1-2. Ngera el omelatk a lobang a remesiungel a Jehovah?

A OMELATK a kmal klou a ultutelel. Ngomeltkir a rebebil el kmo bo lungil a chebechiielir, rengelekir bo el mesisiich a bedengir, me a lechub e bo lungil er a oberaod el rakt. Kid el Kristiano me kede locha olab osisiu el omelatk. Engdi sel omelatk el kot el mekreos er a rengud, a diak a ulebengelel el klengar el kired me a rebetik er a rengud el mla mad.

² A apostol Paulus a dilu el kmo: “E dirrek loba chomelatk el mora Dios . . . el kmo ngmorngii chokiis rar melemalt mar diak le melemalt.” (Rel. 24:15, BT) Engdi ngdiak di el Paulus a milsaod el kirel a okiis. A Job a dirrek el mirruul uaisei. Ngmle ulterekokl a rengul el kmo a Dios a diak bo lobes er ngii e mo okisii er a kodall.​—Job 14:7-10, 12-15.

3. Ngera uchul me ngsebeched el ngmai a klungioled er a 15 el bliongel er a 1 Korinth?

³ A “okiis er a kodall” a uldimukl er a “omekedecheraol” me a lechub e ng “osisechakl” el loumerang a Rekristiano. (Heb. 6:1, 2) A omesodel a Paulus el kirel a okiis a debetik er ngii er a 15 el bliongel er a 1 Korinth. A tekoi lulluches a ulterekokl el kmal millisiich er a Rekristiano er a irechar. Tia el bliongel a dirrek el sebechel melisiich er kid e smisichii a omeltked el kirel a okiis.

4. Ngera uchul me ngar ngii a omeltked el kmo a rebetik er a rengud a mo mekiis?

⁴ A okisel a Jesus Kristus a uchul me ngar ngii a omeltked er a okiis el kirir a rebetik er a rengud el mla mad. Nguldimukl er “a Ebangkelio” el luluuchais er ngii a Paulus el mora rechad er a Korinth. (1 Ko. 15:1, 2) Ngmillekoi el kmo a lsekum a Kristiano  a diak loumerang er a okiis, e a klaumerang er ngii a diak a belkul. (1 Ko. 15:17) A klaumerang er kid er a okisel a Jesus a uchul me ngar ngii a omeltked er a okiis.

5-6. A tekoi el ngar er a 1 Korinth 15:3, 4, ngngera belkul kired?

⁵ A Paulus er a lomuchel el mesaod el kirel a okiis, e nguluuchais a edei el klemerang. Aikang a ngar ngii a (1) A “Kristus a mlad el kirel a kngtid.” (2) Ng “meldakl.” (3) “A ongedei er a sils e a Dios a ulekisii er a kodall el ua ikel ngar a Chedaol Llechukl.”​—Monguiu er a 1 Korinth 15:3, 4.

⁶ A kodellel, deklel, me a okisel a Jesus ngngera belkul kired? A profet Isaia ulemlaoch el kmo ng “mor a kodall” e te mo ‘loia er a debull el teloi er a re ngar ngii a telemellir.’ Engdi ngar ngii a lmuut el ta er a tekoi el mo duubech. A Isaia a dilechelir el kmo a Mesias a mo oltour “a kngterir a rebetok el chad.” A Jesus a mirruul uaisei er a leketmeklii a olubet. (Isa. 53:8, 9, 12, NW; Mt. 20:28; Rom 5:8) Me a kodellel, deklel, me a okisel a Jesus a meskid a uchetemel a omelatk el dobang el mo mengubet er a klengit me a kodall e mo meseterir a rebetik er a rengud el mla mad.

7-8. Ngera ngosuterir a Rekristiano el mo ulterekokl a rengrir el kmo a Jesus a ngiluu okiis?

⁷ A omeltked er a okiis a mengai er a okisel a Jesus me a uchul e ngkirel el mo ulterekokl a rengud el kmo a Jesus a ngiluu a okiis. Ngera me ngsebechel mo ulterekokl a rengud el kmo a Jehovah ulekisii er a kodall?

⁸ Te betok el chad a milsa Jesus er a uriul er a okisel e uluuchais el kirel. (1 Ko. 15:5-7) Ngike el kot el chad el Paulus a ouchais el kmo ngmilsang, a apostol Petrus (Sefas). Te mla er ngii a redisaiplo el dirrek el kilengei el kmo a Petrus a milsa Jesus er a uriul er a okisel. (Lk. 24:33, 34) A “re truich ma terung” el apostol me te dirrek el milsang. E a uriul e a Kristus a “di mle ta e mo duum er a re betok er a 500 er a rubengkel,” el locha ngar sel kldibel el mlara Galilea el losaod er ngii a Mateus 28:16-20. A Jesus a dirrek el “mlo duum er a Jakobus,” el ochellel el ngii a dimlak loumerang el kmo a Jesus a Mesias. (Jn. 7:5) Engdi uriul er a lesang e ngmlo oumerang. Me a lmuut kung, a Paulus er a llechesii tia el babier er a bekord el 55 C.E. e te betok er tirke el milsa okisel a Jesus a dirk mle chad me a ngii di el chad loumededenger a sebechel mengedecheduch er tir el kirel.

9. Ngera lmuut el bebil er a ocholt luluuchais a Paulus el kirel a okisel a Jesus el ua lolekoi a Rellir 9:3-5?

⁹ A uriul e a Jesus a mlo duum er a Paulus. (1 Ko. 15:8) A Paulus (Saulus) er a lengar omerollel el mora Damaskus e ngrirengesii a ngerel e milsa er a ues a mla mekiis el Jesus el ngar er a eanged. (Monguiu er a Rellir 9:3-5.) A experience er ngii a lmuut el ochotii el kmo a okisel a Jesus a diak di ledelbochel.​—Rel. 26:12-15.

10. A klaumerang er a Paulus el kmo a Jesus a milekiis er a kodall nguldbechii el mo mekerang?

¹⁰ A tekingel a Paulus a kmal mo utebengall el mora rebebil e le ngii el mle mesisiich el oldechelakl er a Rekristiano er a ta el taem. Sera bo lulterekokl a rengul el kmo a Jesus a milekiis er a kodall, e ngmle meringel loureor el olterekokl a rengrir a rechad el kirel. Ngika mlechelebed, mlekelebus, e mlara diall e ngobeu er a daob el kirel a berkel a klemerang el kmo a Jesus a mlad engdi ngmla mekiis. (1 Ko. 15:9-11; 2 Ko. 11:23-27) A Paulus a kmal mle ulterekokl a rengul el kmo a Jesus a milekiis er a kodall me ngkilengei el mo mad el mesebechakl er tia el klaumerang er ngii. Me aika el tekingir tirka el Kristiano er a irechar, ngdiak loterekeklii a rengum el kmo a Jesus a milekiis  er a kodall? Ngdiak lesisichii a klaumerang er kau el kirel a okiis?

11. Nglocha ngera uchul me a rebebil el ngar er a Korinth a mle cheleuid a uldesuir el kirel a okiis?

¹¹ A rebebil el ngar er a mats er a Gris er a Korinth a mle cheleuid a uldesuir el kirel a okiis, e mlo melekoi el kmo “ng diak a okiis er a kodall.” E ngera uchul? (1 Ko. 15:12) A remesuub a uldasu el ngar sel ta er a mats er a Gris er a Athens a millenguul er a uldasu el kmo a Jesus a milekiis er a kodall. Me tia locha mla er ngii a lerellii er a rebebil el ngar er a Korinth. (Rel. 17:18, 31, 32) A rekuk bebil a locha ulemdasu el kmo a okiis a di belkul a tekoi, el chad a “ulekoad” e le ngar er a klengit engdi ngme “ngar” el Kristiano. Me alta ngkakerous a uldasu engdi klaumerang er tir a dimlak a belkul e le tir el dimlak loumerang er a okiis. E le a lsekum a Dios a dimlak lokisii a Jesus, e ngdiak a olubet me a rokui el chad a dirk ngar er a klengit. Me tirke el dimlak loumerang er a okiis a dimlak a belkul a omelatk el lobang.​—1 Ko. 15:13-19; Heb. 9:12, 14.

12. A doltirakl er a 1 Petrus 3:18, BT, 22, e ngoeak a ngera el rolel e a okisel a Jesus a ngodech er aike el okiis el uleakuchei er ngii?

¹² A Paulus a uleak a experience er ngii e ngmle medengei el kmo a “Kristus a mlokiis ra chelsir ar mla mad.” E tia el okiis a kuk mle ungil er aike el okiis el uleakuchei er ngii e le tirke el milekiis er a kodall a liluut el mad. A Paulus a dilu el kmo a Jesus a “mo ketengir tirikel mlad.” Ngoeak a ngera el rolel e a Jesus a kot? Ngmle kot el chad el mekiis el reng e kot el chad el mlora eanged.​—1 Ko. 15:20, BT; Rel. 26:23; monguiu er a 1 Petrus 3:18, BT, * 22.

13. A Paulus ngouchais er kid a ngera el klekakerous er a Adam me a Jesus?

¹³ Ngmekera kodellel a ta el chad e mo uchul a klengar el kirir a rebetok el miliol el chad? A Paulus a meketeklii a nger er tiang. Ngmesaod er a klekakerous er aike mlo er ngii lokiu a omerellel a Adam me aike el mo er ngii lokiu a tengetengel a Kristus. Ngmilluches el kirel a Adam el kmo: “A kodall a mlei el okiu a tal chad.” Me a Adam er a lerebet er a klengit, e ngmlo uchul a kodellel ngii me a ruldidellel a rsechel. Kede dirk chuarm e le ngii el dimlak loba blekongesenges. Tia kmal ngodech er aike el mo er ngii e le Dios el ulekisii a Ngelekel! “Me ng dirrek el ua isei a okiis er a kodall a mlei el okiu a tal chad” el Jesus. A Paulus a milsaod el kmo: “Ma rokuil chad a mukngar el ngara Kristus, el ua rokuil chad el mad el ngara Adam.”​—1 Ko. 15:21, 22, BT.

14. A Adam ngmo mekiis? Mosaod.

¹⁴ Ngera mle belkul a tekingel a Paulus er a lolekoi el kmo a “rokuil chad [a] mad el ngara Adam”? Ngmillatk el kirir a ruldidellel a rsechel a Adam el tir a uldiukes er a klengit e diak lemecherrungel me te mo mad. (Rom 5:12) A Adam a diak el ta er tirke el mo “mukngar.” A olubet el tengetengel a Jesus a diak loureor er a Adam e le ngii el mle cherrungel e mle medengelii er a rengul e melilt el mo diak lolengesenges er a Dios. A tekoi el dilubech el mora Adam a di uaike el mo duubech el mo er tirke el bo loukerrekeriil er tir a “Ngelekel a Chad” el kmo te “kaming,” el belkul a kmo te mora “diak a ulebengelel el tellemall.”​—Mt. 25:31-33, 46, NW; Heb. 5:9.

15. Te rua techa uldimukl er a “rokuil chad” el tir a mo “mukngar”?

¹⁵ Mutebengii el kmo a Paulus a dilu el kmo a “rokuil chad a mukngar el ngara Kristus.” (1 Ko. 15:22, BT) Tia el babilengel a Paulus a  mlora rengellitel el Kristiano er a Korinth, el tir a mo mekiis el mora eanged. Tirka el Kristiano a “tirikel mlokedong el mo chedaol, el mlechedaol el ngara Kristus Jesus.” Ngdirrek el millekoi el kirir “tirikel mlad el ngara Kristus.” (1 Ko. 1:2, BT; 15:18, BT; 2 Ko. 5:17) Ngar er a kuk ta er a babilengel e a Paulus a milluches el kmo, tirke el “mlo obengkel [a Jesus] el mor a kodall el ua kodellel” a mo “obengkel el mo mekiis er a kodall el ua okisel.” (Rom 6:3-5) A Jesus a milekiis el reng e mora eanged. Me ngmo uaisei el kirir tirke el “ngara Kristus,” el tirke el rokui el ngellitel el Kristiano.

16. Ngera mle belkul a tekingel a Paulus er a lomekedong er a Jesus el “ketengir”?

¹⁶ A Paulus a milluches el kmo a Kristus a milekiis el “mo ketengir tirikel mlad.” Lak mobes el kmo te mla er ngii a rebebil el ua Lasarus el milekiis er a kodall, engdi Jesus a kot el chad el milekiis el reng e mo nguu a diak a ulebengelel el klengar. Ngsebeched el lomekesiu er a Jesus el mora ike el kot el rdechel a dellemelir a rechad er a Israel el luleldars el mora Dios. Me a lmuut kung, a Paulus er a lomekedong er a Jesus el “ketengir” e ngbelkul a kmo te ngar ngii a mo oeak uriul er ngii el mo mekiis el mora eanged. A rechapostol me a rebebil el “ngara Kristus” a mo oeak uriul er a Jesus. Ngar sel telutk el taem, e te mo nguu a okiis el lengiluu a Jesus.

17. Ngoingera el taem e tirke el “ngara Kristus” a mo nguu a omeksulir er a eanged?

¹⁷ Sel taem er a loluches a Paulus er a babilengel el mora rechad er a Korinth e ngdirkak lomuchel a okiis el mora eanged el kirir tirke el “ngara Kristus.” A Paulus a bai millutk el kirel a ngar medad el taem: “Te di tir el kerous loltirakl a blechebechir: el omuchel a kot el rodech el Kristus, e sola e te mochu tirikel klekedall ra Kristus er sel lluut el mei [“demiel,” NW].” (1 Ko. 15:23, BT; 1 Th. 4:15, 16) Chelechang e kede kiei er a chelsel a taem er a “demiel” a Kristus. Me nguaisei, a rechapostol me a rengellitel el Kristiano el mlad a mle kirir el mengiil er tia el taem el mo nguu a omeksulir el ngar er a eanged e bo el “obengkel [a Jesus] el mo mekiis er a kodall el ua okisel.”

18. (a) Ngera me ngsebeched el melekoi el kmo ngmo er ngii a ta er a okiis el oeak uriul er sel okiis el mora eanged? (b) El ua lolekoi a 1 Korinth 15:24-26, ngera el tekoi a mo duubech er a eanged?

¹⁸ E ngera mo duubech el mo er tirke el rokui el blak a rengrir el Kristiano el diak loba omelatk el mora eanged lobengkel a Kristus?  Tir me te oba omelatk el kirel a okiis. A Biblia melekoi el kmo a Paulus me tirke el mora eanged a teloi er “sel oeakuchei el okiis er a chelsir a remla mad.” (Fil. 3:11, NW) Tia ngdiak lochotii el kmo ngmo er ngii a oeak uriul el okiis? Tia oltirakl er a tekingel a Job el kirel a ngar medal el taem. (Job 14:15) “Tirikel klekedall ra Kristus er sel lluut el mei” a mo obengkel ngar er a eanged sel bo lolekngemed a rokui el kabelment, dereder, me a klisiich. A “cherarou el kmal mo uriul el . . . kodall” a dirrek el bo lokngemedii. Tirke el rokui el mora eanged a diak el lluut el mad. Engdi ngera mo duubech el mo er tirke el bebil?​—Monguiu er a 1 Korinth 15:24-26.

19. Ngera te omes el beduluchei el kirel tirke el loba omelatk el mo kiei er tia el chutem?

¹⁹ Ngera te omes el beduluchei el kirel tirke el loba omelatk el mo kiei er tia el chutem? Ngsebechir lotuil a omeltkir er a tekingel a Paulus el kmo: “E dirrek loba chomelatk . . . el kmo ngmorngii chokiis rar melemalt mar diak le melemalt.” (Rel. 24:15, BT) A diak lemelemalt el chad a diak el sebechel mora eanged, me tia el tekoi a ochotii el kmo ngmo er ngii a okiis el mo kiei er tia el chutem.

20. Ngmekera omelatk el mobang e mla lmuut el mo mesisiich?

²⁰ Ngulterekokl el kmo, “ngmorngii chokiis”! Tirke el mo mekiis er a kodall a mo er ngii a omeltkir el kiei er tia el chutem el mo cherechar. Ngsebechem lotuil a klaumerang er kau er tia el telbiil. Tia el omelatk a sebechel mengelaod er kau sel molatk el kirir a rebetik er a rengum el mla mad. Ngsebechir el mo mekiis er a kodall er sel taem el Kristus me a rebebil a mo “mengedereder . . . el 1,000 el rak.” (Och. 20:6) Ngdirrek el sebechel mo ulterekokl a rengum el kmo omko me ke mad er a uchei er a lomuchel a Ta el Telael Rak, e ngar ngii a omeltkem el mo mekiis. “A omelatk a diak el rellid el mo metirm a rengud.” (Rom 5:5) Ngsebechel melisiich er kau e rullau el lmuut el mo dmeu a rengum el mesiou er a Dios. Engdi ngua bo losaod a ongingil suobel ngar ngii a lmuut el betok el sebeched el suub er a 15 el bliongel er a 1 Korinth.