1-2. Mosaod er a blekeradel el lechilebangel er ngii a Jesus er a uchei er a lemad.

NGSILS er a Nisan 14, 33 C.E. A Jesus a mla motelechakl e mukerrekeriil el kirel a tekoi el dimlak el lerellii. Te dongulii, cholebedii, e dmelii er a teluo el kerrekar. Ngmeringel er ngii a outeliil e mengedecheduch engdi ngngar ngii a meklou a ultutelel el tekoi el kirel melekoi.

² Ka me bo dosaod a tekoi el ledilu a Jesus er a uchei er a lemad er a teluo el kerrekar me a klubeled er ngii. Me bo ‘dorrenges er ngii!’​—Mt. 17:5.

3. A Jesus nglocha millekoi el kirir a rua techang er a ledu el kmo: “Chedam, mousubes a kngterir”?

³ Ngera ngdilu a Jesus? A Jesus er a lemedeel er a kerrekar e ngmilluluuch el kmo: “Chedam, mousubes a kngterir.” Ngkngterir a rua techang? A Jesus a millemolem el melekoi el kmo: “Tirka diak lodenge loruul.” (Lk. 23:33, 34) A Jesus a locha milsaod er a resoldau er a Rom el tir a dilelii er a teluo el kerrekar. Tirka dimlak lodengelii. Nglocha dirrek el millatk er a rebebil el ngar er a seked el tir a mle sorir a bo lokodall engdi uriul e te mo oumerang er ngii. (Rel. 2:36-38) Me a Jesus a dimlak el bo lekesib a rengul er tir el dimlak lemelemalt a omerellir el mo er ngii. (1 Pe. 2:23) Ngbai ullengit er a Jehovah me lousubes er tirka el milekodir.

4. Ngera sebeched el suub er a Jesus el kilengei el lousubes er a rumtok er ngii?

 ⁴ Ngera sebeched el suub er a tekingel a Jesus? Ngsoad el mo ua Jesus el uluusubes er a rebebil. (Kol. 3:13) A rebebil el uldimukl er a rechedad a locha mo omtok er kid e le ngdiak a ungil klemedengei er tir er a klaumerang er kid. Te locha mo melekoi a blulak el kired, omekrur er kid er mederir a rebebil, melemall a babilenged, me a lechub e ngmo sorir el melemall er kid. Engdi ngdiak el soad el mo kesib a rengud er tir, ngbai soad el olengit er a Jehovah me lengesuterir me a ta er a klebesei e ngsebechir el mei er a klemerang. (Mt. 5:44, 45) Nguaisei, nglocha mo meringel er kid a ousubes, tokubets a lemlak lemelemalt a omeruul el mei er kid. Engdi a dolemolem el kesib a rengud e kede di melemall er kid. A ta el odos a melekoi el kmo: “A dousubes a diak el belkul a kmo, kede kongei a mekngit el omerellir a rechad el mei er kid me a lechub e kede mechititerir me te merderd er kid. Ngbai belkul a kmo ngdiak dolemolem el oba ngasecherreng.” (Psa. 37:8) Sel dolilt el mo ousubes e ngdiak dekengei a mekngit el dilubech el mei er kid me lerellid el mo medecherecher a rengud.​—Efe. 4:31, 32.

5. Ngera ngtilbir a Jesus el mora ta er tirke el deleel er bita er ngii, e ngera uchul me ngrirellii tia el telbiil?

⁵ Ngera ngdilu a Jesus? Ngmla er ngii a reteru el merechorech el mle deleel el obengkel a Jesus. A kot e te dilak el melenguul er ngii. (Mt. 27:44) Engdi uriul e a ta er tir a mlengodech a uldesuel. Ngmlo mtebengii el kmo a Jesus a “dimlak a ngeral mekngit el le rirellii.” (Lk. 23:40, 41) Ngdirrek el mlo oumerang el kmo a Jesus a mo mekiis er a kodall e mo mengedereder el king er a ta er a klebesei. Ngdilu er a Jesus el kmo: “Sel bo msiseb er a Rengedem, e lak mobes er ngak!” (Lk. 23:42) Ngika kmal mle mesisiich a klaumerang er ngii! Me a Jesus a dilu er ngii el kmo: “Ak kmal dmu er kau el kmo chelechal sils e ke mo obengkek el [diak el ngar er a Renged e ngbai] ngar a Baradis.” (Lk. 23:43) A tekingel a Jesus a locha kmal rirtechii a rengul. Ngmilsa omeltkel ngika el dengerenger el chad le ngmedengei el kmo a Demal a chubechubechad.​—Psa. 103:8.

6. Ngera kede suub er a tekingel a Jesus el mo er ngike el dengerenger el chad?

⁶ Ngera sebeched el suub er a tekingel a Jesus? A Jesus a kmal di ua Demal. (Heb. 1:3) Me a Jehovah a kmal kltmokl el mo ousubes e olecholt a klechubechub el mei er kid a lsekum e kede ouuchel a rengud er aike el mekngit el deriruul e mo olecholt a klaumerang er a olubet el tengetengel a Jesus Kristus. (1 Jn. 1:7) A rebebil a locha meringel er tir oumera el kmo a Jehovah a sebechel lousubes a kngterir. A lsekum e ngmo uaisei a uldesuem e molatk er tiang: A Jesus er a uchei er a lemad e ngulechotii a klechubechub el mora dengerenger el chad el dirk mlo oumerang er ngii. Me a Jehovah a ulterekokl el mo olecholt a klechubechub el mora reblak a rengrir el mesiungel el tir a melasem el olengesenges a llechul!​—Psa. 51:1; 1 Jn. 2:1, 2.

7. A doltirakl er a Johanes 19:26, 27, e ngera ngdilu Jesus el mora Maria me a Johanes? E ngera uchul me ngdilu aika el tekoi?

⁷ Ngera ngdilu a Jesus? (Monguiu er a Johanes 19:26, 27.) A Jesus a mle soal a delal a lemukerreu e le nglocha mle melakl dil. A rebebil er a Jesus a locha mle sebechir lomekerreu er ngii er a rolel a tekoi er a klechad. Engdi ngtecha mo msa aike el lousbech er a tekoi er a klereng? Ngdiak a olechotel a kmo  a ruchellel a mle disaiplo er ngii er seikid el taem. Engdi a Johanes a mle ta er a blak a rengul el apostol er ngii e ta er a kmeed el sechelil. A Jesus a ulemes er tirke el milengull er a Jehovah el kmo te telungalek er ngii. (Mt. 12:46-50) Bltkil a rengul el mora Maria a uchul me ngulterekeklii er a Johanes e le ngmle medengei el kmo ngmo ngosuir el melemolem el mesiou er a Jehovah. Me ngdilu er a delal el kmo: “Ngika ngelekem.” E dilu er a Johanes el kmo: “Ngika delam.” Seikid el sils el mong e a Johanes a mlo omekerreu er a Maria el ua le delal. Me a Jesus a ulechotii a klou el bltikerreng el mo er ngika el redil el milechelii e ulemekerreu er ngii e chelechang e ngdechor el omes er ngii el medkung!

8. Ngera kede suub er a tekingel a Jesus el mora Maria me a Johanes?

 ⁸ Ngera sebeched el suub er a tekingel a Jesus? A deleuill er kid me a rudam me a rudos er kid a sebechel lmuut el mo mesisiich er a deleuill er kid me a telungalek er kid. Me alta rechedad a mo omtok er kid e choitid engdi Jesus a tibir el kmo, a bo doltirakl er a Jehovah me a cheldebechelel e kede mo “ngmai a lmuut el betok” er aike el durriid. Ngmo betok a rengeleked me a redelad me a redemad. (Mk. 10:29, 30) Ka di molatk er kau el chedal a telungalek el ngar er a kltarreng e le ngbltkil a rengrir me a klaumerang er tir er a Jehovah me a rudam me a rudos er tir.​—Kol. 3:14; 1 Pe. 2:17.

9. Ngera ngouchais er kid a tekingel a Jesus el ngar er a Mateus 27:46?

⁹ Ngera ngdilu a Jesus? Uchei er a lemad a Jesus e ngmle klou a ngerel el melekoi el kmo: “Dios er ngak, Dios er ngak, ngera uchul me ke mla choitak?” (Mt. 27:46) A Biblia a diak louchais er a uchul me a Jesus a millekoi aika el tekoi. Engdi molatk a louchais er kid aika el tekoi. A ta er ngii a kmo, a Jesus er a lolekoi aika el tekoi e ngultutii a ulaoch el ngar er a Psalm 22:1. * Aika el tekoi a dirrek el ulechotii el kmo, a Jehovah a diak bo ‘longkar’ er a Ngelekel. (Job 1:10) A Jesus a mle medengei el kmo a Demal a diak bo lomekerreu er ngii er a recherrouel me bo lsebechel el measem el mo er sel kot el tkurrebab el rolel. Me a lmuut kung, aika el tekoi a meketeklii el kmo a Jesus a dimlak a kngtil e dimlak el rredemelel a mo nguu a kodall.

10. Ngera sebeched el suub er a tekingel a Jesus el mora Demal?

¹⁰ Ngera sebeched el suub er a tekingel a Jesus? Kede suubii el kmo ngdiak el kired el mo omdasu el kmo a Jehovah a mo omekerreu er kid er a rokui el omelsemai el bo dechebangel. Ngkired el mo kltmokl el oba blakerreng el mo lmuut er a kodall el ua Jesus. (Mt. 16:24, 25) Me nguaisei, engdi ngulterekokl a rengud el kmo a Jehovah a diak el bo lebechikid me bo dechuarm el engelakl er sel sebeched. (1 Ko. 10:13) A ta er a tekoi el dirrek el desuubii a kmo, kede locha mo ua Jesus el mo chobangel a diak el melemalt el omeruul. (1 Pe. 2:19, 20) Tirke el mo omtok er kid a meruul el uaisei le kid el diak dechedal tia el beluulechad e omerk er a klemerang. (Jn. 17:14; 1 Pe. 4:15, 16) Me a Jesus a mle medengelii a uchul me a Jehovah a milecherei me ngmo chuarm. Me nguaisei engdi a reblak a rengrir el mesiungel a Jehovah sel bo lechebangel a ringel e te locha mo omdasu el kmo, ngera uchul me a Jehovah a milechei aika el tekoi me ngduubech. (Hab. 1:3) A chubechub e klou a rengul el Dios er kid a diak lomdasu el kmo tirka diak a klaumerang er tir, ngbai medengei el kmo te ousbech a ongelaod el di ngii a sebechel mesterir.​—2 Ko. 1:3, 4, BT.

11. Ngera uchul me a Jesus a millekoi a tekoi el ngar er a Johanes 19:28?

¹¹ Ngera ngdilu a Jesus? (Monguiu er a Johanes 19:28.) Ngera uchul me a Jesus a dilu el kmo: “Ng meched a renguk”? Me bo lsebechel ‘loltaut er a Chedaol Llechukl’ el ngii a ulaoch el ngar er a Psalm 22:15. Tia melekoi el kmo: “Ngerek a medertang el ua chebechab, ma churak a breked er bab er a ngerek.” Ngdirrek aike el rokui el tekoi el blo lechebangel a Jesus el uldimukl er a  ringel lulechesuar er ngii el deleel er a teluo el kerrekar, a uchul me nglocha kmal mlo meched a rengul. Me nguluusbech er a chad el mo ngosuir el msa imelel.

12. Ngera kede suub er a tekingel a Jesus el “ng meched a renguk”?

¹² Ngera sebeched el suub er a tekingel a Jesus? A Jesus a dimlak lomdasu el kmo ngmechitechut a rengul a lsekum e ngouchais aike el ngar er a uldesuel, me ngdiak el kired el mo omdasu el uaisei. Nglocha blekerdeled el diak el soad louchais er a rebebil el kmo kede ousbech a ngeso. Me nguaisei, engdi a lsekum e kede mo ousbech a ngeso e ngdiak el kired lomai er a rengud a olengit a ngeso. El ua tiang, a lsekum e kede chudelang me a lechub e ngngar ngii a sechered e kede locha mo ousbech a ngeso el mora stoang me a lechub e ngosbitar. E a lsekum e ngmo mechitechut a rengud e kede locha mo ousbech a ngelsuil a ta er a remechuodel me a lechub e ngsechelid el Kristiano el mo orrenges er kid me a lechub e ngmeskid a “ungil tekoi” el melisiich er kid. (Osi. 12:25) Lak dobes el kmo a rudam me a rudos er kid a betik a rengrir er kid e kmal sorir lolengeseu er kid er a taem er a “chelebuul.” (Osi. 17:17) Me nguaisei, engdi te diak lodengei a uldesued. A lak douchais er tir e nglocha diak bo lodengei el kmo kede ousbech a ngeso.

13. Ngera ngkiltmokl a Jesus er a lemelemii a blakerreng er ngii el mora kodall?

¹³ Ngera ngdilu a Jesus? Ngbekord el edei el klok er a sueleb er a Nisan 14 e a Jesus a mlo klou a ngerel el melekoi el kmo: “Ng mla mecherrungel a rokui el tekoi!” (Jn. 19:30) Me a Jesus er a lebocha er a kodall, e ngmla kutmokl aike el mle soal a Jehovah a leruul. A Jesus er a lemelemii a blakerreng er ngii el mora kodall e ngkiltmokl a bebil tekoi. A kot, ngmileketeklii el kmo a Satan a bulak. A Jesus a ulechotii el kmo a cherrungel el chad a sebechel msa Jehovah a cherrungel el blakerreng alta Satan a mora tkurrebab el sebechel el melasem er ngii. Ongerung, a Jesus a tilengetengii a klengar er ngii el olubet. A tengetengel a uchul me a rediak el mecherrungel el chad a sebechir el mo melemalt er osengel a Dios e sebechir el kiei el mo cherechar. Ongedei, a Jesus a mlo sobecheklii a llemeltel a Jehovah el mengedereder e kilikidii a ngklel.

14. Ngkirel mo uangera klengar er kid er a bek el sils?

¹⁴ Ngera sebeched el suub er a tekingel a Jesus? Bek el sils el kired el mora tkurrebab el sebeched el oba blakerreng el mora Jehovah. Molatk a tekingel a odam el Maxwell Friend, el mle ta er a rullisechakl er a Watchtower Bible School of Gilead. Ngmillekoi el kirel a blakerreng el ngar er a ta er aike el international assembly er kid el kmo: “Lak mongiil el mo klukuk el mo meruul er a tekoi el sebechem el rullii er chelechang. Kau, ngulterekokl a rengum el kmo ngmo er ngii klukuk? Mrellii a klengar er kau er a bek el sils el mo ua lulebongel el sils er kau lolecholt er a blakerreng.” Me a klengar er kid er a bek el sils lochotii a cherrungel el blakerreng er kid el mora Jehovah! Me sel debocha er a kodall e ngsebeched el melekoi el kmo, “Jehovah ak mlora tkurrebab el sebechek el lochotii a blakerreng el mo er kau, e ochotii el kmo a Satan a bulak, e kikidii a ngklem, e mesebechakl er a llemeltem el mengedereder!”

15. A doltirakl er a Lukas 23:46, e a Jesus ngmle ulterekokl a rengul er a ngerang?

¹⁵ Ngera ngdilu a Jesus? (Monguiu er a Lukas 23:46.) A Jesus a mle ulterekokl a rengul  el melekoi el kmo: “Chedam, ak uterekeklak er kau!” Ngmle medengei el kmo a klengar er a ngar medal a mle ultuil er a Jehovah e mle ulterekokl a rengul el kmo ngdiak bo lobes er ngii.

16. Ngera ke suubii er a experience er a 15 a rekil el Sioning?

¹⁶ Ngera sebeched el suub er a tekingel a Jesus? Mnguu a klengar er kau el loia er a chimal a Jehovah. A omoruul el uaisei e ngkirem ‘loumeral ulsirs er a RUBAK el loba rengum el rokir.’ (Osi. 3:5) Ka molatk er a Joshua el 15 a rekil el Sioning el mla er ngii a omekodall el rektel. Ngika dimlak el lekengei a rolel a ukeruul el melemall a llechul a Dios. A uchei er a lemad e ngdilu er a delal el kmo: “Mami a klengar er ngak a ngar chimal a Jehovah. . . . Ngsebechek louchais er kau e Mami el kmo, ngulterekokl a renguk el kmo a Jehovah a mo okisak er a okiis. Ngmedengelii a renguk e medengei el kmo ngkmal betik a renguk er ngii.” * Me a derta er kid a ungil di lengii loker el kmo, ‘Ngak a bok chelebangel er a blekeradel el sebechel mo uchul a kuridii a klengar er ngak, e ak kongei el melemolem er a blakerreng er ngak el mora Jehovah e oumera el kmo ngmo okisak?’

17-18. Ngera el tekoi a bla desuub? (Dirrek el momes er a baks el “ Aike el Desuub er a Tekingel a Jesus er a Uchei er a Lemad.”)

¹⁷ Ngbetok a meklou a ultutelel tekoi el sebeched el suub er aike el ulebongel el tekingel a Jesus! Kede muklatk el kmo ngkired el ousubes er a rebebil e oumerang el kmo a Jehovah a mo ousubes er kid. Kede ngeltengat el chedal a telungalek er a klereng el tir a kltmokl el mo olengeseu er kid. Me nguaisei, engdi sel bo dousbech a ngeso e ngkired el ouchais er tir. Kede medengei el kmo a Jehovah a mo ngosukid el outekangel a ngii di el ringel el bo dechebangel. Kede dirrek el mesa klungel a ultutelel a derellii a klengar er kid er a bek el sils el mo ua lulebongel el sils er kid el mo olecholt er a blakerreng, el ulterekokl a rengud el kmo a Jehovah a mo okisid a lsekum e kede mad.

¹⁸ Me aika el tekingel a Jesus er a uchei er a lemad a kmal losisecheklid er a betok el tekoi. Me sel doltaut aika el tekoi el bla desuub e kede mo olengesenges a tekingel a Jehovah el kirel a Ngelekel el kmo: “Morrenges er ngii!”​—Mt. 17:5.