Kede silubii er tia el suobel el kmo ngngar ngii a chimo el tekoi el lechebangel er ngii a rokui el chad me a rechanghel: cheledolel a ngklel a Jehovah. A mondai el kirel a rolel a Jehovah longedereder a uldimukl er a omengedolel a ngklel a Jehovah. Me a blakerreng er a chad el mora Dios me ngdirrek el uldimukl er tiang.

Ngera uchul me kede mocha omeketakl er ngii el kmo sel kot el klou a ultutelel el tekoi el dechelebangel er ngii a ngklel a Jehovah me a omengedolel? Ka me dorriter a edei el luchul.

A kot, e a Satan a millemall er a ngklel me a lechub e ngchisel a Jehovah er a sers er a Eden. A ker el Satan ulleker er ngii er a Eva a ua lullekoi el kmo a Jehovah diak el bekokuii e diak el tabesul a tekoi el longerechir er tirke el ngar cheungel. Me a Satan ulemult a tekingel a Jehovah e ua lolekoi el kmo a Dios a bulak. Me ngika ultubii a ngklel a Jehovah. Me a ngklel a mlo “Diabelong” el belkul a kmo “ngike el oltuub.” (Jn. 8:44) Eva luluumerang a blulekngel a Satan a uchul me ngmlo diak lolengesenges er a Dios e mlo omtok er a omengederederel. (Gen. 3:1-6) A Satan a melemolem loltuub er a ngklel a Jehovah e omerk a blulak el kirel. Tirke el oumerang a tekingel a blechoel el mo diak lolengesenges er a Jehovah. Me ngngar osengir a rechedal a Dios e a otuub el mora chedaol el ngklel a Jehovah a sel kot el diak el melemalt el tekoi. Otubel a ngklel a Dios a uchul a ringel me a mekngit el blekeradel er a beluulechad.

Ongerung, a Jehovah mo sobecheklii a ngklel e kikidii, el mo uchul a klungiaol el mora rokui el bleob. Seikid a kot el klou a ultutelel er a Jehovah. Tia uchul me ngmelekoi el kmo: ‘Ak mo ochotii a cheledolel a chetengakl el ngklek.’ (Ese. 36:23) A Jesus ulemeketakl er ngii el kmo tia kirel mo kot el klou a ultutelel tekoi er a nglunguchir a rokui el blak a rengrir el mesiungel a Jehovah er a ledu el kmo: “Le mechedaol a ngklem.” (Mt. 6:9, BT) A Biblia blechoel el melisiich er a klungel a ultutelel a dongebkall er a ngklel a Jehovah. Molatk a bebil lochotel: “Modengesii a kebkall el ngklel.” (1 Kr. 16:29; Psa. 96:8) “Mongitakl el mengebkall er a ngklel.” (Psa. 66:2) “Ak mo mengebkall er a ngklem el mo cherechar.” (Psa. 86:12) A ta er aike el taem el Jehovah mlara eanged e mengedecheduch a dilubech er a templo er a Jerusalem er a ledu Jesus el kmo: “Chedam, mkebkellii a ngklem!” Me a Jehovah ulenger er ngii el kmo: “Ak mla kobkellii e lmuut el mo kobkellii.”​—Jn. 12:28. a

Ongedei, a moktek er a Jehovah a di blechoel el ulekuak er a ngklel, me a lechub e ngchisel. Molatk er tiang: Uriul er a ulebongel el omelsemai el mo er ngii er a ulebengelel a Ta el Telael el Rak er Omerreder er a Kristus, e ngngera mo duubech? Ngmo uangerang a uldesuir a rechanghel me a rechad el kirel a ngklel a Jehovah er tiakid el taem? Dolatk a eru el tekoi el ngii a ngosukid el longer er tiang, el blakerreng er a rechad me a uldekial a omerreder er a eanged me a chutem. A rechad  el mla ochotii a blakerreng te mo melemolem el chelebangel omelsemai er a blakerreng er tir? Ngdiak. Te mo cherrungel e mla mo mesisiich er a bek el omelsemai. E mla nguu a diak a ulebengelel el klengar. Me a uldekial omerreder er a eanged me a chutem ngdirk kirel soadel er a delongelir a rechanghel me a rechad? Ngdiak, ngmla mo diak domeketakl el kmo a rolel a longedereder a Jehovah kot lungil. Ngar tiakid el taem e a rokui el ngar er a eanged me a chutem a mla mo tang e kongei er a omengederederel a Jehovah. Engdi ngmekerang a ngklel a Jehovah?

Ngar tiaikid el taem, e a ngklel a Jehovah mla mechedaol, e mla mo diak otuub el mo er ngii. Me nguaisei, a ngklel a Jehovah mo melemolem el kot el klou a ultutelel el mora remesiungel er a eanged me a chutem. E ngerang? E le te mo melemolem lomes er a Jehovah el meruul a meklou el tekoi. Molatk er tiang: A Jesus el mo olluut er a omerreder el mora Jehovah a uchul me a Jehovah mo “rokui el tekoi er a chelsir a re chad.” (1 Ko. 15:28) Uriul er tiang e a rokui el chad er tia el chutem a mo oldeu a rengrir er a “ilmokl ra klebkall rar ngelekel a Dios.” (Rom 8:21, BT) E a Jehovah mo churrengelii a moktek er ngii el rokui el chedal a telungalek er ngii a mo tang, el rengar er a eanged me a rengar tia el chutem.​—Efe. 1:10.

Ngmo uangerang a uldesuir a rokui el ngar er a eanged me a chutem sel lemeketmokl aika el tekoi? Ngdirk mo ngar ngii a mesisiich el urungulir el oldanges er a ngklel a Jehovah. A David el ta er a milluches er a Psalm a mlukreng el mo meluches el kmo: “Modengesii a RUBAK . . . Modengesii a kebkall el ngklel el mo cherechar.” (Psa. 72:18, 19) Ngmo betok a ungil e beches luchul me kede meruul er tiang el diak a ulebengelel.

A ngklel a Jehovah a omtechei er ngii me a rokui el tekoi el kirel. Engdi sel dolatk er a ngklel e kede mo melatk er a bltikerreng er ngii. (1 Jn. 4:8) Ngkmal diak dobes el kmo a Jehovah ulemeob er kid loba bltikerreng, e milskid a olubet el tenget el bltikerreng a uchul, e mla ochotii el kmo a melemalt el omengederederel a mengai a uchetemel er a bltikerreng. Engdi kede mo melemolem lomes a rolel e ngolecholt er a bltikerreng er ngii el mora reblebelel. Nglmuut el soad el mo kmeed er ngii el Demad e mengitakl odengesel a kebkall el ngklel el mo cherechar.​—Psa. 73:28.