1, 2. (a) Ngera el klou a ultutelel el tekoi a kired el mo mekurulii, e ngera uchul? (b) Ngera kede mo mesaod er tia el suobel?

 KEDE rokui el kired el mesuub er a rolel e ngmo sebeched lungil merriter a tekoi, e ousbech ngii el tekoi el mo medengelii a mera el tekoi el dilubech. (Osisechakl 3:21-23; 8:4, 5) E le lsekum ngdiak dekerekikl, e ngmo beot er a Satan me tia el beluulechad er ngii el mengeblad er kid. (Efesus 5:6; Kolose 2:8) Kid a ungil medengei el kmo a mera el tekoi el dilubech a sebeched el mo medengelii a lsekum kede ngmai a rokui el mera el omesodel. A bades er a Osisechakl 18:13 a kmo: “A lsekum a chad a onger a ker er uchei er a lorrenges, e ng klebelung e otuball.”

² Ngar tia el suobel, e kede mo mesaod a tekoi el sebechel rullii el mo meringel er kid el mo medengei a klemerang el tekoi el dilubech. Kede dirrek el mo suubii a rolel e ngsebechel a omellach er a Biblia me a kerebai el osisecheklid el mo meduch el merriter a tekoi.

3. Ngera me ngkired el oltaut er a omellach er a Biblia el ngar er a Osisechakl 14:15? (Momes er a siasing er a uchelel a suobel.)

³ Chelecha el taem, e ngkmal betok a tekoi el derenges el lokiu a betok el rolel. Kede remenges lokiu a Internet, me a TV, me a lmuut  el bebil er a rolel a chais er a beluu. Kede dirrek el locha remenges lokiu a e-mail me a text message, me a chais el losaod a resechelid. A lebebil er a taem e ngua lak a ulebengelel aika el tekoi a uchul me ngkired el mo kerekikl. A resechelid a locha ungil a uldesuir, engdi te ngar ngii a rebebil el sorir el omerk a blulak me a lechub e te mengeuid a tekoi. Me ngera el omellach er a Biblia a sebechel ngosukid el mo ungil merriter a tekoi el derenges? A Osisechakl 14:15 a kmo: “A meleolt a rengul chad a oumerang a rokui el tekoi, e a mellomes a rengul a omes er a le bor ngii.”

4. Ngmekera Filipi 4:8, 9 e ngosukid el mo ungil melilt a tekoi el donguiu, e ngera me ngklou a ultutelel el kired el ngmai a mera el omesodel a tekoi? (Dirrek el momes er a baks el “ A Bebil Techall el Ngosukid el Mo Medengei a Klemerang el Tekoi.”)

⁴ A ungil lomelilt el doruul a ousbech a klemerang el tekoi. Tiaikid a uchul me ngkmal kired el mo kerekikl a tekoi el donguiu. (Monguiu er a Filipi 4:8, 9.) Ngdiak lsoad el mengoit a temed el menguiu a tekoi el ngar er a Internet el diak dodengei el kmo ngmla er ker el mei, me a lechub e kede menguiu a e-mail el mesaod a telulechoid. E kmal klou a ultutelel el kired el mengeroid er kid er aike el website el melisiich a uldesuir a rumtok a mera el osisechakl. Tirkang a di sorir el mengitechut a klaumerang er a rechedal a Dios e dirrek el mengeuid a klemerang el tekoi. Me a tekoi el diak dodengei el kmo ngmla er ker el mei a mo uchul e a chad a mo mekngit el melilt a tekoi. Me lak momdasu el kmo a blulak el tekoi a diak a ngera el sebechel el rullii er a uldesuem.​—1 Timothy 6:20, 21.

5. Ngera el blulak el tekoi a lerirenges a rechad er a Israel, e ngera ngrirellii er a uldesuir?

⁵ A blulak el cheldecheduch a sebechel mo uchul a klou el tellemall. Sel taem er a Moses, e a 12 el ruurabek a mlo ourabek er a Beluu er a Nglat. A reteruich er tirka el mlo ourabek a mle remei e uluuchais a mekngit el chais. (Ulecherangel 13:25-33) Te kmal milenglou aika el mekngit el chais, me a rechedal a Jehovah a kmal mlo medakt e mlo mechitechut a rengrir. (Ulecherangel 14:1-4) Ngera uchul me a rechad a mlo uaisei a uldesuir? Te locha mlo oumerang er ngii el chais e le oumesingd er tirka el mlo ourabek a milsaod a osisiu el tekoi. Me ngmlo diak lorrenges a ungil chais el lulsaod tirke el terung el dirrek el mlo ourabek er a Beluu er a Nglat. (Ulecherangel 14:6-10) Me tir el dimlak bo loumerang a klemerang el tekoi e mlo diak loumerang er a Jehovah, a uchul me a rechad a millilt el mo oumerang er ngii el mekngit el chais.

6. Ngera me ngdiak el kired el kibetiekl sel derenges a mekngit el chais el kirir a rechedal a Jehovah?

⁶ Ngkired el lmuut el mo kerekikl sel dorrenges a chais el kirir a rechedal a Jehovah. Lak dobes el kmo ngike el cherroued el Satan a okedongall el “ngikel oltutakl rar udam er kid.” (Ocholt 12:10, BT) A Jesus a milengelechel el kmo a rumtok a mo melekoi a “bek el mekngit el blulak” el kired. (Mateus 5:11) Me a lsekum  kede mo kerekikl el melatk er tia el uleklatk, e ngdiak bo lemechas a rengud sel derenges a ngodech el chais el kirir a rechedal a Jehovah.

7. Ngera el ker a kired el melatk er a uchei er a doldurokl a e-mail me a lechub a text message?

⁷ Kau, ngsoam loldurokl a e-mail me a text message el mora resechelim? Sel mrenges a chais el okiu a chisel a beluu me a lechub e ke rongesii a meang el chais el dilubech, e ke omelechesiu er kau el ua chad er a chais el soam el mereched louchais er tia el tekoi el mora rebebil? A uchei er a cho moldurokl er a e-mail me a lechub a text, e molatk el kmo: ‘Ngak ak ungil medengei el kmo tia el tekoi a klemerang? Ak medengei a rokui el tekoi el dilubech?’ A lsekum ngdiak, e ke locha mo omerk a blulak el tekoi. Me a lsekum ngdiak modengei el kmo a tekoi el dilubech a klemerang, e lak moldurokl er ngii. Bai moutekangel el delete er ngii!

8. A rumtok el ngar er a bebil beluu te mla mekerang? E kede mekerang e olengeseu er tir el di diak dodengei?

⁸ Ngar ngii a lmuut el ta er a uchul me ngkmal kdekudel tekoi a doldurokl a e-mail me a text message el di diak dungil lomdasu er a uchei. Ngar er a bebil beluu e a rechad a diak lekengei er tia el urered me a lechub a kabelment a merrob er ngii. Me tirke el omtok er kid el ngar er aika el beluu a sebechir melekoi a blulak el tekoi el melasem el omekdakt er kid me a lechub e te meruul er kid el mo diak a klaumerang er a delongeled. Ka di molatk a tekoi el dilubech er a taem er a Soviet Union. Tirke el berrotel el bulis el okedongall el KGB, a ulemerk a blulak el tekoi el kirir a rebebil el bekongerachel el rudam er kid el kmo te mla remuul a tekoi el mengeblad er a rechedal a Dios. * (Momes er a footnote.) Me ngklengiterreng, e le rebetok el rudam a mlo oumerang aika el blulak el tekoi e dirrek el tilobed er a cheldebechelel a Jehovah. A rebetok er tir a liluut el mei er a uriul, engdi a rebebil a dimlak. Te milechei aika el blulak el tekoi me ngtomellii a klaumerang er tir. (1 Timothy 1:19) Me kede  mekerang e oibngid er chouaika el tellemall? Lak mkengei el omerk a mekngit el chais me a lechub a diak lulterekokl el chais. Lak moumerang a bek el tekoi el morrenges. Bai bo mkerekikl el merriter me bo modengei a mera el tekoi.

9. Ngera el tekoi a dirrek el rullii el mo meringel er kid el mo medengei a mera el omesodel a tekoi?

⁹ A lebebil er a taem e kede remenges a chais el di telkib er ngii a klemerang. E a kuk bebil er ngii a di teleu a omesodel. E tia rullii el mo meringel er kid el mo medengei a klemerang el tekoi el kirel. Me ngkmal diak el sebeched el oumerang a chais el di telkib er ngii a klemerang! Me ngera sebeched el meruul me lak demecheblad er chouaika el chais?​—Efesus 4:14.

10. Ngera uchul me a rebebil el chad er a Israel a di mle kmeed e te mo oumekemad er a rudam er tir? E ngera ngilsuterir me ngdimlekea bo loumekemad?

¹⁰ Ngsebeched el ngmai a klubeled er a tekoi el dilubech el mora rechad er a Israel el kiliei er a mo bedul ngebard er a Omoachel Jordan er a taem er a Josua. (Josua 22:9-34) Te rirenges a chais el kmo a rechad er a Israel el kiei er a mo bedul ongos er a Jordan a mla toketekii a klou el olengetongel er bita er a omoachel. Tia el chais a dimlak el cherrungel el klemerang el tekoi. Ngdirrek el rirelleterir a rechad er a Israel el kiliei er a mo bedul ngebard el mo omdasu el kmo a rudam er tir el kiei er a mo bedul ongos a mla mo omtok er a Jehovah, me te mlo kldibel e mengetmokl er tir el mo oumekemad er tir. (Monguiu er a Josua 22:9-12.) Engdi uchei er a bo loumekemad, e tirka el mlara mo bedul ngebard a uldercheterir a rebebil er tir el mo merriter er tia el tekoi. Me ngera te siluubii? Tirke el chad er a Israel el ngar er a mo bedul ongos a dimlak loleketek er a olengetongel el kirel a omelenget el mora klsuul chelid. Te bai tileketekii el ua ocholt me bo lsebechir a rokui el chad el mo medengei el kmo te mengull er a Jehovah. Me a rechad er a Israel a locha mlo dmeu a rengrir el dimlak bo loumekemad er a rudam er tir, e le tir el milengoit a temir el mo merriter a mera el tekoi.

11. (a) Ngokiu a ngera el rolel e a Mefiboseth a mlo chelebangel a mekngit el omeruul? (b) Ngmilekera David e mle sebechel el mo tabesul a omerellel el mora Mefiboseth?

¹¹ Nglocha mo er ngii a taem el metemall a rengud e le rechad a ulemerk a diak leklemerang el chais el kired. E tia dilubech el mora Mefiboseth. A King el David a milsa Mefiboseth a rokui el beluu el mle kloklel a demal rubak el Saul. (2 Samuel 9:6, 7) Engdi uriul e a David a rirenges a mekngit el tekoi el kirel a Mefiboseth. E dimlak bo lungil tirterii tia el tekoi el kmo ngklemerang me a lechub e ngdiak, e bai ngilai a rokui el kloklel a Mefiboseth. (2 Samuel 16:1-4) Me sel taem el David a mlo mengedecheduch er ngii er a uriul, e ngmlo medengei el kmo ngkmal mle cheleuid a omerellel. Me ngliluut el msang a bebil er a kloklel. (2 Samuel 19:24-29) Me oleko David a milengoit a temel el mo merriter er a klemerang e dimlak lorreched el meruul a tekoi el okiu a di tedobech el omesodel a tekoi, e ngmle sebechel a Mefiboseth el dimlak bo lechuarm er a chelebirukel lomeruul.

12, 13. (a) Ngmilekera Jesus er sel taem el rechad a millekoi a blulak el kirel? (b) Kede mo mekerang a lsekum a chad a melekoi a blulak el kired?

¹² Ke mo mekerang a lsekum a chad a omerk a blulak el tekoi el kirem? Tia el blekeradel a dilubech el mora Jesus me a Johanes el Chad er a Techolb. (Monguiu er a Mateus 11:18, 19.) Ngmilekera Jesus? Ngdimlak longoit a temel me a klisichel el omeketakl a tekoi er a rechad el kmo aika el chais a di blulak. Ngbai millisiich er a rechad me di el tir el merriter a klemerang el tekoi. Ngmle soal a rechad a bo lekerekikl lomtab a tekoi el lurruul me a lullisechakl. Me ngii el Jesus a dilu el kmo: A “llomeserreng er a Dios a chemolt el klemerang el oeak a ikel lukdubech el tekoi.”

 ¹³ Ngsebeched el suubii a klou a ultutelel el tekoi er a omerellel a Jesus. A lebebil er a taem, e a rechad a mo dmu mekngit me a lechub e ngchebirukel tekoi el kired, me kede mo bekikl el kmo kelel bo letemellii a chised. Engdi rolel a klengar er kid a sebechel lochotii el mora rebebil el kmo kede uangera el chad. El ua tekoi el desuub er a kerebil a Jesus, a ungil omerelled a sebechel el oterekeklii el kmo a telkib el blulak me a mekngit lultelechakl a di blulak.

14, 15. Ngera me ngdiak el kired el di mo ultuil er a di klemedengei er kid?

¹⁴ Kede mla mesang el kmo ngsebechel mo meringel er kid el mo medengei a mera el omesodel a tekoi. Me a lmuut el ta er a tekoi, kid a diak demecherrungel. Me nglocha mla mo betok el rak el dosiou er a Jehovah e dirrek el locha mla mukeroul a klemedengei er kid lokiu a bebil tekoi. Me a rechad a locha mo olecholt a omengull el bedulkid, e le kid el ungil el omtab a tekoi. Engdi tia el tekoi, ngsebechel mo uchul a mondai er kid?

¹⁵ Ochoi, ngsebeched el omuchel el di mo ultuil er a di klemedengei er kid. Kede locha mo omuchel el mechei a uldesued me a rengud me ngomtebechel er a rolel a domdasu a tekoi. Kede locha mo oumerang el kmo kede ungil medengelii a tekoi el dilubech alta e ngdiak dodengelii a mera el omesodel a tekoi. Tia el blekeradel a kmal kdekudel! A Biblia a bleketakl el mengelechel er kid me lak desal mo ultuil er a di klemedengei er kid.​—Osisechakl 3:5, 6; 28:26.

16. Ngar tia el okesiu, e ngera dilubech er a chelsel a blil a blengur? E mlo uangera uldesuel a Tom?

¹⁶ El ua tiang, ka molatk er a ta el kebesengei, e a ta er a remechuodel er a ongdibel el Tom a merael el soiseb er a blil a blengur e mesa ta er a remechuodel el John, el dengchokl lobengkel a redil el diak el bechil. E a lomes er tir e te kmal dmeu a rengrir el dmak el terung. A Tom a omes er tir el kaderroakl e kaiuechull el terung. Me ngkmal sobeka rengul e mocha melatk el kmo: ‘A John me a bechil, te mo merort er a chebechiielir? Te mo mekerang a rengelekir?’ A  Tom a mla mes a osisiu el tekoi el dilubech er a uchei. Me ngmo uangera uldesuem oleko ke mle Tom?

17. Ngar tia el okesiu, e ngera ngmlo medengei a Tom er a uriul? Me ngera sebeched el suubii er tiang?

¹⁷ Engdi, ka molatk. Alta e a Tom a mlo omdasu el kmo a John a mengeblad er a bechil, engdi ngika el Tom ngungil medengei a rokui el tekoi? Sel kebesengei, e ngii el Tom a ulemekedong er a John e mlo medengei el kmo ngike el redil a ochedal a John, el mlara cheroid el beluu el me oldingel er ngii. A John me ngika el ochedal a kmal mla mo betok el rak el diak lekasoues. E ngika el ochedal a di mle sebechel ngar sei el di kirel a sesei el sikang, me a John a di mlo er ngii a techellel el mora blil a blengur el mo mesang. E a bechil a mlo diak a techellel el teloi er tir. A Tom a kmal mlo ungil a rengul e le ngdimlak louchais er a ngii di el chad el kirel a uldesuel! Me ngera kede suubii er tia el tekoi? Alta e ngmla mo betok el rak el dosiou er a Jehovah, engdi ngdirk kired el mo ungil medengei a rokui el tekoi er a uchei er a bo doterekeklii a uldesued el kirel a tekoi.

18. Ngera sebechel rullid el mo oumerang a mekngit el tekoi el kirel a odam er kid?

¹⁸ Ngdirrek el sebechel el mo meringel er kid el tirterii a klemerang el tekoi a lsekum a odam el outekoi er a tekoi a meringel er kid lobengkel. Me a lsekum kede di blechoel el melatk aike el klekakerous er a uldesued, e ngsebechel rullid el mo diak doumerang er a odam er kid. Me sel derenges a mekngit el tekoi el kirel, e nglocha mo soad el oumerang ngii el tekoi, el mo lmuut er a taem el diak a bleketakl lolechotel el kmo aika el tekoi a klemerang. Me ngera klubeled el denguu er tiang? A lsekum kede melemolem a mekngit luldesued el bedul a rudam er kid, e ngsebechel rullid el mo omdasu a cheleuid el tekoi el ngii a diak el klemerang. (1 Timothy 6:4, 5) Me ngdiak el kired el mechei a mekngit luldasu el ua chelechei me lolemolem el ngar er a chelsel a rengud. E lak dobes, a Jehovah a kmal soal a bo lebetik a rengud er a rudam er kid e dousubes er tir el mera el ngar er a rengud.​—Monguiu er a Kolose 3:12-14.

19, 20. (a) Ngera el omellach er a Biblia a sebechel ngosukid el mo ungil tiriter a tekoi? (b) Ngera kede mo mesaod er a ongingil el suobel?

¹⁹ Chelecha el taem, e ngkmal meringel er kid el mo medengei a mera el tekoi e dirrek el merriter ngii el tekoi el ngar er a melemalt el rolel. E ngera uchul? E le oumesingd el tekoi a di tedobech a omesodel me a lechub engdi telkib er ngii a klemerang, me kid el chad a dirrek el diak demecherrungel. Me ngera sebechel ngosukid? Ngokiu a omellach el debetik er a Tekingel a Dios! El ua tiang, a ta el omellach a ouchais er kid el kmo ngklebelung a lsekum kede onger er a uchei er a bo dodengei a klemerang el tekoi. (Osisechakl 18:13) E a kuk tang a ngosukid el mo mesa el kmo ngdiak el kired el di oumerang a rokui el tekoi el derenges el di diak bo dungil tiriter el kmo ngmera el tekoi me a lechub e ngdiak. (Osisechakl 14:15) E dirrek, alta e ngkmal mla mo betok el rak el dosiou er a Jehovah, engdi lak dobes el kmo ngkmal diak el kired el di ultuil er a klemedengei er kid. (Osisechakl 3:5, 6) Me a omellach er a Biblia a mo omekerreu er kid a lsekum kede ousbech a klemerang el tekoi el mo oterekokl a tekoi el dilubech e mo meruul a ungil el omelilt.

²⁰ Engdi ngar ngii a lmuut el ta er a uchul me ngmo meringel er kid el mo medengei a mera el tekoi el dilubech. Kid el chad, a blechoel mereched el oukerrekeriil a tekoi el di oltirakl aike el tekoi el sebeched el omes. Me ngar er a ongingil el suobel, e kede mo mesaod a rolel e ngsebeched el rullii tia el cheleuid el tekoi e dirrek el mo suubii a rolel e ngsebeched el oibngid er ngii.