1-2. Ngoeak a ngera el rolel e a rechad a di uai ngike el kekerei el chad el losaod er ngii a parakurab 1?

 KA MKORA imagine er a ta el kekerei el chad el demal me a delal a kmal betok a ududir. A ta er a klebesei e te accident el mad. Ngkmal mekngit a rengul er a lerenges a chais. Engdi ngngar ngii a lmuut el ta er a kmal mekngit el chais. Ngika mlo medengei el kmo a rechad er a blil a uluusekool a udoud e kmal klou a belsir. Me ngdiak a udoud lengai ngbai mla ngmai a betok el blals me a rechad oltoir er ngii el mengerechir a blals. Engdi blals a kmal klou me ngdiak el sebechel kmekad.

² Kid a di uai ngika el kekerei el chad. A kot el demad me a delad er a Adam me a Eva mle mecherrungel e kiliei er a klebokel el baradis. (Gen. 1:27; 2:​7-9) Ngmla er ngii a techellir el mo oldeu a rengrir er a klengar el mo cherechar. Engdi blekeradel a di mle kiul mengodech. Te urridii a Baradis el delengcheklir me a techall el mo kiei el mo cherechar. Me ngngera te mlo oudiukes er ngii a rengelekir? A Biblia kmo: “A klengit a siliseb er a beluulchad el okiu a tal chad [el Adam], ma kodall a ulekiu a klengit el mei, ma kodall a ulemerk el mor a re chad el rokui, ele rokui a mlor a klengit.” (Rom 5:12) Me a klengit a dikesed er a Adam el luchul a kodall. Tia el klengit el duldiukes  er ngii a di ua klou el blals el diak el sebechel a ngii di el techa er kid el kokedir.—Psa. 49:8.

 3. Ngera uchul me a kngtid a sebeched el lomekesiu er a ‘blals’?

³ A Jesus ulemekesiu a klengit er a ‘blals.’ (Mt. 6:​12, BT; Lk. 11:​4, BT) Sel derellii a klengit e kede mo blsel a Jehovah. Ngkired el kokedir ngii el blals. Ngdi kodall a sebechel kokedir a belsed.—Rom 6:​7, 23.

 4. (a) Ngera mo duubech el mora rokui el ngar er a klengit a lsekum e ngdiak a ngosuterir? (Psalm 49:​7-9) (b) A tekoi el “klengit” ngmelutk er a ngerang? (Momes er a baks el “ Klengit.”)

⁴ Kid, ngsebeched el oluut aike el rokui el lurriid a Adam me a Eva? Ngkmal diak el sebeched el di kid e rullii tiang. (Monguiu er a Psalm 49:​7-9.) A lak a ngosukid e ngdiak omeltked er a klengar er a ngar medad me a lechub e ngokiis. A kodelled a kmal di mo osisiu ngii me a kodellel a charm.—Oli. 3:19; 2 Pe. 2:12.

 5. Ngmekera bltikerreng el Demad e mla ngosukid er a blals er a klengit el duldiukes er ngii? (Momes er a siasing.)

⁵ Ka molatk er ngike el chad el dulsaod er ngii er a uchelel. Ngmo uangerang a uldesuel okmo a merau el chad a offer el kokad a rokui el belsel? Ngulterekokl el kmal mo oba omereng el saul e kongei. Ngar er a osisiu el rolel e a bltikerreng el Demad el Jehovah a mla meskid a sengk el ngii a kokedir a blals er a klengit el duldiukes er ngii er a Adam. A Jesus a dilu el kmo: “Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.” (Jn. 3:16) Tia el osisiu el sengk a dirrek el meskid a techelled el mo er ngii a ungil deleuill er kid me a Jehovah.

 6. Ngera kede mo mesaod er tia el suobel, e ngerang?

⁶ Ngmekera sebeched el ngmai a klungioled er tia el mengasireng el sengk me lemusubes a kngtid me a lechub e ngmesuld a ‘blsed?’ Kede mo onger er tia el ker loeak a dosaod a bebil tekoi lousbech a Biblia me a belkul. Sel bo dolebedebek aike el bla leruul a Jehovah me lsebechel lousubes er kid e ngngosukid el lmuut el mekurulii a omereng el saul er kid el mo er ngii.

TURREKONG: JEHOVAH OMUDECH ER A DELONGELED KID ME NGII

 7. (a) Ngera ngdirrek el urridii a Adam me a Eva? (b) Kid el ruldidellel a rsechel a Adam me a Eva ngngera kede kmal ousbech er ngii? (Rom 5:​10, 11)

⁷ A Adam me a Eva a dimlak di loridii a techall el mo kiei el diak a ulebengelel, te dirrek  el urridii a mekreos el deleuill er tir me a Demerir el Jehovah. A uchei er a lebora klengit e te mle chedal a telungalek er a Dios. (Lk. 3:38) Engdi sera bo lak lolengesenges er a Jehovah e te mlodik er a telungalek er ngii, e tia uchei er a bo loungalek. (Gen. 3:​23, 24; 4:1) Ngdiak a di chimo er a rengelekir luldimukl er kid el sebechel mo part er a telungalek er a Jehovah. Me kede ousbech a ngeso me bo lsebechel mesumech a deleuill er kid me a Jehovah. (Monguiu er a Rom 5:​10, 11.) Ngkired el mo diak de cherrouel e mo sechelil. E mera el ileakl el tekoi e le Jehovah di mle ngii el kutmeklii a rolel e ngsebeched el mo sechelil. Ngmilekerang?

LEKILTMEKLII A JEHOVAH: TNGAKIRENG

 8. Ngera ngkiltmeklii a Jehovah?

⁸ A Jehovah rirellii a tngakireng me bo lsebechir a rechad el ngar er a klengit el mo er ngii a ungil deleuill er tir me ngii. Ngkiltmeklii a rolel e ngsebeched el lmuut el ngmai aike el lurriid a Adam er a lebeskid a osisiu el kerresel a tekoi el ririid. Aike el bades el tekoi er a Grik me ngdirrek el mesaod er a rolel e a Jehovah kiltmeklii a rael me a derta el chad a sebechel mo er ngii a ungil deleuill er ngii lobengkel.—Rom 3:25.

 9. Ngera ngkiltmeklii a Jehovah me bo lsebechel a rechad er a Israel el musubes a kngterir?

⁹ Jehovah kiltmeklii a rolel e a rechad er a Israel a sebechel musubes a kngterir e mo er ngii a ungil deleuill er tir lobengkel. Ngmle kirir a rechad er a Israel el ta er a ta el rak e te mengedaol er a ileakl el sils. Tiang a Sils er a Tngakireng. Tiakid el sils e a ngarbab el prist a mo melenget a charm el kirir a rechad. Me nguaisei engdi charm a diak el sebechel mera el smuld a kngterir a rechad el mo diak e le charm a ngariou er a rechad. Me nguaisei engdi a lsekum a rechad er a Israel a mera el obult e melenget aika el tenget el lulengerechir a Jehovah e ngmo kongei lousubes er tir. (Heb. 10:​1-4) Me a lmuut kung, aika el tenget lullenget er a Sils er a Tngakireng me aike el tenget er a klengit el ble leblechoel el melenget a lilechesii er a uldesuir a berredel a blekeradel el lengar ngii el kmo, te ngar er a klengit e ousbech er a permanent el tekoi el mo smuld a kngterir.

10. Ngera el permanent el tekoi a lekiltmeklii a Jehovah me lsebechel musubes a klengit?

¹⁰ Ngera el permanent el tekoi a lekiltmeklii a Jehovah me lsebechir a rechad el musubes er a kngterir? Ngkiltmeklii a betik er a rengul Ngelekel me bo le “tal le metenget el melubet a kngterir a re betok el chad.” (Heb. 9:28) A Jesus a “[uldersii] a klengar er ngii el melubet er a rebetok el chad.” (Mt. 20:​28, NW) Ngera olubet?

CHAR: OLUBET

11. (a) Ngera uchul me ngmle kirel mekekad a olubet? (b) Ngdi ngerang a sebechel kokedir olubet?

¹¹ A doltirakl er a Biblia, e a Jehovah tilbir el kmo ngkirel lobechar olubet me a kngtid lemusubes me bo lsebeched el mo sechelil. a Ngera mle cheral olubet, el kirel mekekad e ngmo sebeched el ngmai aike el lurriid a Adam? Lak dobes el kmo a Adam me a Eva urridii a cherrungel el klengar me a techall el mo kiei el mo cherechar. Me a olubet a kirel osisiu a kerresel er tia el ririid. (1 Ti. 2:6) Me ngdi sebechel mekekad loeak a klou el chad el sechal el (1) cherrungel; (2) sebechel kiei el mo cherechar er tia el chutem; e (3) kongei el tongetengii a klengar er ngii el kired. Tiakid a di ta el rolel e ngsebechel mekekad a ririid.

12. Ngera uchul me a Jesus a mle sebechel kokedir olubet?

 ¹² Molatk a edei luchul me a Jesus a mle sebechel kokedir a cheral a olubet. (1) Ngmle cherrungel e “dimlak a tal le bor a klengit.” (1 Pe. 2:22) (2) Tiakid a uchul me ngmle sebechel el kiei el mo cherechar er tia el chutem. (3) Ngkilengei el mo mad e tongetengii a klengar er ngii el kired. (Heb. 10:​9, 10) A Jesus a mle cherrungel el di uai ngike el kot el Adam er uchei er a lebora klengit. (1 Ko. 15:45) Me ngoeak a kodellel e ngmle sebechel kokedir sel char el mo mtechei a lurriid a Adam. (Rom 5:19) Me a Jesus a “ngikel mlo uriul el Adam.” Me ngdiak dousbech er a klengar er a ta er a lmuut el cherrungel el chad el me mengkad aike el lurriid a Adam. A Jesus a “uldersii a di tal tenget el mo cherechar.”—Heb. 7:27; 10:​12, BT.

13. Ngera uchul me ngsebechel mo er ngii a ungil deleuill er kid me a Jehovah?

¹³ Me ngngera rullii me ngsebechel mo er ngii a ungil deleuill er kid me a Jehovah? A Jehovah kiltmeklii a rolel e ngsebechel musubes a kngtid. E a Jesus a tilengetengii a cherrungel el klengar er ngii el cheral a kngtid.—Efe. 1:7; Heb. 9:14.

RSEL: MENGUBET ER A KLENGIT ME A KODALL E OBASECH EL MELEMALT

14. Ngera kede mo mesaod er chelechang, e ngerang?

¹⁴ Ngera el klungiaol a dengai er tia el tekoi el lekiltmeklii a Jehovah el kired? Kede mo mesaod a belkul a teblo el tekoi el lousbech a Biblia longer er tia el ker, el ngii a mo ngosukid el mo understand a klungiaol el dengai er a klausubes er a Jehovah.

15-16. (a) Ngar er a Biblia e ngngera belkul a de mengubet? (b) Tiang ngera ngrullii el mei er kid?

¹⁵ A Biblia kmo, a olubet el mla mekekad a uchul me kede mla mengubet er a klengit me a kodall. A apostol Petrus a mesaod er ngii el kmo: “Kemiu a medengei el kmo kom mlochar er a meringel char el millubet er kemiu er a ikel chelsengsang el blekerdelel a klechad el mle uldelid el mer kemiu, el mlochar er a diak di bo le ngemed el klalo el ua silber ma kolt; ko bai mlochar er a meringel char el rsechel a Kristus, el ua ngelekel a sib el diak a tal klsakl er ngii.”—1 Pe. 1:​18, 19.

¹⁶ Olubet el tenget a uchul me a klengit me a kodall a dikea longedereder er kid. (Rom 5:21) Me ngkmal ngar ngii a ungil luchul me kede oba omereng el saul el mora Jehovah me a Jesus el mla ngubetid loeak a mekreos el rsechel me a lechub e ngklengar er a Jesus.—1 Ko. 15:22.

17-18. (a) Ngera belkul a dobasech el melemalt? (b) Ngera el klungiaol a dengai le Jehovah omasech er kid el melemalt?

¹⁷ A Biblia kmo a remesiungel a Jehovah obasech el melemalt. Tia belkul a kmo a Jehovah mla mo diak longerechir er tir el mengkad a kngterir. Ngoeak tiang e a Jehovah diak lolemall a llechul el kirel a llemalt. Ngdiak lomasech er kid el melemalt lekid el rredemelel me a ka lekengei a klengit el deruul. Me nguaisei engdi ngkongei lousubes a kngtid e le kede ochotii a klaumerang er aike el bla leruul ngii me a Ngelekel el mo meskid olubet.—Rom 3:24; Gal. 2:16.

¹⁸ Tia ngngera belkul el kirel a derta er kid? Tirke el mla mengilt el mo mengedereder lobengkel a Jesus er a eanged a obasech el melemalt e mla mo ngelekel a Dios. (Tit. 3:7; 1 Jn. 3:1) Ngmla musubes a kngterir me ngua lemlak el rruul aika el kngterir me ngsebechir el qualify el mo chedal a Renged. (Rom 8:​1, 2, 30) Tirke el oba omelatk el di ngar tia el chutem a obasech el melemalt el sechelil a Dios me a kngterir me ngdirrek el mla  musubes. (Jak. 2:​21-23) A kloul seked el mo suobel er a Armakedon a ngar ngii omeltkir el di kiei el mo cherechar. (Jn. 11:26) E a “rar melemalt” me a re “diak le melemalt” el mechiuaiu er a kodall a mo mekiis. (Rel. 24:​15, BT; Jn. 5:​28, 29, BT) Omerollel a taem e a rokui el bekongesenges el mesiungel a Jehovah el ngar tia el chutem a mo “nguu a ilmokl ra klebkall rar ngelekel a Dios.” (Rom 8:​21, BT) Kede kmal semeriar el kirel tia el taem el sebeched el lmuut el mo cherrungel el ngelekel a Demad el Jehovah!

19. Ngmekera blekeradel er a klengar er kid e mla mengodech el mo ungil? (Momes er a baks el “ Klausubes er a Jehovah.”)

¹⁹ A blekeradel el demla er ngii a kmal di uai ngike el kekerei el chad el dulsaod er ngii er a uchelel el urriid a rokui el tekoi e mludiukes er a klou el blals el diak el sebechel el kokedir. Engdi kede kmal oba omereng el saul el kirel a Jehovah el mla ngosukid. Ngmla mengodech a blekeradel el dengar ngii e le Jehovah el kiltmeklii a rolel e ngmusubes a kngtid me a Jesus a mla kokedir a olubet. Klaumerang er kid er a Jesus Kristus a uchul me kede mla mengubet er a klengit me a kodall. Me a Jehovah sel lousubes a kngtid e ngua lemlak deruul ngii el klengit. Engdi sel kot el ngaruchei er ngii a chelechang e ngsebechel ngar ngii a ungil deleuill er kid me a Jehovah el bltikerreng el Demad el ngar er a eanged.

20. Ngera kede mo mesaod er a ongingil el suobel?

²⁰ Kede mo oba kmal klou el omereng el saul sel bo dolebedebek aike el bla leruul a Jehovah me a Jesus el kired. (2 Ko. 5:15) A lemlak lengesukid e ngkmal diak omelatk el kired! Me nguaisei engdi ngngera belkul a klausubes er a Jehovah el kirel a derta er kid? Tiakid a bo dosaod er ngii er a ongingil el suobel.