er a olbiil el mo omekoad er tir. (Rel. 26:10, 11) Ka di molatk er a Paulus el mengedecheduch er a ta er a ngeasek el Kristiano el lekilengei me lokodeterir a rechad er a blil. Me a Paulus a kmal uluuchel a rengul er a kngtil engdi ngdirrek el mle medengei el kmo ngdiak el sebechel ngmodech a tekoi lurruul er a ngar er a mong. Nguluumerang el kmo a Jesus a mlad el kirel e dirrek el mle ulterekokl a rengul el meluches el kmo: “Ngdi krasia er a Dios a uchul, e ak ua ingak er chelechang.” (1 Ko. 15:3, 10) Ngera klubeled er tiang? Moterekeklii a rengum el kmo a Kristus a mlad el kirem e kiltmeklii a rolel me ngsebechel el mo er ngii a kmes el deleuill er kau me a Jehovah. (Rel. 3:19) A Jehovah a omes a tekoi el doruul er chelechang me a ngar medad el diak lomes a tekoi el durruul er a ngar er a mong, a ble de Sioning me a lak.​—Isa. 1:18.

12. Ngmekera 1 Johanes 3:19, 20 e ngosukid sel bo domdasu el kmo ngdiak a ultuteled e diak a sebechel mo betik a rengul er kid?

¹² Me sel molatk er a Jesus el mlad el kirel a  kngtim e ke locha mo omdasu el kmo, ‘Ngkmal diak rredemelel.’ Ngera uchul me ke locha mo omdasu el uaisei? A rengud a sebechel cholbeldid e rullid el mo omdasu el kmo ngdiak a ultuteled e diak a sebechel mo betik a rengul er kid. (Monguiu er a 1 Johanes 3:19, 20.) Ngar choua ikakid el taem e ngkired el mo melatk el kmo a “Dios a lmuut el chubechubchad er a rengud.” Alta ngmeringel er kid oumerang er tia el tekoi engdi a Demad el Jehovah a betik a rengul er kid e mo ousubes er kid. Me ngkired el moba uldesuel a Jehovah el kired. A bo doba uldesuel a Jehovah e ngkired el blechoel el mesuub er a Tekingel, blechoel el meluluuch el mo er ngii, e mo blechoel el obengterir a reblak a rengrir el chedal. Ngera uchul me ngkmal klou a ultutelel a doruul aika el tekoi?

13. Ngmekera omesubed er a Tekingel a Dios e ngosukid? (Dirrek el momes er a baks el “ Rolel e a Tekingel a Dios a Ngosuterir.”)

¹³ Sel mosuub er a Tekingel a Dios er a bek el sils e ngmo dmolech a klemedengei er kau el kirel a ungil blekerdelel a Jehovah. Ngmo sebechem el mesa bltkil a rengul el mo er kau. Sel molebedebek a Tekingel a Dios er a bek el sils e ngngosukau el mo ungil lomdasu e ‘meklemeltii’ a uldesuem me a rengum. (2 Ti. 3:16, BT) A Kevin el ta er a remechuodel el meringel el oldechelakl a mekngit el uldesuel el kirel a kmo: “Omengiuek me a omelebedebekek er a Psalm 103 a ngilsukak el sumecheklii a uldesuek e mesa mera el uldesuel a Jehovah el kirek.” A Eva el dulsaod er ngii er a uchei a kmo: “A ulebengelel a sils er ngak ak mengoit a taem el melatk aike el meklou a ultutelel el tekoi er a Jehovah. Tia meskak a budech e melisiich er a klaumerang er ngak.”

14. Ngmekera nglunguuch e ngosukid?

¹⁴ Mblechoel meluluuch. (1 Th. 5:17) A mesisiich el deleuill a meteketek er a delongelir a rechad el blechoel chadecheduch e kauchais aike el ngar er a rengrir. Tia osisiu er a deleuill er kid me a Jehovah. Sel douchais er ngii aike el ngar er a rengud me a uldesued maike el suebek a rengud er ngii el tekoi, e kede ochotii el kmo kede oumerang er Ngii e medengei el kmo ngbetik a rengul er kid. (Psa. 94:17-19; 1 Jn. 5:14, 15) A Yua el dulsaod er ngii er a uchei a kmo: “Sel kululuuch e ngdiak el soak el kora di report el mo er ngii a tekoi el kurruul. A kuuchais er ngii aike el mera el ngar er a uldesuek me a renguk. Cherengel a taem e ak mla mo omes er a Jehovah el Chedam el betik a rengul er a rengelekel, el diak el kora di ua le merreder er a klou el kombalii.”​—Momes er a baks el “ Ke Mla Chiuii?”

15. Ngmekera Jehovah e ochotii el kmo ngkmal melatk er kid?

¹⁵ Mongoit a taem el obengterir a resechelim. Te sengk el mlara Jehovah. (Jak. 1:17) A Demad el ngar er a eanged a ochotii el kmo ngkmal melatk er kid le ngmla meskid a telungalek er kid er a klereng el tir a “di blechoel el oubltikerreng.” (Osi. 17:17) Ngar er a babilengel a Paulus  el mora rechad er a Kolose, e ngulemasech a ngklir a Rekristiano el ullengeseu er ngii e millekoi el kirir el kmo “te mla mo ongolodek.” (Kol. 4:10, 11, BT) Ngmo lmuut er a Kristus Jesus me nguluusbech a ngeso er a resechelil el rechad me a rechanghel e kmal uleba omereng el saul el kirir.​—Lk. 22:28, 43.

16. Ngmekera resechelid e ngosukid el melemolem el kmeed er a Jehovah?

¹⁶ Kau, kosiik a ngelsurir e dirrek el kongei a ngeso er a resechelim er a ongdibel? Sel douchais er a resechelid el tir a mesisiich a deleongel er tir me a Jehovah aike el suebek a rengud er ngii el tekoi e ngdiak lebelkul a kmo ngmechitechut a klaumerang er kid. Ngbai mo omekerreu er kid. Ka molatk a tekingel a James el dulsaod er ngii er a uchei. Ngmelekoi el kmo: “A ungil klausechelei er ngak el obengterir a Rekristiano el mesisiich a klaumerang er tir a kmal mla ngosukak. Sel lemeieleb a uldesuek er a diak el ungil el uldasu e tirka el sechelik a oba kllourreng el orrenges er ngak e ouchais er a bltkil a rengrir el mei er ngak. Ngoeak tir e ak mesa bltkil a rengul me a ulekerreuil a Jehovah el mei er ngak.” Me ngmera el klou a ultutelel a domekeroul e dolemolem a klausechelei er kid el lobengterir a rudam me a rudos er kid!

17-18. Ngkirem el orrenges er techang, e ngera uchul?

¹⁷ A Satan a soal a demeterob el meruul a soal a Jehovah. Ngsoal a bo domdasu el kmo a Jehovah diak el betik a rengul er kid me a diak derredemelel a nguu a osobel. Engdi kede mesa el kmo tia kmal diak le klemerang el tekoi.

¹⁸ A Jehovah a betik a rengul er kau. Ke kmal mekreos er osengel. A lsekum ke olengesenges er ngii e ke mo uai a Jesus el “ngar a chelsel a bltkil a rengul” el mo cherechar. (Jn. 15:10) Me lak morrenges er a Satan me a uldesuem el kmo a Jehovah a diak lebetik a rengul er kau. Bai morrenges er a Jehovah, el ngii a omes aike el ungil er kid. Bo lulterekokl a rengum el kmo a Jehovah a “dmeu a rengul er a re chedal,” el kau a uldimukl er tir!