1-2. Ngera kede mo mesaod er tia el suobel?

NGUANGERA uldesuem sel lsekum a klalo el kmal mousbech er ngii a dimlak el lemei er sel taem el kirel mei? Ngmo suebek a rengum? A Osisechakl 13:12 a melekoi el kmo: “Sel le metemall omelatk, e a reng me ng metemall.” Me nguaisei engdi ngmo uangerang uldesuem obo modengei el kmo ngmla er ngii a ungil luchul e ngmle meoud el mei? Seikid e nglocha mo klou a rengum e kongei el mengiil.

² Ngar tia el suobel e kede mo omes omellach er a Biblia el ngii a mo ngosukid el mo ‘oumerang e mengiil.’ (Mik. 7:7) E a uriul e kede mo mesaod a eru el tekoi el kired el mo oba kllourreng el mengiil er a Jehovah el kirel. E a ulebongel e kede mo mesaod a klengeltengat el bo lengai tirke el kongei el mengiil er a Jehovah.

3. Ngera ngosisecheklid a omellach el ngar er a Osisechakl 13:11, NW?

³ Kede metik el ngar er a Osisechakl 13:11, NW a klungel a ultutelel a bo doba kllourreng. Ngmelekoi el kmo: “A ilteet el di mereched el mechudel a di mereched el mo diak, engdi a iltetel ngike el mekekokil mengudel a mo obdois.” Ke mtebengii a omellach er tia el bades? Ngllomeserreng a dokekokid el meruul a tekoi e bo doba kllourreng.

4. Ngera ngosisecheklid a omellach el ngar er a Osisechakl 4:18?

⁴ Osisechakl 4:18 a melekoi el kmo a “rolel a melemalt a ua sel lobuu a llomes er a mochu tutau, el mengal mo mellomes sel bo le cheldecheos.” Tia melutk el kirel a rolel a Jehovah a ouchais er a moktek er ngii el mora rechedal. Ngmekekokil el louchais er tir. Me nguaisei engdi tia el bades a dirrek el sebeched lousbech er ngii el mesaod er a rolel e a Kristiano olengeriakl er a tekoi er a klereng. Ngousbech a taem. A lsekum e kede mo blak  a rengud el mesuub e oltaut a ulekrael er a Tekingel a Dios me a cheldebechelel, e seikid e ngmo mekekokil a blekerdeled el mengodech el mo oltirakl a blekerdelel a Kristus. Ngdirrek el medechel a klemedengei er kid er a Dios. Molatk er a rolel e a Jesus ulemekesiu er tiang.

5. Ngera el okesiu a luluusbech er ngii a Jesus lomeketakl el kmo a chad el meruul a omelodech a ousbech a taem?

⁵ A Jesus a uluusbech er a okesiu el mesaod er a rolel e a klumech er a Renged a di ua kekerei el tane el mekekokil el mukeroul er a rengrir tirke el sorir el meruul a llemalt. Ngdilu el kmo, a “tane . . . dilubech el mo meklou, e ngdi ngii [el ngike el millalem] a dimlak lodengei el kmo, ng milekera e duubech el mo ua isei. Ele chutem a di ngii el mekdbechii a dellomel e mekdubech a redechel, a kot e ngduubech a tiul, e ng bngal e ng mor ngii a betok el redechel.” (Mk. 4:27, 28) Ngera belkul a tekingel a Jesus? Ngdi ua tane el mekekokil el mukeroul el mo klou, me ngdi osisiu a chad el kongei er a klumech er a Renged a mekekokil el mukeroul er a tekoi er a klereng. El ua tiang, a chad el mesuub sel lolekeed er ngii er a Jehovah e kede mo omuchel mes a omelodech el loruul. (Efe. 4:22-24) Engdi ngdiak el kired lobes el kmo, ng Jehovah ngike el omekeroul er a tane.​—1 Ko. 3:7.

6-7. Ngera kede suubii er a Jehovah er a lomeob er tia el chutem?

⁶ A Jehovah oba kllourreng el meruul a bek el tekoi el loruul. Ngmeruul el uaisei el kirel a klebkellel a ngklel me a dirrek el kirir a rebebil. El ua tiang, ka molatk er a rolel e a Jehovah milekekokil el mengetmokl er tia el chutem el kirir a rechad.

⁷ A Biblia mesaod el kirel a Jehovah er a lomeob er tia el chutem el kmo ng “millib el kmo ng mo ua klungel a ngerang,” e lilia orreked er a “nglosel,” e lilia “saus el bad er a beluulchad.” (Job 38:5, 6) Ngdirrek el milengoit a taem el omes a urerel. (Gen. 1:10, 12) Ka molatk a uldesuir a rechanghel er a lomes aike el tekoi el lulemeob a Jehovah. Te locha kmal mle semeriar el omes! A ta el taem e te mlo ‘oldiu er a deurreng.’ (Job 38:7) Ngera kede suubii? A Jehovah a uluusbech a betok el telael el  rak el omeob er tia el chutem, me nguaisei engdi sera bo lomes aika el blebelel el lulekekokil lomeob e ngdilu el kmo, “ngkmal ungil.”​—Gen. 1:31, NW.

8. Ngera kede mo mesaod er chelechang?

⁸ Kede mes er aika el tekoi el dirk dulsaod el kmo ngbetok omellach er a Biblia el melisiich er a klungel a ultutelel a bo doba kllourreng. Ka me dosaod a eru el tekoi el kired el mo oba kllourreng el mengiil er a Jehovah el kirel.

9. Ngera el tekoi a dousbech el mengiil er a Jehovah el kirel?

⁹ Nglocha mo kired el mengiil er a Jehovah el mo onger a nglunguched. Kede locha meluluuch el mora Jehovah me lebeskid a klisiich el mo outekangel er a omelsemai me a lechub e lengesukid er a chelitechetud. Me nguaisei engdi ngkora ua lemeoud el monger a nglunguched. Ngera uchul me a Jehovah a lebebil e ngdiak lemereched longer a nglunguched?

10. Ngera uchul me kede ousbech er a kllourreng el kirel a nglunguched?

¹⁰ A Jehovah kerekikl lorrenges a nglunguched. (Psa. 65:2) Ngomes a nglunguched el ua lolechotel a klaumerang er kid er ngii. (Heb. 11:6) Ngdirrek el omes el kmo kede mera el mora tkurrebab el klisiched el kiei el oltirakl a nglunguched e mo meruul er a soal. (1 Jn. 3:22) Me nglocha mo kired el molecholt er a kllourreng e dirrek el mo oureor el oltirakl a nglunguched sel dolasem el mo mesisiich a chelitechetud. A Jesus a ngilsukid el mo mtebengii el kmo a lebebil e a nglunguched a diak lemereched el monger. Ngmilengelechel er kid el kmo: “Molengit, e kom mo ngmai; mosiik, e kom mo metik; molngod er a chesimer, e ng mo mengai el kiriu. Ele ngikel olengit a mo nguu a lolengit er ngii, me ngikel osiik a mo metik er a losiik er ngii, ma chesimer a mo mengai el kirel ngikel melngod er a chesimer.” (Mt. 7:7, 8) Sel bo doltirakl er a tekingel a Jesus e bo le ‘blak a rengud el meluluuch’ e ngsebechel mo ulterekokl a rengud el kmo a Demad a orrenges er kid e mo onger a nglunguched.​—Kol. 4:2.

11. Ngmekera Hebru 4:16, BT e ngosukid sel lak lemereched el monger a nglunguched?

¹¹ Me alta lebebil e a nglunguched a kora mo ua lak lemereched el monger, engdi Jehovah tibir el kmo ngmo onger er a nglunguched er “sel kirel blsechel.” (Monguiu er a Hebru 4:16, BT. *) Me ngkmal diak el kired el mo oltelechakl er a Jehovah a lsekum a tekoi a diak el mereched el meketmokl el ua sel dulemdasu er ngii. El ua tiang, a rebetok a mla mo kemanget el taem el loluluuch me a Rengedel a Dios lokngemedii tia el mekngit el blekeradel. A Jesus me ngdirrek el dilu er kid el mo meluluuch el kirel tiang. (Mt. 6:10) Me nguaisei engdi ngkmal klebelung el tekoi a lsekum a chad a mo mechitechut a klaumerang er ngii er a Dios le ulebongel a dimlak el mei er sel taem el ngii a ulemdasu el kmo ngkirel mei! (Hab. 2:3; Mt. 24:44) Ngkmal kired el melemolem el mengiil er a Jehovah e meluluuch el oumerang el kmo ngmo onger er kid. A ulebongel a mei er sel kirel blsechel e le Jehovah a mla tutkii sel “sils ma . . . sikang” el lemei. E tiakid sel kot lungil taem el kired el rokui.​—Mt. 24:36; 2 Pe. 3:15.

12. Chelsel choua ngera el blekeradel e ngmo measem a kllourreng er kid?

¹² Nglocha mo kired el mo oba kllourreng e outekangel a chelebirukel el omeruul. A rechad a blechoel el mekngit er tirke el ngodech er tir. Aika uldimukl er a beluu el lechad er ngii, siukang er tir, me tir el diak el sechal me a lechub  e te redil el uai tir. A rebebil a lemekngit er tir e le ngsmecher a bderrir me a lechub e te chitechut. A rebetok el Sioning er a Jehovah a outekangel a chelebirukel el omeruul e le tir el ngodech a klaumerang er tir. Sel bo dechelebangel chouaika el blekeradel e bo dolatk aika el tekingel a Jesus. Ngdilu el kmo: “Ngikel mtekengelii a rengul el mor a ulebongel, a mo suobel.” (Mt. 24:13) Engdi ke mo mekerang omrenges chisel a chad er a ongdibel el kmo ngmla rullii a oberaod el klengit? A uriul er a omsubedeterir a remechuodel, e kau ke mo oba kllourreng e oumerang el kmo te mo sumecheklii el ngar er a rolel a Jehovah? A remechuodel, te mekerang sel lerebet a chad er a oberaod el klengit?

13. Ngera soal a Jehovah a loruul a remechuodel sel lerebet a chad er a oberaod el klengit?

¹³ A remechuodel sel bo lodengei el kmo a chad er a ongdibel a mla ruebet er a oberaod el klengit e te meluluuch lolengit er a “llomeserreng el ngar bab el mei” me bo lodengelii a uldesuel a Jehovah el kirel. (Jak. 3:17) A moktek er tir a lsekum e ngsebechel, a mo ngosuir ngike el rirebet er a klengit el mo ‘obult . . . er a klengit el le ngar ngii.’ (Jak. 5:19, 20) Te dirrek el sorir el omekerreu er a ongdibel e mengelaod er tirke el miltemall a rengrir er tia el tekoi. (2 Ko. 1:3, 4, BT) A remechuodel sel losmechokl er a oberaod el klengit e ngkirir el mo medengei a rokui el tekoi el dilubech, e tia ousbech a taem. E a uriul e te meluluuch el kirel e msa omellach er a Biblia ngike el rirebet er a klengit e sumecheklii er sel ‘blals el leredemelel.’ (Jer. 30:11, NW) Me alta te diak lomekmeoud er tia el omesmechokl me nguaisei engdi ngdiak el kirir el di mereched el sumecheklii. A remechuodel sel loltirakl a ulekrael er a Jehovah e a ongdibel a mo mesa el kmo ngmle ungil el kirir a rokui el chad. Me nguaisei engdi te ngar ngii a miltemall a rengrir er a klengit el lerirellii ngike el mlora klengit. A lsekum e kau a ta er tir, e ngngera sebechem el meruul er ngii el mo mechelaod a rengum?

14. Ngera el kerebai er a Biblia sebechel ngosukau loutekangel a lsekum a ta er a kldemem er a klaumerang a kmal tomellii a rengum?

¹⁴ Ngngar ngii a chad el mla tomellii a rengum, e locha ta er a kldemem er a klaumerang? Ngsebechem el metik a ungil kerebai er a tekingel a Dios el losisecheklid el mo mengiil er a Jehovah el mo sumechokl a tekoi. El ua tiang, alta rubekul a Josef a riruul a  chelebirukel el tekoi el mo er ngii me nguaisei engdi ngdimlak el bechei a kngterir me rellii el mo mengemekl a kngtil a rengul. Ngbai millemolem el ulturk osengel er a omesiungel el mora Jehovah, el ngii a ulemekngeltengat er a kllourreng er ngii el mengiil. (Gen. 39:21) Cherengel a taem e a Josef a mlo sebechel lousubes er tirke el riruul a mekngit el mo er ngii e mo omes er a rolel a Jehovah ulemekngeltengat er ngii. (Gen. 45:5) Ngdi ua Josef, ngmechelaod a rengud sel dolekeed er kid er a Jehovah e dongiil er ngii el mo sumechokl a tekoi.​—Psa. 7:17; 73:28.

15. Ngera ngilsuir a ta el odos el outekangel er a chelebirukel el omeruul e melemolem el budech a uldesuel?

¹⁵ Me nguaisei el alta ngdiak bo dechebangel a chelebirukel lomeruul el uaike el mlora Josef, engdi ngkmal mo mekngit a rengud sel leduubech el mei er kid. Ngmo uchul a klungioled a doltaut omellach er a Biblia sel bo er ngii a mondai er kid me a chad el mo lmuut me a lsekum ngika el chad a diak losiou er a Jehovah. (Fil. 2:3, 4) Ka molatk er a ta el experience. A odos a kmal mlo mekngit a rengul er a bo lodengei el kmo a ta er a chad er a urerel a melekoi a diak lungil tekoi el kirel el mora rebebil er a rechad er a ureor. Ngika el odos a dimlak lemereched el mo meruul a tekoi e ngbai milengoit a taem el melatk er a kerebil a Jesus. A Jesus er a lemotuub e ngdimlak lolaitechei el oltuub. (1 Pe. 2:21, 23) Me a odos a ngileltii el diak lokerang e di milecherei tia el tekoi. A uriul e ngmlo medengei el kmo ngika el chad er a urerel a ngar ngii a secherel me ngkmal mle stress. Me ngika el odos a rirellii er a uldesuel el kmo ngika el chad er a urerel a dimlak lemera el omdasu el uaisei el kirel. A odos a kmal dmeu a rengul e le ngkilengei el mengiil e outekangel, me ngmle budech a uldesuel.

16. Ngera sebechel melisiich er kau a lsekum ke chelebangel a diak el melemalt el omeruul? (1 Petrus 3:12)

¹⁶ A lsekum kau a chuarm er a chelebirukel el omeruul me a lechub e ngkuk ta er a tekoi e lak mobes el kmo a Jehovah kmeed er tirke el “chelam a rengrir.” (Psa. 34:18) Ngkmal betik a rengul er kau el oba kllourreng e dirrek el omsa berredem er ngii. (Psa. 55:22) Ngika Chad er a Kerrekeriil er a beluulechad el rokir. Ngdiak a ngera el mochib er a osengel. (Monguiu er a 1 Petrus 3:12.) Me sel bom chebangel a ringel el diak a klisichem er ngii, e kau, ke mo kongei el mengiil er a Jehovah?

17. Ngera ngolterekokl er a rengud er ngii a Jehovah, el ua losaod a Isaia 30:18, NW?

¹⁷ Ngkmal di kmedung e a Demad el ngar er a eanged a mo omekngeltengat er kid loeak a Renged. A Isaia 30:18, NW a kmo: “A Jehovah oba kllourreng el mengiil el mo meruul a ungil kirem e mo ochotii er kau a klechubechub. E le Jehovah a Dios er a llemalt. Ngdmeu a rengrir tirke el rokui el kongei el mengiil er ngii.” Tirke el kongei el mengiil er a Jehovah a ngmai a betok el klengeltengat er chelechang me a dirrek el ngar er a chelsel a beches el blekeradel.

18. Ngera el ungil el tekoi a di kmedung e kede mo ngmai?

¹⁸ A rechedal a Dios sel lesiseb er a beches el blekeradel e ngkmal diak el lluut el mo chobangel a ringel me a omelsemai el loutekangel er chelecha el taem. Ngmo diak a chelebirukel el omeruul e mo diak a ringel. (Och. 21:4) Ngdiak bo el sebek a rengud el kmo kede mo ngmai aike el dousbech me a lechub e ngdiak, le ngkmal mo betok el kirir a rokui el chad. (Psa. 72:16; Isa. 54:13) Ngkol uangerang el klengeltengat!

19. A Jehovah ngmekekokil el mengetmokl er kid er chelechang el kirel a ngerang?

¹⁹ A Jehovah mengetmokl er kid el mo kiei er cheungel a omengederederel loeak sel lolengeseu er kid el mo mesisiich a mekngit el omerelled e domekeroul a blekeradel el odeuir a rengul. Me lak bo lemechitechut a rengum e bo lak mosiou er a Jehovah. A lmuut el ungil klengar a merael el mei! Me chelecha el domes el beduluchei el mo er tiakid el taem, e dolemolem el oba kllourreng el kongei el mengiil er a Jehovah el churrengelii a urerel!