1. Ngera me a Jehovah a ulemeob a klengar?

NGMLA er ngii a taem el Jehovah a di mle ngii el tang. Engdi ngdimlak lesabisi. E le ngdiak a olengesonges er ngii. Me nguaisei engdi ngmle soal a rebebil a bo ledeu a rengrir el ngar. Ngbltikerreng er ngii a uchul e ngulemuchel el omeob.​—Psa. 36:9; 1 Jn. 4:19.

2. Ngmle uangera uldesuel a Jesus me a rechanghel el kirel a blebelel a Jehovah?

² A kot e a Jehovah a milebii a kldemel er a ureor. E okiu ngika el kot el Ngalek, e “a rokuil tekoi” a ulebeob, el uldimukl er a rebetok el miliol el anghel. (Kol. 1:16, BT) A Jesus a kmal mle dmeu a rengul er tia el ileakl el techall el mo oureor lobengkel a Demal. (Osi. 8:30) Me a rechanghel el ngelekel a Dios me te dirrek el mla er ngii a uchul e te mle dmeu a rengrir. Tirka miles a rokui el tekoi el leriruul er a eanged me a chutem a Dios me a Jesus, el ngii a mle Ua Chad er Omelib el Blai. Ngera mle uldesuir? Te “uleldiu er a deurreng” er a lesa beluulechad el obeob e dirrek el uleba deurreng er a leues aike el bek el blebelel a Jehovah, el tokubets a rechad el blebelel. (Job 38:7; Osi. 8:31) Me a derta er aika el blebelel a Jehovah a ulechotii a bltikerreng me a llomeserreng er ngii.​—Psa. 104:24; Rom 1:20.

3. A doltirakl er a 1 Korinth 15:21, 22, e ngera el tekoi a mlo sebechel meketmokl el lokiu a olubet el tengetengel a Jesus?

³ A Jehovah a mle soal a rechad a loldeu a rengrir er a diak a ulebengelel el klengar el ngar tia el klebokel el chutem el lulemeob er ngii. Engdi seikid er a bo lak lolengesenges a Adam me a Eva er ngika el betik a rengul el Demerir, e ngsiliseb a klengit me a kodall er a beluulechad. (Rom 5:12) Ngera ngmirruul er ngii a Jehovah? Ngdi mle mereched el rullii a rolel e ngmo olsobel er a rechad. (Gen. 3:15) A Jehovah a tilbir el mo kutmeklii a olubet me bo el sebechir a rengelekel a Adam me a Eva el mo mimokl er  a klengit me a kodall. E seikid e ngmlo sebechel mechititerir a rechad me ngdi tir el melilt el mo mesiou er Ngii e mo nguu a diak a ulebengelel el klengar.​—Jn. 3:16; Rom 6:23; monguiu er a 1 Korinth 15:21, 22.

4. Kede mo mesaod a ngera el ker er tia el suobel?

⁴ Tia el telbilel a Dios el mo olekiis er a rulekoad a muchel a betok el ker. El ua tiang, nglocha mekera mo meketmokl a okiis? Ngmo sebeched el dongcheterir a rebetik er a rengud sel lluut el me ngar? Ngoeak a ngera el rolel e a okiis a mo uchul a deurreng? Me sel dolebedebek el kirel a okiis, e ngmekera e mekurulii a omereng el saul er kid el kirel a bltikerreng, llomeserreng, me a kllourreng er a Jehovah? Me bo dosaod aika el ker.

5. Ngera me ngsebeched loumerang el kmo te diak el rokui el chad a mo mekiis er a osisiu el taem?

⁵ A Jehovah, el okiu a Ngelekel, sel bo lolekiis er a rebetok el miliol el chad, e ngsebeched el melekoi el kmo ngdiak el tir el rokui a mo mekiis er a osisiu el taem. E ngera uchul? E le a lsekum e te di ta mekiis el rokui e nglocha kmal mo klou a klaiueong. E a Jehovah a chelderoder a bek el tekoi el loruul. Ngmedengei el kmo a lolemolem el ngar ngii a budech e ngkirel a tekoi el chelderoder. (1 Ko. 14:33) A Jehovah a ullecholt er a llomeserreng me a kllourreng er a loureor lobengkel a Jesus el mekekokil el mengetmokl er tia el beluulechad er a uchei er a bo lomeob er a rechad. Me a Jesus me ngdirrek el mo meruul er a osisiu el tekoi er a chelsel a Ta el Telael el Rak el Omengederederel sel bo loureor lobengterir tirke el mo suobel er a Armakedon el mengetmokl er tia el beluulechad el kirir tirke el mo mekiis.

6. A doltirakl er a Rellir 24:15, BT, e te rua techang a uldimukl er tirke el bo lolekiis er tir a Jehovah?

⁶ E a ngaruchei er ngii, tirke el mo suobel er a Armakedon a kirir el mo olisechakl er tirke el mo mekiis el kirel a Rengedel a Dios me a llechul a Jehovah. E ngera uchul? E le oumesingd  er tirke el mo mekiis a mo uldimukl er tirke el “diak le melemalt.” (Monguiu er a Rellir 24:15, BT) * Ngbetok a kirir el mo melodech er a klengar er tir me bo lengai a klungiolir er a olubet el tengetengel a Kristus. Ka di molatk er a klungel a ureor el mo er ngii el lolisechakl er a rebetok el miliol el diak a klemedengei er tir el kirel a Jehovah. Me a rederta el chad ngmo er ngii a mesuub el obengterir, el di ua rolel a dosuub el obengterir a rechad er chelechang? Tirka el beches el mei te mo mukrael el mora kakerous el ongdibel e mosisechakl el mo olisechakl er tirke el mo mekiis er uriul er tir? Ngkired el di mengiil. Engdi kede medengei el kmo, a ulebengelel a Ta el Telael el Rak el Omengederederel a Kristus, e a “beluu a mo mui er a klemedengei er a RUBAK.” (Isa. 11:9) Me kede kmal mo mechesang er a ureor engdi ngkmal mo dmeu a rengud er tia el ta el telael el rak!

7. Ngera me a rechedal a Dios a mo oba klechubechub el olisechakl er tirke el mo mekiis?

⁷ Chelsel tia el Ta el Telael el Rak el Omengederederel a Kristus, e a rokui el chedal a Jehovah a kirir el mo melodech a klengar er tir me bo lodeuir a rengul. Me te rokui el mo oba klechubechub el ngosuterir tirke el mo mekiis el mengoit a mekngit el blekerdelir e mo oltirakl a llechul a Jehovah. (1 Pe. 3:8) Tirke el rokui el mo mekiis a ulterekokl el sorir el mo teloi er a rengariou a rengrir el chedal a Jehovah, el tir a dirrek el oureor el ‘mengerrungel a osebelir.’​—Fil. 2:12.

8. Ngera me ngsebeched el melekoi el kmo tirke el mo outkeu er a rechad el mo mekiis a mo dongcheterir a rebetik er a rengrir?

⁸ Ngar ngii a bebil uchul e ngsebeched el melekoi el kmo tirke el mo outkeu er a rechad el mo mekiis a mo dongcheterir a rebetik er a rengrir. El ua tiang, a doltirakl aike el okiis el mla er ngii, e ngsebeched el melekoi el kmo a Jehovah a lmuut el mo omeob er a rechad el di osisiu a teletelir, oto er a ngerir, me a uldesuir el di uai tir er a uchei er a lemad. Molatk el kmo a Jesus a ulemekesiu er a kodall el ua cheliuaiu me a okiis el ua sel lebekiis a chad er a cheliuaiu. (Mt. 9:18, 24; Jn. 11:11-13) A chad sel bo lebechiuaiu e lebekiis e ngdirk osisiu a teletelel me a oto er a ngerel e dirk olab a rokui el klemedengei el lullab er a uchei er a bo lebechiuaiu. Ka di molatk er a Lasarus. Ngmle ulekoad el eua el klebesei, me a bedengel a locha mlo er ngii a bul. Me nguaisei, engdi a Jesus er a lokisii, e a ruchedal a di mle mereched el dongchii me a Lasarus me ngdilengcheterir.​—Jn. 11:38-44; 12:1, 2.

9. Ngera me tirke el mo mekiis a diak bo lebekiis el cherrungel a uldesuir me a bedengir?

⁹ A Jehovah a tilbir el kmo ngdiak a chad el mo kiei er cheungel a omengederederel a Kristus el mo melekoi el kmo: “Ng smecher.” (Isa. 33:24; Rom 6:7) Me tirke el mo mekiis er a kodall a mo er ngii a beches el bedengir. Engdi ngdiak di lemereched el mo cherrungel. E le leuaisei, e ngmo meringel er a rebetik er a rengrir el dongcheterir. Ngsebeched el melekoi el kmo a rokui el chad a mo mekekoketerir el mo cherrungel er a chelsel a Ta el Telael el Rak el Omengederederel a Kristus. E ngar er a ulebengelel tia el ta el telael el rak e a Jesus a mo olutii a Renged el mora Demal. Seikid e a Renged a mla kutmokl a rokui el urerel, el uldimukl er a meruul er a rechad el mo cherrungel.​—1 Ko. 15:24-28; Och. 20:1-3.

10. Ngmo uangera uldesuem el kirel a okiis?

¹⁰ Ka molatk er sel taem el bo moutkeu er a rebetik er a rengum. A deurreng el bo molechesuar ngrullau el mo ocherchur me a lechub e  ke mo lmangel? Ngkmal mo dmeu a rengum me ke mo mengitakl a chelitakl er a odanges el mora Jehovah? Ngulterekokl a ta el tekoi el kmo, ngkmal mo klou a bltkil a rengum er a betik er a rengud el Demad me a Ngelekel el kirel tia el sengk er a okiis.

11. A doltirakl er a tekingel a Jesus el ngar er a Johanes 5:28, 29, e ngera mo duubech el mo er tirke el kiei el oltirakl a melemalt el llechul a Dios?

¹¹ Molebedebek er a deuil a rengrir tirke el mo mekiis sel lebedebedii el choitii a mechut el klechad er tir e bo lekiei el oltirakl a melemalt el llechul a Dios. Tirke el mo meruul aika el omelodech a mo kiei el diak a ulebengelel er a Baradis el chutem. Engdi a Dios a diak bo lebechititerir tirke el omtok me letemellii tia el budech er a chelsel a Baradis.​—Isa. 65:20; monguiu er a Johanes 5:28, 29.

12. Ngoeak a ngera el rolel e tirke el rokui el ngar tia el chutem a mo mukngeltengat er a Jehovah?

¹² Ngar cheungel a Renged, e a rokui el chedal a Dios a mo mesa el kmo a tekoi el ngar er a Osisechakl 10:22 a klemerang el kmo: “Ng klengeltengat er a RUBAK a rullau el mo merau, el diak le meringel el ureor.” Me a chedaol reng er a Jehovah a moureor er a chelsir a rechedal a uchul me te mo merau er a tekoi er a klereng, el belkul a kmo te di merael el mo uai a blekerdelel a Jesus e merael el mo cherrungel a klisichel a bedengir. (Jn. 13:15-17; Efe. 4:23, 24) A bek el sils e te di merael el mo mesisiich a bedengir. Ngkol uangera el ungil klengar! (Job 33:25) Engdi ngmekera e a omolebedebek el kirel a okiis e ngosukau er chelechang?

13. A doltirakl er a Psalm 139:1-4, e ngmekera okiis e ochotii el kmo a Jehovah a kmal ungil medengelkid?

¹³ Ngdi ua dulsaod, a Jehovah sel bo lolekiis er a rechad e te mo mekiis el olab a blekerdelir me a klemedengei er tir er a uchei. Ka di molatk er a belkul aika el tekoi. A Jehovah a kmal imis el betik a rengul er kau me ngkerekikl el omtab a tekoi el molatk, momelechesiu, molekoi, me a moruul. Me a lsekum e ngmo kirel olekiis er kau e ngkmal di mo beot er ngii el okisau el mo uai kau er a uchei. A King David a mle medengelii a klungel a klemeriarreng er a Jehovah el kirel a rederta er kid. (Monguiu er a Psalm 139:1-4.) Ngmo uangera uldesued sel bo dodengei el kmo a Jehovah a kmal ungil medengelkid?

14. Ngkirel mo uangera uldesued sel dolebedebek er a klungel a klemedengei er a Jehovah el kired?

¹⁴ Ngdiak el kirel el mo suebek a rengud sel dolebedebek er a klungel a klemedengei er a Jehovah el kired. E ngera uchul? Lak mobes el kmo a Jehovah a kmal omekerreu er kid. Ngomes er a derta er kid el mekreos. Ngkerekikl el omtab aike el duubech er a klengar er kid el rullid el mo ileakl er a rebebil. E tiang a kmal mengelaod er a rengud! Me ngkmal diak el kired el mo omdasu el kmo ngdi kid el tang. A bek el bung er a bek el sils e a Jehovah a kmeed er kid, el osiik a techall el mo olengeseu er kid.​—2 Kr. 16:9.

15. Ngmekera okiis e ochotii a llomeserreng er a Jehovah?

¹⁵ A dakt er a kodall a mesisiich el tekoi el lousbech er ngii a rechad el omekdakt. Tirke el chederedall er a Satan a ousbech er ngii el orrimel er a rechad el mo mengeblad er a resechelirir me a lechub e te rulleterir el chemoit aike el loumerang el tekoi. Engdi tia el dakt a diak a klisichel er kid. Kede medengei el kmo a lsekum a recherroued a mekodkid e a Jehovah a sebechel loluut a klengar er kid. (Och. 2:10) Ngulterekokl a rengud el kmo ngdiak a ngerang el sebechir el rullii el mo choridid er a Jehovah. (Rom 8:35-39) Ngkol uangera el llomeserreng a lulechotii a Jehovah er a lebeskid a omelatk er a okiis! Ngoeak a okiis, e ngmla nguu er a Satan  a ta er a kot el mesisiich el ulekdakt el lobang e meskid a blekeu el diak a sebechel tomellii.

16. Ngera el ker a kirem el di kau el oker, e mekera nger er ngii a lengesukau el mo medengelii a klungel a klaumerang er kau er a Jehovah?

¹⁶ A lsekum a recherrouel a Jehovah a kmo te mo melai er a klengar er kau, e kau ke oumerang er a Jehovah me ke nguu a klengar er kau loia er a chimal? Ke mekera mo medengei el kmo ke mo ultuil er a Jehovah? A ta er a rolel a sel di lekau el oker el kmo, ‘Aike el mekekerei el omelilt el kuruul er a bek el sils ngolecholt el kmo a kuumerang er a Jehovah?’ (Lk. 16:10) A ta er a ker a kmo, ‘A rolel a klengar er ngak ngochotii el kmo, a kuumerang er a telbilel a Jehovah el mo meskak aike el kuusbech a lsekum ak nguu a Rengedel el mo kot?’ (Mt. 6:31-33) A lsekum a nger er kau er aika el ker a kmo chochoi, e ke ochotii el kmo ke oumerang er a Jehovah, e dirrek el kltmokl el kirel a ngii di el ringel el bo mchelebangel.​—Osi. 3:5, 6.

17. (a) Ngmekera okiis e ochotii el kmo a Jehovah a oba kllourreng? (b) Ngmekera dochotii a omereng el saul er kid el kirel a kllourreng er a Jehovah?

¹⁷ A Jehovah a ngar ngii a ulterekokl el sils me a sikang el bo lolekngemed er tia el mekngit el blekeradel. (Mt. 24:36) Ngdiak bo lekekerei a rengul e lerellii tiang er a uchei er a temel. ‘Ngkersos a rengul’ el mo olekiis er a rulekoad, engdi ngoba kllourreng. (Job 14:14, 15, NW) Ngmengiil el mo er sel ungil taem el bo lolekiis er tir er a kodall. (Jn. 5:28) Me ngar ngii a ungil uchul e kede oba omereng el saul el kirel a kllourreng er a Jehovah. Ka di molatk, a kllourreng er a Jehovah a uchul me a rebetok el chad el uldimukl er kid a mlo er ngii a techelled el ‘obult el mo imikr a kngtid.’ (2 Pe. 3:9) Me a Jehovah soal a rebetok el chad a lebo er ngii a techellir el nguu a diak a ulebengelel el klengar. Me dochotii el kmo kede oba omereng el saul el kirel a kllourreng er ngii. Ngoeak a ngera el rolel? Sel leblak a rengud el osiik er tirke el “rokui el rredemelel a diak a ulebengelel el klengar” e dengesuterir el mo betik a rengrir er a Jehovah e mo mesiou er ngii. (Rel. 13:48, NW) E seikid e te mo ngmai a klungiolir er a kllourreng er a Jehovah, el di uai kid.

18. Ngera me ngkired el oba kllourreng el bedul a rebebil?

¹⁸ A Jehovah a klou a rengul el mengiil el mora ulebengelel a ta el telael el rak el sel bocha decherrungel. Ngika kongei el ousubes a kngtid el mo er seikid el taem. Me a leuaisei, ngar ngii a uchul e ngkired el omes a klungiolir a rebebil e mo oba kllourreng el bedul tir. Ka molatk er a ta el odos el bechil a mlo er ngii a  rektel el di suebek a rengul e mlo diak lengar er a miting. Ngmelekoi el kmo: “Tia kmal mle meringel er ngak. Aike el telbilem er a ngar medemam el klebesei a di miltemall.” Me nguaisei, engdi ngika el betik a rengul bechiil redil a uleba kllourreng el bedul a bechil. Ngmle ultuil er a Jehovah e dimlak bo lemechitechut a rengul. Nguluukerebai er a Jehovah e dimlak lomes er tia el mondai e ngbai ulemes a klungiolel a bechil. Ngmelekoi el kmo: “A bechik a betok a ungil blekerdelel, e melasem er a tkurrebab el sebechel el mo ungil er tia el rektel.” Me ngkmal klou a ultutelel a bo doba kllourreng el bedul tirke el ngar er a telungalek er kid me a lechub e ng ongdibel el tir a melasem el mo mesisiich a omelsemai!

19. Ngkired el rullii er a rengud el mo mekerang?

¹⁹ A Jesus me a rechanghel a kmal mle dmeu a rengrir er a lobeob a chutem. Engdi ka di molatk er a deuil a rengrir sel bo lesa tia el chutem el mo mui er a remecherrungel el chad el betik a rengrir er a Jehovah e mesiou er ngii. E molatk er a deuil a rengrir tirke el mora eanged el mo mengedereder el obengkel a Kristus sel leseterir a rechad el melai a klungiolir er a urerir. (Och. 4:4, 9-11; 5:9, 10) E ka di molatk er a taem el iuosech er a deurreng a mo mtechei a iuosech er a ringel, me a dirrek el secher, klengiterreng, me a kodall a mo diak. (Och. 21:4) Me chelecha el mongiil er sel taem, e mrellii er a rengum el mo oukerebai er a betik a rengul, mellomes a rengul, e klou a rengul el Demad. A omoruul uaisei, e ngmo melemolem el dmeu a rengum, alta ke mo chobangel a kakerous el ringel. (Jak. 1:2-4) Kede mera el oba klou el omereng el saul el kirel a telbilel a Jehovah el kmo “ngmorngii chokiis”!​—Rel. 24:15, BT.