NGMO uangera uldesuem sel mnguu a tengami er a sechelim el melisiich er kau? A disaiplo el Timothy a ngiluu a chouaitia el babier er a apostol Paulus, el ngii el babier a dodengelii er chelechang el babier er a 2 Timothy. A Timothy a locha kmal mle soal sikii a basio el diak a cherrodech er ngii e menguiu a tekingel ngika el betik er a rengul sechelil. Nglocha millatk el kmo: ‘Ngua ngera Paulus? Ngar ngii a ulekrael er ngii el sebechel ngosukak er a ngerechelek? Ngsebechel a ulekrael er ngii el ngosukak el lmuut el mo ungil omerk e olisechakl e olengeseu er a rebebil?’ Kede mo mesa el kmo a Timothy a miltik a nger er aika el ker me a lmuut el bebil el ngar tia el mekreos el babier. Engdi chelechang e me bo dosaod a bebil tekoi el ngar tia el babier el sebechel ngosukid.

A Timothy er a lomuchel el menguiu er tia el babier e ngmle sebechel mereched el mo melechesuar er a kmes el deleongel er ngii el obengkel a Paulus. A Paulus a ulemekedong er ngii el “betik er a renguk el ngelekek.” (2 Ti. 1:2) A Timothy a ngiluu tia el babier er a bekord el 65 C.E. Nglocha mle 30 me a derengel a rekil e mla mesiou el ta er a remechuodel el betok el rak. E uluureor lobengkel a Paulus el betok er a 10 el rak e mla suub a betok.

Nglocha kmal millisiich er ngii er a bo lodengei el kmo a Paulus a blak a rengul el outekangel a ringel el lechilebangel. A Paulus a mle kelebus er a Rom e di kmedu el mo okodall. (2 Ti. 1:15, 16; 4:6-8) A Timothy a mle sebechel mesa blekengel a Paulus e le Paulus a dilu el kmo: “Meduch a renguk el outekangel a rokui el tekoi.” (2 Ti. 2:8-13) Ngsebeched el mo ua Timothy el ngilai a omelisiich er a ungil kerebai er a Paulus el uluutekangel.

A Paulus a milengelechel er a Timothy el mo omes er a ngerechelel er a omesiou el mora Dios el kmal mekreos. Ngmle soal a ‘lolsiu er a sengk er a Dios el ua ngau’ el lengiluu. (2 Ti. 1:6, NW) A Paulus a uluusbech er a tekoi er a Grik el khaʹri·sma el kirel a tekoi el “sengk.” Tia el tekoi a melutk er a sengk el diak derredemelel a nguu me a ka el sebeched el korekerengii. A Timothy a ngiluu tia el sengk er sel taem er a lemengilt el mo mesiou er a ongdibel er a ileakl el rolel.​—1 Ti. 4:14.

Ngera ngmillisiich er ngii a Paulus er a Timothy? Sera longuiu aike el tekoi el “molsiu . . .  el ua ngau” e nglocha mlo melatk a ngau er a blai el lebebil er a taem e ngmo bas. Ngmle kired el olsiu me lluut el kmard a ngau e longeald er a blai. A ta el dictionary a melekoi el kmo a tekoi er a Grik (a·na·zo·py·reʹo) el luluusbech er ngii a Paulus a belkul a kmo “olsiu, omekngar, meruoru er ngii me lekard” el omekesiu er a bo “desemeriar el kirel a beches el ureor.” Me a Paulus a ua lullekoi er a Timothy el kmo: ‘Moruul er a ngerechelem loba rengum el rokir!’ Me chelecha el taem e ngkired el meruul er a osisiu el tekoi el mo oba blakerreng el meruul er a omesiunged.

A Timothy er a lolemolem el menguiu er tia el babier el mla er ngika el betik er a rengul el sechelil, e ngmlo mtebengii a kuk ta er a tekoi el mo ngosuir el ungil meruul er a ureor er a berkel a klumech. A Paulus a milluches el kmo: “E moeak a Chedaol Reng el kiei ra chelsed el blak a rengum el mengkar er sel mekreos el tekoi el mloterekokl er kau.” (2 Ti. 1:14, BT) Ngera tia el mekreos el tekoi? Ngera mloterekokl er a Timothy? Ngar sel oeakuchei el bades, e a Paulus a millekoi el kirel a ‘melemalt el osisechakl’ el ngii a klemerang el debetik er a Bades. (2 Ti. 1:13) A Timothy a mle Kristiano a uchul me ngmle kirel lomerk er a klemerang er a chelsel me a ikrel a ongdibel. (2 Ti. 4:1-5) Ngdirrek el miltutk el mo ta er a remechuodel el omekerreu er a delebechel er a Dios. (1 Pe. 5:2) Me ngmle sebechel mengkar er a mekreos el tekoi el mloterekokl er ngii, el klemerang el kirel lolisechakl er ngii, loeak sel lultuil er a chedaol reng er a Jehovah me a Tekingel.​—2 Ti. 3:14-17.

Chelecha el taem e kede dirrek el mla moterekokl er a klemerang el dolisechakl er ngii el mora rechad. (Mt. 28:19, 20) Ngsebeched el melemolem el oba omereng el saul el kirel tia el mekreos el tekoi loeak sel deblechoel meluluuch e derellii el mo blekerdeled el blechoel el mesuub er a Tekingel a Dios. (Rom 12:11, 12; 1 Ti. 4:13, 15, 16) Nglocha dirrek el ngar ngii a ta er a ngerecheled el mesiou el ta er a remechuodel me a lechub e kede ngar er a mui el taem el omesiou. Aika el mekreos el ngerachel el mloterekokl er kid a kirel rullid el mo ngariou a rengud, e ngosukid el mo melechesuar el kmo ngkired lultuil er a Dios. Me ngsebeched el mengkar a mekreos el tekoi el mloterekokl er kid loeak sel dongreos e dultuil er a ngelsuil a Jehovah el mo kutmokl.

A ngerachel el lengilai a Timothy a dimlak di lebo er ngii. Ngdirrek el mle kirel el osisecheklterir a rebebil. Sei a uchul me a Paulus a milengelechel er ngii el kmo: “Ikel osisechakl el mrirenges er ngak . . . , mngai el oterekokl er tirkel blak a rengrir el chad el dirrek el sebechir el mo olisechakl er a re bebil.” (2 Ti. 2:2) Nguaisei, a Timothy a mle kirel ngmai a klubelel er a rudam e dirrek losisecheklterir er aike el lodengei. Ngklou a ultutelel el rokui el overseer er chelecha el taem a bo lolasem el meruul er a osisiu el tekoi. A ungil overseer a diak lemechechei e lomart a tekoi lodengei el kirel a ngerachel. Ngbai osisecheklterir a rebebil me bo el sebechir el kutmeklii a ureor. Ngdiak lechetil a bo lekuk ungil er ngii e le tir el mo klou a klemedengei me a lechub ngduch er tir er ngii. Me ngdiak di losisecheklterir a rolel a lemeketmokl a ureor. Ngsoal ngosuterir el mo ungil melilt e omtab a tekoi, el belkul a kmo te mukeroul er a tekoi er a klereng. Seikid e “tirkel blak a rengrir el chad” el bla losisecheklterir a mo uchul a klou el klungiaol el mora ongdibel.

Me ngulterekokl a Timothy el milengreos er tia el tengami el mla er a Paulus el millisiich er ngii. Ngsebeched el melatk er ngii el blechoel el menguiu a ulekrael er a chelsel e lolebedebek er a rolel e ngsebechel mo ungil oltaut er ngii sel loruul a ngerechelel.

Ngdirrek el soad el oltaut er tia el ulekrael. Ngoeak a ngera el rolel? Ngsebeched el olsiu el ua ngau a sengk el dengiluu, e blak a rengud el mengkar a mekreos el tekoi el mloterekokl er kid, e oterekokl er a rebebil a duch me a klemedengei er kid. Seikid e ngmo sebeched el otutii a tekingel a Paulus el mora Timothy el mo ‘churrengelii chomesiunged.’​—2 Ti. 4:5, BT.