1-2. Ngera olubet, e ngera uchul me kede ousbech er ngii?

A ADAM er a lerebet er a klengit e bo lak lecherrungel e ngurridii a techellel el kiei el diak a ulebengelel. Ngdirrek el urridii tia el techall el kirir a rengelekel. A Adam a mle durengul el mora klengit me ngdiak a klisichel er a klengit lurrebet er ngii. Engdi a rengelekel te mekerang? A rengelekel a dimlak a ngera el lerellii. (Rom 5:12, 14) A Adam a rredemelel a kodall el lengiluu, engdi ngngar ngii a sebechel meketmokl el kirir a rengelekel? Chochoi, a uriul er a lerebet er a klengit a Adam e a Jehovah milekekokil lochotii a rolel e ngmo osebelterir a rengelekel er a klengit me a kodall. (Gen. 3:15) Ngar er a telutk el temel e a Jehovah a mo oderchii a Ngelekel el me “tongetengii a klengar er ngii el mo ngbetir a re betok el chad.”​—Mk. 10:45; Jn. 6:51.

² Ngera olubet? Sel losaod er ngii aike el Bades el tekoi er a Grik e ngmelutk el kirel sel char el lekilkedir a Jesus me bo el sebechel loluut aike el lurriid a Adam. (1 Ko. 15:22) Ngera uchul me kede ousbech er a olubet? A Llach a ochotii el kmo, a Jehovah el melemalt el Dios a mengerechir er a klengar el kirel a klengar. (Exo. 21:23, 24) A Adam a urridii a cherrungel el klengar er ngii. Me a Jesus a kirel tongetengii a cherrungel el klengar er ngii el mo omeklemalt er a tekoi el lerirellii a Adam. (Rom 5:17) Ngika “Chedam er a Cherechar” el kirir tirke el rokui el loumerang er a olubet.​—Isa. 9:6; Rom 3:23, 24.

3. A doltirakl er a Johanes 14:31 me a 15:13, e ngera uchul me a Jesus a kilengei el mo tongetengii a cherrungel el klengar er ngii?

³ A Jesus a kilengei el tongetengii a klengar er ngii e le ngkmal betik a rengul er a Demal me kid. (Monguiu er a  Johanes 14:31; 15:13.) Tiakid el bltkil a rengul a uchul me ngrirellii a rengul el mo lomelemii a blakerreng er ngii e otutii a moktek er a Demal. A blakerreng er a Jesus a uchul me a moktek er a Jehovah el kirir a rechad me tia el beluulechad a mo tmaut. Ngar tia el suobel e kede mo mesaod er a uchul me a Dios a milecherei a Jesus me ngkmal mlo chuarm er a uchei er a lemad. Kede dirrek el mo telkib el mesaod er a kerebil a ta er a milluches er a Biblia el ngii a kmal uleba omereng el saul el kirel a olubet. E a ulebongel e kede mo mesaod a rolel e ngsebeched el lochotii a omereng el saul er kid el kirel a olubet me a rolel e ngsebeched el menglou er a omereng el saul er kid el kirel tia el tenget el Jehovah me a Jesus a kiltmeklii el kired.

4. Ka mosaod el kmo ngmle uangerang a kodellel a Jesus.

⁴ Ka molebedebek er a ulebongel sils er a klengar er a Jesus er tia el chutem. A Jesus a mle sebechel olengit er a rebetok el telael el anghel el mo omekerreu er ngii, engdi ngbai kilengei el mekelebus e mechelebed er a resoldau er a Rom. (Mt. 26:52-54; Jn. 18:3; 19:1) Te chillebedii loba ongelebed el meles er a ulkel. Me te cholebedii me a ulkel a di merael a rasech er ngii, e te dmu er ngii me le chelngii a teluo el kerrekar. Me ngmocha mengol el mengurs er tia el kerrekar el mora basio el bo lemedeel er ngii. Me nguaisei a resoldau er a Rom a uriul e te dilu er a ta er a chad me bo longol er ngii el kirel. (Mt. 27:32) Me a lebocha er tia el basio, e a resoldau er a Rom a dmeel chimal me a ochil er tia el teluo el kerrekar. A resechelil me a delal omes er ngii e lmangel, engdi a remengeteklir a Rechijudea a melenguul er ngii. (Lk. 23:32-38; Jn. 19:25) Ngkltekotel er a teluo el kerrekar e chuarm er a ringel el kemanget el taem. Ngmerengela er ngii a outeliil. A uchei er a lesebek a telil e ngdillii a ulebongel el nglunguchel el mora Jehovah. E mocha terrob e ngnguemed a telil. (Mk. 15:37; Lk. 23:46; Jn. 10:17, 18; 19:30) Ngmera el mle meringel el kodall!

5. Ngera mle lmuut el meringel er a Jesus er a kodall lengiluu?

⁵ Engdi tia dimlak el sel kot el meringel el tekoi er a osengel a Jesus. Ngbai kmal mle meringel er ngii a tekoi el le mlotelechakl el kirel. Ngika mlotelechakl el kmo ngoltuub er a Dios, el diak longull er a Dios el ka longull er a ngklel. (Mt. 26:64-66) Ngkmal mle meringel er a Jesus a lsekum a rechad a mo omdasu el uaisei el kirel, me ngullengit er a Demal me a lsebechel e lecheridii tia el tekoi er ngii. (Mt. 26:38, 39, 42) Ngera uchul me a Jehovah milecherei ngika el betik er a rengul Ngelekel me ngmo chuarm e mad? Ka me bo dosaod a edei el uchul.

6. Ngera uchul me a Jesus a mle kirel mekabs er a teluo el kerrekar?

⁶ A kot, e a Jesus a mle kirel mo kltekotel er a kerrekar me bo lsebechel ngubeteterir a Rechijudea er a delebeakl el mlo er tir. (Gal. 3:10, 13) Tirka mildebeakl e le te tilbir el mo olengesenges a Llechul a Dios engdi te dimlak lotireklii a telbilir. Me te delebeakl e dirrek el mudiukes er a klengit el lengiluu er a Adam. (Rom 5:12) A Llechul a Dios el mora Israel a kmo a chad el rullii a klengit el rredemelel a kodall a kirel mo okodall. E a uriul e ngmekabs er a kerrekar. * (Dut. 21:22, 23; 27:26) Me a Jesus el mildeel er a teluo el kerrekar a uchul me a Rechijudea a mlo sebechir el ngmai a klungiolir er a tengetengel.

7. Ngera ongeru el uchul me a Dios a milecherei a Ngelekel me ngmo chuarm?

 ⁷ Molatk er a ongeru el uchul me a Dios a milecherei a Ngelekel me ngmo chuarm. Ngmilengetmokl er a Jesus el kirel a ngerechelel el Ngarbab el Prist. A Jesus a mlo medengelii a ringelel a dolengesenges er a Dios sel dechelebangel a meringel el omelsemai. Tia kmal mlo oberaod me ng “mle klou a ngerel e dirrek el lilangel” er a loluluuch lolengit a ngeso er a Dios. Me a Jesus a kmal medengei aike el dousbech “me ng sebechel el olengeseu er tirkel mor tir ongarm.” Me kede mera el oba omereng el saul le Jehovah a mla meskid a chubechub el Ngarbab el Prist el sebechel ‘melechesiu a chelitechetud’!​—Heb. 2:17, 18; 4:14-16; 5:7-10.

8. Ngera ongedei luchul me a Jehovah a milecherei a Jesus me ngkmal mlo chuarm?

⁸ Ongedei, a Jehovah milecherei a Ngelekel me ngmo chuarm me bo lsebechel monger tia el klou a ultutelel el ker: Ngsebechel a chad el lomelemii a blakerreng er ngii el mora Dios sel bo lechebangel a meringel el omelsemai? A Satan a kmo, Ngdiak! Ngdmu el kmo a rechad a mesiou er a Dios le ngngar ngii a lenguu er a Dios. Ngoumerang el kmo kede di ua demad er a Adam el diak demera el betik a rengud er a Jehovah. (Job 1:9-11; 2:4, 5) A Jehovah mle ulterekokl a rengul el kmo a Ngelekel a mo lomelemii a blakerreng er ngii me a uchul me ngmilecherei me ngmo chuarm. Me a Jesus ulechotii el kmo a Satan a bulak.

9. Ngera el kerebai a lekiltmeklii a apostol Johanes el kired?

⁹ A olubet a uchul me a klaumerang er a Rekristiano a melemolem el mesisiich. Te melemolem el omerk er a klumech alta te mo chelebangel a ultok. Te dirrek el melemolem loutekangel a ringel. Molatk er a kerebil a apostol Johanes. Ngika millemolem lomerk er a klemerang el kirel a Kristus me a olubet el betok er a 60 el rak. Ngmle bekord el 100 a rekil e a kabelment er a Rom a kilebsengii er a Patmos le te ulemdasu el kmo ngkmal kengaol. Ngera mle telemellel? ‘Ngullisechakl a tekingel a Dios ma klemerang el lullecholt a Jesus.’ (Och. 1:9) Ngmera el lungil kerebai e le ngmle mesisiich a klaumerang er ngii e uluutekangel!

10. Ngmekera ike el babilengel a Johanes e ochotii el kmo nguleba omereng el saul el kirel a olubet?

¹⁰ A Johanes a ulechotii el ngar aike el mlukreng el babilengel el kmo, ngkmal mle betik a rengul er a Jesus e kmal uleba omereng el saul el kirel a olubet. Ngmilsaod el kirel a olubet me a klengeltengat el mo er ngii loeak olubet el betok er a 100 el taem. El ua tiang, ngmilluches el kmo: “Lsekum ng ngar ngii a ruebet er a klengit, e ng ngar ngii a meluluuch er a Chedam el kired, el Jesus Kristus el ngikel melemalt.” (1 Jn. 2:1, 2) Aike el babilengel a Johanes a dirrek el melisiich er a klungel a ultutelel a ‘dolecholt er a Jesus.’ (Och. 19:10) Me ngbleketakl el kmo a Johanes a uleba omereng el saul el kirel a olubet. Ngmekera dochotii el kmo kede dirrek el oba omereng el saul el kirel a olubet?

11. Ngera sebechel ngosukid me lak demekesuseu er a klengit?

¹¹ Moltngakl a uldasu el mekrolau el mora klengit. A lsekum e kede mera el oba omereng el saul el kirel olubet e ngdiak bo domdasu el kmo: ‘Ngdiak a belkul el kmeringel loureor loltngakl a omengesuseu. Ak rebet er a klengit e ngsebechek lolengit a klausubes.’ Ngbai a lsekum e kede mekesuseu el mo  meruul er a klengit e ngsoad el kmo: ‘Ngdiak! Sel kulatk aike el rokui el bla leruul a Jehovah me a Jesus el kirek e ngmekera sebechek el mo meruul er tia el tekoi?’ Ngdirrek el sebeched el meluluuch lolengit a ngeso er a Jehovah el kmo: ‘Lak bechikak me bo kmechitechut er tia el ongarm.’​—Mt. 6:13.

12. Ngmekera doltaut a bades er a 1 Johanes 3:16-18?

¹² Bo lebetik a rengum er a rudam me a rudos. Sel doubltikerreng el mora rudam me a rudos e kede dirrek lochotii el kmo kede oba omereng el saul el kirel a olubet. Ngmekera e uaisei? E le Jesus a dimlak di letengetengii a klengar er ngii el kirem ngdirrek el kirir a rudam me a rudos er kid. A lsekum e ngmle kltmokl el mad el kirir e ngbelkul a kmo te kmal mekreos er osengel. (Monguiu er a 1 Johanes 3:16-18.) Me kede ochotii a bltikerreng el mora rudam me a rudos loeak omerelled el mo er tir. (Efe. 4:29, 31–5:2) El ua tiang, kede olengeseu er tir sel bo lsecher me a lechub e sel lechebangel a meringel el blekeradel me a dirrek el telemellel a beluu. Engdi ke mo mekerang a lsekum a ta er tir a tomellii a rengum?

13. Ngera uchul me ngkired el ousubes?

¹³ Ngmeringel er kau a lebebil el ousubes er a odam me a odos er kau? (Lev. 19:18) A leuaisei e moltirakl er tia el ulekrael: “Bo lulserechakl a rengmiu, e bo mkausubes a mlo mekngit er a delongeliu, a le bor ngii a ultutakl el kirel a tar a re chad. Ng kiriu el mo kausubes, el ua ia Rubak el mla ousubes a telemelliu.” (Kol. 3:13) Bek el taem el dousubes er a odam me a lechub e ngodos er kid e kede ochotii el mora Demad el ngar er a eanged el kmo, kede oba omereng el saul el kirel a olubet. Me kede mekera melemolem el menglou er a omereng el saul er kid el kirel a olubet?

14. Ngera ta er a rolel e ngsebeched el menglou er a omereng el saul er kid el kirel a olubet?

¹⁴ Moureng a sulel a Jehovah el kirel a olubet. A 83 a rekil el odos el Joanna el kiei er a India a kmo: “A kumdasu e ngkmal klou a ultutelel el bek el sils el kululuuch el mereng a sulel a Jehovah el kirel a olubet.” Me a bek el sils e molatk a cheleuid el mriruul e moluluuch el mora Jehovah el lolengit a klausubes. Me nguaisei engdi a omrebet er a oberaod el klengit e ngdirrek el kirem el mo olengit a ngeso er a remechuodel. Te mo orrenges er kau e oeak a bltikerreng e te mo meskau a omellach er a Tekingel a Dios. Te mo meluluuch lobengkem lolengit er a Jehovah me lousubes er kau me  lluut el ‘mo ungil’ a deleuill er kau me Ngii.​—Jak. 5:14-16.

15. Ngera uchul me ngkired el mengoit a taem el menguiu e melebedebek el kirel a olubet?

¹⁵ Molebedebek el kirel a olubet. A 73 a rekil el odos el Rajamani a kmo: “Sel kunguiu el kirel a ringel el blo lecharm a Jesus, e ngmo delelualu a iuechel a medak.” Kau a locha dirrek el kmal mo mekngit a rengum sel molatk a ringel el blo lechebangel a Jesus. Me sel oblechoel el melebedebek er a tengetengel a Jesus e nglmuut el mo klou a bltkil a rengum el mo er ngii me a Jehovah. Kau, ngsebechem el rullii a dmolech el omesubem el kirel a olubet?

16. Ngmekera mo uchul a klungioled sel dolisechakl er a rebebil el kirel a olubet? (Momes er a siasing er a medal tia el babier.)

¹⁶ Molisechakl er a rebebil el kirel a olubet. Bek el taem el douchais er a rebebil el kirel a olubet e ngmedechel a omereng el saul er kid el kirel. Ngkmal betok a dongu el mla meketmokl el sebeched lousbech lolisechakl er a rebebil er a uchul me a Jesus a mlad el kired. El ua tiang, ngsebeched el lousbech er a 4 el suobel er a brochure el Ungil Chais el Mla er a Dios! A dai er tia el suobel a “Ngtechang a Jesus Kristus?” Me a lechub e kede ousbech er a 5 el bliongel er a Ngerang Mera el Lolisechakl a Biblia? el babier, el dai er ngii a kmo “A Olubet a Kot el Ngarbab el Sengk er a Dios.” Ngdirrek el sel debora Chedaol Belsoil er a bek el rak e dongemedaol er a rebebil el me teloi er kid, e kede menglou er a omereng el saul er kid el kirel a olubet. Ngmera el ileakl el techall el bla lebeskid a Jehovah el mo olisechakl er a rebebil el kirel a Ngelekel!

17. Ngera uchul me a olubet a kot el ngarbab el sengk er a Dios?

¹⁷ Ngmeral kired el mekurulii e melemolem el menglou er a omereng el saul er kid el kirel a olubet. A olubet a uchul me alta ngdiak demecherrungel engdi ngngar ngii a kmes el deleuill er kid me a Jehovah. A olubet a mo tomall a urerel a Diabelong. (1 Jn. 3:8) Ngdirrek el olubet a uchul me ngmo tmaut a dimla moktek er a Jehovah el kirel tia el chutem. A beluulechad el rokir a mo baradis me a rokui el chad el kiei er tia el chutem a mo betik a rengrir er a Jehovah e mesiou er Ngii. Mada dosiik a bek el techall el mo olecholt a omereng el saul el kirel tia el kot el ngarbab el sengk er a Dios!